General (Page 1,375)

ന്യൂഡൽഹി: ഉപയോഗിക്കാതെ സൂക്ഷിക്കുന്ന വൈദ്യുതി ഉപഭോക്താക്കൾക്ക് വിതരണം ചെയ്യണമെന്ന് സംസ്ഥാനങ്ങളോട് ആവശ്യപ്പെട്ട് കേന്ദ്ര സർക്കാർ. കേന്ദ്ര വൈദ്യുതി നിലയങ്ങളിൽ ഉപയോഗിക്കാതെ സൂക്ഷിക്കുന്ന വൈദ്യുതി (അൺ അലോക്കേറ്റഡ് പവർ) സ്വന്തം ഉപഭോക്താക്കളുടെ ആവശ്യകത നിറവേറ്റുന്നതിന് മാത്രം ഉപയോഗിക്കാനാണ് സംസ്ഥാനങ്ങൾക്ക് കേന്ദ്ര സർക്കാർ നൽകിയിരിക്കുന്ന നിർദേശം.

കേന്ദ്ര വൈദ്യുതി നിലയങ്ങളിലെ (CGS) 15% വൈദ്യുതി ‘അൺ അലോക്കേറ്റഡ് പവർ’ ആയി സൂക്ഷിക്കുന്നുണ്ട്. വൈദ്യുതി വിതരണത്തിനുള്ള മാർഗനിർദേശങ്ങളനുസരിച്ചാണ് ഇത്തരത്തിൽ അൺ അലോക്കേറ്റഡ് പവർ സൂക്ഷിക്കുന്നത്. ഇങ്ങനെ സൂക്ഷിക്കുന്ന വൈദ്യുതി ആവശ്യമുള്ള സംസ്ഥാനങ്ങളിലെ ഉപഭോക്താക്കളുടെ വൈദ്യുതി ആവശ്യകത നിറവേറ്റുന്നതിനായി കേന്ദ്ര സർക്കാർ അനുവദിക്കും.

വിതരണ കമ്പനികൾക്കാണ് ഉപഭോക്താക്കൾക്ക് വൈദ്യുതിയെത്തിക്കാനുള്ള ഉത്തരവാദിത്തം. വിതരണ കമ്പനികൾ സ്വന്തം ഉപഭോക്താക്കൾക്ക് വൈദ്യുതി വിതരണം ചെയ്യാതിരിക്കുകയും പവർ എക്സ്ചേഞ്ച് വഴി ഉയർന്ന വിലയ്ക്ക് വൈദ്യുതി വിൽക്കുകയും ചെയ്യരുതെന്നാണ് കേന്ദ്രം നിർദ്ദേശിച്ചിരിക്കുന്നത്. ഉപഭോക്താക്കൾക്ക് വൈദ്യുതി വിതരണം ചെയ്യുന്നതിനായി സംസ്ഥാനങ്ങൾ ‘അൺ അലോക്കേറ്റഡ് പവർ’ ഉപയോഗിക്കണമെന്നും അധിക വൈദ്യുതി ഉണ്ടെങ്കിൽ, ആവശ്യമുള്ള സംസ്ഥാനങ്ങളിലേക്ക് പുനർവിന്യസിക്കാൻ കഴിയുന്ന തരത്തിൽ വിവരം നൽകണമെന്നും കേന്ദ്ര സർക്കാർ നിർദ്ദേശം നൽകി.

സംസ്ഥാനങ്ങൾ തങ്ങളുടെ ഉപഭോക്താക്കൾക്ക് സേവനം നൽകാതെ ഉയർന്ന നിരക്കിൽ പവർ എക്സ്ചേഞ്ചുകളിൽ വൈദ്യുതി വിൽക്കുന്നുവെന്ന് കണ്ടെത്തിയാൽ, അത്തരം സംസ്ഥാനങ്ങളുടെ ‘അൺ അലോക്കേറ്റഡ് പവർ’ പിൻവലിക്കുകയും മറ്റ് ആവശ്യമുള്ള സംസ്ഥാനങ്ങൾക്ക് അനുവദിക്കുകയും ചെയ്യുമെന്നാണ് കേന്ദ്ര സർക്കാർ അറിയിക്കുന്നത്.

