International (Page 146)

കീവ്: റഷ്യൻ അധിനിവേശത്തെ ചെറുക്കാനുള്ള ശ്രമത്തിൽ യുക്രൈൻ ജനത. റഷ്യൻ നീക്കത്തെ ചെറുക്കാൻ വേണ്ടി ആയുധങ്ങൾ ഉപയോഗിക്കുന്ന രീതികളെകുറിച്ചുള്ള ക്രാഷ് കോഴ്‌സുകളിൽ പങ്കെടുക്കുന്ന തിരക്കിലാണ് റഷ്യൻ ജനതയിൽ ഭൂരിഭാഗം പേരും. ഡോക്ടർമാർ, സ്‌കൂൾ അദ്ധ്യാപകർ, ഫുട്ബാൾ താരങ്ങൾ തുടങ്ങിയവരും ഇക്കൂട്ടത്തിൽ ഉൾപ്പെടുന്നുണ്ട്. തോക്കുകളും മറ്റ് ആയുധങ്ങളും ഉപയോഗിച്ചിട്ടില്ലാത്ത എന്നാൽ റഷ്യയ്‌ക്കെതിരായ യുദ്ധത്തിൽ പങ്കെടുക്കാൻ താത്പര്യമുള്ളവർക്ക് വേണ്ടി യുക്രെയിൻ സൈന്യം നടത്തുന്ന ആയുധപരിശീലനങ്ങൾ രാജ്യത്തൊട്ടാകെ നടക്കുന്നുണ്ട്.

യുക്രെയിനിലെ ലിവിവ് പട്ടണത്തിൽ നടക്കുന്ന ഇത്തരമൊരു ക്രാഷ് കോഴ്‌സിൽ ഏകദേശം മുപ്പതോളം പേർ പങ്കെടുക്കുന്നുണ്ട്. 21-ാം നൂറ്റാണ്ടിൽ നമുക്ക് ജീവിക്കാൻ വേണ്ടി വരില്ലെന്ന് കരുതിയിരുന്ന ചില അറിവുകൾ നേടിയെടുക്കുന്ന തിരക്കിലാണ് തങ്ങളെന്ന് ക്രാഷ് കോഴ്‌സിൽ പങ്കെടുക്കുന്ന വ്യക്തിയായ ആന്ദ്രെ സെൻകെവ് അറിയിച്ചു. പലരും റഷ്യൻ സൈനികരെ നേരിടാൻ ഒരുങ്ങിയിട്ടില്ലെങ്കിലും രാജ്യത്തിന് വേണ്ടി അത് ചെയ്യാൻ തയ്യാറാണെന്നും അദ്ദേഹം മാദ്ധ്യമങ്ങളോട് പ്രതികരിച്ചു.

അതേസമയം, യുക്രൈനിൽ അവശേഷിക്കുന്ന വിദ്യാർത്ഥികൾ വിവരങ്ങൾ ഓപ്പറേഷൻ ഗംഗയിൽ എത്രയും വേഗം രജിസ്റ്റർ ചെയ്യണമെന്ന് കീവിലെ ഇന്ത്യൻ എംബസി നിർദ്ദേശം നൽകി.

വാഷിങ്ടൺ: റഷ്യയുടെ ആക്രമണത്തെ പ്രതിരോധിക്കാൻ യുക്രൈന് യുദ്ധവിമാനങ്ങൾ നൽകുന്നതിന് പോളണ്ടുമായി ചില ധാരണകളിലെത്താൻ ചർച്ചകൾ നടത്തുകയാണെന്ന് അമേരിക്ക. അമേരിക്കൻ സെക്രട്ടറി ഓഫ് സ്റ്റേറ്റ് ആന്റണി ബ്ലിങ്കെനാണ് ഇക്കാര്യം അറിയിച്ചത്. ‘പോളണ്ട് യുക്രൈന് യുദ്ധവിമാനങ്ങൾ നൽകുന്നതിനുള്ള സാധ്യതകളെക്കുറിച്ച് തങ്ങൾ ഇപ്പോൾ സജീവമായി ഉറ്റുനോക്കുകയാണ്. റഷ്യൻ നിർമിത വിമാനങ്ങൾ യുക്രൈന് നൽകാൻ പോളണ്ട് തീരുമാനിച്ചാൽ അവർക്ക് പകരം വിമാനങ്ങൾ നൽകാൻ തങ്ങൾക്ക് കഴിയുമോയെന്ന് പരിശോധിക്കുകയാണെന്നും അദ്ദേഹം വ്യക്തമാക്കി. മോൾഡോവ സന്ദർശനത്തിനിടെയാണ് അദ്ദേഹം ഇക്കാര്യം വ്യക്തമാക്കിയത്.

അതേസമയം, അമേരിക്കയുടെ കിഴക്കൻ യൂറോപ്യൻ സഖ്യകക്ഷികളിൽ നിന്ന്, ഉപയോഗിച്ച റഷ്യൻ യുദ്ധവിമാനങ്ങൾ തങ്ങൾക്ക് നൽകാനുള്ള നടപടികൾക്ക് മുൻകൈ എടുക്കണമെന്ന് യുഎസ് കോൺഗ്രസ് അംഗങ്ങളുമായി ശനിയാഴ്ച നടത്തിയ ചർച്ചയിൽ യുക്രൈനിയൻ പ്രസിഡന്റ് വോളോദിമിർ സെലെൻസ്‌കി ആവശ്യപ്പെട്ടിരുന്നുവെനന്് ഡെമോക്രാറ്റ് സെനറ്റ് മെജോറിറ്റി നേതാവ് ചക്ക് ഷുമർ വെളിപ്പെടുത്തിയതിനു പിന്നാലെയാണ് ആന്റണി ബ്ലിങ്കൻ ഇതുസംബന്ധിച്ച വെളിപ്പെടുത്തൽ നടത്തിയത്.

