International (Page 148)

കീവ്: യുക്രൈനിൽ താൽക്കാലികമായി വെടിനിർത്തൽ പ്രഖ്യാപിച്ച് റഷ്യ. യുദ്ധം ആരംഭിച്ചതിന്റെ പത്താം ദിവസമാണ് റഷ്യ യുക്രൈനിൽ വെടിനിർത്തൽ പ്രഖ്യാപിച്ചത്. യുക്രെയിനിൽ കുടുങ്ങിക്കിടക്കുന്ന ജനങ്ങളെ ഒഴിപ്പിക്കുന്നതിന്റെ ഭാഗമായാണ് നടപടി. ഇന്ത്യൻ സമയം രാവിലെ 11.30 ഓടെയാണ് റഷ്യ യുക്രൈനിൽ വെടിനിർത്തൽ പ്രഖ്യാപിച്ചത്. അതേസമയം, റഷ്യൻ നീക്കത്തോട് യുക്രൈൻ സർക്കാർ ഇതുവരെ ഔദ്യോഗിക പ്രതികരണം നടത്തിയിട്ടില്ല.

മരിയുപോൾ, വോൾനോവാഖ എന്നീ നഗരങ്ങളിലൂടെയാണ് രക്ഷാപ്രവർത്തനം അനുവദിച്ചിരിക്കുന്നതെന്ന് റഷ്യൻ പ്രതിരോധ മന്ത്രാലയം അറിയിച്ചു. വോൾനോവോഖ നഗരത്തിൽ മാത്രം 20,000 ജനങ്ങൾ കുടുങ്ങിക്കിടപ്പുണ്ടെന്നാണ് റിപ്പോർട്ടുകൾ. 1,60,000 പേരെങ്കിലും യുക്രൈനിലുണ്ടെന്നാണ് യുഎൻ ഏജൻസികൾ വ്യക്തമാക്കുന്നത്. വെടിനിർത്തൽ പ്രഖ്യാപിക്കാതെ ജനങ്ങളെ ഒഴിപ്പിക്കാൻ നിലവിലെ സാഹചര്യത്തിൽ കഴിയില്ലെന്ന് റഷ്യയെയും യുക്രൈനെയും ഇന്ത്യ അറിയിച്ചിരുന്നു.

യുക്രൈനിൽ കുടുങ്ങിയ വിദ്യാർത്ഥികളടക്കമുള്ള ഇന്ത്യക്കാരെ ഒഴിപ്പിക്കാൻ റഷ്യ ബസുകൾ തയ്യാറാക്കിയതായുള്ള റിപ്പോർട്ടുകൾ പുറത്തുവന്നിരുന്നു. 130 ബസുകളാണ് റഷ്യ തയ്യാറാക്കിയത്. ഖാർകീവ്, സുമി എന്നിവിടങ്ങളിൽ കുടുങ്ങിയവരെ ബൽഗറോഡ് മേഖല വഴി രക്ഷപ്പെടുത്താനാണ് റഷ്യ ലക്ഷ്യമിടുന്നത്. ഖാർകീവ്, പിസോച്ചിൻ സുമി തുടങ്ങിയ ഇടങ്ങളിൽ മലയാളികൾ ഉൾപ്പടെ നിരവധി ഇന്ത്യക്കാരാണ് കുടുങ്ങി കിടക്കുന്നത്. ഇവരെ തിരികെയെത്തിനുള്ള നടപടികൾ എങ്ങുമെത്തിയിട്ടില്ല. ഇതോടെയാണ് ഇവരെ തിരികെ എത്തിക്കാനായി ഇന്ത്യ റഷ്യയുടെ സഹായം തേടിയത്. രക്ഷാ ദൗത്യത്തിന്റെ സ്ഥിതിഗതികൾ വിലയിരുത്താനായി കഴിഞ്ഞ ദിവസം പ്രധാനമന്ത്രി നരേന്ദ്രമോദി ഉന്നതതല യോഗം വിളിച്ചു ചേർത്തിരുന്നു.