ന്യൂഡൽഹി: രാജ്യത്തെ ജനങ്ങളുടെ ജീവിത നിലവാരമുയർത്താൻ സർക്കാർ കഠിനമായി പരിശ്രമിക്കുകയാണെന്ന് പ്രധാനമന്ത്രി നരേന്ദ്ര മോദി. ദേശീയ മനുഷ്യാവകാശ കമ്മീഷന്റെ 28-ാം വാർഷികാഘോഷം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. മനുഷ്യാവകാശലംഘനം ചൂണ്ടിക്കാണിക്കുന്നതിൽ വിവേചനം കാണിക്കരുതെന്ന് അദ്ദേഹം ആവശ്യപ്പെട്ടു.

വർഷങ്ങളായി സ്ത്രീകൾ അനുഭവിച്ചു വരുന്ന അനീതികൾ ഇല്ലായ്മ ചെയ്യുന്നതിലും സർക്കാർ ശ്രദ്ധ ചെലുത്തിയിട്ടുണ്ട്. അതിനുള്ള ഉദാഹരണത്തിന് ഒന്നു മാത്രമാണ് മുത്തലാഖ് നിരോധന നിയമം. കാലങ്ങളായി മുസ്ലീം സ്ത്രീകൾ അനുഭവിച്ച മനുഷ്യാവകാശലംഘനത്തിനാണ് അറുതി വരുത്തിയതെന്നും അദ്ദേഹം പറഞ്ഞു.

രാജ്യത്ത് നടക്കുന്ന മനുഷ്യാവകാശ ലംഘനങ്ങളിൽ ചില വ്യക്തികൾ അവർക്ക് താൽപര്യമുള്ളത് മാത്രമേ കാണൂ. അതു മാത്രമേ ഉയർത്തിക്കാട്ടുകയുള്ളൂ. മറ്റുള്ളവ അവഗണിക്കുന്നു. ഇത്തരം പ്രവർത്തിയിലൂടെ അവർ രാജ്യത്തിന്റെ ഖ്യാതി താഴ്ത്തിക്കെട്ടാൻ ശ്രമിക്കുന്നു. ഈ പ്രവണത രാജ്യത്തിനും ജനാധിപത്യത്തിനും കോട്ടം വരുത്തുമെന്നും ഇത് ശരിയായ നടപടിയല്ലെന്നും അദ്ദേഹം കുറ്റപ്പെടുത്തി. ഒരു വ്യക്തിയുടെ അവകാശങ്ങൾ പോലെ തന്നെ പ്രധാനമാണ് അയാളുടെ കടമകളുമെന്നും അദ്ദേഹം കൂട്ടിച്ചേർത്തു.

അതേസമയം പാവപ്പെട്ടവരുടെയും പിന്നോക്ക വിഭാഗങ്ങളുടെയും ഉന്നമനത്തിനായി മോദി സർക്കാർ അക്ഷീണം പ്രവർത്തിക്കുന്നുണ്ടെന്നും അതിലൂടെ അവരുടെ അവകാശങ്ങൾ ഉയർത്തിപ്പിടിക്കുന്നുണ്ടെന്നും ആഭ്യന്തര മന്ത്രി അമിത് ഷായും വ്യക്തമാക്കി.

ന്യൂഡൽഹി: രാജ്യത്തെ വിമാന സർവ്വീസുകൾക്ക് ഏർപ്പെടുത്തിയിരുന്ന നിയന്ത്രണങ്ങൾ നീക്കി കേന്ദ്ര സർക്കാർ. കോവിഡ് വൈറസ് വ്യാപനത്തിന്റെ രണ്ടാം തരംഗത്തെ തുടർന്ന് വിമാന സർവ്വീസുകൾക്ക് ഏർപ്പെടുത്തിയിരുന്ന നിയന്ത്രണങ്ങളാണ് കേന്ദ്ര സർക്കാർ നീക്കിയത്.

ഇതുവരെ 85 ശതമാനം യാത്രക്കാർക്കു മാത്രമാണ് ആഭ്യന്തരസർവീസുകളിൽ യാത്ര ചെയ്യാൻ അനുമതി നൽകിയിരുന്നത്. ഇനി മുതൽ ആഭ്യന്തര സർവീസുകളിൽ നൂറ് ശതമാനം യാത്രക്കാരെയും അനുവദിക്കും. പുതിയ തീരുമാനം ഈ മാസം 18 മുതൽ പ്രാബല്യത്തിൽ വരും.

