International (Page 147)

ന്യൂഡൽഹി: യുദ്ധം അവസാനിപ്പിക്കാൻ ഇന്ത്യയുടെ ഇടപെടൽ ആവശ്യപ്പെട്ട് യുക്രൈൻ. യുക്രൈൻ വിദേശകാര്യ മന്ത്രി ദിമിത്രോ കുലേബയാണ് ഇക്കാര്യം ആവശ്യപ്പെട്ടത്. ശനിയാഴ്ച നടത്തിയ ടെലിവിഷൻ പ്രസംഗത്തിലായിരുന്നു അദ്ദേഹത്തിന്റെ പരാമർശം. യുദ്ധം അവസാനിക്കുന്നത് എല്ലാ രാജ്യങ്ങൾക്കും ഗുണകരമാകുമെന്നും അതിനാൽ യുദ്ധം അവസാനിപ്പിക്കാൻ ഇന്ത്യ ഉൾപ്പെടെയുള്ള രാജ്യങ്ങൾ ഇടപെടണമെന്നും അദ്ദേഹം ആവശ്യപ്പെട്ടു.

യുക്രേനിയൻ കാർഷിക ഉത്പന്നങ്ങളുടെ ഏറ്റവും വലിയ ഉപഭോക്താവാണ് ഇന്ത്യ. യുദ്ധം തുടർന്നാൽ രാജ്യത്തെ കാർഷിക മേഖല താറുമാറാകും. അതുകൊണ്ടു തന്നെ ആഗോള ഭക്ഷ്യ സുരക്ഷയുടെ കാര്യത്തിലും ആശങ്കയുണ്ടാകും. ഈ യുദ്ധം നിർത്തുന്നതാണ് നല്ലതെന്നും അദ്ദേഹം വ്യക്തമാക്കി. യുദ്ധം എല്ലാവരുടെയും താൽപ്പര്യത്തിന് എതിരാണെന്ന് റഷ്യൻ പ്രസിഡന്റ് വ്ളാദിമിർ പുടിനെ ബോധ്യപ്പെടുത്താൻ ഇന്ത്യ ഉൾപ്പെടെ, റഷ്യയുമായി പ്രത്യേക ബന്ധം സൂക്ഷിക്കുന്ന എല്ലാ രാജ്യങ്ങളും തയ്യാറാകണംമെന്നും യുദ്ധം അവസാനിപ്പിക്കാൻ ഇന്ത്യയിലെ സാധാരണ ജനം സമ്മർദം ചെലുത്തണമെന്നും അദ്ദേഹം ആവശ്യപ്പെട്ടു.

അതേസമയം, വിദേശ വിദ്യാർത്ഥികളുടെ വിഷയത്തിൽ റഷ്യ കൃത്രിമം കാണിക്കുന്നത് അവസാനിപ്പിച്ചാൽ അവരെയെല്ലാം സുരക്ഷിതമായി ഒഴിപ്പിക്കും. വെടിനിർത്തൽ അവസാനിപ്പിക്കാനും സാധാരണക്കർക്ക് ഒഴിഞ്ഞുപോകാൻ സമയം നൽകണമെന്നും റഷ്യയോട് അഭ്യർത്ഥിക്കാൻ ഇന്ത്യ, ചൈന, നൈജീരിയ സർക്കാരുകൾ തയ്യാറാകാണമെന്നും അദ്ദേഹം അറിയിച്ചു.

കീവ്: യുക്രൈനിലെ രണ്ടു നഗരങ്ങളിൽ റഷ്യൻ സേന ആറു മണിക്കൂർ വെടിനിറുത്തൽ പ്രഖ്യാപിച്ചെങ്കിലും പലയിടത്തും ആക്രമണം തുടർന്നതിനാൽ രക്ഷാദൗത്യം ഫലപ്രദമായില്ല. റഷ്യ വെടിനിറുത്തൽ ലംഘിച്ചെന്നാണ് യുക്രൈന്റെ ആരോപണം. അതേസമയം, രക്ഷാദൗത്യം യുക്രൈൻ അനുവദിച്ചില്ലെന്ന് റഷ്യ പറഞ്ഞു. വെടിനിറുത്തൽ നടപ്പാക്കാതെ ചർച്ചയ്ക്കില്ലെന്നാണ് യുക്രൈൻ പ്രസിഡന്റ് സെലൻസ്‌കിയുടെ നിലപാട്. കഴിഞ്ഞ ദിവസം നടക്കേണ്ടിയിരുന്ന സമാധാന ചർച്ച തിങ്കളാഴ്ച്ചത്തേക്ക് മാറ്റുകയും ചെയ്തിട്ടുണ്ട്.

