General (Page 1,390)

On:

തിരുവനന്തപുരം: ബന്ധുനിയമനവുമായി ബന്ധപ്പെട്ട ലോകായുക്ത വിധി സ്റ്റേ ചെയ്യണമെന്നാവശ്യപ്പെട്ട് സുപ്രീം കോടതിയിൽ സമർപ്പിച്ച ഹർജി തള്ളിയ വിഷയത്തിൽ പ്രതികരണവുമായി മുൻമന്ത്രി കെ ടി ജലീൽ. തന്നെ കേൾക്കാതെയാണ് ലോകായുക്ത, ബന്ധു നിയമന കേസിൽ വിധി പറഞ്ഞതെന്നും അത്‌കൊണ്ട് എനിക്ക് പറയാനുള്ളത് കേൾക്കണമെന്നും ആവശ്യപ്പെട്ടാണ് ഹൈക്കോടതിയിലും സുപ്രീംകോടതിയിലും ഹർജി സമർപ്പിച്ചതെന്ന് കെ ടി ജലീൽ പറഞ്ഞു. ഫേസ്ബുക്കിൽ പങ്കുവെച്ച കുറിപ്പിലൂടെയാണ് അദ്ദേഹത്തിന്റെ പ്രതികരണം.

തന്റെ രാജിയോടെ ലോകായുക്ത വിധി നടപ്പിലായിക്കഴിഞ്ഞെന്നും അതിനാൽ തന്നെ പ്രസ്തുത വിധിയിൽ ഇടപെടുന്നില്ലെന്നുമാണ് പരമോന്നത നീതിപീഠം പറഞ്ഞത്. അതിന്റെ അടിസ്ഥാനത്തിലാണ് ഞാൻ നൽകിയ ഹർജി പിൻവലിച്ചത്. ലോകായുക്ത വിധിയുടെ നാൾവഴികളെ കുറിച്ച് ചിലത് പറയാനുണ്ട്. വിശദമായി അത് പിന്നീട് പറയാമെന്നും ജലീൽ വ്യക്തമാക്കുന്നു.

നാല് ദുരൂഹ മരണങ്ങളിലേക്ക് നയിച്ച പ്രമാദമായ ഐസ്‌ക്രീം പാർലർ കേസിൽ നിന്ന് പി.കെ. കുഞ്ഞാലിക്കുട്ടിയെ കുറ്റവിമുക്തനാക്കിക്കൊണ്ട് 2005 ജനുവരി 25 ന് വന്ന ഹൈക്കോടതി ഉത്തരവ്. 15.11.2004 ന് നടന്ന മഹാത്മാഗാന്ധി യൂണിവേഴ്‌സിറ്റി വൈസ് ചാൻസലറുടെ നിയമനം.
ഒരു ദിവസത്തോടെ ലോകം അവസാനിക്കുന്നില്ല. സത്യം ഒരുനാൾ ഉയിർത്തെഴുന്നേൽക്കുക തന്നെ ചെയ്യുമെന്നും ക്ഷമയോടെ കാത്തിരിക്കുകയെന്നും അദ്ദേഹം ഫേസ്ബുക്കിൽ കുറിച്ചു.

കെ ടി ജലീലിന്റെ ഫേസ്ബുക്ക് കുറിപ്പ്:

എന്നെ കേൾക്കാതെയാണ് ലോകായുക്ത, ബന്ധു നിയമന കേസിൽ വിധി പറഞ്ഞതെന്നും അത്‌കൊണ്ട് എനിക്ക് പറയാനുള്ളത് കേൾക്കണമെന്നും ആവശ്യപ്പെട്ടാണ് ഹൈക്കോടതിയിലും സുപ്രീംകോടതിയിലും ഹർജി സമർപ്പിച്ചത്. എന്റെ രാജിയോടെ ലോകായുക്ത വിധി നടപ്പിലായിക്കഴിഞ്ഞെന്നും അതിനാൽ തന്നെ പ്രസ്തുത വിധിയിൽ ഇടപെടുന്നില്ലെന്നുമാണ് പരമോന്നത നീതിപീഠം പറഞ്ഞത്. അതിന്റെ അടിസ്ഥാനത്തിലാണ് ഞാൻ നൽകിയ ഹർജി പിൻവലിച്ചത്.

ലോകായുക്ത വിധിയുടെ നാൾവഴികളെ കുറിച്ച് ചിലത് പറയാനുണ്ട്. വിശദമായി അത് പിന്നീട് പറയാം.

