International (Page 156)

മോസ്‌ക്കോ: റഷ്യയെ പൂർണ്ണമായും തള്ളാതെ യൂറോപ്യൻ യൂണിയൻ. ലോകത്തിലെ എറ്റവും വലിയ പണമിടപാട് സംവിധാനത്തിൽ നിന്നും റഷ്യയെ പുറത്താക്കാനുള്ള ബ്രിട്ടന്റെ ശ്രമത്തിൽ യൂറോപ്യൻ യൂണിയനിൽ കടുത്ത അമർഷം നിലനിൽക്കുന്നുണ്ട്. അന്താരാഷ്ട്ര പണമിടപാടുകളിൽ പകുതിയോളവും നടക്കുന്ന സ്വിഫ്റ്റിൽ നിന്നും റഷ്യയെ പുറത്താക്കാൻ കഴിഞ്ഞ ദിവസം ജി 7 രാജ്യങ്ങളോട് ബോറിസ് ജോൺസൺ ആവശ്യപ്പെട്ടിരുന്നു. ഇതിനെതിരെ എതിർപ്പുമായി നിരവധി യൂറോപ്യൻ യൂണിയൻ അംഗരാജ്യങ്ങൾ രംഗത്തെത്തിയിരുന്നു.

ബെൽജിയം ആസ്ഥാനമാക്കിയുള്ള വേൾഡ് വൈഡ് ഇന്റർബാങ്ക് ഫിനാൻഷ്യൽ ടെലിക്കമ്മ്യുണിക്കേഷൻ എന്ന സ്വിഫ്റ്റ് അന്താരാഷ്ട്ര തലത്തിൽ തന്നെ പണമിടപാടുകൾ സാധ്യമാക്കുന്ന സംവിധാനമാണ്. പുടിൻ ഭരണകൂടത്തിനു മേൽ കനത്ത സാമ്പത്തിക ആഘാതം ഏൽപിക്കുവാൻ റഷ്യയെ സ്വിഫ്റ്റിൽ നിന്നും നീക്കം ചെയ്യേണ്ടത് അത്യാവശ്യമാണെന്നാണ് ബോറിസ് ജോൺസൺ പറയുന്നത്. ഇതിനായുള്ള ശ്രമങ്ങളും അദ്ദേഹം നടത്തുന്നുണ്ട്. ജർമ്മനിയും ഇറ്റലിയുമാണ് ബോറിസ് ജോൺസന്റെ നിർദ്ദേശത്തെ എതിർത്തതെന്നാണ് റിപ്പോർട്ടുകൾ.

അതേസമയം, യൂറോപ്യൻ രാജ്യങ്ങൾ പ്രകൃതി വാതകത്തിനും മറ്റും മറ്റ് സ്രോതസ്സുകൾ തേടിപ്പോയാലും റഷ്യയെ സഹായിക്കുവാൻ ചൈന എത്തുമെന്നാണ് നിരീക്ഷകർ കരുതുന്നു. റഷ്യയിൽ നിന്നും പ്രകൃതിവാതകവും എണ്ണയുമെല്ലം അധികമായി വാങ്ങി ശേഖരിക്കാൻ ചൈനയ്ക്ക് കഴിയും. എന്നാൽ, പാശ്ചാത്യ രാജ്യങ്ങളുമായുള്ള ബന്ധം തകരാതിരിക്കാൻ വളരെ സൂക്ഷിച്ചു മാത്രമെ ചൈന ഇക്കാര്യത്തിൽ ഇടപെടുകയുള്ളുവെന്നാണ് വിലയിരുത്തപ്പെടുന്നത്. റഷ്യയെ സഹായിക്കാൻ ചൈന മുന്നോട്ടുവന്നാൽ പാശ്ചാത്യ ശക്തികളുടെ ഉപരോധം വലിയൊരു അളവ് വരെ ഫലം കാണാതെ പോകും.