ലണ്ടൻ: യുക്രൈനിൽ നിന്നെത്തുന്ന അഭയാർത്ഥികൾക്ക് നിബന്ധനകൾ ഇല്ലാതെ മൂന്നു വർഷം വരെ രാജ്യത്ത് തുടരാനുള്ള അനുമതി നൽകി ബ്രിട്ടൺ. ഇതുസംബന്ധിച്ച ഉത്തരവ് ബ്രിട്ടൺ പുറത്തിറക്കി. നേരത്തെ ഒരു വർഷത്തെ വിസയായിരുന്നു യുക്രൈൻ അഭയാർത്ഥികൾക്കായി ബ്രിട്ടൺ പ്രഖ്യാപിച്ചിരുന്നത്. യൂറോപ്യൻ യൂണിയനിൽ നിന്നും വിട്ടുപോയതോടെ ബ്രിട്ടൻ പല മേഖലകളിലും ജീവനക്കാരുടെ ക്ഷാമം അനുഭവിക്കുകയാണ്.

ആരോഗ്യ മേഖലയിലും ഹോസ്പിറ്റാലിറ്റി മേഖലയിലുമൊക്കെ ക്ഷാമം അനുഭവപ്പെടുന്നുണ്ട്. ഇത് പരിഹരിക്കുന്നതിന് വേണ്ടിയായിരുന്നു ഇന്ത്യാക്കാർക്കുള്ള വിസ നിയമത്തിൽ ഇളവുകൾ വരുത്തി സ്‌പോൺസർമാരുടെ അവശ്യമില്ലാതെ തന്നെ മൂന്നു വർഷം വരെ ബ്രിട്ടനിൽ താമസിക്കാനും ജോലി ചെയ്യാനുമുള്ള അനുവാദം നൽകിയിരുന്നത്.

സ്റ്റുഡന്റ്‌സ് വിസയിലെത്തുന്നവർക്കും പഠനം പൂർത്തിയാക്കിയതിനു ശെഷം രണ്ടു വർഷം വരെ ജോലിചെയ്ത് ബ്രിട്ടനിൽ താമസിക്കാനുള്ള അനുമതിയും ബ്രിട്ടൺ നൽകിയിരുന്നു. ഇനി മുതൽ ഏതൊരു യുക്രെയിൻ പൗരനും ബ്രിട്ടനിലെത്തി മൂന്നു വർഷം വരെ തൊഴിലെടുത്ത് ജീവിക്കാം. ബ്രിട്ടനിലെത്താവുന്നവരുടെ എണ്ണത്തിന് പരിധി നിശ്ചയിച്ചിട്ടില്ല എന്നതാണ് മറ്റൊരു ശ്രദ്ധേയമായ വസ്തുത. പ്രതിവാരം 6000 വിസ അപേക്ഷകൾ കൈകാര്യം ചെയ്യുവാനുള്ള തയ്യാറെടുപ്പുകൾ ബ്രിട്ടൻ നടത്തിക്കഴിഞ്ഞു. എന്നാൽ ഈ പരിധി ഇനിയും ഉയർത്താനാണ് സാധ്യത.

പെഷവാർ: പാകിസ്താനിൽ പളളിയിൽ ചാവേർ ആക്രമണം. 30 പേരാണ് ആക്രമണത്തിൽ കൊല്ലപ്പെട്ടത്. പെഷവാറിലെ കിസ ഖ്വാനി ബസാർ മേഖലയിലെ പളളിയിലാണ് ആക്രമണം നടന്നത്. വെളളിയാഴ്ച പ്രാർത്ഥന നടക്കുന്ന സമയത്താണ് ആക്രമണം നടന്നത്. പളളിയിൽ കാവൽ നിന്നിരുന്ന പോലീസുകാർക്ക് നേരെ വെടിയുതിർത്ത ചാവേറുകൾ പളളിയുടെ ഉള്ളിൽ കടന്ന സ്‌ഫോടനം നടത്തുകയായിരുന്നു.

ചാവേറുകൾ വെടിവെച്ചതിൽ ഒരു പോലീസുകാരൻ മരണപ്പെട്ടു. ഒരാൾക്ക് ഗുരുതര പരിക്കേൽക്കുകയും ചെയ്തിട്ടുണ്ട്. ബോംബ് സ്ഫോടനത്തിൽ മരിച്ച 30 പേരുടെ മൃതദേഹം ആശുപത്രിയിൽ സൂക്ഷിച്ചിട്ടുണ്ടെന്ന് അധികൃതർ അറിയിച്ചു. 56 പേർക്ക് ഗുരുതരമായി പരിക്കേറ്റിട്ടുണ്ട്. ആക്രമികൾ ഏത് സംഘടനയിൽ പെട്ടവരാണെന്നോ ആക്രമണ ഉദ്ദേശ്യമെന്തെന്നോ ഇതുവരെ കണ്ടെത്തിയിട്ടില്ല.

