General (Page 1,403)

ന്യൂഡൽഹി: രാജ്യത്ത് ഇലക്ട്രിക് വാഹനങ്ങളുടെ പ്രചാരം വർധിച്ചു വരികയാണ്. എണ്ണ വില വർധിക്കാൻ തുടങ്ങിയതോടെയാണ് ജനങ്ങൾ ഇലക്ട്രിക് വാഹനങ്ങളെ കുറിച്ച് ചിന്തിക്കാൻ ആരംഭിച്ചത്. ഇലക്ട്രിക് വാഹനങ്ങളെ കുറിച്ചുള്ള റിപ്പോർട്ടുകളിലെല്ലാം വെല്ലുവിളിയായി കണക്കാക്കുന്നത് ചാർജ്ജിംഗ് പോയിന്റുകൾ രാജ്യത്ത് വിപുലീകരിക്കേണ്ട ആവശ്യകതയെ കുറിച്ചാണ്. ഇതിനൊരു മാർഗവുമായി എത്തിയിരിക്കുകയാണ് കേന്ദ്രം.

രാജ്യത്ത് വിവിധ ഇടങ്ങളിലായി ഇലക്ട്രിക് ഹൈവേകൾ നിർമ്മിക്കുക എന്നതാണ് കേന്ദ്ര സർക്കാരിന്റെ പദ്ധതി. വാഹനങ്ങൾ റോഡിലൂടെ സഞ്ചരിക്കുമ്പോൾ തന്നെ ബാറ്ററികൾ ചാർജാക്കാൻ കഴിയുന്ന സാങ്കേതിക വിദ്യയാണിത്. വഴിയിൽ ഇലക്ട്രിക് വാഹനങ്ങൾ നിർത്തിയിട്ട് ചാർജ് ചെയ്യുമ്പോൾ യാത്രക്കാർക്കുണ്ടാവുന്ന സമയ നഷ്ടവും ഇതിലൂടെ പരിഹരിക്കാനാകുമെന്നാണ് വിലയിരുത്തപ്പെടുന്നത്. ഡൽഹിയിൽ നിന്നും രാജസ്ഥാനിലെ ജയ്പൂരിനെ ബന്ധിപ്പിക്കുന്ന 200 കിലോമീറ്റർ നീളമുള്ള ഇലക്ട്രിക് ഹൈവേ നിർമ്മിക്കുവാനാണ് ഇപ്പോൾ കേന്ദ്രം ലക്ഷ്യമിടുന്നത്. ഇത് സംബന്ധിച്ച ചില വിവരങ്ങൾ കേന്ദ്ര ഉപരിതല ഗതാഗത വകുപ്പ് മന്ത്രി നിതിൻ ഗഡ്കരി പങ്കുവച്ചു. ഇലക്ട്രിക് ഹൈവേ തന്റെ സ്വപ്ന പദ്ധതിയാണെന്നാണ് ഗഡ്കരി അറിയിച്ചിട്ടുള്ളത്.

ഇലക്ട്രിക് ഹൈവേയിലൂടെ വാഹനങ്ങൾ സഞ്ചരിക്കുമ്പോൾ റോഡിലുള്ള കേബുളുമായി വാഹനത്തിന്റെ ചാർജ് പോയിന്റ് ബന്ധിപ്പിച്ചാണ് ചാർജ് ചെയ്യുന്നത്. വിദേശ രാജ്യങ്ങളിൽ ട്രക്കുകൾക്കായുള്ള ഇത്തരം പാതകൾ നിലവിൽ ഉപയോഗിക്കുന്നുണ്ട്. എന്നാൽ റോഡിനരികിൽ സ്ഥാപിച്ചിട്ടുള്ള ഇലക്ട്രോമാഗ്നെറ്റിക് സാങ്കേതികവിദ്യയിലൂടെ വാഹനങ്ങൾ ചാർജ് ചെയ്യുന്ന ആധുനിക രീതിയാവും ഇലക്ട്രിക് ഹൈവേകളിൽ കൂടുതൽ ഉപയോഗപ്രദമാവുക. നിലവിൽ ജർമ്മനിയിലും സ്വീഡനിലും ഇലക്ട്രിക് ഹൈവേകൾ ഉപയോഗത്തിലുണ്ട്. ഇലക്ട്രിക് ഹൈവേയുമായി ബന്ധപ്പെട്ട് ഒരു വിദേശ കമ്പനിയുമായി ചർച്ച നടത്തി കഴിഞ്ഞുവെന്ന റിപ്പോർട്ടുകളും പുറത്തു വരുന്നുണ്ട്. ഇലക്ട്രിക് ഹൈവേയുടെ നിർമ്മാണം ജൂലൈ പകുതിയോടെ ആരംഭിക്കുമെന്നാണ് വിവരം.