നാല് ദുരൂഹ മരണങ്ങളിലേക്ക് നയിച്ച പ്രമാദമായ ഐസ്‌ക്രീം പാർലർ കേസിൽ നിന്ന് പി.കെ. കുഞ്ഞാലിക്കുട്ടിയെ കുറ്റവിമുക്തനാക്കി ക്കൊണ്ട് 2005 ജനുവരി 25 ന് വന്ന ഹൈക്കോടതി ഉത്തരവ്. 15.11.2004 ന് നടന്ന മഹാത്മാഗാന്ധി യൂണിവേഴ്‌സിറ്റി വൈസ് ചാൻസലറുടെ നിയമനം.
ഒരു ദിവസത്തോടെ ലോകം അവസാനിക്കുന്നില്ല. സത്യം ഒരുനാൾ ഉയിർത്തെഴുനേൽക്കുക തന്നെ ചെയ്യും. ക്ഷമയോടെ കാത്തിരിക്കുക.

On:

ന്യൂഡൽഹി: മുൻമന്ത്രി കെ ടി ജലീലിന് തിരിച്ചടി. ബന്ധുനിയമന വിവാദത്തിലാണ് കെ.ടി. ജലീലിന് തിരിച്ചടി ഉണ്ടായത്. ലോകായുക്ത വിധി സ്റ്റേ ചെയ്യണമെന്ന കെ ടി ജലീലിന്റെ ആവശ്യം സുപ്രീം കോടതി നിരസിച്ചു. അപേക്ഷ ക്ഷണിക്കാതെയുള്ള നിയമനം ഭരണഘടനാ ലംഘനമാണെന്നും സുപ്രീം കോടതി വ്യക്തമാക്കി. വിധി സ്റ്റേ ചെയ്യാൻ കഴിയില്ലെന്നും കേസിൽ ഇടപെടാൻ ആകില്ലെന്നും കോടതി അറിയിച്ചു.

ബന്ധു നിയമന വിവാദത്തിൽ ഹൈക്കോടതി വിധിയെയും ലോകായുക്തയുടെ കണ്ടെത്തലിനെയും ചോദ്യം ചെയ്തുകൊണ്ടാണ് കെ ടി ജലീൽ സുപ്രീം കോടതിയിൽ ഹർജി സമർപ്പിച്ചത്. ഹർജി പരിഗണിക്കുന്നതിന് സുപ്രീം കോടതി വിസമ്മതിച്ച കോടതി ബന്ധുവല്ലായിരുന്നുവെങ്കിൽ വാദങ്ങൾ പരിഗണനക്കെടുക്കാമെന്നും പറഞ്ഞു. പിന്നീട് കോടതി ഹർജി തള്ളാൻ തീരുമാനിച്ചു. തുടർന്ന് ഹർജി പിൻവലിക്കാൻ അനുവദിക്കണമെന്ന് കെടി ജലീലിന്റെ അഭിഭാഷകൻ ആവശ്യപ്പെട്ടു. ഇതോടെ കോടതി ഇത് അംഗീകരിക്കുകയായിരുന്നു.

തനിക്ക് സ്വാഭാവിക നീതി നഷ്ടപ്പെട്ടെന്നും തന്നെ കേൾക്കാൻ ലോകായുക്ത തയാറായില്ലെന്നുമാണ് ജലീൽ ഹർജിയിൽ ആരോപിച്ചിരുന്നു. കേസിൽ നടപടി ക്രമങ്ങൾ പാലിച്ചിട്ടില്ലെന്നും പ്രാഥമിക അന്വേഷണം പോലും നടത്താതെയാണ് ലോകായുക്തയുടെ കണ്ടെത്തലെന്നും ഹർജിയിൽ പറഞ്ഞിരുന്നു. തനിക്കെതിരായ വാദങ്ങളിൽ കൃത്യതയില്ലെന്നും ബന്ധുവായ ആളെ ന്യൂനപക്ഷ വികസന കോർപറേഷന്റെ ജനറൽ മാനേജരായി നിയമിച്ചതിൽ ഒരു തരത്തിലുമുള്ള അധികാര ദുർവിനിയോഗം ഇല്ലെന്നുമാണ് ജലീലിന്റെ വാദം.

