അബുദാബി: പൊതുസ്ഥലങ്ങളിൽ ലഭ്യമാകുന്ന സൗജന്യ വൈഫൈ കരുതലോടെ ഉപയോഗിക്കണമെന്ന് ജനങ്ങൾക്ക് മുന്നറിയിപ്പ് നൽകി അബുദാബി ഡിജിറ്റൽ അതോറിറ്റി. സൈബർ തട്ടിപ്പുകാരുടെ വലയിൽ വീഴാതിരിക്കാൻ ജാഗ്രത പുലർത്തണമെന്ന് അബുദാബി ഡിജിറ്റൽ അതോറിറ്റി വ്യക്തമാക്കി.
പൊതുസ്ഥലങ്ങളിൽ സ്വന്തം ഡേറ്റ ഉപയോഗിച്ച് ഓൺലൈൻ ഇടപാടുകൾ നടത്തുന്നതാണ് സുരക്ഷിതമെന്ന് അബുദാബി ഡിജിറ്റൽ അതോറിറ്റി അറിയിച്ചു. വിപിഎൻ ഇൻസ്റ്റാൾ ചെയ്തിട്ടുണ്ടെന്നും ഉറപ്പാക്കണമെന്നും നിർദ്ദേശം നൽകിയിട്ടുണ്ട്.
എയർപോർട്ട്, ഷോപ്പിങ് മാൾ, റസ്റ്ററന്റ്, ജിംനേഷ്യം, ഹോട്ടൽ, കോഫിഷോപ്പ്, ലൈബ്രറി, പബ്ലിക് ട്രാൻസ്പോർട്ട് തുടങ്ങിയ പൊതുസ്ഥലങ്ങളിൽ ലഭ്യമാകുന്ന വൈഫൈ ഒരേസമയം ആയിരക്കണക്കിന് ആളുകൾ ഉപയോഗിക്കുന്നുണ്ട്. അതിനാൽ തന്നെ ഇവ ഉപയോഗിക്കുമ്പോൾ അപകട സാധ്യത കൂടുതലാണ്. യൂസർ നെയിമും പാസ് വേർഡും ഉള്ള പൊതു വൈഫൈ സേവനവും പൂർണ സുരക്ഷിതമല്ല. രഹസ്യ കോഡുകളില്ലാത്ത വൈഫൈ ശൃംഖലകളിലെത്തുന്ന ഉപഭോക്താക്കളുടെ വിവരങ്ങൾ ഉപയോഗിച്ച് അവരറിയാതെ ഇടപാട് നടത്താൻ സൈബർ കുറ്റവാളികൾക്ക് കഴിയും.
ഇത്തരത്തിൽ പൊതു ഇന്റർനെറ്റ് സേവനം ഉപയോഗിക്കുന്നവർ സ്വയം സുരക്ഷ ഉറപ്പാക്കണമെന്നാണ് നിർദ്ദേശം. പൊതു വൈഫൈ ഉപയോഗിക്കുമ്പോൾ അപരിചിത ഇമെയിലും എസ്എംഎസ് സന്ദേശങ്ങളും തുറക്കരുതെന്നും അബുദാബി ഡിജിറ്റൽ അതോറിറ്റി വ്യക്തമാക്കി. ലാപ്ടോപ്പിലെയും മൊബൈലിലെയും സോഫ്റ്റ്വെയറുകൾ യഥാസമയം അപ്ഡേറ്റ് ചെയ്യണമെന്നും ആന്റിവൈറസ് ഇൻസ്റ്റാൾ ചെയ്യണമെന്നും അബുദാബി ഡിജിറ്റൽ അതോറിറ്റി വിശദമാക്കുന്നു.