രാജ്യത്ത് കോവിഡ് കേസുകളിൽ കുറവുണ്ടാകുന്ന സാഹചര്യത്തിലാണ് കേന്ദ്ര സർക്കാരിന്റെ തീരുമാനമെന്നാണ് വിലയിരുത്തൽ. രാജ്യത്ത് എട്ട് മാസത്തിന് ശേഷം കോവിഡ് പ്രതിദിന കണക്ക് പതിനയ്യായിരത്തിന് താഴെയെത്തിയിട്ടുണ്ട്. കഴിഞ്ഞ ഇരുപത്തിനാല് മണിക്കൂറിനിടെ 14313 പേർക്ക് മാത്രമാണ് രാജ്യത്ത് കോവിഡ് സ്ഥിരീകരിച്ചത്. കേരളത്തിൽ മാത്രമാണ് നിലവിൽ അയ്യായിരത്തിന് മുകളിൽ പ്രതിദിന കേസുകൾ റിപ്പോർട്ട് ചെയ്യപ്പെടുന്നത്

ന്യൂഡൽഹി: അഫ്ഗാനിൽ ഉചിതമായ മാറ്റങ്ങളുണ്ടാകാൻ ലോകരാജ്യങ്ങളുടെ യോജിച്ചുള്ള പ്രതികരണം വേണമെന്ന് പ്രധാനമന്ത്രി നരേന്ദ്ര മോദി. അഫ്ഗാന്റെ മണ്ണ് ഭീകരവാദത്തിനും മൗലികവാദത്തിനും ഉറവിടമാകുന്നില്ലെന്ന് ഉറപ്പുവരുത്തണമെന്ന് അദ്ദേഹം അന്താരാഷ്ട്ര സമൂഹത്തോട് അഭ്യർത്ഥിച്ചു. അഫ്ഗാൻ വിഷയത്തിന്മേലുള്ള അസാധാരണ ജി-20 ഉച്ചകോടിയിൽ സംസാരിക്കവെയാണ് അദ്ദേഹത്തിന്റെ പ്രതികരണം. വെർച്വലായാണ് ഉച്ചകോടി സംഘടിപ്പിച്ചത്.

അഫ്ഗാന്റെ മണ്ണ് മൗലികവാദത്തിന്റെയും ഭീകരവാദത്തിന്റെയും ഉറവിടമാകുന്നത് തടയേണ്ടതിന്റെ ആവശ്യകതയെ കുറിച്ച് അദ്ദേഹം ഉച്ചകോടിയിൽ സംസാരിച്ചു. അഫ്ഗാൻ പൗരന്മാർക്ക് അടിയന്തരവും തടസ്സങ്ങളില്ലാത്തതുമായ മനുഷ്യത്വപരമായ സഹായം നൽകണം. അഫ്ഗാനിൽ എല്ലാവരെയും ഉൾക്കൊള്ളുന്ന ഒരു ഭരണകൂടം ഉണ്ടാകേണ്ടതിന്റെ ആവശ്യകതയെ കുറിച്ചും അദ്ദേഹം സംസാരിച്ചു. അഫ്ഗാനിസ്താനിലെ സ്ഥിതി മെച്ചപ്പെടുത്താൻ ഐക്യരാഷ്ട്ര സംഘടനാ സുരക്ഷാ സമിതിയുടെ 2593-ാം പ്രമേയം അടിസ്ഥാനമാക്കിയ യോജിച്ചുള്ള അന്താരാഷ്ട്ര പ്രതികരണം വേണമെന്നും നരേന്ദ്ര മോദി ആവശ്യപ്പെട്ടു.

അഫ്ഗാന്റെ മണ്ണ് ഭീകരവാദത്തിന് ഉപയോഗിക്കരുതെന്നും പ്രതിസന്ധി പരിഹരിക്കാൻ രാഷ്ട്രീയമായ ഒത്തുതീർപ്പിലെത്തിച്ചേരണമെന്നും ഇന്ത്യയുടെ അധ്യക്ഷതയിൽ യു.എൻ. സുരക്ഷാസമിതി ഓഗസ്റ്റ് 30-ന് പാസാക്കിയ പ്രമേയത്തിലും ആവശ്യപ്പെട്ടിരുന്നു. അഫ്ഗാനിൽ മനുഷ്യാവകാശങ്ങൾ സംരക്ഷിക്കേണ്ടതിന്റെ ആവശ്യകതയെ കുറിച്ചും പ്രമേയത്തിൽ വ്യക്തമാക്കിയിരുന്നു.