General (Page 1,288)

മലപ്പുറം: മെട്രോമാൻ ഇ ശ്രീധരനുമായി കൂടിക്കാഴ്ച്ച നടത്തി ബി.ജെ.പി സംസ്ഥാന പ്രസിഡന്റ് കെ.സുരേന്ദ്രൻ. ബി.ജെ.പിക്കൊപ്പം ഇ.ശ്രീധരൻ സജീവമായി ഉണ്ടാവുമെന്ന് കെ സുരേന്ദ്രൻ വ്യക്തമാക്കി. കൂടിക്കാഴ്ച്ചയ്ക്ക് ശേഷം മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം. ബിജെപിയിൽ പ്രതീക്ഷയുണ്ടെന്ന് ഇ.ശ്രീധരനും വ്യക്തമാക്കി.

ഇനി സജീവ രാഷ്ട്രീയത്തിനില്ലെന്നും കാര്യമായ തിരുത്തലുകൾ വരുത്താതെ ബിജെപിയ്ക്ക് രക്ഷപ്പെടാനാവില്ലെന്നും കഴിഞ്ഞ ദിവസം ഇ ശ്രീധരൻ അഭിപ്രായപ്പെട്ടിരുന്നു. ഇതിനെ തുടർന്നാണ് ഇ ശ്രീധരനുമായി സുരേന്ദ്രൻ കൂടിക്കാഴ്ച്ച നടത്തിയത്. ഇ ശ്രീധരന്റെ പ്രസ്താവനകൾ ബിജെപി നേതൃത്വത്തെ പ്രതിരോധത്തിലാക്കിയിരുന്നു.

ഇ ശ്രീധരൻ എപ്പോഴും പാർട്ടിക്കൊപ്പം ഉണ്ടാകുമെന്നാണ് കെ സുരേന്ദ്രൻ പറയുന്നത്. നിലവിൽ ദേശീയ കൗൺസിലിന്റെ പ്രത്യേക ക്ഷണിതാവാണ് ഇ ശ്രീധരൻ. അദ്ദേഹത്തിന്റെ നിർദ്ദേശങ്ങൾക്കനുസരിച്ചുള്ള തിരുത്തലുകൾ പാർട്ടിയിൽ നടന്നുവരികയാണെന്നും. അദ്ദേഹം സജീവ രാഷ്ട്രീയ പ്രവർത്തകനായിരുന്നില്ല. വിദഗ്ദ്ധന്മാരുടെ പട്ടികയിൽ പെടുത്തിയാണ് സ്ഥാനാർത്ഥിയാക്കിയത് എന്നും സുരേന്ദ്രൻ അറിയിച്ചു.

തിരുവനന്തപുരം: സംസ്ഥാനത്ത് നടത്താനിരുന്ന അനിശ്ചിതകാല ബസ് സമരം മാറ്റിവെച്ച് സ്വകാര്യ ബസുടമകൾ. ഈ മാസം 21 മുതൽ നടത്താനിരുന്ന അനിശ്ചിതകാല സ്വകാര്യ ബസ് സമരമാണ് മാറ്റിവെച്ചത്. യാത്ര നിരക്ക് വർധനവുമായി ബന്ധപെട്ട് സംസ്ഥാന സർക്കാരിന്റെ ഭാഗത്തു നിന്ന് അനുകൂലമായ നടപടികൾ ഉണ്ടാകുന്ന സാഹചര്യത്തിലാണ് തീരുമാനം.

വിദ്യാർത്ഥികളുടെ യാത്രാ നിരക്ക് വർധനയടക്കമുള്ള ആവശ്യങ്ങൾ സർക്കാരിനെ അറിയിച്ച് ഒരുമാസം കഴിഞ്ഞിട്ടും തീരുമാനമൊന്നും ഉണ്ടായില്ലെന്നാരോപിച്ചാണ് സ്വകാര്യ ബസുടമകൾ സംസ്ഥാനത്ത് ഡസംബർ 21 മുതൽ അനിശ്ചിതകാല സമരം നടത്താൻ തീരുമാനിച്ചത്. വിദ്യാർത്ഥികൾക്ക് സൗജന്യം നൽകണമെങ്കിൽ ടാക്‌സിൽ ഇളവ് നൽകുകയോ ഡീസലിന് സബ്‌സിഡി നൽകുകയോ വേണമെന്നാണ് ബസ് ഉടമകളുടെ ആവശ്യപ്പെടുന്നത്.