പോളണ്ട് സോവിയറ്റ് കാലഘട്ടത്തിലെ യുദ്ധവിമാനങ്ങൾ യുക്രൈന് നൽകാൻ യുഎസും പോളണ്ടും ഒരുമിച്ച് പ്രവർത്തിക്കുന്നുണ്ടെന്ന് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്തിരുന്നു.

മോസ്‌കോ: യുദ്ധം അവസാനിക്കണമെങ്കിൽ യുക്രൈൻ പോരാട്ടം നിർത്തണമെന്ന് റഷ്യൻ പ്രസിഡന്റ് വ്‌ളാഡിമിർ പുടിൻ. റഷ്യയുടെ ആവശ്യങ്ങൾ യുക്രൈൻ അംഗീകരിക്കണമെന്നും അദ്ദേഹം അഭിപ്രായപ്പെട്ടു. തുർക്കി പ്രസിഡൻറ് എർദോഗനുമായുള്ള സംഭാഷണത്തിലായിരുന്നു പുടിൻ ഇക്കാര്യം അറിയിച്ചത്. കൃത്യമായ പദ്ധതിയോട് കൂടിയാണ് നിലവിലെ ഓപ്പറേഷൻ നടക്കുന്നതെന്നും യാഥാർത്ഥ്യം ഉൾക്കൊണ്ട് ചർച്ചകളോട് യുക്രൈൻ ക്രിയാത്മകമായി ഇടപെടുമെന്നാണ് കരുതുന്നതെന്നും പുടിൻ പറഞ്ഞതായാണ് റിപ്പോർട്ടുകൾ.

അതേസമയം വിന്നിറ്റ്‌സ്യ നഗരത്തിൽ റഷ്യ മിസൈലാക്രമണം നടത്തിയെന്നാണ് യുക്രൈൻ ആരോപിക്കുന്നത്. എട്ട് മിസൈലുകൾ നഗരത്തിൽ പതിച്ചെന്നും യുക്രൈന് മേൽ നോ ഫ്‌ളൈ സോൺ ഉടൻ ഏർപ്പെടുത്തണമെന്നും സെലൻസ്‌കി അറിയിച്ചു.

മരിയുപോൾ നഗരപരിധിയിൽ രക്ഷാപ്രവർത്തനത്തിനായി റഷ്യ വെടിനിർത്തൽ പ്രഖ്യാപിച്ചിട്ടുണ്ട്. ഇന്ത്യൻ സമയം രാത്രി 12.30 വരെ പതിനൊന്ന് മണിക്കൂർ നേരത്തേക്ക് ആക്രമണം നിർത്തിവയ്ക്കാനാണ് റഷ്യൻ സേനയും മരിയുപോൾ നഗര ഭരണകൂടവും തമ്മിൽ ധാരണയായത്. ബസുകളിലും കാറുകളിലുമൊക്കെയായി പരമാവധി പേരെ ഒഴിപ്പിക്കാനാണ് അധികൃതരുടെ നീക്കം.

വാഷിങ്ടൺ: റഷ്യയിലുള്ള അമേരിക്കൻ പൗരന്മാർ ഉടൻ രാജ്യം വിടണമെന്ന് മുന്നറിയിപ്പ് നൽകി അമേരിക്ക. റഷ്യയിലേക്ക് യാത്ര നിശ്ചയിച്ചവർ അത് റദ്ദാക്കണമെന്നും അമേരിക്ക ആവശ്യപ്പെട്ടു. അമേരിക്കൻ വിദേശകാര്യ വകുപ്പാണ് ഇതുസംബന്ധിച്ച നിർദ്ദേശം നൽകിയത്.

അമേരിക്കൻ പൗരന്മാരെ റഷ്യൻ സർക്കാർ അകാരണമായി പീഡിപ്പിക്കുന്നതായി വിവരമുണ്ട്. ഇനി സ്ഥിതി ഗുരുതരമായേക്കാം. എല്ലാവരെയും സഹായിക്കാൻ റഷ്യയിലെ അമേരിക്കൻ എംബസിക്ക് പരിമിതിയുണ്ടെന്നും അതിനാൽ ഇപ്പോൾത്തന്നെ റഷ്യ വിടണമെന്നും അമേരിക്കൻ വിദേശകാര്യ വകുപ്പ് പുറപ്പെടുവിച്ച മുന്നറിയിപ്പിൽ വ്യക്തമാക്കുന്നു. റഷ്യയിലെ സാഹചര്യം ഏതു നിമിഷവും മാറാമെന്നും ഇപ്പോൾത്തന്നെ യാത്രാ മാർഗങ്ങൾ പരിമിതമാണെന്നും മുന്നറിയിപ്പിലുണ്ട്. പൗരന്മാർ റഷ്യ വിടണമെന്ന് നേരത്തെ കാനഡയും നിർദ്ദേശം നൽകിയിരുന്നു.

അതേസമയം റഷ്യയ്ക്ക് എതിരായ ഉപരോധങ്ങൾ യുദ്ധപ്രഖ്യാപനത്തിന് തുല്യമെന്ന് വ്‌ലാദിമിർ പുടിൻ അറിയിച്ചിരുന്നു. യുക്രൈനുമേൽ നാറ്റോ വ്യോമ നിരോധന മേഖല പ്രഖ്യാപിച്ചാൽ അതിനെ യുദ്ധമായി കണക്കാക്കുമെന്നും പുടിൻ അറിയിച്ചിരുന്നു.