General (Page 1,383)

തിരുവനന്തപുരം: നിലം നികത്തി നടത്തുന്ന നിർമ്മാണ പ്രവർത്തികൾക്കെല്ലാം മുൻകൂർ അനുമതി വാങ്ങണമെന്ന് മന്ത്രി പി പ്രസാദ്. 2008-ലെ കേരള നെൽവയൽ തണ്ണീർത്തട സംരക്ഷണ നിയമത്തിന്റെ പരിധിയിൽ ഉൾപ്പെടുന്ന ഭൂമിയിൽ നിർമാണ പ്രവർത്തനങ്ങൾ പൂർത്തിയാക്കിയതിനു ശേഷമാണ് പലപ്പോഴും ബന്ധപ്പെട്ട കമ്മിറ്റികൾക്കും അധികാരികൾക്കും പരിവർത്തനാനുമതിക്കുള്ള അപേക്ഷ നൽകുന്നതെന്ന് അദ്ദേഹം പറഞ്ഞു. ഇത് ഒഴിവാക്കണമെന്നും അദ്ദേഹം ആവശ്യപ്പെട്ടു.

അത്തരത്തിലുള്ള അനധികൃതവും നിയമവിരുദ്ധമായ പരിവർത്തനങ്ങൾ ആരംഭത്തിൽ തന്നെ തടയുന്നതിനും ഭൂമിയുടെ തരം അതേ നിലയിൽ സംരക്ഷിക്കുന്നതിനും പ്രത്യേകം ശ്രദ്ധ ചെലുത്തും. ഇക്കാര്യത്തിൽ വീഴ്ച വരുത്തുന്ന ഉദ്യോഗസ്ഥർക്കെതിരെ വകുപ്പ് (23) പ്രകാരമുള്ള നടപടികളും, അച്ചടക്ക നടപടികളും സ്വീകരിക്കുമെന്നും മന്ത്രി അറിയിച്ചു.

നിയമത്തിന്റെ അന്തസത്ത ഉൾക്കൊണ്ടും വ്യവസ്ഥകൾ പാലിച്ചും പാരിസ്ഥിതിക പ്രാധാന്യമുള്ള നെൽവയലുകളും തണ്ണീർതടങ്ങളും സംരക്ഷിക്കേണ്ടത് പൊതു സമൂഹത്തിന്റെയും, സർക്കാരിന്റെയും കർത്തവ്യമായതിനാൽ വ്യക്തമായ പരിശോധനയ്ക്കു ശേഷം മാത്രമേ പരിവർത്തനാനുമതി നൽകാൻ സാധിക്കുകയുള്ളൂവെന്നും അദ്ദേഹം കൂട്ടിച്ചേർത്തു. പിറവം നിയോജകമണ്ഡലത്തിൽ രാമമംഗലം – മണീട് പഞ്ചായത്തുകളെ ബന്ധിപ്പിച്ചുകൊണ്ട് കിഴുമുറികടവ് പാലത്തിന്റെ അപ്രോച്ച് റോഡ് നിർമ്മാണത്തിന് വേണ്ടി ഭൂമി രൂപാന്തരപ്പെടുത്തുന്നത് സംബന്ധിച്ച് അനൂപ് ജേക്കബ് എം.എൽ.എ. അവതരിപ്പിച്ച സബ്മിഷന് മറുപടി നൽകുകവെയായിരുന്നു മന്ത്രി ഇക്കാര്യങ്ങൾ അറിയിച്ചത്.

തിരുവനന്തപുരം: അച്ഛനെയും മകളെയും മോഷ്ടാക്കളെന്ന് ആരോപിച്ച് പരസ്യമായി അപമാനിച്ച സംഭവത്തിൽ പിങ്ക് പോലീസ് ഉദ്യോഗസ്ഥയ്‌ക്കെതിരെ പട്ടികജാതി-പട്ടികവർഗ കമ്മീഷൻ. പിങ്ക് പോലീസ് ഉദ്യോഗസ്ഥയുടെ പ്രവൃത്തി പോലീസ് സേനയുടെ അന്തസ്സിന് കളങ്കമേൽപ്പിച്ചെന്ന് കമ്മീഷൻ വ്യക്തമാക്കി. പിങ്ക് പോലീസ് ഉദ്യോഗസ്ഥയായ രജിതയെ യൂണിഫോമിലുള്ള ജോലിയിൽ നിന്ന് ഒഴിവാക്കണമെന്നും കമ്മീഷൻ നിർദ്ദേശിച്ചു.

