General (Page 1,409)

കോട്ടയം: ആർച്ച് ബിഷപ്പുമായി കൂടിക്കാഴ്ച്ച നടത്തി പ്രതിപക്ഷ നേതാവ് വി ഡി സതീശനും കെ പി സി സി അദ്ധ്യക്ഷൻ കെ സുധാകരനും. ചങ്ങനാശ്ശേരി അതിരൂപത ആസ്ഥാനത്തുവച്ചായിരുന്നു കൂടിക്കാഴ്ച. ചങ്ങനാശ്ശേരി ബിഷപ്പിനോട് എല്ലാ പിന്തുണയും അഭ്യർത്ഥിച്ചുവെന്ന് സുധാകരൻ വ്യക്തമാക്കി. കൂടിക്കാഴ്ചയ്ക്ക് ശേഷം മാദ്ധ്യമങ്ങളോട് സംസാരിക്കവെയായിരുന്നു സുധാകരന്റെ പ്രതികരണം.

പാലാ ബിഷപ്പിന്റെ നാർക്കോട്ടിക്‌സ് ജിഹാദ്‌ വിവാദത്തിൽ സമവായത്തിന് മുൻകൈ എടുക്കേണ്ടത് സർക്കാരാണ്. എന്നാൽ ചോര നക്കി കുടിക്കാൻ നിൽക്കുന്ന ചെന്നായയെ പോലെ സർക്കാർ നോക്കി നിൽക്കുന്നു. സമവായത്തിനല്ല ബിഷപ്പിനെ കാണാൻ പോയത്. വ്രണപ്പെടാത്ത സാമുദായിക സൗഹാർദമാണ് വേണ്ടതെന്നും വർഗീയ വിഷം ചാലിക്കപ്പെടാൻ അനുവദിച്ചുകൂടെന്നും സുധാകരൻ വിശദമാക്കി.

സാഹോദര്യം നിലനിർത്തുകയാണ് കോൺഗ്രസിന്റെ ദൗത്യം. മത സൗഹാർദം സംരക്ഷിക്കണമെന്നും അദ്ദേഹം കൂട്ടിച്ചേർത്തു.

തിരുവനന്തപുരം: നാർകോട്ടിക് ജിഹാദ് പമാർശത്തിന്റെ പേരിൽ പാലാ ബിഷപ്പിനെതിരെ കേസെടുക്കേണ്ടതില്ലെന്ന് മുഖ്യമന്ത്രി പിണറായി വിജയൻ. ലഹരി മാഫിയ ലോകവ്യാപകമായ പ്രതിഭാസമാണെന്നും എന്നാൽ അതിന് മത ചിഹ്നം നൽകേണ്ട കാര്യമില്ലെന്നും അദ്ദേഹം പറഞ്ഞു. കോവിഡ് അവലോകനത്തിന് ശേഷമുള്ള വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം. വിദ്വേഷ പ്രചാരകർക്കെതിരെ കർശനമായ നടപടിയുണ്ടാകുമെന്നും അദ്ദേഹം മുന്നറിയിപ്പ് നൽകി.

മാഫിയകളെ മാഫിയ ആയിത്തന്നെ കാണണം. അതിന് മത ചിഹ്നങ്ങളുമായി ബന്ധപ്പെടുത്തേണ്ട കാര്യമില്ല. സമുദായങ്ങൾ തമ്മിൽ നല്ല രീതിയിലുള്ള യോജിപ്പുണ്ടാക്കിയെടുക്കുകയാണ് പ്രധാനം. ഏതെങ്കിലും മതസ്പർധയുണ്ടാക്കാൻ വേണ്ടിയല്ലെന്നും തങ്ങളുടെ സമുദായത്തിലുള്ളവർക്ക് മുന്നറിയിപ്പ് നൽകുകയായിരുന്നു ഉദ്ദേശ്യമെന്ന് സംഭവത്തെ കുറിച്ച് പാലാ ബിഷപ്പ് പ്രതികരിച്ചു കഴിഞ്ഞുവെന്നും മുഖ്യമന്ത്രി വ്യക്തമാക്കി.

നാർകോട്ടിക് മാഫിയ എന്നത് പണ്ടും കേട്ടിട്ടുള്ളതാണ്. എന്നാൽ നാർകോട്ടിക് ജിഹാദ് എന്നത് മനസ്സിലാക്കാൻ പറ്റാത്ത കാര്യമാണ്. അത്തരം ഏതെങ്കിലും പ്രവർത്തനങ്ങൾ സംസ്ഥാനത്ത് എവിടെയും നടക്കുന്നില്ല. പുറംരാജ്യങ്ങളിലുള്ളതു പോലെ ഇവിടെ വലിയ മാഫിയകൾ ആയി ലഹരി സംഘങ്ങൾ വളർന്നിട്ടില്ല എന്നുള്ളതാണ് സത്യമെന്നും സർക്കാരുകളെക്കാൾ ശക്തരായ നാർകോട്ടിക് മാഫിയകളെ പോലെ സംസ്ഥാനത്തോ രാജ്യത്തോ സംഘടിതമായി ഏതെങ്കിലും സംഘങ്ങളൊന്നും പ്രവർത്തിക്കുന്നില്ലെന്നും അദ്ദേഹം വിശദീകരിച്ചു.