On:

തിരുവനന്തപുരം: സംസ്ഥാന വനിതാ കമ്മീഷൻ അദ്ധ്യക്ഷയായി പി സതീദേവി ചുമതലയേറ്റു. എം സി ജോസഫൈൻ വനിതാ കമ്മിഷൻ അദ്ധ്യക്ഷപദവിയിൽ നിന്ന് രാജി വച്ച ഒഴിവിലേക്കാണ് സതീദേവിയെ സർക്കാർ നിയമിച്ചത്. പരാതിക്കാരിയോട് അപമര്യാദയായി സംസാരിച്ചത് വിവാദമായതിനെ തുടർന്നാണ് എം സി ജോസഫൈൻ വനിതാ കമ്മീഷൻ അദ്ധ്യക്ഷ പദവി രാജിവെച്ചത്.

ഭയമില്ലാതെ പരാതിക്കാർക്ക് അധികാരികളെ സമീപിക്കാൻ കഴിയണമെന്നും ആ സാഹചര്യമാണ് ഉണ്ടാകേണ്ടതെന്ന ബോധം എല്ലാവർക്കും വേണമെന്നും സതീദേവി അറിയിച്ചു. വനിതാ കമ്മീഷൻ അദ്ധ്യക്ഷയായി സ്ഥാനമേറ്റ ശേഷമാണ് സതീദേവി ഇക്കാര്യം വ്യക്തമാക്കിയത്. പോലീസിൽ ഉൾപ്പെടെ സ്ത്രീവിരുദ്ധ സമീപനങ്ങളുണ്ട്. ഇത് മാറ്റാനുള്ള ശ്രമങ്ങൾ നടത്തുമെന്നും ഹരിതയുടെ പരാതിയിൽ പരിശോധിച്ച് തീരുമാനമെടുക്കുമെന്നും സതീദേവി വിശദീകരിച്ചു.

പാഠ്യപദ്ധതിയിലടക്കം സ്ത്രീവിരുദ്ധമായ നിലപാടുകളുണ്ടെങ്കിൽ മാറ്റാൻ ശ്രമിക്കുമെന്നും തൊഴിൽ മേഖലയിൽ സ്ത്രീ പുരുഷ തുല്ല്യത ഉറപ്പാക്കുന്ന നിയമങ്ങൾ പാലിക്കപ്പെടുന്നുണ്ടോ എന്ന് പരിശോധിക്കുമെന്നും സതീദേവി കൂട്ടിച്ചേർത്തു.

സി പി എം സംസ്ഥാന സമിതി അംഗമായ പി ജയരാജന്റെ സഹോദരിയും അന്തരിച്ച സി പി എം നേതാവ് എം ദാസന്റെ ഭാര്യയുമായ സതീദേവി 2004 ൽ വടകരയിൽ നിന്ന് ലോക്സഭയിലേക്ക് തെരഞ്ഞെടുക്കപ്പെട്ടിട്ടുണ്ട്. കോഴിക്കോട് ജില്ലാ സഹകരണ ബാങ്ക് പ്രസിഡന്റ്, സംസ്ഥാന സഹകരണ ബാങ്ക് ഡയറക്ടർ, ഉത്തര മേഖല ഉപഭോക്തൃ തർക്ക പരിഹാര ഫോറം അംഗം എന്നീ നിലകളിൽ സതീദേവി സേവനം അനുഷ്ഠിച്ചിട്ടുണ്ട്.

On:

കൊച്ചി: കെ സുധാകരന് പിന്തുണയുമായി പ്രതിപക്ഷ നേതാവ് വി ഡി സതീശൻ. മോൻസൻ മാവുങ്കൽ തട്ടിപ്പ് കേസിലാണ് കെ സുധാകരന് പിന്തുണ അറിയിച്ച് പ്രതിപക്ഷ നേതാവ് വിഡി സതീശൻ രംഗത്തെത്തിയത്. ഒരു ഫോട്ടോയുടെ പേരിൽ കെ സുധാകരനെ അനാവശ്യമായി വേട്ടയാടുകയാണെന്ന് പ്രതിപക്ഷ നേതാവ് വി ഡി സതീശൻ ആരോപിച്ചു.