കീവ്: യുക്രൈന് വേണ്ടി റഷ്യയ്ക്ക് എതിരെ സംയുക്ത സൈനികനീക്കം നടത്തേണ്ടതില്ലെന്ന് നാറ്റോ. അംഗരാജ്യമല്ലാത്ത യുക്രൈയ്‌ന് വേണ്ടി സംയുക്ത സൈനിക നീക്കം നടത്തേണ്ടെന്നാണ് നോർത്ത് അറ്റ്‌ലാൻറിക് ട്രീറ്റി ഓർഗനൈസേഷന്റെ തീരുമാനം. നാറ്റോയുടെ അംഗരാജ്യങ്ങളിൽ പലരും സ്വന്തം നിലയ്ക്ക് യുക്രൈന് സൈനികസഹായം നൽകിയേക്കാമെങ്കിലും നാറ്റോ ഒരു സംഘടന എന്ന നിലയിൽ ഒരു തരത്തിലും സംയുക്ത സൈനിക നീക്കത്തിനില്ലെന്നാണ് അറിയിച്ചിട്ടുള്ളത്. നാറ്റോ റഷ്യയ്‌ക്കെതിരെ സംയുക്തസൈനികനീക്കം നടത്തുമെന്ന് പ്രഖ്യാപിച്ചിരുന്നെങ്കിൽ അത് മറ്റൊരു ലോകയുദ്ധത്തിലേക്ക് നയിച്ചേനെയെന്നാണ് വിദഗ്ധർ പറയുന്നത്.

അതേസമയം യുക്രൈനെതിരെ റഷ്യയ്ക്ക് ഒപ്പം സൈന്യം അണിചേരുമെന്ന് ബെലാറസ് അറിയിച്ചിട്ടുണ്ട്. യുക്രൈനിലെ പല വ്യോമത്താവളങ്ങളിലേക്കും നടത്തിയ ആക്രമണങ്ങളിൽ റഷ്യൻ സൈന്യത്തോടൊപ്പം ബെലാറഷ്യൻ സൈന്യവും ഉണ്ടായിരുന്നുവെന്ന് വ്യക്തമായിരുന്നു. ഇതിന് പിന്നാലെയാണ് ബെലാറസിന്റെ ഔദ്യോഗിക പ്രഖ്യാപനം.

പത്ത് ഖണ്ഡികകളുള്ള ഒരു പ്രസ്താവനയാണ് നാറ്റോ അംഗരാജ്യങ്ങൾ പുറത്തുവിട്ടിരിക്കുന്നത്. റഷ്യ യുക്രൈന് മേൽ അഴിച്ചുവിട്ട ക്രൂരമായ ആക്രമണത്തെ സാധ്യമായ ഏറ്റവും ശക്തമായ ഭാഷയിൽ അപലപിക്കുന്നുവെന്ന് നാറ്റോ വ്യക്തമാക്കി. ആക്രമണം തീർത്തും സാധൂകരിക്കാനാവാത്തതാണെന്നും കൊല്ലപ്പെട്ട പരിക്കേറ്റ എല്ലാവർക്കുമൊപ്പം ചേർന്നു നിൽക്കുന്നുവെന്നും ആക്രമണത്തിന് സഹായം നൽകുന്ന ബെലാറസിനെ ശക്തിയുക്തം അപലപിക്കുന്നുവെന്നും നാറ്റോ വ്യക്തമാക്കി.

നാറ്റോ മുന്നണിയിലെ രാജ്യങ്ങളുടെ അതിർത്തിയിൽ സൈനികവിന്യാസം വർധിപ്പിക്കും. സമുദ്രാതിർത്തികളിൽ സൈനികവിന്യാസവും പടക്കോപ്പുകളുടെ വിന്യാസവും ശക്തമാക്കും. അടിയന്തരസാഹചര്യങ്ങൾക്കെല്ലാം തയ്യാറായി നിൽക്കാൻ എല്ലാ സൈന്യങ്ങൾക്കും മുന്നറിയിപ്പും നൽകിയിട്ടുണ്ട്. എന്നാൽ നിലവിലെ അവസ്ഥ കൂടുതൽ വഷളാക്കാൻ തങ്ങളില്ലെന്നും സ്വയം പരസ്പരം സംരക്ഷിച്ച് ഒന്നിച്ച് നിൽക്കും നാറ്റോ അറിയിച്ചു.