ഖാർകീവ്: ഖാർകീവ് പൂർണ്ണമായും നിയന്ത്രണത്തിലാക്കി റഷ്യ. എന്നാൽ ഇവിടെ അകപ്പെട്ട ഇന്ത്യൻ പൗരന്മാരെ പുറത്തുകടക്കാൻ റഷ്യ സഹായിക്കുന്നുണ്ടെന്നാണ് വിവരം. ഖാർകീവിലെ ഇന്ത്യക്കാരുടെ ക്യത്യമായ കണക്ക് ലഭ്യമല്ലാത്തത് രക്ഷാദൗത്യത്തിന് തടസം സൃഷ്ടിക്കുന്നുണ്ടെന്ന റിപ്പോർട്ടുകളും പുറത്തുവരുന്നുണ്ട്. ഖാർകീവിലുള്ള ഇന്ത്യാക്കാരുടെ വിവരം തേടി ഏംബസി ഗൂഗിൾ ഫോം പുറത്തിറക്കുകയും ചെയ്തിട്ടുണ്ട്.

ഹാർകീവ് വിട്ട് പിസോച്ചിനിൽ എത്തിയവർ ഒഴികെയുള്ളവരെല്ലാം ഉടൻ തന്നെ ഈ ഗൂഗിൾ ഫോമിൽ വിവരങ്ങൾ നൽകി രജിസ്റ്റർ ചെയ്യണമെന്നാണ് വിദേശകാര്യമന്ത്രാലയത്തിന്റെ നിർദ്ദേശം. എംബസിയുടെ ട്വിറ്റർ ഉൾപ്പെടെയുള്ള സാമൂഹ്യ മാദ്ധ്യമ ഹാൻഡലുകളിൽ നിന്നും ഗൂഗിൾ ഫോം ലിങ്ക് ലഭിക്കും. ഖാർകീവ് വിട്ട് എത്തിയവർ എല്ലാവരും ഈ ലിങ്കിൽ കയറി രജിസ്റ്റർ ചെയ്യണമെന്നും വിദേശകാര്യ മന്ത്രാലയം നിർദ്ദേശിച്ചു. ആദ്യഘട്ടത്തിൽ യുക്രൈനിലുള്ള ഇരുപതിനായിരം ഇന്ത്യക്കാരാണ് രജിസ്റ്റർ ചെയ്തതെന്നും രജിസ്ട്രേഷൻ നടത്താത്ത ധാരാളം പേർ ഇനിയും അവിടെയുണ്ടെന്നും വിദേശകാര്യ മന്ത്രാലയ വക്താവ് അരിന്ദം ബാഗ്ചി വ്യക്തമാക്കി. ഇതുവരെ 18,000 ഇന്ത്യൻ പൗരന്മാരാണ് യുക്രൈൻ വിട്ടത്. 6,400 ഇന്ത്യക്കാരെ തിരികെ എത്തിച്ചു. ഓപ്പറേഷൻ ഗംഗയുടെ കീഴിൽ ഇതുവരെ 30 വിമാനങ്ങൾ സർവീസ് നടത്തിയെന്നും അദ്ദേഹം വിശദമാക്കി.

അടുത്ത 2-3 ദിവസത്തിനുള്ളിൽ ധാരാളം ഇന്ത്യക്കാർ നാട്ടിലേക്കു മടങ്ങിയെത്തും. യുക്രൈന്റെ പടിഞ്ഞാറൻ അതിർത്തി കടക്കാൻ കാത്തിരിക്കുന്ന ഇന്ത്യക്കാരുടെ എണ്ണം കുറഞ്ഞതായും അദ്ദേഹം പറഞ്ഞു. കീവിൽ കൊല്ലപ്പെട്ട കർണാടക സ്വദേശിയായ വിദ്യാർത്ഥി നവീനിന്റെ മൃതദേഹം എത്രയും പെട്ടെന്ന് കൊണ്ടുവരാനാണ് ശ്രമിക്കുന്നതായും അദ്ദേഹം കൂട്ടിച്ചേർത്തു.