രാഷ്ട്രീയ നേതാക്കൾ ഓരോ സ്ഥലത്തും പോകുമ്പോൾ ആളുകൾ ഫോട്ടോയെടുക്കാൻ വരാറുണ്ട്. അവർ പിൽക്കാലത്ത് ഏതെങ്കിലും കേസിൽ അകപ്പെടുമ്പോൾ രാഷ്ട്രീയ നേതാക്കളെ കുറ്റപ്പെടുത്തരുത്. അത്തരത്തിൽ ആരെയും വേട്ടയാടുന്നതിനോട് പ്രതിപക്ഷത്തിന് യോജിപ്പില്ലെന്നും അദ്ദേഹം പ്രതികരിച്ചു.

അതേസമയം കേസിൽ സിബിഐ അന്വേഷണം നടത്തിയാലേ സത്യം പുറത്തുവരൂവെന്ന് ബെന്നി ബഹന്നാൻ വ്യക്തമാക്കി. സത്യം പുറത്ത് വരണമെങ്കിൽ കേന്ദ്ര അന്വേഷണം വേണമെന്നാണ് അദ്ദേഹം പറയുന്നത്. തട്ടിപ്പുകാരനായ മോൻസൻ മാവുങ്കലിനും പരാതിക്കാരനായ അനൂപിനെതിരെയും പരാതി നൽകാനാണ് സുധാകരന്റെ നീക്കമെന്നാണ് റിപ്പോർട്ട്.

On:

തിരുവനന്തപുരം: ജയ്ഹിന്ദിന്റെ ചെയർമാൻ സ്ഥാനം രാജിവെച്ച് രമേശ് ചെന്നിത്തല. കെ പി സി സിക്കു കീഴിലുള്ള രാജീവ് ഗാന്ധി ഇൻസ്റ്റിറ്റ്യൂട്ട് ചെയർമാൻ സ്ഥാനവും കെ കരുണാകരൻ ഫൗണ്ടെഷൻ ചെയർമാൻ സ്ഥാനവും ചെന്നിത്തല രാജിവെച്ചു.

കഴിഞ്ഞ മേയ് 24 നാണ് ചെന്നിത്തല സ്ഥാനങ്ങൾ രാജിവച്ചത്. കെ പി സി സി അദ്ധ്യക്ഷനാണ് ഈ സ്ഥാനങ്ങൾ വഹിക്കേണ്ടതെന്ന് ചെന്നിത്തല വ്യക്തമാക്കി. മുൻ അദ്ധ്യക്ഷനായിരുന്ന മുല്ലപ്പള്ളി രാമചന്ദ്രൻ ഈ സ്ഥാനങ്ങൾ ഏറ്റെടുക്കാൻ വിസമ്മതിച്ചതിനാലാണ് താൻ അന്ന് ഈ സ്ഥാനങ്ങളിൽ തുടർന്നതെന്നും ഇപ്പോൾ പുതിയ അദ്ധ്യക്ഷനെത്തിയതിനാലാണ് സ്ഥാനങ്ങളിൽ നിന്നും രാജി വയ്ക്കുന്നതെന്നും ചെന്നിത്തല വ്യക്തമാക്കി.

അതേസമയം ചെന്നിത്തലയുടെ രാജി സ്വീകരിച്ചിട്ടില്ലെന്നാണ് കെ പി സി സി നേതൃത്വം അറിയിച്ചിരിക്കുന്നത്. അതേസമയം കെ പി സി സിക്കു കീഴിലുള്ള മുഴുവൻ സ്ഥാപനങ്ങളിലും സ്വകാര്യ ഏജൻസിയെ കൊണ്ട് ഓഡിറ്റ് നടത്താനും നേതൃത്വം തീരുമാനിച്ചു. ഈ സ്ഥാപനങ്ങളുമായി ബന്ധപ്പെട്ട മുഴുവൻ കണക്കുകളും പരിശോധിക്കാനാണ് കെ പി സി സി നേതൃത്വം നൽകിയ നിർദ്ദേശം.

On:

