General (Page 1,514)

കോട്ടയം: സിം കാർഡ് ബ്ലോക്ക് ആകുമെന്ന തരത്തിൽ സന്ദേശങ്ങൾ അയച്ച് പുതിയ തട്ടിപ്പ് നടത്തുന്ന സംഘം വ്യാപകമാകുന്നു. കെവൈസി (വ്യക്തിഗത വിവരം) ഇല്ലാത്തതിനാൽ മൊബൈൽ നമ്പർ ഉടൻ സസ്‌പെൻഡ് ആകുമെന്ന് പറഞ്ഞ് ഫോണിൽ സന്ദേശങ്ങൾ അയച്ച് പണം ചോർത്തിയെടുക്കുന്നതാണ് തട്ടിപ്പ് സംഘത്തിന്റെ രീതി.

ബിഎസ്എൻഎൽ നമ്പറുകളെ ലക്ഷ്യമിട്ടാണ് ഇത്തരത്തിൽ സന്ദേശമെത്തുന്നത്. സിം കാർഡ് ഇപ്പോൾ ബ്ലോക്ക് ആകും, ഉടൻ തന്നെ താഴെ തന്നിരിക്കുന്ന കസ്റ്റമർ കെയർ നമ്പറുമായി ബന്ധപ്പെടുക എന്ന തരത്തിലുള്ള സന്ദേശങ്ങളായിരിക്കും ലഭിക്കുക. ഈ നമ്പറിൽ ബന്ധപ്പെടുമ്പോൾ ഹിന്ദി കലർന്ന ഇംഗ്ലിഷിൽ ആയിരിക്കും സംസാരിക്കുക. ആദ്യം ആധാർ നമ്പർ അടക്കമുള്ളവയാണ് ഇവർ ആവശ്യപ്പെടുന്നത്. നേരിൽ വരേണ്ടതില്ലെന്നും ഒരു ലിങ്ക് അയക്കാം അതിൽ വ്യക്തിഗത വിവരങ്ങൾ നൽകിയാൽ മതിയെന്നും പിന്നീട് അറിയിക്കും.

ലിങ്കിൽ ക്ലിക്ക് ചെയ്താൽ നിങ്ങളുടെ ഫോണിൽ ഇൻസ്റ്റാൾ ആകുന്നതു ഫോൺ മറ്റ് സ്ഥലങ്ങളിൽ നിന്നു നിയന്ത്രിക്കാൻ സാധിക്കുന്ന റിമോട്ട് ആപ്ലിക്കേഷനുകൾ ആകും. ഇതിന്റെ ആക്‌സസ് നൽകുന്നതു വഴി മൊബൈൽ ഫോണിലെ ആക്ടിവിറ്റികൾ തട്ടിപ്പുകാർക്ക് കാണാൻ സാധിക്കും. അടുത്തതായി 10 രൂപയ്ക്ക് ബിഎസ്എൻഎൽ നമ്പർ റീചാർജ് ചെയ്യാൻ ആവശ്യപ്പെടും. ഇങ്ങനെ റീചാർജ് ചെയ്യുമ്പോൾ റിമോട്ട് ആക്‌സസ് ആപ്പു വഴി കാർഡ് നമ്പർ, ഒടിപി തുടങ്ങിയ വിവരങ്ങൾ ശേഖരിച്ച് ബാങ്കിൽ നിന്ന് തുക തട്ടിയെടുക്കും. ഫോണിന്റെ പ്ലാൻ അവസാനിക്കും എന്നു പറഞ്ഞും ഇതേ രീതിയിൽ തട്ടിപ്പ് നടക്കുന്നുണ്ടെന്നു റിപ്പോർട്ടുകളുണ്ട്. ഇത്തരം തട്ടിപ്പ് സംഘങ്ങൾക്കെതിരെ ജാഗ്രത പാലിക്കണമെന്നാണ് നിർദ്ദേശം.