കീവ്: യുക്രൈനിൽ റഷ്യ ആക്രമണം ആരംഭിച്ചതിന് പിന്നാലെ രാജ്യത്തെ ഒഡേസ, ഖാർകിവ് നഗരങ്ങളിലെ സർവകലാശാലകളിൽ കുടുങ്ങി മലയാളി വിദ്യാർത്ഥികൾ. ഏറ്റവുമൊടുവിൽ ലഭിക്കുന്ന കണക്കനുസരിച്ച് 213 മലയാളി വിദ്യാർത്ഥികൾ കുടുങ്ങി കിടപ്പുണ്ടെന്നാണ് വിവരം. എയർ ഇന്ത്യ യുക്രൈനിൽ നിന്ന് ഇന്ത്യയിലേക്ക് നടത്താനിരുന്ന എല്ലാ വിമാന സർവീസുകളും റദ്ദാക്കിയതോടെയാണ് ഇവർ ഇന്ത്യയിലേക്ക് മടങ്ങിയെത്താൻ കഴിയാതെ കുടുങ്ങിപ്പോയത്.

യുക്രൈനിലെ ഒഡേസ നാഷണൽ യൂണിവേഴ്‌സിറ്റിയിൽ 200 മലയാളി വിദ്യാർത്ഥികളാണ് കുടുങ്ങിക്കിടക്കുന്നത്. ഇവിടെ നിന്ന് ഏതാണ്ട് 700 കിലോമീറ്ററോളം അകലെയുള്ള ഖാർകിവ് നാഷണൽ മെഡിക്കൽ സർവകലാശാലയിൽ 13 മലയാളി വിദ്യാർത്ഥികളാണ് കുടുങ്ങിയിട്ടുണ്ടെന്നുമാണ് വിവരങ്ങൾ. യുക്രൈനിലെ നിലവിലെ സ്ഥിതിഗതികൾ വിദേശകാര്യ മന്ത്രാലയം നിരീക്ഷിച്ച് വരികയാണ്. വിദ്യാർത്ഥികളുടെ സുരക്ഷ ഉറപ്പാക്കുമെന്നാണ് ഇന്ത്യൻ വിദേശകാര്യ മന്ത്രാലയം അറിയിച്ചത്.

യുക്രൈനിലെ സ്ഥിതിഗതികൾ ഇന്ത്യ നിരന്തരം നിരീക്ഷിച്ച് വരുന്നതായി വിദേശകാര്യമന്ത്രി എസ് ജയശങ്കർ നേരത്തെ അറിയിച്ചിരുന്നു. യുക്രൈനിൽ തുടരാൻ അത്യാവശ്യമില്ലാത്ത ഇന്ത്യക്കാർ അവിടെ നിന്നും മടങ്ങണമെന്നും അദ്ദേഹം അഭ്യർത്ഥിച്ചിരുന്നു. വിദ്യാർത്ഥികൾക്ക് ഓൺലൈൻ ക്ലാസുകൾ ഉറപ്പാക്കാൻ ചർച്ച നടത്തും. എംബസിയുടെ പ്രവർത്തനത്തിന് തടസ്സമില്ലെന്നും അദ്ദേഹം അറിയിച്ചു.

അതേസമയം യുക്രൈനിൽ നിന്നും കഴിഞ്ഞ ദിവസം ഇന്ത്യക്കാരെ തിരിച്ചെത്തിച്ചിരുന്നു. യുക്രൈനിൽ നിന്നുള്ള എയർ ഇന്ത്യയുടെ ആദ്യ പ്രത്യേക വിമാനം കഴിഞ്ഞ ദിവസം അർദ്ധരാത്രിയോടെയാണ് ഡൽഹിയിൽ എത്തിയത്. വരും ദിവസങ്ങളിലും കൂടുതൽ ഇന്ത്യക്കാരെ തിരികെ എത്തിക്കാനുള്ള നടപടികൾ വിദേശകാര്യ മന്ത്രാലയം നടത്തുന്നുണ്ട്. ഇന്ത്യയിലേക്ക് തിരികെയെത്തിയതിലൂടെ ആശങ്കയൊഴിഞ്ഞുവെന്ന് യുക്രൈനിൽ നിന്ന് മടങ്ങിയെത്തിയ വിദ്യാർത്ഥികൾ മാദ്ധ്യമങ്ങളോട് പ്രതികരിച്ചു.