ന്യൂഡൽഹി: തുർക്കി പ്രസിഡന്റ് റജബ് ത്വയ്യിബ് എർദോഗനുമായുള്ള കൂടിക്കാഴച്ചയ്ക്ക് വിസമ്മതിച്ച് അമേരിക്കൻ പ്രസിഡന്റ് ജോ ബൈഡൻ. ന്യൂയോർക്കിൽ നടന്ന 76 -ാമത് ഐക്യരാഷ്ട്രസഭയുടെ പൊതുസമ്മേളനത്തിൽ പങ്കെടുത്തപ്പോഴാണ് എർദോഗനുമായുള്ള കൂടിക്കാഴ്ച്ചയ്ക്ക് ബെഡൻ വിസമ്മതം അറിയിച്ചതെന്നാണ് റിപ്പോർട്ട്. ബൈഡന്റെ നീക്കം എർദോഗനെ നിരാശനാക്കിയെന്നും അദ്ദേഹം ദേഷ്യപ്പെട്ടെന്നുമാണ് അൽ ജസീറ റിപ്പോർട്ട് ചെയ്യുന്നത്. നേരത്തെ അമേരിക്കൻ പ്രസിഡന്റുമായി ചേർന്ന് പ്രവർത്തിക്കുന്നതിൽ തനിക്ക് പ്രശ്‌നങ്ങളുണ്ടായിരുന്നില്ലെന്നും എന്നാൽ ബൈഡന്റെ വരവിനു ശേഷം കാര്യങ്ങൾ കൂടുതൽ വഷളായെന്നുമാണ് എർദോഗൻ ടർക്കിഷ് മാദ്ധ്യമങ്ങളോട് പ്രതികരിച്ചത്.

അമേരിക്കൻ പ്രസിഡന്റുമായുള്ള സംഭാഷണം തൃപ്തികരമെന്ന് വിളിക്കാനാകില്ല. ഭീകര സംഘടനകളോട് പോരാടുന്നതിനു പകരം യു.എസ് അവരെ പിന്തുണയ്ക്കുന്നുവെന്നാണ് എർദോഗന്റെ ആരോപണം. വടക്കൻ സിറിയയിൽ അമേരിക്കയുടെ പങ്കാളിത്തം നിരോധിത സംഘടനയായ കുർദിസ്ഥാൻ വർക്കേഴ്‌സ് പാർട്ടിയുമായി ബന്ധമുള്ള പീപ്പിൾ പ്രൊട്ടക്ഷൻ യൂണിറ്റുകളുമായാണ്. അതേസമയം അമേരിക്കയോടുള്ള തുർക്കിയുടെ അസംതൃപ്തി റഷ്യയ്ക്ക് ഗുണകരമാകാൻ സാധ്യതയുണ്ടെന്നാണ് വിവരം.

റഷ്യയിൽ നിന്ന് എസ്-400 മിസൈൽ പ്രതിരോധ സംവിധാനങ്ങളുടെ രണ്ടാം ബാച്ച് വാങ്ങാൻ തുർക്കിക്ക് താത്പര്യമുണ്ടെന്നാണ് എർദോഗൻ വ്യക്തമാക്കുന്നത്. ഈ ആയുധങ്ങൾക്കായി യു.എസുമായി ശത്രുതയ്ക്ക് തയ്യാറാണെന്ന് തുർക്കി ഉദ്യോഗസ്ഥരും പറയുന്നുണ്ട്. ഇത്തരം നീക്കങ്ങൾ തുർക്കിക്കുമേൽ യു.എസ് ഉപരോധ നടപടിയിലേക്ക് നീങ്ങുന്നതിന് കാരണമായേക്കാമെന്നാണ് സൂചന. റഷ്യൻ പ്രസിഡന്റ് വ്ളാഡിമിർ പുടിനുമായി എർദോഗൻ കൂടിക്കാഴ്ച്ച നടത്തിയിരുന്നു.

നേരത്തെ പാകിസ്താൻ പ്രധാനമന്ത്രി ഇമ്രാൻ ഖാനും ബൈഡനെതിരായ അതൃപ്തി രേഖപ്പെടുത്തിയിരുന്നു. യു.എസ് പ്രസിഡന്റ് സ്ഥാനം ഏറ്റെടുത്ത ശേഷം ബൈഡൻ ഖാനെ ഫോണിൽ വിളിക്കുക പോലും ചെയ്തിരുന്നില്ല. എന്നാൽ പാക്കിസ്താനും തുർക്കിയും തമ്മിൽ നല്ല സൗഹൃദ ബന്ധം നിലനിൽക്കുന്നുണ്ട്. ഐക്യരാഷ്ട്രസഭയുടെ ജനറൽ അസംബ്ലിയിൽ കാശ്മീർ പ്രശ്‌നം എർദോഗൻ ഉന്നയിച്ചിരുന്നു. ഇതിന് പാകിസ്താന്റെ മുൻ അംബാസഡർ തുർക്കിയെ പ്രശംസിക്കുകയും ചെയ്തിരുന്നു.