തിരുവനന്തപുരം: അനർഹമായി ബിപിഎൽ കാർഡ് കൈവശം വെച്ചിരിക്കുന്നവർ ഈ മാസം 30നകം തിരികെ ഏൽപ്പിക്കണമെന്ന് ഭക്ഷ്യമന്ത്രി ജി ആർ അനിൽ. സൗജന്യ ഭക്ഷ്യക്കിറ്റ് ആവശ്യമില്ലാത്തവരെ ഒഴിവാക്കണമെന്നാണ് തന്റെ അഭിപ്രായമെന്നും അദ്ദേഹം പറഞ്ഞു. സൗജന്യ കിറ്റ് ആവശ്യമാണെങ്കിൽ അത്‌ നൽകുന്നത് തുടരുമെന്നും ഭക്ഷ്യമന്ത്രി വ്യക്തമാക്കി. ഒരു സ്വകാര്യ ചാനലിനോട് ആണ് മന്ത്രി ഇക്കാര്യം വ്യക്തമാക്കിയത്.

വരുമാനമുള്ളവർക്ക് കിറ്റ് ആവശ്യമില്ലെങ്കിൽ അത് വേണ്ടെന്ന് വെക്കാനുള്ള സംവിധാനം ഒരുക്കം. ഇതിനായുള്ള പ്രത്യേക പദ്ധതി മുഖ്യമന്ത്രിയുടെ ശ്രദ്ധയിൽപ്പെടുത്തിയിട്ടുണ്ടെന്നും ജി ആർ അനിൽ അറിയിച്ചു.

റേഷൻകടയുമായി ബന്ധപ്പെട്ട് പ്രവർത്തിക്കുന്ന നാൽപ്പതോളം പേരാണ് ഇതുവരെ കൊവിഡ് ബാധിച്ച് മരിച്ചത്. ഇവരുടെ കുടുംബാംഗങ്ങളെ സഹായിക്കാനുള്ള പദ്ധതിയെക്കുറിച്ച് സർക്കാർ ചിന്തിക്കുന്നുണ്ട്. കുട്ടികൾക്കായുള്ള ഭക്ഷ്യക്കിറ്റ് വീടുകളിൽ എത്തിച്ചു നൽകുന്നതിനെക്കുറിച്ചും സംസ്ഥാന സർക്കാർ ആലോചിക്കുന്നുണ്ട്.

ജൂലൈ മാസം ആദ്യം വരെ സൗജന്യ ഭക്ഷ്യ കിറ്റ് നൽകുന്നതിനാണ് ഇതുവരെ ക്രമീകരണം ഒരുക്കിയിരിക്കുന്നത്. സൗജന്യ ഭക്ഷ്യ കിറ്റ് നൽകുന്നത് തുടരേണ്ട സാഹചര്യമുണ്ടായാൽ ക്യാബിനറ്റ് കൂടി ഇക്കാര്യത്തിൽ അന്തിമ തീരുമാനമെടുക്കുമെന്നും അദ്ദേഹം കൂട്ടിച്ചേർത്തു.

കണ്ണൂർ: കാലം മാറുന്നതിനൊപ്പം മാറ്റങ്ങളുമായി കുടുംബശ്രീയും. മൊബൈൽ ഫോൺ റിപ്പയറിംഗ് മുതൽ ഓൺലൈൻ വിപണനം വരെയുള്ള ന്യൂജൻ സംരംഭങ്ങളുമായാണ് കുടുംബശ്രീയുടെ മുന്നേറ്റം. ഇതുവരെ കണ്ടതിൽ നിന്നും വ്യത്യസ്തമായി പുതിയ മാറ്റങ്ങളോടെ പുതിയ ഭാവത്തിലായിരിക്കും പ്രവർത്തനമെന്ന വ്യക്തമായ സൂചനകളാണ് സംസ്ഥാന കുടുംബശ്രീ മിഷന്റെ ഭാഗത്ത് നിന്നും ലഭിക്കുന്നത്. ബൃഹത്തായ സ്റ്റാർട്ട് ആപ്പ് പദ്ധതികൾ മുതൽ ചെറുകിട സംരംഭങ്ങൾ വരെ കുടുംബശ്രീയിലൂടെ നടപ്പിലാക്കാനാണ് പദ്ധതി.

