General (Page 1,396)

ന്യൂഡൽഹി: രാജ്യത്തെ കർഷകരുടെ ക്ഷേമത്തിന് വേണ്ടി പുതിയ പദ്ധതി ആവിഷ്‌ക്കരിക്കാനൊരുങ്ങി കേന്ദ്രം. കർഷകരുടെ വരുമാനം വർധിപ്പിക്കാൻ സഹായിക്കുന്ന ഒരു പുതിയ ബിൽ അവതരിപ്പിക്കാനാണ് കേന്ദ്ര സർക്കാർ പദ്ധതിയിടുന്നത്. ഈ ബിൽ പ്രാവർത്തികമാകാൻ സമയമെടുക്കുമെന്നാണ് റിപ്പോർട്ട്. അതിനാൽ അടുത്തിടെ പ്രഖ്യാപിച്ച എഫ്.പി.ഒ (ഫാർമേഴ്സ് പ്രൊഡ്യൂസർ ഓർഗനൈസേഷൻ) പദ്ധതി വഴി കർഷകർക്ക് പ്രതിവർഷം 18 ലക്ഷം രൂപ നൽകാനും സർക്കാർ പദ്ധതിയിടുന്നുണ്ട്.

കർഷകൾ അംഗങ്ങളായ സംഘടനയാണ് എഫ്.പി.ഒ (ഫാർമേഴ്സ് പ്രൊഡ്യൂസേഴ്സ് ഓർഗനൈസേഷൻ). ചെറുകിട കർഷകർക്ക് വിളവിറക്കുന്നതു മുതൽ വിപണി വരെയുള്ള എല്ലാ പിന്തുണയും സേവനങ്ങളും നൽകുന്ന സംഘടനയാണിത്. സാങ്കേതിക സേവനങ്ങൾ, വിപണനം, സംസ്‌കരണം, കൃഷി വിജ്ഞാനം തുടങ്ങിയ കാര്യങ്ങളിലും സംഘടന സഹായം നൽകും. പ്രധാനമന്ത്രി നരേന്ദ്ര മോദിയുടെ അദ്ധ്യക്ഷതയിൽ ചേർന്ന സാമ്പത്തികകാര്യ കാബിനറ്റ് കമ്മിറ്റിയാണ് 2019 – 2024 കാലഘട്ടത്തിൽ 10,000 എഫ്.പി.ഒകൾ രൂപീകരിക്കാൻ അംഗീകാരം നൽകിയത്.

കർഷകർക്ക് പുതിയ കാർഷിക ബിസിനസ് ആരംഭിക്കുന്നതിനുള്ള സാമ്പത്തിക സഹായമാണ് പദ്ധതി വഴി ലഭിക്കുക. 11 കർഷകർ ചേർന്നായിരിക്കണം ഒരു കമ്പനി ആരംഭിക്കേണ്ടത്. ഉത്പാദന സാങ്കേതികവിദ്യ, മൂല്യവർധന സേവനങ്ങൾ, വിപണനം എന്നിവ പ്രയോഗിക്കാൻ സാമ്പത്തിക ശക്തിയില്ലാത്ത ചെറുകിട- ഇടത്തര കർഷകരെ സഹായത്തിക്കുന്നതിനുള്ള സംഘടനയാണിത്. എഫ്.പി.ഒകളിലൂടെ, കർഷകർക്ക് ഗുണനിലവാരമുള്ള അസംസ്‌കൃത വസ്തുക്കൾ, സാങ്കേതികവിദ്യ, വായ്പ, വരുമാന വർധനയ്ക്കുള്ള കാര്യങ്ങൾ, വിപണി എന്നിവ കൈവരിക്കാനാകുമെന്നാണ് പ്രതീക്ഷിക്കപ്പെടുന്നത്. മൂന്ന് വർഷം തവണകളായാകും കർഷകർക്ക് 18 ലക്ഷം രൂപ ലഭിക്കുക. 6885 കോടി രൂപ പദ്ധതിക്കായി സർക്കാർ ചെലവഴിക്കും. എല്ലാ വിഭാഗത്തിൽപ്പെട്ട കർഷകർക്കും പദ്ധതി പ്രകാരം സഹായം ലഭിക്കും. വൻകിട കുത്തകകളിൽ നിന്നും ഇടിനിലക്കാരിൽനിന്നും എഫ്.പി.ഒ. കർഷകരെ സംരക്ഷിക്കുകയും കർഷകരുടെ ക്ഷേമത്തിനായി പ്രവർത്തിക്കുകയും ചെയ്യും.

ന്യൂഡൽഹി: രാജ്യത്ത് ഉടൻ പുതിയ സഹകരണ നയം കൊണ്ടുവരുമെന്ന് കേന്ദ്രം. സഹകരണ വകുപ്പ് മന്ത്രി അമിത് ഷായാണ് ഇക്കാര്യം അറിയിച്ചത്. സംസ്ഥാനങ്ങളുമായി യോജിച്ച് പ്രവർത്തിച്ച് സഹകരണ ശൃംഖല ശക്തിപ്പെടുത്തുമെന്നും അമിത് ഷാ അഭിപ്രായപ്പെട്ടു. ഡൽഹിയിൽ രാജ്യത്തെ ആദ്യ ദേശീയ സഹകരണ സമ്മേളനത്തിൽ സംസാരിക്കവെയാണ് അദ്ദേഹം ഇക്കാര്യം അറിയിച്ചത്.