ന്യൂഡൽഹി: ചരൺജിത് സിംഗ് ചന്നിക്കെതിരായ മീ ടു ആരോപണം ചർച്ചയാക്കി ദേശീയ വനിതാ കമ്മീഷൻ അദ്ധ്യക്ഷ. പഞ്ചാബ് മുഖ്യമന്ത്രിയായി സത്യപ്രതിജ്ഞ ചെയ്തതിന് പിന്നാലെയാണ് ചന്നിക്കെതിരെയുള്ള മീടൂ ആരോപണത്തെ കുറിച്ചുള്ള ദേശീയ വനിതാ കമ്മീഷൻ അദ്ധ്യക്ഷ രേഖാ ശർമ്മയുടെ പ്രതികരണം.

ചന്നി മുഖ്യമന്ത്രി സ്ഥാനത്ത് ഇരിക്കുന്നത് സ്ത്രീകൾക്ക് ഭീഷണിയാണെന്ന് രേഖ ശർമ്മ വ്യക്തമാക്കി. ചരൺജിത്ത് സിംഗ് ചന്നി രാജിവെക്കണമെന്ന് രേഖാ ശർമ്മ ആവശ്യപ്പെടുന്നത്. ഒരു വനിത അദ്ധ്യക്ഷയായ പാർട്ടിയുടെ മുഖ്യമന്ത്രി ഇത്തരക്കാരനാകുന്നത് അപമാനകരമാണ്. ഇത് സ്ത്രീ ശാക്തീകരണത്തെ പിന്നിൽ നിന്ന് കുത്തുന്നതും സ്ത്രീകൾക്ക് ഭീഷണിയാണെന്നും രേഖ ശർമ്മ അഭിപ്രായപ്പെട്ടു.

മൂന്ന് വർഷങ്ങൾക്ക് മുൻപ് ഉയർന്ന മീ ടൂ ആരോപണമാണ് ചന്നി പഞ്ചാബ് മുഖ്യന്ത്രി സ്ഥാനം ഏറ്റെടുത്തതിന് പിന്നാലെ വീണ്ടും വിവാദമായിരിക്കുന്നത്. 2018 ൽ മീടു ആരോപണത്തിൽ ചന്നിക്കെതിരെ കമ്മീഷൻ കേസെടുത്തിരുന്നു.

വനിതാ ഐഎഎസ് ഉദ്യോഗസ്ഥയ്ക്ക് അശ്ലീല സന്ദേശം അയച്ചെന്നായിരുന്നു ചന്നിക്കെതിരെ ഉയർന്ന ആരോപണം. അതേസമയം ഉദ്യോഗസ്ഥ ചന്നിക്കെതിരെ പരാതി നൽകിയിട്ടില്ല. വനിതാ കമ്മീഷൻ സ്വമേധയായാണ് ചന്നിക്കെതിരെ കേസെടുത്തത്. പിന്നീട് വിഷയത്തിൽ അന്ന് മുഖ്യമന്ത്രിയായിരുന്ന അമരീന്ദർ സിംഗ് ഇടപെടുകയും ചന്നി മാപ്പ് പറഞ്ഞതായി അറിയിക്കുകയും ചെയ്തിരുന്നു.

