യുക്രൈൻ സംഘർഷത്തിന്റെ പശ്ചാത്തലത്തിൽ റഷ്യയിൽ ഹോളിവുഡ് ചിത്രങ്ങൾ റിലീസ് ചെയ്യുന്നതിൽ നിന്ന് പിന്മാറി നിർമാതാക്കൾ. യൂണിവേഴ്സ്, പാരമൗണ്ട്, സോണി, ഡിസ്നി, വാർണർ ബ്രോസ് തുടങ്ങിയ ഭീമൻ നിർമാണ കമ്പനികളാണ് തങ്ങളുടെ പുതിയ ചിത്രങ്ങൾ റഷ്യയിൽ വിതരണം ചെയ്യില്ലെന്ന് തീരുമാനിച്ച് രംഗത്തെത്തിയത്.
ഡിസ്നിയാണ് ഇക്കാര്യത്തിൽ ആദ്യം നിലപാട് വ്യക്തമാക്കിയത്. മാർച്ച് 10 ന് ഡിസ്നിയുടെ ഏറ്റവും പുതിയ ചിത്രമായ ടേണിങ് റെഡ് റഷ്യയിൽ റിലീസ് ചെയ്യാൻ തീരുമാനിച്ചിരുന്നു. എന്നാൽ യുക്രൈനിൽ റഷ്യയുടെ അധിനിവേശം തുടരുന്ന സാഹചര്യത്തിൽ തങ്ങളുടെ സിനിമ പിൻവലിക്കുകയാണെന്ന് അറിയിച്ച് ഡിസ്നി രംഗത്തെത്തിയിരുന്നു.
യാതൊരു പ്രകോപനവുമില്ലാതെ റഷ്യ യുക്രൈനെ ആക്രമിക്കുകയും അവിടെ ജീവിക്കുന്ന സാധാരണ ജനങ്ങളെ കടുത്ത പ്രതിസന്ധിയിലേക്ക് തള്ളി വിടുകയും ചെയ്തുവെന്നും യുക്രൈനെതിരെയുള്ള സൈനിക നടപടി തുടരുന്നിടത്തോളം കാലം റഷ്യയിൽ ഡിസ്നിയുടെ ചിത്രങ്ങൾ റിലീസ് ചെയ്യുന്നില്ലെന്നുമാണ് ഡിസ്നി വ്യക്തമാക്കിയിട്ടുള്ളത്. വാർണർ ബ്രോസിന്റെ ബാറ്റ്മാൻ, സോണിയുടെ മൊർബിയസ്, പാരമൗണ്ടിന്റെ ദ ലോസ്റ്റ് സിറ്റി തുടങ്ങിയ ചിത്രങ്ങളും റഷ്യയിൽ റിലീസ് ചെയ്യുന്നില്ലെന്നാണ് തീരുമാനിച്ചിട്ടുള്ളത്.