International (Page 155)

മോസ്‌കോ: റഷ്യയെ യൂറോപ്യൻ മനുഷ്യാവകാശസംഘടനയിൽ നിന്നും പുറത്താക്കി. റഷ്യൻ അധിനിവേശത്തെത്തുടർന്നാണ് നടപടി. 47 അംഗ കൗൺസിലാണ് റഷ്യയെ പുറത്താക്കാനുള്ള തീരുമാനമെടുത്തത്. അടിയന്തര സ്വഭാവമുള്ളതാണ് പുറത്താക്കലെന്നാണ് സംഘടന വ്യക്തമാക്കുന്നത്. 1949 ൽ സ്ഥാപിതമായ സംഘടനയിൽ റഷ്യ സജീവ അംഗമായിരുന്നുവെന്നും തൊട്ടടുത്ത കാലം വരെ റഷ്യ പ്രധാനപ്പെട്ട എല്ലാ മനുഷ്യാവകാശ വിഷയങ്ങളിലും സജീവമായി പങ്കെടുത്തിരുന്നുവെന്നും പുറത്താക്കൽ സന്ദേശത്തിൽ സംഘടന വിശദമാക്കിയിട്ടുണ്ട്.

അതേസമയം, യുക്രൈനിൽ സംഘർഷാവസ്ഥ നിലനിൽക്കുകയാണ്. ഭരണം അട്ടിമറിക്കാൻ വേണ്ടി റഷ്യൻ പ്രസിഡന്റ് വ്ളാഡിമിർ പുടിൻ യുക്രൈൻ സൈന്യത്തോട് ആഹ്വാനം ചെയ്തു. സർക്കാരിനെ പുറത്താക്കാൻ അധികാരം പിടിച്ചെടുക്കാനാണ് വ്‌ളാഡിമിർ പുടിൻ സൈന്യത്തോട് പറഞ്ഞത്. നിലവിലെ ഭരണകൂടം ഭീകരരുടേതാണെന്നും സെലൻസ്‌കി ഭരണകൂടത്തെ പുറത്താക്കും വരെ ആക്രമണം തുടരുമെന്നും പുടിൻ അറിയിച്ചിരുന്നു.

യുക്രൈനുമായി ചർച്ചയ്ക്ക് തയ്യാറാണെന്ന് റഷ്യ നേരത്തെ അറിയിച്ചിരുന്നു. ബലാറൂസിന്റെ തലസ്ഥാനമായ മിൻസ്‌കിലേക്കാണ് പുടിൻ യുക്രൈനെ ചർച്ചയ്ക്ക് വിളിച്ചത്. വിദേശകാര്യമന്ത്രാലയത്തിന്റെയും പ്രസിഡന്റിന്റെയും പ്രതിനിധികളെ അയക്കണമെന്നായിരുന്നു റഷ്യൻ വക്താവ് ദിമ്ത്രി പെസ്‌കോവ് ആവശ്യപ്പെട്ടിരുന്നത്. യുക്രൈൻ നിഷ്പക്ഷ നിലപാടിലേക്ക് മാറണമെന്നാണ് റഷ്യ മുന്നോട്ടു വച്ച പ്രധാപ്പെട്ട ഉപാധി. റഷ്യ ചർച്ചയ്ക്ക് തയ്യാറാകണമെന്ന് യുക്രൈയിൻ പ്രസിഡന്റ് വോളോഡിമിർ സെലൻസ്‌കി നേരത്തെ അഭിപ്രായപ്പെട്ടിരുന്നു.

റോം: യുക്രൈൻ സംഘർഷത്തിൽ ആശങ്ക രേഖപ്പെടുത്തി ഫ്രാൻസിസ് മാർപ്പാപ്പ. ഇറ്റലിയിലെ റഷ്യൻ എംബസിയിൽ നേരിട്ട് എത്തി അദ്ദേഹം സ്ഥാനപതിയെ ആശങ്കയറിയിക്കുകയായിരുന്നു. വെള്ളിയാഴ്ച്ച വൈകുന്നേരമാണ് അദ്ദേഹം റഷ്യൻ എംബസി സന്ദർശിച്ചത്.

യുക്രൈനെതിരെയുള്ള സൈനിക നീക്കത്തിൽ അദ്ദേഹം റഷ്യയോട് അതൃപ്തി അറിയിച്ചു. യുക്രൈന് മേൽ നടത്തുന്ന സൈനിക ആക്രമണങ്ങൾ എത്രയും വേഗം അവസാനിപ്പിക്കണമെന്നും അദ്ദേഹം അഭ്യർത്ഥിച്ചെന്ന റിപ്പോർട്ടുകളും പുറത്തുവരുന്നുണ്ട്. യുക്രൈൻ ജനതയ്ക്കായി അടുത്ത ബുധനാഴ്ച ഉപവസിച്ച് പ്രാർഥിക്കുമെന്ന് മാർപ്പാപ്പ സ്ഥാനപതിയെ അറിയിച്ചു.

