General (Page 1,391)

ന്യൂഡൽഹി: പഞ്ചാബിൽ കോൺഗ്രസിന്റെ അനുനയ ശ്രമങ്ങൾ ഫലം കാണുന്നു. പഞ്ചാബ് പിസിസി അദ്ധ്യക്ഷ സ്ഥാനത്ത് നിന്ന് രാജിവച്ച നവ്‌ജ്യോത് സിംഗ് സിദ്ദുവുമായി പഞ്ചാബ് മുഖ്യമന്ത്രി ചരൺസിംഗ് ചന്നി നടത്തിയ ചർച്ചയിൽ പുരോഗതി ഉണ്ടായതായാണ് വിവരം. സിദ്ദു മുന്നോട്ടു വച്ച ആവശ്യങ്ങളിൽ ചിലത് പരിഗണിക്കാമെന്ന് മുഖ്യമന്ത്രി ഉറപ്പു നൽകിയെന്നാണ് ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നത്. ഡി.ജി.പി, അഡ്വക്കേറ്റ് ജനറൽ എന്നിവരെ മാറ്റണം എന്ന സിദ്ദുവിന്റെ ആവശ്യം മന്ത്രിസഭ പരിഗണിക്കുമെന്ന് മുഖ്യമന്ത്രി അറിയിച്ചതായാണ് സൂചനകൾ. സിദ്ദു രാജി പിൻവലിക്കാൻ സാധ്യതയുണ്ടെന്ന റിപ്പോർട്ടുകളും പുറത്തു വരുന്നുണ്ട്.

അതേ സമയം മന്ത്രിമാരെ മാറ്റാൻ സാദ്ധ്യതയില്ലെന്നാണ് വിവരം. ആഭ്യന്തര വകുപ്പിന്റെ കാര്യത്തിലും വിട്ടുവീഴ്ചയുണ്ടാകില്ല. പഞ്ചാബിൽ പുതുതായി ചുമതലയേറ്റ ചന്നി സർക്കാരിൽ തന്റെ അനുയായികളായ എം.എൽ.എമാരെ ഉൾപ്പെടുത്താതിരുന്നതിൽ സിദ്ദുവിന് കടുത്ത അതൃപ്തിയുണ്ടായിരുന്നു. മന്ത്രിസഭാ രൂപീകരണ ചർച്ചകളിൽ നിന്നും സിദ്ദുവിനെ എ.ഐ.സി.സി നേതൃത്വം പൂർണമായും മാറ്റി നിർത്തുകയായിരുന്നു. ഇതിൽ പ്രതിഷേധിച്ചാണ് സിദ്ദു പിസിസി അദ്ധ്യക്ഷ സ്ഥാനം രാജി വെച്ചത്.

ന്യൂഡൽഹി: മുതിർന്ന നേതാവ് കപിൽ സിബലിന് പിന്തുണ അറിയിച്ച് ശശി തരൂർ എംപി. കോൺഗ്രസ് നേതൃത്വത്തെ വിമർശിച്ച കപിൽ സിബലിനെതിരെ പ്രതിഷേധം ഉയരുന്ന സാഹചര്യത്തിലാണ് ശശി തരൂർ അദ്ദേഹത്തിന് പിന്തുണ അറിയിച്ച് രംഗത്തെത്തിയത്. കപിൽ സിബലിനെതിരായ പ്രതിഷേധം ലജ്ജാകരമാണെന്ന് അദ്ദേഹം പറഞ്ഞു. കപിൽ സിബലിന്റെ അഭിപ്രായത്തോട് വിയോജിപ്പുണ്ടായാലും അദ്ദേഹത്തെ കേൾക്കാൻ തയാറാകണമെന്ന് തരൂർ വ്യക്തമാക്കി. ഫേസ്ബുക്ക് കുറിപ്പിലൂടെയായിരുന്നു അദ്ദേഹത്തിന്റെ പ്രതികരണം.

ഇതു ലജ്ജാകരമാണ്. കപിൽ സിബൽ യഥാർഥ കോൺഗ്രസുകാരനാണെന്നു നമുക്കെല്ലാം അറിയാം. ഇന്ത്യൻ നാഷനൽ കോൺഗ്രസിനായി കോടതിയിൽ ഒട്ടേറെ കേസുകൾ വാദിച്ചിട്ടുള്ള ആളാണ് അദ്ദേഹം. ഒരു ജനാധിപത്യ പാർട്ടി എന്ന നിലയിൽ അദ്ദേഹത്തിനു പറയാനുള്ളത് എന്താണെന്നു നാം കേൾക്കണം. ആവശ്യമെങ്കിൽ അതിനോടു വിയോജിക്കാം. പക്ഷേ ഇങ്ങനെയല്ല വേണ്ടതെന്നും ബിജെപിയെ നേരിടുന്നതിനായി നമ്മെ കൂടുതൽ കരുത്തുറ്റതാക്കുകയാണു വേണ്ടതെന്നും അദ്ദേഹം ആവശ്യപ്പെട്ടു.