On:

തിരുവനന്തപുരം: വൈദ്യുതി ഉപഭോഗവുമായി ബന്ധപ്പെട്ട് സംസ്ഥാനത്തും പ്രീപെയ്ഡ് സ്മാർട്ട് മീറ്റർ സംവിധാനം നടപ്പിലാക്കാനുള്ള തീരുമാനത്തിലുറച്ച് സംസ്ഥാന വൈദ്യുതി വകുപ്പും കെഎസ്ഇബിയും. കേന്ദ്രസർക്കാർ നിർദ്ദേശം അനുസരിച്ചാണ് പദ്ധതി നടപ്പിലാക്കുന്നതെന്നാണ് സംസ്ഥാന സർക്കാർ പറയുന്നതെങ്കിലും പൊതുമേഖലാ സ്ഥാപനത്തിന്റെ നിലവിലെ നഷ്ടം മറികടക്കലാണ് പദ്ധതിയിലൂടെ ലക്ഷ്യം വെയ്ക്കുന്നതെന്നാണ് റിപ്പോർട്ട്.

സാധാരണക്കാരെയും തീരുമാനം ബാധിക്കുമെന്നാണ് വിവരം. നിലവിൽ ഉപയോഗിച്ച ശേഷമാണ് വൈദ്യുതിക്ക് പണം അടയ്ക്കുന്നതെങ്കിൽ ഇനിമുതൽ അത് പ്രീപെയ്ഡ് മൊബൈൽ കണക്ഷൻ പോലെയായിരിക്കും. നിശ്ചിത തുകയ്ക്ക് റീചാർജ് ചെയ്‌തെന്ന പോലെ വൈദ്യുതി ഉപയോഗിക്കുന്ന രീതിയായിരിക്കും ഇനി ഉണ്ടാകുക.പ്രീ പെയ്ഡ് സ്മാർട്ട് മീറ്ററുകൾ വരുന്നതോടെ വൈദ്യുതി ബിൽ കുടിശിക താനേ ഇല്ലാതാകുംകയും ചെയ്യും.

പ്രീപെയ്ഡ് മൊബൈൽ കണക്ഷനിൽ ബാലൻസ് ഇല്ലെങ്കിൽ സേവനം ലഭിക്കില്ലെന്നത് പോലെ ഈ പ്രീപെയ്ഡ് സ്മാർട് മീറ്ററിൽ പണമില്ലെങ്കിൽ ഉപഭോക്താവിന് വൈദ്യുതി ലഭിക്കില്ല. 2019-20 സാമ്പത്തിക വർഷം 25 ശതമാനത്തിലധികം പ്രസരണ-വിതരണ നഷ്ടം രേഖപ്പെടുത്തിയ സംസ്ഥാനങ്ങൾ 2023 ഡിസംബറിന് മുമ്പ് എല്ലാ ഉപഭോക്താക്കൾക്കും സ്മാർട് മീറ്റർ സ്ഥാപിക്കണമെന്നാണ് നിർദ്ദേശം.

കേരളത്തിന്റെ 2019-20 കാലത്തെ പ്രസരണ – വിതരണ നഷ്ടം ഒൻപത് ശതമാനം മാത്രമാണ്. അതിനാൽ 2025 മാർച്ചിന് മുമ്പ് മാത്രം കേരളത്തിൽ പൂർണമായി സ്മാർട് മീറ്റർ ഘടിപ്പിച്ചാൽ മതി. ആദ്യ ഘട്ടത്തിൽ സർക്കാർ-പൊതുമേഖലാ സ്ഥാപനങ്ങളിൽ പ്രീ പെയ്ഡ് സ്മാർട് മീറ്ററുകൾ സ്ഥാപിക്കും. സംസ്ഥാന വൈദ്യതി ബോർഡിന് വാട്ടർ അതോറിറ്റിയിൽ നിന്നടക്കം കോടികളുടെ വൈദ്യുതി ബിൽ കുടശ്ശികയാണുള്ളത്. പ്രീപെയ്ഡ് സ്മാർട് മീറ്റർ വരുന്നതോടെ ഇവർക്ക് പോലും അക്കൗണ്ടിൽ പണമില്ലെങ്കിൽ വൈദ്യുതി ഉപയോഗിക്കാൻ സാധിക്കാത്ത സ്ഥിതി ഉണ്ടാകും.