നാർക്കോട്ടിക്‌സ് ജിഹാദ് വിഷയവുമായി ബന്ധപ്പെട്ട് ഇരു കൂട്ടരെയും സർക്കാരിന്റെ മുൻഗണനയിൽ വിളിച്ചുവരുത്തി സർവ്വകക്ഷി യോഗം നടത്തണമെന്ന് പ്രതിപക്ഷത്തിന്റെ നിർദേശം പരിഗണിക്കാവുന്നതാണെന്നും അദ്ദേഹം അഭിപ്രായപ്പെട്ടു. സമുദായത്തിന്റെ ഉന്നമനത്തിനായി മതമേലധ്യക്ഷൻമാർ ശ്രമിക്കും. അവർ അവരോട് തന്നെ സംസാരിക്കും, അതിൽ തെറ്റില്ല. ഇവിടെ സമുദായത്തോട് അവർ സ്വന്തം കാര്യങ്ങൾ പറയുമ്പോൾ മറ്റു സമുദായത്തിന്റെ വികാരത്തെ വ്രണപ്പെടുത്തുന്ന നിലയുണ്ടാവരുത്. അത് മാത്രമാണ് ഇവിടെ വിവാദ വിഷയം. ചില സർക്കാരുകളേക്കാൾ ശക്തമാണ് നാർകോട്ടിക് മാഫിയ. ആഭിചാരം വഴി സ്ത്രീകളെ വശീകരിക്കുന്നതൊക്കെ നാടുവാഴികളുടെ കാലത്തെ കാര്യമാണ്. ശാസ്ത്ര യുഗത്തിൽ വശീകരിക്കുകയെന്നൊക്കെ പറയുന്നതിൽ കഴമ്പില്ലെന്നും സമൂഹത്തിൽ യോജിപ്പ് ഉയർത്തിക്കൊണ്ടുവരാനുള്ള ശ്രമമാണ് വേണ്ടതെന്നും അദ്ദേഹം കൂട്ടിച്ചേർത്തു.

പാലക്കാട്: സമാന്തര ടെലഫോൺ എക്‌സ്‌ചേഞ്ച് കേസുമായി ബന്ധപ്പെട്ട് പാലക്കാട് നടത്തിയ റെയ്ഡിൽ പോപ്പുലർ ഫ്രണ്ട് സംഘടനയുടെ ലഘുലേഖകൾ കണ്ടെത്തി. പോപ്പുലർ ഫ്രണ്ടിന്റെ രണ്ട് ലഘുലേഖകളാണ് റെയ്ഡിൽ കണ്ടെത്തിയിരിക്കുന്നതെന്ന് പോലീസ് അറിയിച്ചു. കുഴൽമന്ദം സ്വദേശി ഹുസൈന്റെ ഉടമസ്ഥതയിലുള്ള കീർത്തി എന്ന ആയുർവേദ ഫാർമസിയുടെ മറവിലാണ് സമാന്തര എക്‌സേഞ്ച് പ്രവർത്തിച്ചിരുന്നത്. ബംഗളൂരുവിലും കോഴിക്കോടും സമാന്തര ഏക്‌സ്‌ചേഞ്ച് കണ്ടെത്തിയതുമായി ബന്ധപ്പെട്ട അന്വേഷണത്തിനിടയിലാണ് മേട്ടുപ്പാളയം എക്‌സ്‌ചേഞ്ചിനെ കുറിച്ച് പോലീസിന് വിവരം ലഭിച്ചത്.

പാലക്കാട് മേട്ടുപ്പാളയം സ്ട്രീറ്റിലെ (എം എ) ടവറിലെ വാടകമുറിയിലാണ് സമാന്തര ടെലിഫോൺ എക്‌സ്‌ചേഞ്ച് കണ്ടെത്തിയത്. സംസ്ഥാന ഇന്റലിജൻസ് ബ്യൂറോയും പാലക്കാട് നോർത്ത് പോലീസും ചേർന്ന് നടത്തിയ പരിശോധനയിലാണ് സമാന്തര എക്‌സ്‌ചേഞ്ച് കണ്ടെത്തിയത്. മുറിയുടെ പൂട്ട് തകർത്ത് അകത്ത് കടന്നാണ് പരിശോധന നടത്തിയതെന്ന് പോലീസ് അറിയിച്ചു. എട്ട് സിം കാർഡുകളും ഉപയോഗിച്ച 32 സിം ബോക്‌സുകളും ഇവിടെ നിന്നും കണ്ടെത്തിയെന്നും പോലീസ് വ്യക്തമാക്കി.