പൊതുജനങ്ങളുമായി നേരിട്ട് ബന്ധപ്പെടുന്ന ജോലികളിൽ നിന്ന് ഉദ്യോഗസ്ഥയെ മാറ്റിനിർത്തണമെന്നും പട്ടികജാതി പട്ടിക വർഗ കമ്മീഷൻ ആവശ്യപ്പെട്ടു. തോന്നയ്ക്കൽ സ്വദേശിയായ ജയചന്ദ്രനെയും മകളെയും മൊബൈൽ മോഷ്ടാക്കളാക്കി ചിത്രീകരിച്ച് അപമാനിക്കാനായിരുന്നു രജിതയുടെ ശ്രമം.

ഓഗസ്റ്റ് മാസം 27 നായിരുന്നു സംഭവം. ഐ.എസ്.ആർ.ഒ.യിലേക്ക് കൂറ്റൻ ചേംബറുകളുമായി പോകുന്ന വാഹനങ്ങൾ കാണാൻ എത്തിയ മൂന്നാം ക്ലാസുകാരിയേയും പിതാവിനെയും പോലീസ് വാഹനത്തിലെ മൊബൈൽ ഫോൺ മോഷ്ടിച്ചുവെന്ന് ആരോപിച്ച് സിവിൽ പോലീസ് ഓഫീസർ രജിത പരസ്യമായി വിചാരണ ചെയ്യുകയും അപമാനിക്കുകയുമായിരുന്നു. കാറിന്റെ പിൻസീറ്റിൽ ബാഗിൽ മൊബൈൽ ഫോൺ ഉണ്ടായിരിക്കേയാണ് കുട്ടിയുടെ മേൽ മോഷണക്കുറ്റം ചുമത്തി അപമാനിച്ചത്.

തിരുവനന്തപുരം: തട്ടിപ്പ് കേസിൽ അറസ്റ്റിലായ മോൻസൻ മാവുങ്കലിന്റെ കൈവശമുള്ള വ്യാജ ചെമ്പോലയെക്കുറിച്ചു അന്വേഷണം നടത്തണമെന്ന് ആവശ്യപ്പെട്ട് ചരിത്ര ഗവേഷകനും പുരാരേഖാ വിദഗ്ധനുമായ ഡോ.എം ജി ശശിഭൂഷൺ. വ്യാജ ചെമ്പോല തയ്യാറാക്കിയ ആളെ അറിയാമെന്ന് അദ്ദേഹം വ്യക്തമാക്കി. ശബരിമല ക്ഷേത്രത്തിൽ ആചാരങ്ങൾ നടത്താനുള്ള ചുമതല ചീരപ്പഞ്ചിറ കുടുംബത്തിനാണെന്നു രേഖപ്പെടുത്തിയിരിക്കുന്ന വ്യാജ ചെമ്പോലയെ കുറിച്ച് വിശദമായ അന്വേഷണം നടത്തണമെന്നാണ് അദ്ദേഹം ആവശ്യപ്പെട്ടിരിക്കുന്നത്.

ശബരിമല കേസ് ഹൈക്കോടതി പരിഗണിച്ചപ്പോൾ ചെമ്പോല തെളിവായി ഹാജരാക്കിയിരുന്നു. ചൊമ്പോലയെ കുറിച്ച് അഭിഭാഷകർ സംശയം പ്രകടിപ്പിച്ചതിനെ തുടർന്ന് ചരിത്രഗവേഷകൻ പ്രഫ.എ.ശ്രീധരമേനോനെ പരിശോധനയ്ക്കായി ചുമതലപ്പെടുത്തി. ലിപി പരിശോധിക്കേണ്ടതിനാൽ പരമേശ്വരൻ പിള്ളയെ ഏൽപിക്കാൻ അദ്ദേഹം നിർദേശിച്ചു. ഒടുവിൽ ശ്രീധര മേനോനും പരമേശ്വരൻ പിള്ളയും ചേർന്നു പഠനം നടത്തട്ടെയെന്ന് കോടതി നിർദേശിച്ചു. വ്യാജ ചെമ്പോല തയാറാക്കിയ ആളെക്കുറിച്ചു പരമേശ്വരൻ പിള്ള തന്നോടു പറഞ്ഞിട്ടുണ്ട്. ഇപ്പോൾ പുറത്തു പറയുന്നതു ശരിയല്ലെന്നും അദ്ദേഹം പറഞ്ഞു.