കഴിഞ്ഞ ദിവസമാണ് കപിൽ സിബൽ കോൺഗ്രസ് നേതൃത്വത്തിനെതിരെ രൂക്ഷ വിമർശനവുമായി രംഗത്തെത്തിയത്. പ്രസിഡന്റ് ഇല്ലാതെ പാർട്ടി മുന്നോട്ടു പോകുന്നത് തുടരുകയാണെന്നും ആരാണ് തീരുമാനങ്ങൾ എടുക്കുന്നതെന്ന് ആർക്കും അറിയില്ലെന്നും അദ്ദേഹം കുറ്റപ്പെടുത്തിയിരുന്നു.

തങ്ങളുടെ പാർട്ടിയിൽ പ്രസിഡന്റ് ഇല്ല. അതുകൊണ്ടു തന്നെ ആരാണ് തീരുമാനങ്ങൾ കൈക്കൊള്ളുന്നതെന്ന് തങ്ങൾക്ക് അറിയുകയില്ല. ഞങ്ങൾക്കറിയാം, എന്നാലും അറിയില്ലെന്ന് അദ്ദേഹം മാദ്ധ്യമങ്ങളോട് പറഞ്ഞു.

ആരെയും പേരെടുത്തു പറഞ്ഞായിരുന്നില്ല, സിബലിന്റെ വിമർശനം. പഞ്ചാബ് വിഷയത്തിൽ തീരുമാനം കൈക്കൊണ്ട കോൺഗ്രസ് മുൻ അധ്യക്ഷൻ രാഹുൽ ഗാന്ധിയെയും താത്കാലിക അധ്യക്ഷ സോണിയാ ഗാന്ധിയെയും ഉദ്ദേശിച്ചായിരുന്നു സിബലിന്റെ പരാമർശങ്ങളെന്നാണ് റിപ്പോർട്ട്. തങ്ങൾ ഗ്രൂപ്പ് 23 ആണെന്നും അല്ലാതെ ‘ജി ഹുസൂർ-23’ (ശരി അങ്ങുന്നേ) അല്ലെന്നും കബിൽ സിബൽ വ്യക്തമാക്കിയിരുന്നു.

കൊൽക്കത്ത: പശ്ചിമ ബംഗാളിൽ ഇന്ന് ഉപതെരഞ്ഞെടുപ്പ്. മുഖ്യമന്ത്രി മമതാ ബാനർജി ജനവിധി തേടുന്ന ഭവാനിപൂർ ഉൾപ്പെടെയുള്ള നിയമസഭാ മണ്ഡലങ്ങളിലാണ് ഉപതെരഞ്ഞെടുപ്പ് നടക്കുന്നത്. മമത ബാനർജിയെ സംബന്ധിച്ചിടത്തോളം ഏറെ നിർണായകമായ ഉപതെരഞ്ഞെടുപ്പാണിത്. പശ്ചിമ ബംഗാളിൽ മുഖ്യമന്ത്രിയായി തുടരണമെങ്കിൽ മമത ബാനർജിയ്ക്ക് ഈ ഉപതെരഞ്ഞെടുപ്പിൽ വിജയിക്കണം.

രാവിലെ ഏഴു മണിയ്ക്കാണ് ബംഗാളിൽ പോളിങ് ആരംഭിച്ചത്. ഒക്ടോബർ മൂന്നിന് വോട്ടെണ്ണൽ നടക്കും. ഉപതെരഞ്ഞെടുപ്പിൽ വിയിച്ച് നിയമസഭയിലെത്തിയാൽ മമത ബാനർജിയ്ക്ക് മുഖ്യമന്ത്രിയായി തുടരാം. തൃണമൂൽ കോൺഗ്രസ് എംഎൽഎയായ ശോഭൻദേബ് ചട്ടോപധ്യായാണ് മമതയ്ക്ക് മത്സരിക്കാനായി രാജിവെച്ചത്. ബിജെപി സ്ഥാനാർത്ഥിയായ പ്രിയങ്ക ട്രിബേവാളും സിപിഎം സ്ഥാനാർത്ഥിയായ ശ്രീജിബ് ബിശ്വാസുമാണ് മമതയ്ക്കെതിരെ മത്സരിക്കുന്നത്.