റഷ്യ വെടിനിറുത്തൽ പ്രഖ്യാപനം നടത്തിയത് യുക്രൈനിൽ കുടുങ്ങിയവർക്ക് വലിയ ആശ്വാസകരമായ വാർത്തയായിരുന്നു. മരിയുപോൾ, വോൾനോവാഖ എന്നീ നഗരങ്ങളിലൂടെയാണ് രക്ഷാപ്രവർത്തനം അനുവദിച്ചിരിക്കുന്നതെന്നും റഷ്യൻ പ്രതിരോധ മന്ത്രാലയം അറിയിച്ചിരുന്നു. ശനിയാഴ്ച രാവിലെ 10 മണി ( ഇന്ത്യൻ സമയം ഉച്ചയ്ക്ക് 12.30 ) മുതൽ ജനങ്ങളെ ഒഴിപ്പിക്കാനായിരുന്നു പദ്ധതി. എന്നാൽ മരിയുപോളിൽ റഷ്യൻ സേന ഷെല്ലാക്രമണം തുടർന്നതിനാൽ ഒഴിപ്പിക്കൽ മാറ്റിവച്ചെന്ന് നഗര കൗൺസിൽ അറിയിക്കുകയായിരുന്നു.

അതേസമയം, മരിയുപോൾ നഗരത്തിൽ വെള്ളവും വൈദ്യുതിയും നിലച്ചു. ഇവിടേക്കുള്ള ഭക്ഷണവിതരണവും നിലച്ചിരിക്കുകയാണ്.

മോസ്‌കോ: യുക്രൈനിൽ യുദ്ധത്തിന് വേണ്ടി റഷ്യ ഇറങ്ങി തിരിച്ചതിന്റെ പിന്നിലെ കാരണം വെളിപ്പെടുത്തി റഷ്യൻ പ്രസിഡന്റ് വ്‌ളാഡിമിർ പുടിൻ. ഒരു ആണവായുധ ശക്തിയാകാനുള്ള യുക്രൈനിന്റെ ആഗ്രഹമാണ് റഷ്യയെ പ്രകോപിപ്പിച്ചതിനുള്ള മുഖ്യ കാരണമെന്നാണ് പുടിൻ വ്യക്തമാക്കുന്നത്.

യുക്രൈൻ ആണവായുധ ശക്തിയാകുന്നത് റഷ്യയുടെ സുരക്ഷിതത്വത്തിന് ഭീഷണിയാണെന്നും യുക്രൈൻ നേരിട്ട് പ്രയോഗിച്ചില്ലെങ്കിൽ കൂടെ റഷ്യയ്‌ക്കെതിരെ ആണവായുധം ഉപയോഗിച്ച് എങ്ങനെ പ്രവർത്തിക്കണമെന്ന് യുക്രൈനെ ഉപദേശിക്കാൻ അമേരിക്കയും നാറ്റോയും അടക്കമുള്ള ശത്രുക്കൾ ഉള്ളപ്പോൾ റഷ്യ സുരക്ഷിതമാണെന്ന് കരുതാനാകില്ലെന്നും പുടിൻ പറയുന്നു. റഷ്യയിലെ ഒരു ന്യൂസ് ഏജൻസിക്ക് നൽകിയ അഭിമുഖത്തിലായിരുന്നു പുടിന്റെ പ്രതികരണം.