സുപ്രീം കോടതി വിധിക്കുശേഷം മോൻസന്റെ ചെമ്പോലയ്ക്കു സ്ഥിരീകരണം നൽകിയതു ചരിത്രകാരൻ എം.ആർ.രാഘവ വാരിയരാണ്. പിന്നീട് അദ്ദേഹത്തെ നേരിൽ കണ്ടു താൻ വ്യാജ ചെമ്പോലയാണെന്ന് പറഞ്ഞു. എന്നാൽ ഇതുകേട്ട അദ്ദേഹം ചിരിച്ചതേയുള്ളു. ശബരിമല വിഷയം കത്തിനിൽക്കുന്ന സമയത്തു മുഖ്യമന്ത്രി പിണറായി വിജയന്റെ ചാനൽ പരിപാടിയായ നാം മുന്നോട്ടിലും ചെമ്പോലയെക്കുറിച്ചു സഗൗരവം ചർച്ച ചെയ്യുന്നതു കണ്ടു. ആ പരിപാടിയിൽ എല്ലാം തലകുലുക്കി സമ്മതിക്കുന്ന രാഘവ വാരിയരെയും രാജൻ ഗുരുക്കളെയും കണ്ടപ്പോൾ സങ്കടം തോന്നിയതെന്നും ശശിഭൂഷൺ കൂട്ടിച്ചേർത്തു.

തിരുവനന്തപുരം: ഒറ്റയ്ക്കു കഴിയുന്ന, റേഷൻ കടയിലെത്താൻ ബുദ്ധിമുട്ടുള്ള 80 വയസ് കഴിഞ്ഞവർക്ക് റേഷൻ സാധനങ്ങൾ വീട്ടിലെത്തിച്ച് നൽകാനൊരുങ്ങി സിവിൽ സപ്ലൈസ്. കുടുംബശ്രീ അംഗങ്ങളെയോ സന്നദ്ധ സംഘടനാ പ്രവർത്തകരെയോ ഉപയോഗിച്ച് അടുത്ത മാസം മുതൽ സിവിൽ സപ്ലൈസ് ഇത്തരക്കാരുടെ വീടുകളിൽ റേഷൻ എത്തിക്കും. ഭക്ഷ്യ, സാമൂഹ്യനീതി വകുപ്പ് ഉന്നതോദ്യോഗസ്ഥർ ചർച്ച നടത്തി തീയതി തീരുമാനിക്കുമെന്ന് അധികൃതർ അറിയിച്ചു.

മന്ത്രി ജി.ആർ. അനിലിന്റെ നിർദ്ദേശ പ്രകാരമാണ് ഒറ്റയ്ക്ക് കഴിയുന്ന 80 വയസു കഴിഞ്ഞവർക്ക് വീടുകളിൽ റേഷൻ എത്തിക്കാൻ തീരുമാനിച്ചത്. ഇത്തരക്കാരുടെ റേഷൻ സാധനങ്ങൾ മറ്റുള്ളവർ വാങ്ങുന്നെന്ന പരാതികൾ സിവിൽ സപ്ലൈസ് വകുപ്പിന് ലഭിച്ചിരുന്നു. ഈ സാഹചര്യത്തിലായിരുന്നു അദ്ദേഹത്തിന്റെ നിർദ്ദേശം.

അതേസമയം കിടപ്പ് രോഗികളുള്ള കുടുംബങ്ങളിൽ റേഷൻ എത്തിക്കാൻ മൊബൈൽ കടകളും ഉടൻ ആരംഭിക്കും. കെ.എസ്.ആർ.ടി.സിയുടെ പഴയ ബസുകൾ രൂപമാറ്റം വരുത്തി ഇതിന് വേണ്ടി ഉപയോഗിക്കും. ഒറ്റയ്ക്കു കഴിയുന്ന 80 കഴിഞ്ഞവരുടെ പട്ടിക നഗരസഭ, ഗ്രാമപഞ്ചായത്ത് വാർഡ് അടിസ്ഥാനത്തിൽ അംഗങ്ങളുടെ സഹായത്തോടെയിരിക്കും തയ്യാറാക്കുക. ഏത് റേഷൻ കടയിലാണോ കാർഡ് അവിടെ നിന്നും സാധനങ്ങൾ വീട്ടിൽ എത്തിക്കാനാണ് തീരുമാനം.

