International (Page 172)

ലണ്ടൻ: ഉടമസ്ഥരിൽ നിന്നും വേർപ്പെട്ട് തെരുവിൽ അലഞ്ഞു നടക്കുന്ന വളർത്തുനായ്ക്കളെ പലപ്പോഴും നമ്മൾ കാണാറുണ്ട്. സാധാരണ തെരവുകളില്ലെല്ലാം അലഞ്ഞു നടക്കുന്ന നായ്ക്കളെ പോലെ പുറംലോകത്തെ തിരക്കും വാഹനങ്ങളും ഒന്നും അതിജീവിക്കാൻ ഇത്തരം വളർത്തു നായ്ക്കൾക്ക് കഴിയാറില്ല. ഉടമസ്ഥന്റെ അടുത്തേക്കോ വീട്ടിലേക്കോ മടങ്ങാൻ കഴിയാതെ തെരുവിൽ തന്നെ അലഞ്ഞുതിരിഞ്ഞ് നടക്കേണ്ട അവസ്ഥയാണ് ഇത്തരം നായകൾക്കുണ്ടാകുന്നത്. ഇവയുടെ ഉടമസ്ഥരാകട്ടെ ഇവ എവിടെ പോയെന്ന് അറിയാതെ അന്വേഷിച്ച് മടുത്ത അവസ്ഥയിലായിരിക്കും.

തിരികെ വീട്ടിലേക്ക് മടങ്ങാൻ കഴിയാതെ എന്നാൽ ഇത്തരത്തിൽ ഒറ്റപ്പെട്ടുപോകുന്ന നായ്ക്കൾക്ക് ഈ വിവരം ഉടമയെ ധരിപ്പിക്കാൻ കഴിഞ്ഞാൽ ഈ പ്രതിസന്ധിയ്ക്ക് പരിഹാരമാകും. അതിന് സഹായകമായ ഒരു സംവിധാനം ഒരുക്കിയിരിക്കുകയാണ് ഗവേഷകർ. ബ്രിട്ടനിൽ നിന്നും ഫിൻലൻഡിൽ നിന്നുമുള്ള ഒരു സംഘം ഗവേഷകരാണ് ഇത്തരമൊരു സംവിധാനം ഒരുക്കിയത്.

വളർത്തുനായയ്ക്ക് താൻ എവിടെയാണെന്ന് ഉടമയ്ക്ക് വിവരം നൽകാൻ സാധിക്കുന്നൊരു ഫോൺ ആണ് ഗവേഷകർ വികസിപ്പിച്ചെടുത്തിരിക്കുന്നത്. ‘ഡോഗ്ഫോൺ’എന്നാണ് ഇതിന് ഗവേഷകർ നൽകിയിരിക്കുന്ന പേര്. നായയുടെ ദേഹത്ത് തന്നെ ഘടിപ്പിക്കാവുന്നൊരു സംവിധാനമാണിത്. ആവശ്യമായ സന്ദർഭങ്ങളിൽ അതിന് ഈ ഉപകരണത്തിന്റെ സഹായത്തോടെ ഉടമയെ വീഡിയോ കോൾ ചെയ്യാൻ കഴിയും. തങ്ങളുടെ പരീക്ഷണത്തിൽ ഈ ഉപകരണം ഫലപ്രദമായി പ്രവർത്തിച്ചുവെന്നാണ് ഗവേഷകർ പറയുന്നത്. ഇനി ഇതിന്റെ ഗുണങ്ങൾ ആളുകളെ മനസിലാക്കിച്ച്, ഈ ഉപകരണം വ്യാവസായികാടിസ്ഥാനത്തിൽ പുറത്തിറക്കാനുള്ള മാർഗങ്ങൾ അന്വേഷിക്കുകയാണെന്നും ഗവേഷകർ വിശദമാക്കി.

വാഷിംഗ്ടൺ: ലോകത്ത് പറക്കും കാറുകൾ യാഥാർത്ഥ്യമാകുന്നു. സാങ്കൽപ്പിക കഥകളിൽ നിറഞ്ഞു നിന്നിരുന്ന പറക്കും കാറുകൾ പുറത്തിറക്കുമെന്ന് ഫ്ളോറിഡ ആസ്ഥാനമായി പ്രവർത്തിക്കുന്ന ലുഫ്റ്റ്കാർ കമ്പനിയാണ് അറിയിച്ചിരിക്കുന്നത്. 2023 ഓടെ തങ്ങൾ പറക്കുന്ന വാഹനങ്ങൾ പുറത്തിറക്കുമെന്നാണ് കമ്പനിയുടെ അറിയിപ്പ്. പല കമ്പനികളും പറക്കുന്ന വാഹനങ്ങൾ വികസിപ്പിക്കുന്നതിന് വേണ്ടിയുള്ള പ്രവർത്തനത്തനങ്ങൾ നടത്തുന്നുണ്ട്. ഇതിനിടെയിലാണ് ഇത്തരമൊരു വാർത്തയുമായി ലുഫ്റ്റ്കാർ രംഗത്തെത്തിയിരിക്കുന്നത്.