റഷ്യ- യുക്രൈൻ സംഘർഷത്തിന്റെ പശ്ചാത്തലത്തിൽ നേരത്തെ നിശ്ചയിച്ചിരുന്ന എല്ലാ പരിപാടികളും മാർപ്പാപ്പ റദ്ദാക്കിയിരുന്നു. ഇതിന് പിന്നാലെയാണ് എംബസിയിൽ എത്തി അദ്ദേഹം സ്ഥാനപതിയുമായി കൂടിക്കാഴ്ച നടത്തിയത്. അരമണിക്കൂറോളം നേരം ഇരുവരും തമ്മിൽ സംസാരിച്ചു. സ്ഥാനപതിമാരെയും മറ്റ് ഉദ്യോഗസ്ഥരെയും മാർപ്പാപ്പ വത്തിക്കാനിലേക്ക് വിളിച്ചുവരുത്താറാണ് പതിവ്. എന്നാൽ യുക്രൈൻ സംഘർഷത്തിന്റെ പശ്ചാത്തലത്തിൽ ഈ നയതന്ത്ര പ്രോട്ടോകോൾ മാറ്റിവെച്ചാണ് അദ്ദേഹം റഷ്യൻ സ്ഥാനപതിയുമായി കൂടിക്കാഴ്ച്ച നടത്തിയത്.

മോസ്‌കോ: യുക്രൈനിൽ നിന്നും റഷ്യയുടെ സൈനിക പിൻമാറ്റം ആവശ്യപ്പെട്ടുള്ള യുഎൻ രക്ഷാ സമിതിയിലെ പ്രമേയം വീറ്റോ ചെയ്ത് റഷ്യ. അമേരിക്ക ഉൾപ്പെടെ 11 രാജ്യങ്ങളാണ് പ്രമേയത്തിന് പിന്തുണ നൽകിയത്. അതേസമയം, ഇന്ത്യയും ചൈനയും യുഎഇയും വോട്ടെടുപ്പിൽ നിന്നും വിട്ടു നിന്നു. സ്ഥിരാംഗമായ റഷ്യ വീറ്റോ ചെയ്തതോടെ പ്രമേയം പൊതു സഭയിലെത്തും. യുഎൻ പൊതു സഭയിൽ പ്രമേയം കൊണ്ടുവരുമെന്നാണ് അമേരിക്ക വ്യക്തമാക്കുന്നത്. 192 അംഗ പൊതു സഭയിൽ ഇനി വിഷയമെത്തും.

ചർച്ചയിലൂടെ യുക്രൈൻ-റഷ്യ പ്രശ്‌നത്തിന് പരിഹാരം കാണണമെന്നാണ് ഇന്ത്യയുടെ നിലപാട്. ഇക്കാര്യം ഇന്ത്യ യുഎന്നിൽ ആവശ്യപ്പെടുകയും ചെയ്തിരുന്നു. നയതന്ത്ര ചർച്ചയിലൂടെയാണ് പ്രശ്‌നം പരിഹരിക്കേണ്ടതെന്നും മനുഷ്യക്കുരുതിയില്ലാതാക്കാണമെന്നും ഇന്ത്യൻ പ്രതിനിധി ടി എസ് തിരുമൂർത്തി അറിയിച്ചു.

സമാധാന നീക്കങ്ങൾക്ക് ഇടം കൊടുക്കാനാണ് ഐക്യരാഷ്ട്ര സഭയിലെ പ്രമേയത്തിൽ നിന്ന് വിട്ടു നിന്നതെന്നാണ് ഇന്ത്യയുടെ വിശദീകരണം. ചർച്ചയുടെ വഴിയിലേക്ക് ഇരുപക്ഷവുമെത്തുമെന്ന് പ്രതീക്ഷിക്കുന്നുവെന്നും ഇന്ത്യ വ്യക്തമാക്കി.

കീവ്: യുക്രൈൻ തലസ്ഥാനമായ കീവ് റഷ്യൻ സൈന്യം വളഞ്ഞതായി റിപ്പോർട്ടുകൾ. രാജ്യത്തിന്റെ വടക്ക്, വടക്കുകിഴക്കൻ മേഖലകളിലൂടെ റഷ്യൻ സേന കീവിലേക്ക് അടുക്കുകയാണെന്ന് യുക്രൈൻ സൈന്യം സ്ഥിരീകരിച്ചിട്ടുണ്ട്. ഏതു നിമിഷവും റഷ്യൻ സൈന്യം കീവ് പിടിച്ചടക്കാൻ സാധ്യതയുണ്ടെന്നാണ് വിവരം.

