International (Page 162)

ലണ്ടൻ: ബ്രിട്ടണിൽ കൂടുതൽ ഇളവുകൾ. രണ്ട് ഡോസ് വാക്‌സിൻ എടുത്ത വിദേശസഞ്ചാരികളെ നിർബന്ധിത കോവിഡ് പരിശോധനയിൽ നിന്ന് ഒഴിവാക്കാനാണ് ബ്രിട്ടന്റെ തീരുമാനം. ബ്രിട്ടീഷ് പ്രധാനമന്ത്രി ബോറിസ് ജോൺസനാണ് ഇക്കാര്യം അറിയിച്ചത്. പുതിയ തീരുമാനം എന്നു മുതലാണ് നടപ്പിലാക്കുകയെന്ന കാര്യം വ്യക്തമല്ല.

ബ്രിട്ടൻ സഞ്ചരിക്കുന്ന എല്ലാ വിദേശസഞ്ചാരികളും നിർബന്ധിത കോവിഡ് പരിശോധന നടത്തി നെഗറ്റീവ് സർട്ടീഫിക്കറ്റ് ഹാജരാക്കണമെന്ന നിബന്ധന ഉണ്ടായിരുന്നു. വാക്‌സിൻ എടുത്തവർക്കും ഇത്തരത്തിൽ കോവിഡ് നെഗറ്റീവ് പരിശോധനാ ഫലം ഹാജരാക്കണം. ഏതാനും ദിവസങ്ങളായി ബ്രിട്ടണിലെ കോവിഡ് കേസുകളുടെ എണ്ണത്തിൽ കുറവ് രേഖപ്പെടുത്തുന്നുണ്ട്. ഈ സാഹചര്യത്തിലാണ് കൂടുതൽ ഇളവ് നൽകാൻ അധികൃതർ തീരുമാനിച്ചത്.

അതേസമയം ബ്രിട്ടൻ സഞ്ചാരികൾക്ക് തുറന്നുകൊടുക്കുന്നു എന്ന പ്രതീതി ജനിപ്പിക്കേണ്ടത് രാജ്യത്തെ സാമ്പത്തികസ്ഥിതി മെച്ചമാക്കുന്നതിൽ നിർണായകമാണെന്ന് ബോറിസ് ജോൺസൺ അഭിപ്രായപ്പെട്ടു. ബ്രിട്ടന്റെ ഗതാഗതമന്ത്രി പുതിയ തീരുമാനത്തെ കുറിച്ചുള്ള വിശദവിവരങ്ങൾ പാർലമെന്റിൽ ഉടൻ അറിയിക്കുമെന്നും അദ്ദേഹം വ്യക്തമാക്കി.

അബുദാബി: അബുദാബിയ്ക്ക് നേരെയുണ്ടായ ആക്രമണത്തിൽ ഹൂതികൾക്ക് ശക്തമായ തിരിച്ചടി നൽകി യുഎഇ. യെമനിലെ മിസൈൽ വിക്ഷേപണ കേന്ദ്രം യുഎഇ തകർത്തു. യുഎഇയുടെ അത്യാധുനിക പോർ വിമാനങ്ങളാണ് യെമനിലെ മിസൈൽ വിക്ഷേപണ കേന്ദ്രം തകർത്തത്. തിങ്കളാഴ്ച രാവിലെ അബുദാബിക്ക് നേരെ ഹൂതികൾ നടത്തിയ മിസൈൽ ആക്രമണത്തിന് പിന്നാലെയാണ് നടപടി.

തിങ്കളാഴ്ച പുലർച്ചെ യെമൻ സമയം 4.10 നായിരുന്നു യുഎഇ ഹൂതികൾക്ക് തിരിച്ചടി നൽകിയത്. എഫ് 16 യുദ്ധ വിമാനമുപയോഗിച്ചായിരുന്നു യുഎഇ സൈന്യത്തിന്റെ ആക്രമണം. ആക്രമണം നടത്തിയ വിവരം സാമൂഹിക മാദ്ധ്യമങ്ങളിലൂടെ യുഎഇ പ്രതിരോധ സേന ഔദ്യോഗികമായി സ്ഥിരീകരിക്കുകയും ചെയ്തിരുന്നു. ആക്രമണത്തിന്റെ ആകാശ ദൃശ്യങ്ങളും യുഎഇ സൈന്യം പുറത്തുവിട്ടിട്ടുണ്ട്.

തിങ്കളാഴ്ച്ച പുലർച്ചെ യുഎഇയിലേക്ക് ഹൂതികൾ രണ്ട് ബാലിസ്റ്റിക് മിസൈലുകളാണ് വിക്ഷേപിച്ചത്. ഇവ യുഎഇ സൈന്യം തകർത്തിരുന്നു. അബുദാബിയുടെ നേർക്ക് തൊടുത്ത മിസൈലുകളാണ് സൈന്യം തകർത്തത്. മിസൈലുകളുടെ അവശിഷ്ടങ്ങൾ അബുദാബിയിൽ നിന്ന് കണ്ടെത്തിയിട്ടുണ്ട്. ആശങ്കപ്പെടേണ്ട സാഹചര്യമില്ലെന്നും ആവശ്യമായ സുരക്ഷാ നടപടികൾ സ്വീകരിച്ചതായും യുഎഇ അറിയിച്ചിരുന്നു.