ലുഫ്റ്റ്കാർ കമ്പനി പുറത്തിറക്കുന്ന വാഹനം ഒരു ഫ്‌ളയിംഗ് മൊഡ്യൂളിൽ ഘടിപ്പിക്കാൻ സാധിക്കും. ആറ് പ്രൊപ്പല്ലറുകൾ ഇതിനുണ്ടായിരിക്കും. മണിക്കൂറിൽ 220 മൈൽ (350 കിലോമീറ്റർ) വേഗത കൈവരിക്കാൻ ഈ കാറുകൾക്ക് കഴിയുമെന്നാണ് കമ്പനിയുടെ വാഗ്ദാനം. ഏകദേശം 4,000 അടി ഉയരത്തിൽ എത്താനും കാറുകൾക്ക് കഴിവുണ്ട്. ഒറ്റയടിക്ക് 150 മൈൽ (240കിലോമീറ്റർ) ചുറ്റി സഞ്ചരിക്കാനുള്ള കഴിവും കാറുകൾക്കുണ്ടെന്നും കമ്പനി അവകാശവാദമുന്നയിക്കുന്നുണ്ട്.

അഞ്ച് സീറ്റുകളായിരിക്കും പറക്കും കാറുകൾക്ക് ഉണ്ടാകുക. ഹൈഡ്രജൻ ഉപയോഗിച്ചാകും കാറിന്റെ പ്രവർത്തനം. 3.5 ലക്ഷം ഡോളറായിരിക്കും കാറിന്റെ വിലയെന്നാണ് പ്രതീക്ഷിക്കപ്പെടുന്നത്. പ്രാഥമികമായി വൻകിട കോർപ്പറേഷനുകൾക്കും, അത്യാവശ്യ യാത്രകൾ ചെയ്യേണ്ടി വരുന്ന സമ്പന്നർക്കും വേണ്ടിയായിരിക്കും കാർ പുറത്തിറക്കുന്നത്. ഭാവിയിൽ നഗരങ്ങളിൽ പറക്കും കാറുകൾ സജ്ജീവമാകുമെന്നാണ് പ്രതീക്ഷിക്കുന്നതെന്ന് ലുഫ്റ്റ്കാറിന്റെ സ്ഥാപകനും സിഇഒയുമായ ശാന്ത് സത്യ പറഞ്ഞു. അതിനാൽ ജനങ്ങൾക്ക് തിരക്കേറിയ നഗരത്തിൽ താമസിക്കേണ്ടതില്ലെന്നും, ദൂരസ്ഥലങ്ങളിൽ നിന്ന് നഗരങ്ങളിലേക്ക് എളുപ്പത്തിൽ യാത്ര ചെയ്യാനാകുമെന്നും അദ്ദേഹം വ്യക്തമാക്കി.

ഇന്ത്യൻ വംശജനായ ശാന്ത് സത്യയാണ് ലുഫ്റ്റ് കാറിന്റെ സ്ഥാപകൻ. അണ്ണാ യൂണിവേഴ്സിറ്റിയിലെ പൂർവ്വ വിദ്യാർത്ഥിയാണ് സത്യ. സീമെൻസ്, ജോൺസൺ കൺട്രോൾസ്, ബോയിംഗ് തുടങ്ങിയ വിവിധ കമ്പനികളിൽ അദ്ദേഹം പ്രവർത്തിച്ചിട്ടുണ്ട്.

ബെയ്ജിംഗ്: അമേരിക്കയെ പിന്നിലാക്കി ലോകത്തെ ഏറ്റവും വലിയ സമ്പന്ന രാജ്യമായി ചൈന. കഴിഞ്ഞ വർഷം ചൈനയുടെ മൊത്തം സമ്പത്ത് 120 ലക്ഷം കോടി ഡോളറിലെത്തിയെന്നാണ് കണക്കുകൾ വ്യക്തമാക്കുന്നത്. 2000 ൽ ചൈനയുടെ സമ്പത്ത് വെറും ഏഴ് ലക്ഷം കോടി ഡോളറായിരുന്നു നിലവിൽ ലോക സമ്പത്തിലെ മൂന്നിലൊന്ന് ഭാഗവും ചൈനയുടെ കൈവശമാണെന്ന് സൂറിച്ച് ആസ്ഥാനമായ ആഗോള റിസർച്ച് സ്ഥാപനം മക്കിൻസി ആൻഡ് കമ്പനിയുടെ റിപ്പോർട്ടിൽ വിശദമാക്കുന്നു. ലോക വരുമാനത്തിൽ 60 ശതമാനം പങ്കിടുന്ന ചൈന, യുഎസ്എ, ഫ്രാൻസ്, ബ്രിട്ടൻ, ജർമ്മനി, ജപ്പാൻ, സ്വീഡൻ, മെക്സിക്കോ, കാനഡ, ഓസ്ട്രേലിയ എന്നീ 10 രാജ്യങ്ങളെ ഉൾപ്പെടുത്തി നടത്തിയ പഠനത്തിലാണ് ഇക്കാര്യം വ്യക്തമാക്കിയിരിക്കുന്നത്.

