General (Page 1,395)

ന്യൂഡൽഹി: ജുഡീഷറിയിൽ സ്ത്രീകൾക്ക് 50 ശതമാനം സംവരണം ആവശ്യമാണെന്ന് സുപ്രീം കോടതി ചീഫ് ജസ്റ്റീസ് എൻ വി രമണ. സുപ്രീംകോടതിയിലെ വനിത അഭിഭാഷകരെ അഭിസംബോധന ചെയ്തു സംസാരിക്കവെയായിരുന്നു അദ്ദേഹം ഇക്കാര്യങ്ങൾ വ്യക്തമാക്കിയത്. രാജ്യത്തെ നിയമ കോളജുകളിലും 50 ശതമാനം സംവരണം വേണമെന്ന ആവശ്യത്തിന് അദ്ദേഹം പിന്തുണ അറിയിക്കുകയും ചെയ്തു.

ആയിരക്കണക്കിന് വർഷത്തെ അടിച്ചമർത്തലിന്റെ പ്രശ്നമാണിത്. ജുഡീഷറിയുടെ താഴെ തലങ്ങളിൽ 30 ശതമാനം സ്ത്രീകൾ മാത്രമാണ് ജഡ്ജിമാരായി ഉള്ളത്. ഹൈക്കോടതിയിൽ ഇത് 11.5 ശതമാനമാണ്. സുപ്രീംകോടതിയിൽ 11-12 ശതമാനം സ്ത്രീകളാണുള്ളതെന്നും അദ്ദേഹം വ്യക്തമാക്കി.

രാജ്യത്തെ 1.7 ദശലക്ഷം അഭിഭാഷകരിൽ സ്ത്രീകൾ 15 ശതമാനം മാത്രമാണുള്ളത്. ബാർ കൗൺസിൽ ഓഫ് ഇന്ത്യ നാഷണൽ കമ്മിറ്റിക്ക് ഒരു വനിത പ്രതിനിധി പോലും ഇല്ലാത്തത് എന്തുകൊണ്ടാണെന്നും അദ്ദേഹം ചോദിച്ചു. രണ്ട് ശതമാനം സ്ത്രീകൾ മാത്രമാണ് സംസ്ഥാനങ്ങളിലെ ബാർ കൗൺസിലുകളിലേക്ക് തെരഞ്ഞെടുക്കപ്പെടുന്നതെന്നും അദ്ദേഹം കുറ്റപ്പെടുത്തി. ഈ പ്രശ്നങ്ങൾ എല്ലാം അടിയന്തരമായി പരിഹരിക്കണമെന്ന് അദ്ദേഹം ആവശ്യപ്പെട്ടു.

ന്യൂഡൽഹി: രാജ്യവ്യാപക ശുചീകരണ പദ്ധതിയുമായി കേന്ദ്ര സർക്കാർ. ഒറ്റത്തവണ ഉപയോഗിക്കുന്ന പ്ലാസ്റ്റിക്ക് ഉൾപ്പെടെയുള്ള മാലിന്യ ശുചീകരണമാണ് പരിപാടിയിലൂടെ പദ്ധതിയിടുന്നത്. 2021 ഒക്ടോബർ 1 മുതൽ 31 വരെ ഒരു മാസം നീണ്ടുനിൽക്കുന്ന ‘ക്ലീൻ ഇന്ത്യ ഡ്രൈവ്’ എന്ന ഈ പരിപാടി സംഘടിപ്പിക്കാനാണ് കേന്ദ്ര സർക്കാർ ലക്ഷ്യമിടുന്നത്. കേന്ദ്രമന്ത്രി അനുരാഗ് ഠാക്കൂറാണ് ഇക്കാര്യം അറിയിച്ചത്.

ഇന്ത്യയുടെ സ്വാതന്ത്ര്യത്തിന്റെ 75-ാം വാർഷികത്തിൽ ‘ആസാദി കാ അമൃത് മഹോത്സവ്’ ആഘോഷിക്കുന്ന അവസരത്തിൽ പ്ലാസ്റ്റിക് വിമുക്ത ഇന്ത്യ സൃഷ്ടിക്കുക എന്നതാണ് ലക്ഷ്യമിടുന്നതെന്ന് അദ്ദേഹം ട്വിറ്റ് ചെയ്തു. ഈ ഉദ്യമത്തിൽ പങ്കാളികളാകണമെന്നും ‘തീരുമാനങ്ങളിൽ നിന്നും യാഥാർത്ഥ്യത്തിലേക്ക് എന്ന ലക്ഷ്യം നേടാൻ സഹായിക്കണമെന്നും അദ്ദേഹം ജനങ്ങളോട് അഭ്യർത്ഥിച്ചു.