അടുത്ത അഞ്ച് വർഷം കൊണ്ട് രാജ്യത്തെ പ്രാഥമിക കാർഷിക സഹകരണ സംഘങ്ങളുടെ എണ്ണം മൂന്ന് ലക്ഷമായി ഉയർത്താനാണ് ശ്രമം. നിലവിൽ 65000 ത്തോളം പ്രാഥമിക കാർഷിക സഹകരണ സംഘങ്ങളാണ് രാജ്യത്തുള്ളത്. സംസ്ഥാനങ്ങളുമായി തർക്കങ്ങൾ ആഗ്രഹിക്കുന്നില്ല. സംസ്ഥാനങ്ങളുമായി സഹകരിച്ച് തന്നെ മുന്നോട്ടു പോകുമെന്നും അദ്ദേഹം കൂട്ടിച്ചേർത്തു.

സഹകരണ മേഖലയെ മുന്നോട്ട് കൊണ്ടുപോകാൻ സംസ്ഥാനങ്ങളുമായി ചേർന്ന് പ്രവർത്തിക്കും. സഹകരണ വകുപ്പുണ്ടാക്കിയത് ഈ മേഖലയുടെ ആധുനിക വത്കരണവും ശാക്തീകരണവും ലക്ഷ്യമിട്ടാണ്. 2002 ൽ അന്നത്തെ പ്രധാനമന്ത്രി വാജ്‌പേയി സഹകരണ വകുപ്പിൽ പുതിയൊരു നയം കൊണ്ടുവന്നിരുന്നു. ഇനി മോദി സർക്കാർ പുതിയ നയം യാഥാർത്ഥ്യമാക്കുമെന്നും അദ്ദേഹം പറഞ്ഞു. സഹകരണ മേഖലയ്ക്ക് വലിയ പ്രാധാന്യമാണ് ഇപ്പോഴുള്ളത്. സഹകാരികൾക്ക് രാജ്യത്തിന്റെ വികസനത്തിൽ നിർണായക പങ്ക് വഹിക്കാനാവും. രാജ്യത്തെ അഞ്ച് ലക്ഷം കോടി ഡോളർ വലിപ്പമുള്ള സാമ്പത്തിക ശക്തിയാക്കുന്നതിന്റെ ഭാഗമായുള്ള പരിശ്രമത്തിൽ സഹകാരികൾക്കും ഭാഗമാകാനുണ്ട്. നികുതിയടക്കമുള്ള വിഷയങ്ങളിൽ സഹകാരികളുടെ ബുദ്ധിമുട്ട് മനസിലാക്കുന്നുണ്ടെന്നും രാജ്യത്തെ സഹകാരികളോട് നീതികേട് കാട്ടില്ലെന്നും അദ്ദേഹം വ്യക്തമാക്കി.

വിവിധ സഹകരണ സംഘങ്ങളെ പ്രതിനിധീകരിച്ച് 2100 പേരാണ് ഡൽഹിയിൽ സംഘടിപ്പിച്ച യോഗത്തിൽ നേരിട്ട് പങ്കെടുത്തത്. ഓൺലൈനായി ആറ് കോടി പ്രതിനിധികളും പങ്കുചേർന്നു.

ന്യൂഡൽഹി: അഫ്ഗാനിസ്താന്റെ നിയന്ത്രണം താലിബാൻ ഏറ്റെടുത്തത് എല്ലാവർക്കും ഒരു പാഠമാണെന്ന് കേന്ദ്രമന്ത്രി രാജ്‌നാഥ് സിംഗ്. അഫ്ഗാനിസ്ഥാന്റെ നിയന്ത്രണം താലിബാൻ ഏറ്റെടുത്തതോടെ, പാകിസ്താന്റെ പിന്തുണയുള്ള തീവ്രവാദ ഗ്രൂപ്പുകളെ ചുറ്റിപ്പറ്റിയുള്ള ഇന്ത്യയുടെ ആശങ്കകൾ ലോകം തിരിച്ചറിയുന്നുണ്ടെന്ന് അദ്ദേഹം പറഞ്ഞു. കാര്യമായ രാഷ്ട്രീയ സ്വാധീനമുള്ള എന്നാൽ ഒരു പ്രത്യേക രാജ്യത്തോ സംസ്ഥാനത്തോടോ ബന്ധമില്ലാത്ത സംഘടനകൾക്ക് നിരുത്തരവാദപരമായ രാജ്യങ്ങളിൽ നിന്നുളള സജീവ പിന്തുണയാണ് മേഖലയിലെ പ്രക്ഷുബ്ദതകൾക്ക് കാരണമായതെന്നും അദ്ദേഹം ചൂണ്ടിക്കാട്ടി.