മോസ്‌കോ: യുക്രൈനെതിരെ യുദ്ധം ആരംഭിച്ച് റഷ്യ. തന്ത്രപ്രധാന മേഖലകൾ കേന്ദ്രീകരിച്ചാണ് റഷ്യ യുക്രൈനെതിരെ ആക്രമണം നടത്തുന്നത്. റഷ്യയുടെ കര, നാവിക, വ്യോമ സേനങ്ങൾ ആക്രമണങ്ങൾ നടത്തുന്നുണ്ട്. വടക്ക് ബെലറൂസ്, തെക്ക് ഒഡേസ, കിഴക്ക് ഡോൺബാസ് എന്നീ അതിർത്തികൾ വഴിയും കരിങ്കടൽ വഴിയുമാണ് ആക്രമണം. യുക്രൈൻ ആയുധങ്ങൾ താഴെ വെച്ച് കീഴടങ്ങണമെന്നാണ് പുടിൻ ആവശ്യപ്പെടുന്നത്. രക്തച്ചൊരിച്ചിൽ ഉണ്ടായാൽ യുക്രൈനായിരിക്കും അതിനുത്തരാവാദിയെന്നും റഷ്യ പറയുന്നു. സംഘർഷത്തിൽ ഇടപെടുന്നവർക്കെതിരെ ശക്തമായ തിരിച്ചടി നൽകുമെന്നും പുടിൻ അറിയിച്ചു.

കിയവ്, യുക്രെയ്നിലെ വടക്ക് കിഴക്ക് ഭാഗത്തെ വലിയ നഗരമായ കർക്കീവ്, ക്രമറ്റോസ്, ഡിപ്രോ, മരിയ പോൾ, ഒഡേസ, സെപോർസിയ എന്നിവിടങ്ങളിൽ വ്യോമാക്രമണം നടന്നുവെന്ന റിപ്പോർട്ടുകൾ പുറത്തുവന്നിട്ടുണ്ട്. യുക്രൈനിൽ നിലവിൽ അടിയന്തരാവസ്ഥ പ്രഖ്യാപിച്ചിരിക്കുകയാണ്. ജനങ്ങൾ വീടിന് പുറത്തിറങ്ങരുതെന്നും പരിഭ്രാന്തരാകേണ്ടെന്നും യുക്രെയ്ൻ പ്രസിഡന്റ് വൊളോദിമിർ സെലൻസ്‌കി വ്യക്തമാക്കി. റഷ്യൻ സൈന്യത്തെ സർവശക്തിയുമെടുത്ത് പ്രതിരോധിക്കുമെന്ന് വൊളോദിമിർ സെലൻസ്‌കി മുന്നറിയിപ്പ് നൽകി. രണ്ട് ലക്ഷത്തോളം വരുന്ന റിസർവ് സൈനികർ സൈനിക സേവനത്തിനായി തയ്യാറായിരിക്കണമെന്നാണ് സെലൻസ്‌കി നൽകിയിരിക്കുന്ന നിർദ്ദേശം.

അതേസമയം റഷ്യൻ നീക്കങ്ങൾക്കെതിരെ യുക്രൈൻ യുഎൻ സുരക്ഷാ സമിതിയുടെ സഹായം അഭ്യർത്ഥിച്ചിരുന്നു. യുക്രൈനെതിരായ നീക്കങ്ങളിൽ നിന്ന് റഷ്യ പിന്മാറണമെന്ന് യുഎൻ സെക്രട്ടറി ജനറൽ ആന്റോണിയോ ഗുട്ടറസ് യുഎൻ സുരക്ഷാ സമിതിയുടെ അടിയന്തര യോഗത്തിൽ ആവശ്യപ്പെട്ടു. റഷ്യക്കെതിരെ അമേരിക്കയും ബ്രിട്ടനുമടക്കം ഉപരോധം ഏർപ്പെടുത്തുകയും ചെയ്തിട്ടുണ്ട്.