കൊല്ലം: പ്രവാസിയെ ഭീഷണിപ്പെടുത്തിയ ബ്രാഞ്ച് സെക്രട്ടറിക്കെതിരെ നടപടിയുമായി സിപിഎം. സി.പി.എം മുകുന്ദപുരം ബ്രാഞ്ച് സെക്രട്ടറി ബിജു ശ്രീനിത്യത്തിനെതിരെയാണ് പാർട്ടി നടപടിയെടുത്തത്. പ്രവാസിയെ ഭീഷണിപ്പെടുത്തിയതിന് ബിജുവിനെ സിപിഎം പാർട്ടിയിൽ നിന്നും സസ്പെൻഡ് ചെയ്തു.
അതേസമയം ബിജു തെറ്റു ചെയ്തിട്ടില്ലെന്നും നിലം നികത്താൻ സഹായം ചെയ്യാത്തതിന്റെ പേരിൽ ബ്രാഞ്ച് സെക്രട്ടറിക്കെതിരെ വ്യാജ പ്രചാരണം നടത്തുകയാണെന്നുമായിരുന്നു സി.പി.എം കൊല്ലം ജില്ലാ നേതൃത്വത്തിന്റെ നിലപാട്. സംസ്ഥാന നേതൃത്വം ഇടപെട്ടാണ് ബിജുവിനെതിരെ നടപടി സ്വീകരിച്ചത്.
രക്തസാക്ഷി മണ്ഡപത്തിന് പണം സംഭാവന നൽകാത്തതിന്റെ പേരിൽ ബ്രാഞ്ച് സെക്രട്ടറി ഭീഷണിപ്പെടുത്തിയെന്നായിരുന്നു പ്രവാസി നൽകിയ പരാതി. ഇക്കാര്യം ചൂണ്ടിക്കാട്ടി മുഖ്യമന്ത്രി പിണറായി വിജയനും പ്രവാസി പരാതി നൽകിയിരുന്നു. ഇതിന്റെ അടിസ്ഥാനത്തിലാണ് നടപടി സ്വീകരിച്ചത്. ഭീഷണിപ്പെടുത്തിയിട്ടില്ലെന്നും പ്രവാസി വ്യവസായി തെറ്റിദ്ധരിച്ചതാകാമെന്നാണ് ഏരിയാ കമ്മിറ്റി വ്യക്തമാക്കുന്നത്. രണ്ടു വർഷം മുമ്പ് നൽകാമെന്ന് ഏറ്റിരുന്ന പണം ചോദിക്കുക മാത്രമാണ് ഉണ്ടായതെന്നാണ് സംഭവത്തിൽ ബിജു നൽകിയ വിശദീകരണം.