പാലക്കാട് കണ്ടെത്തിയത് ഐഎസ് വിരുദ്ധ പോസ്റ്ററുകളാണെന്നും ഐ എസ് പോസ്റ്ററുകൾ കണ്ടെത്തിയെന്ന് പ്രചരിക്കുന്ന വാർത്ത തെറ്റാണെന്നും ജില്ലാ പോലീസ് മേധാവി ആർ വിശ്വനാഥ് വിശദമാക്കി. കോഴിക്കോട് സമാന്തര എക്‌സ്‌ചേഞ്ച് കേസുമായി ബന്ധമുണ്ടോയെന്ന കാര്യം പരിശോധിച്ച് വരികയാണ്. അന്വേഷണം ശരിയായ ദിശയിലാണെന്നും അദ്ദേഹം പറഞ്ഞു. സമാന്തര എക്‌സ്‌ചേഞ്ച് കേസിൽ കോഴിക്കോട്ട് നിന്നും പിടികൂടിയയാളെ കേന്ദ്രീകരിച്ച് നടത്തിയ അന്വേഷണത്തിലാണ് പാലക്കാട് മേട്ടുപ്പാളയം സ്ട്രീറ്റിലും സമാന്തര ടെലിഫോൺ എക്‌സ്‌ചേഞ്ച് ഉണ്ടെന്ന വിവരം ലഭിച്ചതെന്ന് റിപ്പോർട്ടുകൾ പുറത്തു വരുന്നുണ്ട്.

തിരുവനന്തപുരം: കോൺഗ്രസിനെതിരെ രൂക്ഷ വിമർശനവുമായി മുഖ്യമന്ത്രി പിണറായി വിജയൻ. കോൺഗ്രസ് പാർട്ടി എന്നത് തകർന്നുകൊണ്ടിരിക്കുന്ന കൂടാരമാണെന്ന് അദ്ദേഹം പറഞ്ഞു. കോവിഡ് അവലോകനത്തിന് ശേഷമുള്ള വാർത്താ സമ്മേളനത്തിലായിരുന്നു അദ്ദേഹത്തിന്റെ പ്രതികരണം.

കോൺഗ്രസ് നേതാക്കൾ പാർട്ടി വിട്ട് സിപിഎമ്മിലേക്ക് വരുന്നത് സ്വാഭാവിക പ്രക്രിയയാണ്. തകർച്ചയുടെ ഭാഗമായി നിൽക്കേണ്ടതില്ലെന്ന് കോൺഗ്രസിൽ നിൽക്കുന്ന പലരും ചിന്തിച്ചെന്ന് വരും. അതിന്റെ ഭാഗമായാണ് പലരും കോൺഗ്രസ് വിട്ടുവരുന്നതെന്നും അദ്ദേഹം വ്യക്തമാക്കി.

നേരത്തെ പലരും കോൺഗ്രസ് വിടാൻ തയ്യാറായിരുന്നു. അങ്ങനെ വിടാൻ തയ്യാറായവർ ബിജെപിയിലേക്ക് പോകാനായിരുന്നു തീരുമാനിച്ചിരുന്നത്. ബിജെപിയിലേക്ക് പോയേക്കും എന്ന് കണ്ടപ്പോൾ അവരെ നിലനിർത്തുന്നതിന് വേണ്ടി കോൺഗ്രസ് നേതൃത്വം ഇടപെട്ടത് ആളുകൾക്കറിയാവുന്ന കാര്യമാണ്. തീരുമാനിച്ചാൽ ബിജെപിയിലേക്ക് പോകുമെന്ന് പരസ്യമായി പറഞ്ഞ പല നേതാക്കളും ഇപ്പോൾ കോൺഗ്രസിലുണ്ടെന്നും അദ്ദേഹം വിശദമാക്കി.

ബിജെപി രാജ്യത്ത് സ്വീകരിക്കുന്ന നയം രാജ്യത്തിന്റെ തകർച്ചയ്ക്ക് തന്നെ വഴിവെക്കുന്നതാണ്. അവരെ ആ രീതിയിൽ നേരിടാനല്ല കോൺഗ്രസ് ശ്രമിക്കുന്നതെന്ന് പാർട്ടിക്കകത്തുള്ള പലർക്കും അറിയാം. ബിജെപിയുടെ നീക്കങ്ങൾക്കെതിരേ കൃത്യമായ നിലപാട് സ്വീകരിക്കുന്നത് ഇടതുപക്ഷമാണെന്ന് കോൺഗ്രസിലുള്ള പലർക്കുമറിയാം. അപ്പോൾ കോൺഗ്രസ് വിട്ട് ഇടതുപക്ഷത്തേക്ക് വരാൻ പലരും തയ്യാറാവുന്നത് സ്വാഭാവികമാണെന്നും അതിനെ ആരോഗ്യകരമായ പ്രവണതയെന്നാണ് സിപിഎം വിലയിരുത്തുന്നതെന്നും അദ്ദേഹം കൂട്ടിച്ചേർത്തു.