ബംഗളുരു: കള്ളപ്പണം വെളുപ്പിക്കൽ കേസിൽ സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണന്റെ മകൻ ബിനീഷ് കോടിയേരിയുടെ ജാമ്യാപേക്ഷയെ എതിർത്ത് ഇഡി. ലഹരിയിടപാടിലെ ലാഭത്തുകയാണ് ബിനീഷിന്റെ അക്കൗണ്ടിലുണ്ടായിരുന്നതെന്നാണ് എൻഫോഴ്‌സ്‌മെന്റ് ഡയറക്ടറേറ്റ് കോടതിയെ അറിയിച്ചിരിക്കുന്നത്. ലഹരി കടത്തിനായി ബിനീഷ് സാമ്പത്തിക ഇടപാടുകൾ നടത്തിയെന്നും ഇഡി വ്യക്തമാക്കുന്നു.

ലഹരികടത്ത് കേസിൽ ജയിലിൽ കഴിയുന്ന മുഹമ്മദ് അനൂപ്, ബിനീഷ് കോടിയേരിയുടെ പങ്കാളിയാണ്. മുഹമ്മദ് അനൂപും ബിനീഷും ലഹരികടത്തിനായി സാമ്പത്തിക ഇടപാടുകൾ നടത്തി. ബിനിഷിന്റെ ഡ്രൈവറുടെ പേരിലാണ് ഇടപാടുകൾ നടത്തിയത്. ഡ്രൈവർ ചോദ്യം ചെയ്യലിന് ഹാജരാകാത്തത് സംശയകരമാണെന്നും ദുബായ്, ബംഗളുരു എന്നിവടങ്ങളിൽ ബിനീഷും അനൂപും നേരിട്ട് ഇടപാടുകൾ നടത്തിയിട്ടുണ്ടെന്നും എൻഫോഴ്‌സ്‌മെന്റ് കോടതിയിൽ വിശദീകരിച്ചു.

എൻ.സി.ബിയുടെ കസ്റ്റഡിയിലുള്ള സുഹാസ് കൃഷ്ണഗൗഡ, സൊനാറ്റ ലോഗോ എന്നിവർ ബിനീഷിന്റെ ലഹരി ഇടപാടിലെ പങ്ക് സ്ഥിരീകരിക്കുന്നുണ്ട്. മുഹമ്മദ് അനൂപും ബിനീഷും ലഹരി ഇടപാട് നടത്തിയതായാണ് ഇവർ എൻഫോഴ്‌സ്‌മെന്റിന് നൽകിയ മൊഴി. പച്ചക്കറി, മത്സ്യ കച്ചവടം നടത്തിയെന്നാണ് ബിനീഷ് നേരത്തെ അറിയിച്ചത്. എന്നാൽ പച്ചക്കറി കച്ചവടം കൊണ്ട് 6 കോടി അക്കൗണ്ടിൽ എത്തുമോയെന്ന് ഇഡി ചോദിക്കുന്നു.

ബിനീഷ് കോടിയേരിയ്ക്ക് ഒരു കാരണവശാലും ജാമ്യം അനുവദിക്കരുത്. ഇല്ലാത്ത ന്യായങ്ങളും രേഖകളുമാണ് ബിനീഷ് സൃഷ്ടിക്കുന്നതെന്നും എൻഫോഴ്‌സ്‌മെന്റ് കൂട്ടിച്ചേർത്തു.