യുക്രൈനിലെ യഷ്മാഷ് എന്ന സർക്കാർ നിയന്ത്രിത വിമാനനിർമാണ കമ്പനി മുൻപ് സോവിയറ്റ് യൂണിയന് വേണ്ടി ആണവായുധങ്ങൾ നിർമിക്കുന്നതിൽ പങ്കെടുത്തിരുന്നു. യുക്രൈൻ ഇപ്പോഴും മറ്റ് പല ആവശ്യങ്ങൾക്കും വേണ്ടി റേഡിയോ ആക്ടീവ് മൂലകങ്ങൾ ശേഖരിക്കുന്നുണ്ടെന്നും ഇത് ആണവായുധങ്ങൾ ആയി മാറാൻ അധികം സമയം വേണ്ടിവരില്ലെന്നും റഷ്യ ഭയപ്പെടുന്നതായി പുടിൻ അറിയിച്ചു.

കീവ്: രാജ്യത്തെ സ്ഥിതിഗതികളെല്ലാം ശരിയാകുമെന്ന പ്രതീക്ഷ പങ്കുവെച്ച് യുക്രൈൻ പ്രസിഡന്റ് വ്ളാദിമിർ സെലൻസ്‌കി. രാജ്യം വിട്ടുപോയവർക്ക് തിരിച്ചുവരാൻ കഴിയുന്ന കാലം വരുമെന്ന് അദ്ദേഹം വ്യക്തമാക്കി. റഷ്യ- യുക്രൈൻ സംഘർഷം നിലനിൽക്കുന്ന സാഹചര്യത്തിലാണ് രാജ്യം പഴയസ്ഥിതിയിലാകുമെന്ന പ്രതീക്ഷ പങ്കുവെച്ച് സെലസ്‌കി രംഗത്തെത്തിയത്.

അതേസമയം സൈനിക സഖ്യമായ നാറ്റോയ്‌ക്കെതിരെ അദ്ദേഹം രൂക്ഷ വിമർശനം ഉന്നയിക്കുകയും ചെയ്തു. റഷ്യക്കെതിരെ ശക്തമായ നടപടി സ്വീകരിക്കാത്തതിനാണ് സെലൻസ്‌കി നാറ്റോയ്‌ക്കെതിരെ വിമർശനം ഉന്നയിച്ചത്. യുക്രൈനെ ആക്രമിക്കാൻ നാറ്റോ റഷ്യക്ക് ഗ്രീൻ സിഗ്നൽ നൽകിയെന്ന് അദ്ദേഹം പറഞ്ഞു. യുക്രൈന് മുകളിലെ വ്യോമപാത അടക്കാൻ നാറ്റോ തയ്യാറാകുന്നില്ല. യുക്രൈനിൽ റഷ്യയുടെ വ്യോമാക്രമണം നിരവധി സാധാരണക്കാരുടെ ജീവനെടുക്കുന്നുണ്ടെന്നും അദ്ദേഹം വ്യക്തമാക്കി.

അതേസമയം, യുക്രൈനിൽ റഷ്യ താത്ക്കാലികമായി വെടിനിർത്തൽ പ്രഖ്യാപിച്ചിട്ടുണ്ട്. യുദ്ധം ആരംഭിച്ചതിന്റെ പത്താം ദിവസമാണ് റഷ്യ യുക്രൈനിൽ വെടിനിർത്തൽ പ്രഖ്യാപിച്ചത്. യുക്രെയിനിൽ കുടുങ്ങിക്കിടക്കുന്ന ജനങ്ങളെ ഒഴിപ്പിക്കുന്നതിന്റെ ഭാഗമായാണ് നടപടി. ഇന്ത്യൻ സമയം രാവിലെ 11.30 ഓടെയാണ് റഷ്യ യുക്രൈനിൽ വെടിനിർത്തൽ പ്രഖ്യാപിച്ചത്. എന്നാൽ, റഷ്യൻ നീക്കത്തോട് യുക്രൈൻ സർക്കാർ ഇതുവരെ ഔദ്യോഗിക പ്രതികരണം നടത്തിയിട്ടില്ല.