രാജ്യത്തിന്റെ വിവിധ ഭാഗങ്ങളിൽ നിന്നുള്ള 75 ലക്ഷം ടണ്ണിലധികം പ്ലാസ്റ്റിക് ഉൾപ്പെടെയുള്ള മാലിന്യങ്ങൾ ശേഖരിക്കുകയും, ‘വേസ്റ്റ് ടു വെൽത്ത്’ മാതൃകയിൽ സംസ്‌കരിക്കുകയും ചെയ്യുന്നതിനാണ് ലോകത്തിലെ ഏറ്റവും വലിയ ശുചിത്വ പരിപാടിയിലൂടെ പദ്ധതിയിടുന്നതെന്നും അദ്ദേഹം വ്യക്തമാക്കി. ‘ശുചിത്വമുള്ള ഇന്ത്യ: സുരക്ഷിത ഇന്ത്യ’ എന്ന ആശയം പ്രചരിപ്പിക്കുന്നതിനാണ് ഈ പരിപാടി സംഘടിപ്പിക്കുന്നതെന്നും അദ്ദേഹം കൂട്ടിച്ചേർത്തു.

പ്രചാരണത്തിൽ പങ്കെടുക്കുന്നതിന് വ്യക്തികൾക്കും സ്ഥാപനങ്ങൾക്കും താത്പര്യമുള്ളവർക്കും https://forms.gle/oAdnvGpvrcDvBmLE6 എന്ന ലിങ്കിൽ രജിസ്റ്റർ ചെയ്യാം.

ന്യൂഡൽഹി: അമേരിക്കൻ പര്യടനത്തിനിടെ പ്രധാനമന്ത്രി നരേന്ദ്ര മോദി നടത്തിയത് 24 മീറ്റിംഗുകൾ. അമേരിക്കയിൽ ചെലവഴിച്ച 65 മണിക്കൂറിനുള്ളിൽ 24 മീറ്റിംഗുകളാണ് പ്രധാനമന്ത്രി പൂർത്തിയാക്കിയതെന്നാണ് റിപ്പോർട്ട്. അമേരിക്കയിൽ നടന്ന ഇരുപത് കൂടിക്കാഴ്ചകളും വിമാനത്തിൽ വെച്ചുനടന്ന നാല് നീണ്ട കൂടിക്കാഴ്ചകളും ഉൾപ്പടെയുള്ള കണക്കാണിത്. മൂന്ന് ദിവസത്തെ അമേരിക്കൻ സന്ദർശനത്തിൽ ലഭ്യമായ സമയമെല്ലാം വളരെ ഫലപ്രദമായ രീതിയിലാണ് പ്രധാനമന്ത്രി വിനിയോഗിച്ചതെന്നാണ് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നത്.

അമേരിക്കയിലേക്ക് പോകുമ്പോൾ വിമാനത്തിനുള്ളിൽ വെച്ച് വിദേശകാര്യ വിദഗ്ദരുമായി മോദി രണ്ടു തവണ കൂടിക്കാഴ്ചകൾ നടത്തിയിരുന്നു. അമേരിക്കയിലെത്തിയപ്പോൾ വാഷിങ്ടൺ ഡിസിയിലെ ഹോട്ടലിൽ മൂന്ന് കൂടിക്കാഴ്ചകളും നടന്നു. സെപ്റ്റംബർ 23 ന്, പ്രധാനമന്ത്രി ആഗോള കമ്പനികളുടെ സിഇഒമാരുമായി അഞ്ച് വ്യത്യസ്ത കൂടിക്കാഴ്ചകൾ പ്രധാനമന്ത്രി നടത്തി. അതിനുശേഷം യുഎസ് വൈസ് പ്രസിഡന്റ് കമല ഹാരിസ്, ഓസ്‌ട്രേലിയൻ പ്രധാനമന്ത്രി സ്‌കോട്ട് മോറിസൺ, ജാപ്പനീസ് പ്രധാനമന്ത്രി യോഷിഹിഡെ സുഗാ എന്നിവരുമായും അദ്ദേഹം കൂടിക്കാഴ്ച നടത്തി. പിന്നീട് ഈ കൂടിക്കാഴചകൾ വിലയിരുത്തുന്നതിനായി പ്രധാനമന്ത്രി നരേന്ദ്ര മോദി തന്റെ ടീമിനൊപ്പം മൂന്ന് ആഭ്യന്തര കൂടിക്കാഴ്ചകൾ നടത്തുകയും ചെയ്തു.