വെള്ളിയാഴ്ച്ച പുലർച്ചെ രണ്ടു സഫോടനങ്ങളാണ് കീവിൽ ഉണ്ടായത്. പ്രധാന നഗരങ്ങളിലെല്ലാം റഷ്യൻ സേന മിസൈൽ ആക്രമണവും ഷെല്ലാക്രമണവും നടത്തുകയാണ്. റഷ്യയുടെ നടപടികൾ മൂലം ജനജീവിതം ദുരിതത്തിലായിരിക്കുകയാണ്.

ജീവൻ രക്ഷിക്കാനായി ജനങ്ങൾ കൂട്ടപ്പലായനം നടത്തുകയാണ്. ജനവാസ മേഖലകളും പാർപ്പിട സമുച്ചയങ്ങളും ലക്ഷ്യമിട്ടുള്ള റഷ്യൻ ആക്രമണം വർധിച്ചുവരുകയാണെന്നാണ് പ്രസിഡന്റ് വൊളോഡിമിർ സെലെൻസ്‌കി പറഞ്ഞത്. കീവിൽ ആക്രണത്തിനെത്തിയ റഷ്യൻ വിമാനം വെടിവെച്ചിട്ടതായി യുക്രൈൻ പറഞ്ഞു. അതേസമയം യുക്രൈൻ ആയുധംവെച്ച് കീഴടങ്ങിയാൽ ചർച്ചയ്ക്ക് തയ്യാറാണെന്ന് റഷ്യൻ വിദേശകാര്യമന്ത്രി സെർജി ലാവ്റോവ് അറിയിച്ചു.

യുക്രൈനെ പൂർണമായും അധീനതയിലാക്കാൻ പുടിൻ ആഗ്രഹിക്കുന്നില്ല. യുക്രൈനെ നിരായുധീകരിക്കുകയാണ് റഷ്യയുടെ ലക്ഷ്യമെന്നും ലാവ്റോവ് വ്യക്തമാക്കി.

കീവ്: യുക്രൈൻ സംഘർഷത്തിന്റെ പശ്ചാത്തലത്തിൽ ജീവൻ രക്ഷിക്കാനായി ബങ്കറുകളിലും ഭൂഗർഭ മെട്രോ സ്റ്റേഷനുകളിലും അഭയം തേടി ജനങ്ങൾ. യുക്രൈനിൽ റഷ്യ സ്‌ഫോടനങ്ങളും മിസൈൽ, റോക്കറ്റ് ആക്രമണങ്ങളും കടുപ്പിച്ചതോടെയാണ് ജനങ്ങൾ കൂട്ടത്തോടെ സുരക്ഷിത സ്ഥാനത്തേക്ക് മാറാൻ തുടങ്ങിയത്. യുക്രൈനിലുള്ള മലയാളി വിദ്യാർത്ഥികളും വലിയ ദുരിതമാണ് അനുഭവിക്കുന്നത്. പലരുടെയും കൈവശം ഭക്ഷണമോ വെള്ളമോ ഇല്ല. ശുചിമുറികൾ ഇല്ലാത്തതും ഇവരുടെ ബുദ്ധിമുട്ട് വർധിപ്പിക്കുന്നു.

കൊടും തണുപ്പിൽ പുതയ്ക്കാൻ ഒരു പുതപ്പു പോലുമില്ലാതെ ദുരിതത്തിലാണ് ജനങ്ങൾ. കോട്ടുകൾ മാത്രമാണ് തണുപ്പിനെ പ്രതിരോധിക്കാൻ ഇവരുടെ കൈവശമുള്ളത്. അതേസമയം, ഒരുലക്ഷത്തോളം പേർ യുക്രൈനിൽ നിന്നും പലായനം ചെയ്തതായുള്ള വിവരങ്ങളും പുറത്തുവരുന്നുണ്ട്. റൊമേനിയ, പോളണ്ട്, ഹംഗറി തുടങ്ങിയ അയൽ രാജ്യങ്ങളിലേക്കാണ് ഭൂരിഭാഗം പേരും പലായനം ചെയ്തത്.

കീവിലെ സാഹചര്യം ഏത് നിമിഷവും മാറാമെന്ന അവസ്ഥയിലാണ്. കീവിൽ നിന്നും 546 കിലോമീറ്റർ ദൂരമുള്ള സുരക്ഷിത നഗരമായ ലെവീവിലേക്ക് മാറണമെന്നായിരുന്നു ഇന്ത്യൻ എംബസി ആദ്യം വിദ്യാർത്ഥികൾക്ക് നൽകിയിരുന്ന നിർദ്ദേശം. പിന്നീട് കീവിൽ തന്നെ തുടരണമെന്ന് അധികൃതർ നിർദ്ദേശിച്ചു. എ.ടി.എമ്മിൽ നിന്ന് പണം ശേഖരിക്കാനും ആവശ്യമായ രേഖകളുമായി സജ്ജമാവാനും എംബസി അറിയിച്ചിട്ടുണ്ടെന്നും ഇന്ത്യൻ വിദ്യാർത്ഥികൾ വ്യക്തമാക്കി.