വൻകിട സംരംഭങ്ങൾ തുടങ്ങുക വഴി കൂടുതൽ തൊഴിൽ അവസരമുണ്ടാക്കുകയാണ് കുടുംബശ്രീയുടെ ലക്ഷ്യം. സംസ്ഥാന വ്യാപകമായി കുടുംബശ്രീ യൂണിറ്റുകളുടെ ഭാഗമായി തന്നെ ന്യൂജനറേഷൻ സംരംഭങ്ങൾ കൊണ്ടുവരാനാണ് തദ്ദേശ സ്വയംഭരണ വകുപ്പ് ലക്ഷ്യമിടുന്നത്. തദ്ദേശ സ്വയം ഭരണ മന്ത്രി എം.വി ഗോവിന്ദനാണ് ഇക്കാര്യം അറിയിച്ചത്. ഇതു സംബന്ധിച്ച ഉത്തരവ് ഉടൻ പുറപ്പെടുവിപ്പിക്കുമെന്നും അദ്ദേഹം വ്യക്തമാക്കി.

18 വയസിനും 35 വയസിനും ഇടയിലുള്ള യുവതികൾക്കായിരിക്കും ന്യൂജെൻ സംരംഭങ്ങളിൽ അംഗത്വം. ഓരോ ഗ്രാമപഞ്ചായത്ത് വാർഡിലും ഓരോ പുതിയ യൂണിറ്റ് ഈ മാസം അവസാനത്തോടെ നിലവിൽ വരും. സംസ്ഥാനത്ത് ഇരുപതിനായിരത്തോളം വാർഡുകളാണുള്ളത്. കുടുംബശ്രീ ഏരിയാ ഡെവലപ്പ്‌മെന്റ് സൊസെറ്റിക്ക് കീഴിലായിരിക്കും ഇവയുടെ പ്രവർത്തനങ്ങൾ നടക്കുക. കേരളത്തിലെ രണ്ടേക്കാൽ ലക്ഷം കുടുംബശ്രീകളിലായി 45 ലക്ഷത്തോളം അംഗങ്ങളാണുള്ളത്. അഭ്യസ്ത വിദ്യരും സാങ്കേതിക വിദഗ്ദ്ധരുമായ യുവതലമുറ ഇതിലേക്ക് വന്നാൽ ആധുനിക കാർഷിക ഉപകരണങ്ങളും യന്ത്രങ്ങളും പ്രവർത്തിപ്പിച്ചു കൊണ്ടുള്ള സംരംഭങ്ങൾ തുടങ്ങാൻ കഴിയുമെന്നാണ് തദ്ദേശ സ്വയംഭരണ വകുപ്പിന്റെ പ്രതീക്ഷ. ഓരോ ഗ്രാമപഞ്ചായത്ത് പരിധിയിലും ഓരോ പുതിയ ന്യൂജെൻ യൂണിറ്റുകൾ ജൂൺ മാസത്തിലായിരിക്കും നിലവിൽ വരുന്നത്. അടിമുടി മാറ്റങ്ങളോടെ മുഖം മിനുക്കി എത്തുന്ന കുടുംബശ്രീകൾ നാടിന്റെ മുഖച്ഛായ തന്നെ മാറ്റുമെന്നാണ് പ്രതീക്ഷിക്കപ്പെടുന്നത്.

തിരുവനന്തപുരം; സോഷ്യൽ മീഡിയാ പ്ലാറ്റ്‌ഫോമായ ക്ലബ് ഹൗസിൽ സാന്നിദ്ധ്യം അറിയിച്ച് കേരളാ പോലീസ്. തങ്ങളുടെ ഫേസ്ബുക്ക് പേജിലൂടെയാണ് അക്കൗണ്ട് എടുത്ത വിവരം കേരളാ പോലീസ് ജനങ്ങളെ അറിയിച്ചത്. വളരെ രസകരമായ രീതിയിലാണ് പോലീസ് ഈ വിവരം പൊതുജനങ്ങളുമായി പങ്കുവെച്ചിരിക്കുന്നത്. ‘നിങ്ങളെവിടെ പോയാലും കൂടെ ഞങ്ങളുണ്ടാകും, ഒപ്പം കൂടിക്കോ’ എന്നാണ് ക്ലബ് ഹൗസ് ലിങ്ക് സഹിതം ഷെയർ ചെയ്ത് കൊണ്ട് പങ്കുവെച്ചിരിക്കുന്ന പോസ്റ്റിൽ കേരളാ പൊലീസ് നൽകിയിരിക്കുന്ന ക്യാപ്ഷൻ.