ഹൂസ്റ്റൻ: അമേരിക്കയിൽ കോവിഡ് കേസുകൾ വർധിക്കുന്നു. കോവിഡ് രോഗികളെ കൊണ്ട് ആശുപത്രികൾ നിറയുന്ന കാഴ്ച്ചയാണ് അമേരിക്കയിൽ കാണാൻ കഴിയുന്നത്. മരണ നിരക്കും വർധിച്ചു കൊണ്ടിരിക്കുകയാണ്. കിഴക്കൻ നഗരങ്ങളിൽ നിന്ന് രാജ്യത്തിന്റെ പല ഭാഗങ്ങളിലേക്കും സമീപ ദിവസങ്ങളിൽ കൂടുതൽ കേസുകളെത്തി. വെള്ളിയാഴ്ച വരെ അമേരിക്കയിൽ ഒരു ദിവസം ശരാശരി 720,000 പുതിയ കേസുകൾ റിപ്പോർട്ട് ചെയ്യപ്പെട്ടിരുന്നു. മിക്ക ദിവസങ്ങളിലും രണ്ടായിരത്തിലധികം കോവിഡ് മരണങ്ങളും റിപ്പോർട്ട് ചെയ്യുന്നു.

അമേരിക്കയുടെ ചിലഭാഗങ്ങളിൽ കോവിഡ് അതിവേഗത്തിൽ പടരുകയാണ്. നോർത്ത് ഡക്കോട്ടയിൽ പുതിയ അണുബാധകളുടെ റിപ്പോർട്ടുകൾ വർധിക്കുന്നു. അലബാമയിലും യൂട്ടായിലും കോവിഡ് രോഗികളുടെ എണ്ണത്തിൽ വർധനവ് ഉണ്ടായിട്ടുണ്ട്.

അതേസമയം കൻസാസിൽ, കഴിഞ്ഞ രണ്ടാഴ്ചയ്ക്കുള്ളിൽ പ്രതിദിന കേസുകളുടെ നിരക്ക് 50 ശതമാനം വർധിച്ചു. ഒമിക്രോൺ വകഭേദത്തിനൊപ്പം ഞങ്ങളുടെ ആശുപത്രികളിലെ ബുദ്ധിമുട്ട് തങ്ങളുടെ ആരോഗ്യ പ്രവർത്തകരെയും രോഗികളെയും ബാധിക്കുന്നുവെന്ന് ഗവർണർ ലോറ കെല്ലി പറഞ്ഞിരുന്നു. എല്ലായിടത്തും വൈറസ് തങ്ങളുടെ കമ്മ്യൂണിറ്റികളിലൂടെ അതിവേഗം പടരുന്നത് തുടരുകയാണെന്നും കെല്ലി വ്യക്തമാക്കിയിരുന്നു.

വെല്ലിംഗ്ടൺ: ന്യൂസിലൻഡ് പ്രധാനമന്ത്രി ജസീന്ദ ആർഡേന്റെ വിവാഹം മാറ്റിവെച്ചു. ഒമിക്രോൺ വ്യാപനത്തിന്റെ പശ്ചാത്തലത്തിൽ കോവിഡ് നിയന്ത്രണങ്ങൾ കർശനമാക്കിയതിനാലാണ് വിവാഹം മാറ്റിവെച്ചതെന്ന് ജസീന്ദ ആർഡേൻ വ്യക്തമാക്കി. തന്റെ വിവാഹ ചടങ്ങുകൾ നടക്കില്ല. ന്യൂസിലാന്റിലെ സാധാരണ ജനങ്ങളും താനും തമ്മിൽ വ്യത്യാസമൊന്നുമില്ല. കോവിഡ് കാരണം സമാനമായ അനുഭവം ഉണ്ടായവർക്കൊപ്പം താനും ചേരുന്നുവെന്നും ജസീന്ദ പറഞ്ഞു.

ഇതേ അവസ്ഥ ഉള്ളവരോട് പ്രധാനമന്ത്രി ക്ഷമ ചോദിക്കുകയും ചെയ്തു. ന്യൂസിലൻഡിലെ പുതിയ നിയന്ത്രണങ്ങൾ വിശദീകരിച്ച് സംസാരിക്കവെയാണ് പ്രധാനമന്ത്രി ഇക്കാര്യങ്ങൾ വ്യക്തമാക്കിയത്.

ടെലിവിഷൻ അവതാരകനായ ക്ലാർക്ക് ഗേഫോഡയെയാണ് ജസീന്ദ വിവാഹം ചെയ്യുന്നത്. പൂർണ്ണമായും വാക്സിനെടുത്ത 100 പേരെ പങ്കെടുപ്പിച്ച് ചടങ്ങ് നടത്താമായിരുന്നെങ്കിലും നിലവിലെ സ്ഥിതിഗതികൾ കണക്കിലെടുത്ത് ജസീന്ദ വിവാഹം മാറ്റിവെയ്ക്കുകയായിരുന്നു. അടുത്തിടെയാണ് ജസീന്ദയും ക്ലാർക്ക് ഗേഫോഡെയും വിവാഹിതരാകാൻ പോകുന്നുവെന്ന പ്രഖ്യാപനം ഉണ്ടായത്. മൂന്നുവയസുള്ള ഒരു മകളും ഇരുവർക്കുമുണ്ട്.