ഭീകരവാദികൾക്കും ഭീകര സംഘടനകൾക്കും ഗ്രൂപ്പുകൾക്കുമുള്ള പാകിസ്താന്റെ സജീവ പിന്തുണയുമായി ബന്ധപ്പെട്ട്, ഇന്ത്യ വളരെക്കാലമായി എന്താണ് ശബ്ദിക്കുന്നതെന്ന തിരിച്ചറിവ് വർദ്ധിച്ചുവരികയാണ്. ഭീകരതയുടെ അസ്ഥിരപ്പെടുത്തുന്ന പ്രത്യാഘാതങ്ങൾക്കും അക്രമാസക്തമായ തീവ്ര ശക്തികളുടെ അപകടകരമായ മുൻഗണനയ്ക്കും ഇന്ന് ലോകം സാക്ഷ്യം വഹിക്കുന്നുണ്ടെന്നും അദ്ദേഹം പറഞ്ഞു. തീവ്ര ശക്തികൾ നിയമസാധുത നേടാൻ ശ്രമിക്കുന്നതായും അദ്ദേഹം വിശദമാക്കി.

ഭീകരവാദ ഗ്രൂപ്പുകൾക്ക് പാകിസ്താാൻ നൽകുന്ന പിന്തുണയെക്കുറിച്ചുള്ള ആശങ്കകൾ വർദ്ധിച്ചുവരികയാണ്. അഫ്ഗാനിലെ അടുത്തിടെ ഉണ്ടായ സംഭവങ്ങൾ സംഭവങ്ങൾ നമ്മുടെ ഇക്കാലത്തെ യാഥാർത്ഥ്യത്തെ ഉയർത്തിക്കാട്ടി. ഈ സംഭവങ്ങൾ രാഷ്ട്രീയത്തിന്റെ പങ്കിനെക്കുറിച്ചും രാജ്യത്തിന്റെ ഘടനകളെയും പെരുമാറ്റത്തെയും മാറ്റുന്നതിനുള്ള ഒരു ഉപകരണമായി ഭീകരവാദത്തെ ഉപയോഗിക്കുന്നതിനെക്കുറിച്ചും ചോദ്യങ്ങൾ ഉയർത്തുന്നതായും അദ്ദേഹം അഭിപ്രായപ്പെട്ടു.

ന്യൂഡൽഹി: ഇറ്റലിയിൽ നടക്കുന്ന ലോക സമാധാന സമ്മേളത്തിൽ പങ്കെടുക്കാൻ പശ്ചിമ ബംഗാൾ മുഖ്യമന്ത്രി മമത ബാനർജിക്ക് അനുമതിയില്ല. ഒക്ടോബർ മാസം വത്തിക്കാനിൽ വെച്ച് നടക്കുന്ന സമ്മേളനത്തിൽ പങ്കെടുക്കാൻ മമത ബാനർജിയ്ക്ക് കേന്ദ്ര സർക്കാർ അനുമതി നൽകിയില്ല. ലോക സ,മാധാന സമ്മേളനം ഒരു സംസ്ഥാന മുഖ്യമന്ത്രി പങ്കെടുക്കേണ്ട പരിപാടിയല്ലെന്ന് കേന്ദ്ര വിദേശകാര്യ മന്ത്രാലയം വ്യക്തമാക്കിയതായാണ് റിപ്പോർട്ട്.

ഇറ്റാലിയൻ പ്രധാനമന്ത്രി മരിയോ ദ്രാഗി, ജർമൻ ചാൻസലർ ആംഗല മെർക്കൽ, പോപ്പ് ഫ്രാൻസിസ്, തുടങ്ങിയവർ മദർ തെരേസയെ കേന്ദ്രീകരിച്ച് നടക്കുന്ന ലോക സമാധാന സമ്മേളനത്തിൽ പങ്കെടുക്കുന്നുണ്ട്. മറ്റ് പ്രതിനിധികൾ ഇല്ലാതെ സമ്മേളനത്തിന് എത്തണമെന്ന് ഇറ്റാലിയൻ സർക്കാർ മമത ബാനർജിയോട് അഭ്യർത്ഥിച്ചിരുന്നു. തുടർന്നാണ് മമത ലോകസമ്മേളനത്തിൽ പങ്കെടുക്കാൻ പോകാൻ വേണ്ടി അനുമതി തേടി വിദേശകാര്യ മന്ത്രാലയത്തെ സമീപിച്ചത്. എന്നാൽ വിദേശകാര്യ മന്ത്രാലയം അനുമതി നിഷേധിക്കുകയായിരുന്നു.

അകേസമയം കേന്ദ്ര നടപടിയ്‌ക്കെതിരെ രൂക്ഷ വിമർശനവുമായി തൃണമൂൽ കോൺഗ്രസ് രംഗത്തെത്തിയിട്ടുണ്ട്. ഇറ്റലി യാത്രക്ക് അനുമതി നൽകാത്തതിൽ രാഷ്ട്രീയ താത്പര്യമുണ്ടെന്നാണ് തൃണമൂൽ കോൺഗ്രസ് പറയുന്നത്.