മലയാളികളുടെ പ്രിയ ഹാസ്യതാരമായ കൊച്ചിൻ ഫനീഫയുടെ ചിത്രം ഉപയോഗിച്ച് രസകരമായ ഒരു മീമിയും പോലീസ് ഒരുക്കിയിട്ടുണ്ട്. വ്യാജ ഐ.ഡികളെ നിയന്ത്രിക്കാനും ചർച്ചകൾ നിരീക്ഷിക്കാനും പോലീസിന് ക്ലബ് ഹൗസിൽ അക്കൗണ്ട് ആവശ്യമാണ്. അതിനാലാണ് ക്ലബ് ഹൗസിൽ അക്കൗണ്ട് ആരംഭിക്കാൻ പോലീസ് തീരുമാനിച്ചത്.

ക്ലബ് ഹൗസിൽ തങ്ങളുടെ വ്യാജ ഐ.ഡികൾ ഉണ്ടാക്കിയതായി പരാതിപ്പെട്ട് നിരവധി സിനിമ താരങ്ങൾ രംഗത്തെത്തിയിരുന്നു. സുരേഷ് ഗോപി, ദുൽഖർ സൽമാൻ, ടോവിനോ തോമസ്, നിവിൻ പോളി, ആസിഫ് അലി, സാനിയ അയ്യപ്പൻ എന്നിങ്ങനെ നിരവധി സിനിമാ താരങ്ങളാണ് ക്ലബ് ഹൗസിൽ വ്യാജ പ്രൊഫൈൽ ഉണ്ടാക്കിയതായി അറിയിച്ചത്. ഈ സാഹചര്യത്തിൽ കൂടിയാണ് പോലീസ് ക്ലബ് ഹൗസിൽ അക്കൗണ്ട് തുടങ്ങിയത്.

തിരുവനന്തപുരം: എന്റെ മരം എന്റെ സ്വപ്നം എന്ന പദ്ധതിയുടെ ഭാഗമായി നടന്ന ഫല വൃക്ഷ തൈ നടീലിന്റെ സംസ്ഥാനതല ഉദ്ഘാടനം നിർവ്വഹിച്ച് വിദ്യാഭ്യാസ മന്ത്രി വി ശിവൻകുട്ടി. സ്വന്തം വസതിയിൽ മരം നട്ടായിരുന്നു മന്ത്രി പദ്ധതി ഉദ്ഘാടനം ചെയ്തത്. മന്ത്രിയുടെ ഭാര്യാപിതാവ് യശ:ശരീരനായ പി ഗോവിന്ദപിള്ളയുടെ നാമത്തിലാണ് അദ്ദേഹം മരം നട്ടത്. ചാമ്പക്കയാണ് അദ്ദേഹം നട്ടത്.

ലോക പരിസ്ഥിതി ദിനത്തോടനുബന്ധിച്ചാണ് പദ്ധതിയ്ക്ക് ഇന്ന് തുടക്കം കുറിച്ചത്. സ്റ്റുഡൻറ് പോലീസ് കേഡറ്റ് തിരുവനന്തപുരം സിറ്റിയാണ് പദ്ധതി സംഘടിപ്പിച്ചത്. എസ് പി സി കേഡറ്റുകളും സിറ്റി നോഡൽ ഓഫീസിലെ ഉദ്യോഗസ്ഥരും ഉദ്ഘാടന ചടങ്ങിൽ പങ്കെടുത്തു. ഒരുകോടി ഫല വൃക്ഷതൈകൾ കേരളമെമ്പാടും നട്ടു പിടിപ്പിച്ചു പരിപാലിക്കുമെന്ന് ചടങ്ങിൽ കേഡറ്റുകൾ പ്രതിജ്ഞ ചെയ്തു. പദ്ധതിയ്ക്ക് എല്ലാവിധ പിന്തുണയും നൽകുമെന്ന് മന്ത്രി വി ശിവൻകുട്ടി അറിയിച്ചു.