ഗാർഹിക ഉപഭോക്താക്കൾക്ക് അടുത്ത ഘട്ടത്തിൽ സ്മാർട് മീറ്ററുകൾ നൽകും. കേന്ദ്ര വൈദ്യുതി നിയമ ഭേദഗതിയിൽ സ്വകാര്യ വൈദ്യുതി വിതരണ കമ്പനികൾക്കും അനുമതിയുണ്ട്. സ്മാർട് മീറ്റർ വരുന്നതോടെ ഓരോ മേഖലയിലെയും വൈദ്യുതി ഉപഭോഗവും വരുമാനവും കൃത്യമായി തിരിച്ചറിയാം. സ്വകാര്യവത്കരണത്തെ പ്രോത്സാഹിപ്പിക്കാനാണ് സ്മാർട് മീറ്റർ സംവിധാനമെന്നാണ് പ്രധാനമായും ഉയരുന്ന വിമർശനം.

On:

ന്യൂഡൽഹി: കോൺഗ്രസിനുള്ളിലെ പ്രശ്‌നങ്ങളിലുള്ള നിരാശ പങ്കുവെച്ച് മുതിർന്ന നേതാവ് പി ചിദംബരം. പാർട്ടി ഫോറങ്ങളിൽ അർഥപൂർണമായ സംഭാഷണങ്ങൾ ആരംഭിക്കാൻ കഴിയാതിരിക്കുമ്പോൾ നിസ്സാഹയത തോന്നുന്നുവെന്ന് അദ്ദേഹം പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.

സഹപ്രവർത്തകനും എം.പിയുമായ ഒരാളുടെ വീടിനു പുറത്ത് കോൺഗ്രസ് പ്രവർത്തകർ മുദ്രാവാക്യം വിളിക്കുന്നത് കാണുമ്പോൾ മനോവേദനയും നിസ്സഹായതയും അനുഭവപ്പെടുന്നതായും അദ്ദേഹം വ്യക്തമാക്കി. ഒരാൾക്ക് പിൻവലിയാൻ യോജിക്കുന്ന സുരക്ഷിതമായ ഇടം നിശ്ശബ്ദതയാണെന്നു തോന്നുന്നുവെന്നും അദ്ദേഹം കൂട്ടിച്ചേർത്തു.

മുതിർന്ന നേതാവ് കപിൽ സിബലിന്റെ വീടിന് മുന്നിൽ കോൺഗ്രസ് പ്രവർത്തകർ പ്രതിഷേധവുമായി എത്തിയ സാഹചര്യത്തിലാണ് അദ്ദേഹത്തിന്റെ പരാമർശങ്ങൾ. കോൺഗ്രസ് നേതൃത്വത്തിനെതിരെ വിമർശനം ഉന്നയിച്ചതിനു പിന്നാലെയാണ് കപിൽ സിബലിന്റെ വീടിനു പുറത്ത് കോൺഗ്രസ് പ്രവർത്തകർ പ്രതിഷേധവുമായി എത്തിയത്.

On:

കൊച്ചി: കൊച്ചി മെട്രോ എം.ഡിയും മുൻ ഡി.ജി.പിയുമായ ലോക്നാഥ് ബെഹ്‌റ അവധിയിലാണെന്ന വാർത്തകൾ നിരസിച്ച് കെ എം ആർ എൽ. ലോക്‌നാഥ് ബെഹ്‌റ അവധിയിൽ പ്രവേശിച്ചിട്ടില്ലെന്ന് കെഎംആർഎൽ അറിയിച്ചു. ബെഹ്‌റ ഓഫീസിൽ ഉണ്ടെന്നും കെ എം ആർ എൽ വ്യക്തമാക്കി.

ഒക്ടോബർ ഒന്നു മുതൽ നാലുവരെ കട്ടക്കിൽ നടക്കുന്ന ഒഡിഷ അഡ്മിനിസ്ട്രേറ്റീവ് സർവീസിന്റെ അഭിമുഖ പാനലിലേക്ക് അദ്ദേഹത്തിന് ക്ഷണം ലഭിച്ചിട്ടുണ്ടെന്നും അതിന് പോവുകയാണെന്നും കെ എം ആർ എൽ വിശദമാക്കി.