സെപ്തംബർ 24 വെള്ളിയാഴ്ച്ച അമേരിക്കൻ പ്രസിഡന്റ് ജോ ബൈഡനുമായി കൂടിക്കാഴ്ച നടത്തിയ ശേഷം നരേന്ദ്ര മോദി ക്വാഡ് സമ്മേളനത്തിൽ പങ്കെടുത്തു. ഇതിനുശേഷം നാല് അഭ്യന്തര ചർച്ചകളും നടത്തി. അമേരിക്കൻ സന്ദർശനം പൂർത്തിയാക്കിയ ശേഷം ശനിയാഴ്ച ഡൽഹിയിലേക്കുള്ള മടക്കയാത്രയ്ക്കിടെ വിമാനത്തിൽ വച്ച് രണ്ടു ചർച്ചകൾ കൂടി നടന്നുവെന്നും കേന്ദ്ര സർക്കാർ വൃത്തങ്ങളെ ഉദ്ധരിച്ച് ദേശീയ മാദ്ധ്യമങ്ങൾ റിപ്പോർട്ട് ചെയ്തു.

അതേസമയം വരുംവർഷങ്ങളിൽ ഇന്ത്യ-യുഎസ് ബന്ധം കൂടുതൽ ശക്തമാകുമെന്ന് തനിക്ക് ഉറപ്പുള്ളതായും വളരെ കാര്യക്ഷമമായ ഉഭയകക്ഷി, ബഹുരാഷ്ട്ര ചർച്ചകൾ നടത്താനായെന്നും നരേന്ദ്ര മോദി വ്യക്തമാക്കി.

ന്യൂഡൽഹി: ജീവനക്കാർക്ക് സന്തോഷ വാർത്തയുമായി കേന്ദ്ര സർക്കാർ. ദീപാവലിയും നവരാത്രിയും ഉൾപ്പെടെയുള്ള ഉത്സവ കാലത്തിന് മുന്നോടിയായി കേന്ദ്രസർക്കാർ ജീവനക്കാരുടെ ക്ഷാമബത്ത വീണ്ടും വർദ്ധിപ്പിക്കാൻ സാദ്ധ്യതയുണ്ടെന്നാണ് വിവരം. മൂന്ന് ശതമാനം ക്ഷാമബത്ത വർദ്ധിപ്പിക്കുമെന്നാണ് റിപ്പോർട്ട്.

ഇക്കഴിഞ്ഞ ജൂലൈ മാസത്തിൽ കേന്ദ്രസർക്കാർ ജീവനക്കാരുടെ ക്ഷാമബത്ത ഉയർത്തിയിരുന്നു. 17 ശതമാനത്തിൽ നിന്ന് 28 ശതമാനമാക്കിയാണ് ക്ഷാമബത്ത ഉയർത്തിയത്. ലക്ഷക്കണക്കിന് കേന്ദ്ര സർക്കാർ ജീവനക്കാർക്കും പെൻഷൻകാർക്കുമാണ് ക്ഷാമബത്ത ഉയർത്തിയതിന്റെ പ്രയോജനം ലഭിച്ചത്.

വീണ്ടും മൂന്ന് ശതമാനം വർധനവ് ഉണ്ടായാൽ ക്ഷാമബത്ത അടിസ്ഥാന ശമ്പളത്തിന്റെ 31 ശതമാനമായി ഉയരും. ജീവനക്കാരുടെ എച്ച്ആർഎയും 24 ശതമാനത്തിൽ നിന്ന് 27 ശതമാനമൈയി നേരത്തെ ഉയർത്തിയിരുന്നു.