ആഗോള ആസ്തിയിലും വലിയ മുന്നേറ്റമാണ് ഉണ്ടായിരിക്കുന്നത്. കഴിഞ്ഞ 20 വർഷത്തിനുള്ളിൽ ആഗോള ആസ്തി 156 ലക്ഷം കോടിയിൽ നിന്ന് 514 ലക്ഷം കോടിയായി ഉയർന്നുവെന്നും പഠനത്തിൽ വിശദമാക്കുന്നു. 1999 ൽ ലോകാരോഗ്യ സംഘടനയിൽ അംഗമായതോടെയാണ് ചൈനയുടെ സാമ്പത്തിക സ്ഥിതി വർധിക്കാൻ ആരംഭിച്ചത്.

അതേസമയം അമേരിക്കയുടെ സമ്പത്ത് 90 ലക്ഷം കോടി ഡോളറാണ്. 20 വർഷത്തിനിടെ അമേരിക്കയ്ക്കും വളർച്ചയുണ്ടായി. ആഗോള ആസ്തിയുടെ 68 ശതമാനവും റിയൽ എസ്റ്റേറ്റ് രംഗത്തെ നിക്ഷേപമാണ്. അടിസ്ഥാന സൗകര്യവികസനമാണ് രണ്ടാമത്. റിയൽ എസ്റ്റേറ്റ് മേഖലയിലെ വിലക്കയറ്റവും പലിശ നിരക്കിലെ കുറവുമാണ് ആസ്തി വർധിക്കാനുള്ള പ്രധാന കാരണമെന്നും വിദഗ്ധർ ചൂണ്ടിക്കാട്ടുന്നു.

ദുബായ്: ആറാഴ്ച്ചകൾക്കുള്ളിൽ ദുബായ് എക്സ്പോ 2020 വേദിയിൽ സന്ദർശനം നടത്തിയത് 3.5 ദശലക്ഷത്തിലധികം പേർ. ഒക്ടോബർ 1 മുതൽ ആറ് ആഴ്ച്ചക്കുള്ളിൽ എക്സ്പോ വേദിയിൽ 3,578,653 ടിക്കറ്റ് സന്ദർശനങ്ങൾ രേഖപ്പെടുത്തിയതായാണ് എക്സ്പോ അധികൃതർ അറിയിക്കുന്നത്.

കൊറിയൻ പോപ് ഗായകരുടെയും ലെബനീസ് സൂപ്പർ താരങ്ങളായ നാൻസി അജ്റാമിന്റെയും റാഗിബ് അലാമയുടെയും പ്രകടനങ്ങളുമാണ് കഴിഞ്ഞ ആഴ്ചയിൽ എക്സ്പോയിലേക്കുള്ള സന്ദർശകരുടെ എണ്ണം വർധിപ്പിച്ചത്. ടിക്കറ്റിന്റെ വില പകുതിയായി കുറച്ച നവംബറിലെ ഓഫർ നിരവധി പേർ പ്രയോജനപ്പെടുത്തുണ്ടെന്നും അധികൃതർ വ്യക്തമാക്കി. ഞായർ മുതൽ വ്യാഴം വരെയുള്ള ദിവസങ്ങളിൽ ഓഫർ ലഭ്യമാകുന്ന ഈ ടിക്കറ്റിന്റെ വില 45 ദിർഹമാണ്. ശനി, ഞായർ ദിവസങ്ങളിൽ 95 ദിർഹമാണ് എക്‌സ്‌പോയിലെ ടിക്കറ്റ് നിരക്ക്.

അതേസമയം ഒക്ടോബർ 1 മുതൽ വെർച്വൽ സന്ദർശകരുടെ എണ്ണം 15.7 ദശലക്ഷമായി ഉയർന്നിട്ടുണ്ടെന്നും അധികൃതർ അറിയിച്ചു.