പുരാവസ്തു വിൽപനയുടെ പേരിൽ കോടികൾ തട്ടിയ മോൻസൻ മാവുങ്കലിന് ബെഹ്‌റ അടക്കമുള്ള മുതിർന്ന പോലീസ് ഉദ്യോഗസ്ഥരുടെ സഹായം ലഭിച്ചെന്ന ആരോപണം ഉയർന്നതിന് പിന്നാലെ ലോക്നാഥ് ബെഹ്റ മൂന്ന് ദിവസമായി ഓഫീസിൽ വരുന്നില്ലെന്നും അവധിയിലാണെന്നും അദ്ദേഹത്തിന്റെ ഓഫീസ് പ്രതികരിച്ചിരുന്നു. എന്നാൽ വൈകിട്ടോടെ ഇത് തിരുത്തി കെ എം ആർ എൽ വാർത്താക്കുറിപ്പ് ഇറക്കുകയായിരുന്നു. അതേസമയം മോൻസനുമായി ബന്ധപ്പെട്ട് ഉയർന്ന വിവാദങ്ങളോട് ബെഹ്‌റ ഇതുവരെ പ്രതികരിച്ചിട്ടില്ല.

On:

മഞ്ചേരി: പി വി അൻവർ എംഎൽഎയ്‌ക്കെതിരെ ക്രൈംബ്രാഞ്ച് റിപ്പോർട്ട്. 50 ലക്ഷത്തിന്റെ ക്രഷർ തട്ടിപ്പ് കേസിൽ പി വി അൻവർ എംഎൽഎ പ്രഥമദൃഷ്ട്യാ വഞ്ചന നടത്തിയതായാണ് ക്രൈംബ്രാഞ്ചിന്റെ ഇടക്കാല അന്വേഷണ റിപ്പോർട്ട്. കർണാടകയിൽ ക്രഷർ ബിസിനസിൽ പങ്കാളിത്തം വാഗ്ദാനം ചെയ്ത് പ്രവാസി എൻജിനീയറുടെ 50 ലക്ഷം തട്ടിയ കേസിൽ പി വി അൻവർ എംഎൽഎ പ്രഥമദൃഷ്ട്യാ വഞ്ചനടത്തിയതായാണ് ക്രൈം ബ്രാഞ്ച് ഡിവൈഎസ്പിയുടെ അന്വേഷണ റിപ്പോർട്ടിൽ വ്യക്തമാക്കിയിരിക്കുന്നത്.

മഞ്ചേരി ചീഫ് ജുഡീഷ്യൽ മജിസ്‌ട്രേറ്റ് കോടതിയിൽ അന്വേഷണ ഉദ്യോഗസ്ഥനായ മലപ്പുറം ക്രൈംബ്രാഞ്ച് ഡിവൈഎസ്പി പി വിക്രമൻ സമർപ്പിച്ച റിപ്പോർട്ടിലാണ് ഇക്കാര്യം വെളിപ്പെടുത്തിയത്. മംഗലാപുരം ബൽത്തങ്ങാടി തൂലൂക്കിലെ തണ്ണീരുപന്ത പഞ്ചായത്തിലെ ക്രഷർ പി വി അൻവറിന് വിൽപന നടത്തിയ കാസർകോട് സ്വദേശി കെ. ഇബ്രാഹിമിൽ നിന്നും ഡിവൈഎസ്പി മൊഴി രേഖപ്പെടുത്തിയിരുന്നു.

ക്രഷറും ഇതോടൊപ്പമുള്ള 26 ഏക്കർ ഭൂമിയും സ്വന്തം ഉടമസ്ഥതയിലാണെന്നായിരുന്നു പി വി അൻവറിന്റെ അവകാശവാദം. ക്രയവിക്രയ അവകാശമുണ്ടെന്ന് പറഞ്ഞാണ് പി വി അൻവർ പ്രവാസി എൻജിനീയർ മലപ്പുറം പട്ടർക്കടവ് സ്വദേശി നടുത്തൊടി സലീമിൽ നിന്നും 10 ശതമാനം ഷെയറും മാസം അരലക്ഷം ലാഭവിഹിതവും വാഗ്ദാനം ചെയ്ത് 50 ലക്ഷം രൂപ വാങ്ങിയത്. എന്നാൽ, ക്രഷർ സർക്കാരിൽ നിന്ന് പാട്ടത്തിന് ലഭിച്ച രണ്ടേക്കറോളം ഭൂമിയിലാണെന്നും ഇതിന്റെ പാട്ടക്കരാർ മാത്രമാണ് അൻവറിന് കൈമാറിയതെന്നുമാണ് ഇബ്രാഹിം നൽകിയിരിക്കുന്ന മൊഴി.