വാടാക വീട്ടുകളിൽ താമസിക്കുന്നവർക്ക് റേഷൻ കാർഡിനുള്ള നിബന്ധനകളിലും ഇളവ് അനുവദിച്ചിട്ടുണ്ട്. ഇതുസംബന്ധിച്ച ഉത്തരവ് സർക്കാർ പുറത്തിറക്കി. വാടക വീടുകളിൽ കഴിയുന്നവർ റേഷൻ കാർഡിന് അപേക്ഷിക്കുമ്പോൾ സാധുവായ വാടക കരാറും കെട്ടിട ഉടമയുടെ സമ്മതപത്രവും വേണമെന്ന നിബന്ധന സർക്കാർ ഒഴിവാക്കി. ഇത്തരക്കാർക്ക് റേഷൻ കാർഡിന് അപേക്ഷിക്കാൻ സ്വയം സാക്ഷ്യപ്പെടുത്തിയ സത്യപ്രസ്താവനയും അപേക്ഷകന്റെയും മറ്റ് കുടുംബാംഗങ്ങളുടെയു ം ആധാർ വിവരങ്ങളും മതിയാകും. ഇത്തരത്തിൽ ലഭിക്കുന്ന റേഷൻ കാർഡുകൾ റേഷൻ ആനുകൂല്യങ്ങൾക്കല്ലാതെ തരിച്ചറിയൽ രേഖയായോ മറ്റ് ആനുകൂല്യങ്ങൾക്കുള്ള രേഖയായോ ഉപയോഗിക്കാൻ പാടില്ലെന്നാണ് നിർദ്ദേശം.

തിരുവനന്തപുരം: കോർപ്പറേഷനിലെ നികുതി തട്ടിപ്പുമായി ബന്ധപ്പെട്ട് ജനങ്ങളുടെ ആശങ്ക ഉയരുന്നു. കോർപ്പറേഷന്റെ അദാലത്തിൽ നേരിട്ട് നികുതി അടച്ചതിന്റെ വിവരങ്ങൾ പോലും രേഖപ്പെടുത്തിയിട്ടില്ലെന്നതാണ് ജനങ്ങളുടെ ആശങ്ക ഉയരാൻ കാരണം.

നഗരസഭയിലെ പല സോണൽ ഓഫീസുകളിലും ഉദ്യോഗസ്ഥർ നികുതിപ്പണം തട്ടിയെടുത്തെന്ന് മേയർ ആര്യ രാജേന്ദ്രൻ കഴിഞ്ഞ ദിവസം സ്ഥിരീകരിച്ചിരുന്നു. കൗൺസിൽ യോഗത്തിലാണ് ആര്യാ രാജേന്ദ്രൻ ഇക്കാര്യം സ്ഥിരീകരിച്ചത്. അഞ്ച് ഉദ്യോഗസ്ഥരെ അന്വേഷണവിധേയമായി സസ്‌പെൻഡ് ചെയ്തിട്ടുണ്ടെന്നും മേയർ അറിയിച്ചിട്ടുണ്ട്.

കാഷ്യർ അനിൽ കുമാർ, ഓഫീസ് അസിസ്റ്റന്റ് ബിജു, കാഷ്യർ എസ്.സ്മിത, സുപ്രണ്ട് ശാന്തി, ജോർജുകുട്ടി എന്നിവരെയാണ് സസ്പെൻഡ് ചെയ്തത്. ശ്രീകാര്യം സോണിലെ അന്നത്തെ ചാർജ് ഓഫീസറും ഇപ്പോൾ കൊല്ലം നഗരസഭയിലെ ജീവനക്കാരിയുമായ ലളിതാംബികയ്‌ക്കെതിരെ നിയമനടപടി സ്വീകരിക്കുമെന്നും മേയർ അറിയിച്ചിരുന്നു.