കിവ്: യുക്രൈൻ സംഘർഷത്തിൽ റഷ്യയ്‌ക്കെതിരെ രംഗത്തെത്തി കൂടുതൽ ലോകരാജ്യങ്ങൾ. റഷ്യൻ പ്രസിഡന്റ് വ്‌ളാഡിമിർ പുടിനുമായി ഫ്രഞ്ച് പ്രസിഡന്റ് ഇമ്മാനുവൽ മക്രോൺ ഫോണിൽ ബന്ധപ്പെട്ടു. യുക്രൈനിലെ സൈനിക നീക്കം റഷ്യ എത്രയും പെട്ടന്ന് നിർത്തിവയ്ക്കണമെന്ന് മക്രോൺ പുടിനോട് ആവശ്യപ്പെട്ടതായാണ് റിപ്പോർട്ടുകൾ. യുക്രൈൻ പ്രസിഡന്റ് സെലൻസ്‌കിക്ക് പുടിനെ ബന്ധപ്പെടാൻ സാധിക്കുന്നില്ലെന്നും അദ്ദേഹം ആവശ്യപ്രകാരമാണ് പുടിനുമായി സംസാരിച്ചതെന്നും ഫ്രഞ്ച് പ്രസിഡന്റ് അറിയിച്ചു.

റഷ്യയ്ക്ക് ഉപരോധം ഏർപ്പെടുത്താനാണ് കൂടുതൽ രാജ്യങ്ങളുടെ തീരുമാനം. കാനഡ ഉൾപ്പെടെയുള്ള രാജ്യങ്ങളാണ് റഷ്യയ്‌ക്കെതിരെ ഉപരോധം ഏർപ്പെടുത്തുന്നത്. റഷ്യ നടത്തുന്നത് അപകടകരമായ സൈനിക നീക്കമാണെന്നും കർശന ഉപരോധങ്ങൾ ഏർപ്പെടുത്തുമെന്നും കാനേഡിയൻ പ്രധാനമന്ത്രി ജസ്റ്റിൻ ട്രൂഡോ വ്യക്തമാക്കി. റഷ്യൻ എക്‌സ്‌പോർട്ട് പെർമിറ്റുകളും കാനഡ റദ്ദാക്കിയിട്ടുണ്ട്. 62 റഷ്യൻ സ്ഥാപനങ്ങൾക്കും വ്യക്തികൾക്കുമെതിരെ പുതിയ ഉപരോധങ്ങൾ പ്രഖ്യാപിക്കുകയും ചെയ്തു. കിഴക്കൻ യൂറോപ്പിലെ നാറ്റോ ദൗത്യത്തിലേക്ക് 460 കനേഡിയൻ സൈനിക അംഗങ്ങളെയാണ് കാനഡ വിന്യസിച്ചിട്ടുള്ളത്.

ന്യൂസിലൻഡും റഷ്യക്കെതിരെ രംഗത്തെത്തിയിട്ടുണ്ട്. വലിയ നിയന്ത്രണങ്ങളാണ് റഷ്യക്കെതിരെ ന്യൂസിലൻഡ് ഏർപ്പെടുത്തിയത്. റഷ്യൻ അധികൃതർക്ക് ന്യൂസിലൻഡ് യാത്രാ നിയന്ത്രണം ഏർപ്പെടുത്തുകയും റഷ്യൻ സൈന്യത്തിനായുള്ള ചരക്ക് കയറ്റുമതിയും നിരോധിക്കുകയും ചെയ്തു. റഷ്യയുമായുള്ള എല്ലാ ചർച്ചകളും നിർത്തിവച്ചതായും ന്യൂസിലൻഡ് അറിയിച്ചു. ‘സൈനിക ബലത്തിന്റെ പ്രകടമായ ദുരുപയോഗമാണ് റഷ്യ നടത്തുന്നത്. നിരപരാധികളായ മനുഷ്യരുടെ ജീവൻ നഷ്ടമാകും. ഇതിനെതിരെ നിൽക്കേണ്ട സമയമാണിതെന്ന് ന്യൂസിലൻഡ് പ്രധാനമന്ത്രി ജസിന്ത ആന്റൻ പറഞ്ഞു. തായ്‌വാനും റഷ്യയ്ക്ക് സാമ്പത്തിക ഉപരോധം ഏർപ്പെടുത്തി.