ന്യൂഡൽഹി: കേരളത്തിൽ നിലവിൽ സ്‌കൂൾ തുറക്കാൻ പറ്റിയ സാഹചര്യമാണോ എന്ന കാര്യത്തിൽ സംശയം പ്രകടിപ്പിച്ച് സുപ്രീം കോടതി. ജസ്റ്റിസ് ഡി.വൈ ചന്ദ്രചൂഡ് അധ്യക്ഷനായ ബെഞ്ചിന്റേതാണ് നിരീക്ഷണം. കേരളത്തിലും മഹാരാഷ്ട്രയിലും സ്‌കൂൾ തുറക്കണമെന്ന് എങ്ങനെ പറയാനാകുമെന്ന് കോടതി ചോദിച്ചു. ഡൽഹിയിലെ സ്‌കൂളുകൾ തുറക്കണമെന്നാവശ്യപ്പെട്ടുള്ള ഹർജി പരിഗണിക്കവെയായിരുന്നു കോടതിയുടെ ചോദ്യം.

സ്‌കൂളുകൾ തുറക്കുന്ന വിഷയത്തിൽ കേന്ദ്ര സർക്കാരിനും സംസ്ഥാനങ്ങൾക്കും മാർഗനിർദേശം നൽകണമെന്ന ആവശ്യത്തിൽ ഉത്തരവ് പുറപ്പെടുവിക്കാൻ കഴിയില്ലെന്നും കോടതി അറിയിച്ചു. സങ്കീർണമായ വിഷയമാണിതെന്നും സർക്കാരുകൾ കൈകാര്യം ചെയ്യേണ്ട കാര്യങ്ങളാണെന്നും കോടതി ചൂണ്ടിക്കാട്ടി. തീരുമാനങ്ങൾ സർക്കാരാണ് എടുക്കേണ്ടത്. ഭരണനിർവഹണം സുപ്രീംകോടതിക്ക് ഏറ്റെടുക്കാനാകില്ലെന്നും കോടതി വ്യക്തമാക്കി.

സ്‌കൂളുകൾ തുറക്കണമമെന്നാവശ്യപ്പെട്ട് ഡൽഹി സ്വദേശിയായ വിദ്യാർത്ഥിയാണ് ഹർജിയുമായി സുപ്രീംകോടതിയെ സമീപിച്ചത്. കോവിഡ് വൈറസ് വ്യാപനം കാരണം കഴിഞ്ഞ വർഷം മാർച്ച്-ഏപ്രിൽ മുതൽ സ്‌കൂൾ അടച്ചിട്ടിരിക്കുകയാണെന്നും ഇത് വിദ്യാർത്ഥികളിൽ മാനസികമായ പ്രതിസന്ധികൾ സൃഷ്ടിക്കുന്നുവെന്നും ഹർജിയിൽ പറയുന്നുണ്ട്. മാനസിക സമ്മർദ്ദം അനുഭവിക്കുന്ന നിരവധി വിദ്യാർത്ഥികളുണ്ട്. സ്‌കൂളുകളിൽ ഓൺലൈൻ ക്ലാസുകളുണ്ടെങ്കിലും വിദ്യാർത്ഥികൾക്ക് ശരിയായ വിദ്യാഭ്യാസം ലഭിക്കുന്നില്ലെന്നും വിദ്യാർത്ഥികളുടെ ബൗദ്ധിക വികാസം ഓൺലൈൻ വിദ്യാഭ്യാസ രീതിയിലൂടെ സാധ്യമാകുന്നില്ലെന്നും ഹർജിയിൽ ചൂണ്ടിക്കാട്ടുന്നു.

അതസമയം കുട്ടികൾക്ക് ഇതുവരെ വാക്‌സിൻ നൽകാത്ത സാഹചര്യത്തിൽ സ്‌കൂൾ തുറക്കാൻ ഉത്തരവിടാനാവില്ലെന്ന് കോടതി വ്യക്തമാക്കി. ഡൽഹിയിൽ സ്‌കൂൾ പൂർണമായും തുറക്കുന്നതിനുള്ള നടപടികൾ പുരോഗമിക്കുകയാണ്. സർക്കാർ ഉചിതമായ തീരുമാനങ്ങൾ എടുക്കുമെന്നും കോടതി വിശദമാക്കി.