ഉപതെരഞ്ഞെടുപ്പിനോട് അനുബന്ധിച്ച് ഭവനിപൂരിൽ സുരക്ഷ ശക്തമാക്കിയിരിക്കുകയാണ്. ചൊവ്വാഴ്ച വൈകിട്ട് മുതൽ പോളിങ് ബൂത്തുകളുടെ 200 മീറ്റർ പരിധിയിൽ നിരോധനാജ്ഞ പ്രഖ്യാപിച്ചിട്ടുണ്ട്. അഞ്ച് പേരിൽ കൂടുതൽ കൂട്ടം കൂടുന്നതിനാണ് നിരോധനം. സുരക്ഷാനടപടികളുടെ ഭാഗമായി 35 കമ്പനി കേന്ദ്രസേനയെയും വിന്യസിച്ചിട്ടുണ്ട്. പ്രദേശത്ത് കനത്ത മഴയുണ്ടാകുമെന്ന കാലാവസ്ഥാ മുന്നറിയിപ്പിനെ തുടർന്ന് പോളിങ് സ്റ്റേഷനുകളിൽ വെള്ളക്കെട്ട് ഒഴിവാക്കാനുള്ള നിർദേശവും നൽകിയിട്ടുണ്ട്. സംഘർഷ സാധ്യത കണക്കിലെടുത്ത് കനത്ത ജാഗ്രതയിലാണ് സർക്കാർ.

ന്യൂഡൽഹി: പഞ്ചാബ് മുഖ്യമന്ത്രി സ്ഥാനം രാജിവെച്ച കോൺഗ്രസ് നേതാവ് അമരീന്ദർ സിംഗ് ബി.ജെ.പിയിലേക്കെന്ന് റിപ്പോർട്ട്. കേന്ദ്ര ആഭ്യന്തര മന്ത്രി അമിത് ഷായുമായി അമരീന്ദർ സിംഗ് കൂടിക്കാഴ്ച്ച നടത്തി. ഡൽഹിയിൽ അമിത് ഷായുടെ വസതിയിൽ വെച്ചാണ് കൂടിക്കാഴ്ച്ച.

ബുധനാഴ്ച്ച വൈകിട്ട് ആറു മണിയോടെയാണ് അമരീന്ദർ സിംഗ് അമിത് ഷായുടെ വസതിയിലെത്തിയത്. കഴിഞ്ഞയാഴ്ചയാണ് അമരിന്ദർ സിംഗ് പഞ്ചാബ് മുഖ്യമന്ത്രി സ്ഥാനം രാജിവച്ചത്. ഏറെ കാലമായി പഞ്ചാബ് കോൺഗ്രസിൽ നിലനിന്ന അഭിപ്രായ ഭിന്നകൾക്കൊടുവിലായിരുന്നു രാജി. മുഖ്യമന്ത്രി സ്ഥാനം രാജി വച്ച സമയത്ത് അമരീന്ദർ ബി.ജെ.പിയിൽ ചേരുമോ എന്ന മാദ്ധ്യമ പ്രവർത്തകരുടെ ചോദ്യത്തിന് മറുപടി നൽകിയിരുന്നില്ല. എന്നാൽ ഡൽഹിയിൽ വെച്ച് അമിത് ഷായുമായി കൂടിക്കാഴ്ച്ച നടത്തിയതോടെ അമരീന്ദർ സിംഗ് ബിജെപിയിൽ ചേരുന്നുവെന്ന തരത്തിലുള്ള അഭ്യൂഹങ്ങൾ ശക്തമാണ്.

മുഖ്യമന്ത്രി എന്ന നിലയിലുള്ള ഡൽഹിയിലെ കപൂർത്തല ഹൗസ് ഒഴിയാൻ എത്തിയതാണെന്നായിരുന്നു കഴിഞ്ഞ ദിവസം ഡൽഹിയിലെത്തിയപ്പോൾ അമരീന്ദർ സിംഗ് മാദ്ധ്യമങ്ങളോട് വെളിപ്പെടുത്തിയത്. ഒക്ടോബർ രണ്ടിന് അമരീന്ദർ സിംഗ് നിർണായക പ്രഖ്യാപനം നടത്തുമെന്ന റിപ്പോർട്ടുകളും പുറത്തു വരുന്നുണ്ട്. അമരീന്ദർ സിംഗ് ബി.ജെ.പിയിൽ ചേർന്നാണ് അത് കോൺഗ്രസിന് വലിയ തിരിച്ചടിയാകുമെന്ന് ഉറപ്പാണ്.

പഞ്ചാബ് മുൻ പിസിസി അദ്ധ്യക്ഷൻ നവ്‌ജ്യോത് സിംഗ് സിദ്ദുവുമായുള്ള അഭിപ്രായ വ്യത്യാസത്തെ തുടർന്നാണ് അമരീന്ദർ സിംഗിന് മുഖ്യമന്ത്രി സ്ഥാനം രാജിവെയ്‌ക്കേണ്ടി വന്നത്.