ഈ ആവശ്യം സർക്കാർ പരിഗണിച്ചില്ലെങ്കിൽ 21 മുതൽ അനിശ്ചിതകാല ബസ് സമരം നടത്തുമെന്നായിരുന്നു ബസുടമകളുടെ പ്രഖ്യാപനം. തങ്ങളുടെ ന്യായമായ ആവശ്യങ്ങൾ ജസ്റ്റിസ് രാമചന്ദ്രൻ കമ്മീഷൻ പോലും അംഗീകരിച്ചതാണെന്നും വിദ്യാർഥികളുടെ യാത്രാ നിരക്ക് കൂട്ടാതെയുളള യാതൊരു ഒത്തുതീർപ്പിനും തയ്യാറല്ലെന്നുമുള്ള നിലപാടിൽ ഉറച്ചു നിൽക്കുകയാണ് സ്വകാര്യ ബസുടമകൾ.

തിരുവനന്തപുരം: ഉന്നതവിദ്യാഭ്യാസ മന്ത്രി മന്ത്രി ആർ. ബിന്ദുവിനെതിരെ രൂക്ഷ വിമർശനവുമായി ഗവർണർ ആരിഫ് മുഹമ്മദ് ഖാൻ. കണ്ണൂർ വിസി പുനർനയമനവുമായി ബന്ധപ്പെട്ടായിരുന്നു അദ്ദേഹത്തിന്റെ വിമർശനം. ഗവർണ്ണർക്ക് കത്തെഴുതാൻ മന്ത്രിക്ക് അധികാരമില്ലെന്ന് അദ്ദേഹം പറഞ്ഞു. മന്ത്രിക്ക് മറുപടി പറയലല്ല തന്റെ ജോലിയെന്നും കോടതിയുടെ പരിഗണനയിലുള്ള വിഷയത്തിൽ കൂടുതൽ പ്രതികരിക്കാനില്ലെന്നും അദ്ദേഹം അഭിപ്രായപ്പെട്ടു.

മന്ത്രി പറയുന്ന കാര്യങ്ങൾക്ക് മറുപടി പറയേണ്ട ആവശ്യം തനിക്കില്ല. തന്റെ നീതിബോധത്തിന് നിരക്കാത്ത കാര്യങ്ങൾ ചെയ്യേണ്ടിവന്നു. അത് തുടരാൻ താൽപര്യമില്ലാത്തതിനാലാണ് ചാൻസിലർ സ്ഥാനം ഒഴിയാൻ തയ്യാറാണെന്ന് താൻ സർക്കാരിനെ അറിയിച്ചതെന്നും അദ്ദേഹം വ്യക്തമാക്കി. രാഷ്ട്രീയ ഇടപെടലുകളുടെ സാഹചര്യങ്ങളിൽ തനിക്ക് ചാൻസിലർ ആയി തുടരാൻ സാധിക്കില്ല. സർവകലാശാലകളിൽ നടക്കേണ്ടത് നിയമവാഴ്ചയാണ്. മനുഷ്യവാഴ്ചയല്ലെന്നും അദ്ദേഹം കുറ്റപ്പെടുത്തി.

ഉന്നതവിദ്യാഭ്യാസ മന്ത്രി തനിക്ക് നേരിട്ട് കത്തെഴുതിയത് ഭരണഘടന വിരുദ്ധമാണ്. സർക്കാരുമായുള്ള ഏറ്റുമുട്ടലുകൾ ഒഴിവാക്കാനാണ് താൻ നിയമന ശുപാർശയിൽ ഒപ്പിട്ടതെന്നും അദ്ദേഹം കൂട്ടിച്ചേർത്തു.

തിരുവനന്തപുരം: കേരളത്തിൽ അത്യാധുനിക സൗകര്യങ്ങളോടു കൂടിയ ഫുഡ് പാർക്ക് ആരംഭിക്കുമെന്ന് ഉറപ്പു നൽകി യുഎഇ. ഇന്ത്യയിൽ മൂന്ന് ബൃഹദ് ഫുഡ് പാർക്കുകൾ സ്ഥാപിക്കാനാണ് യു.എ.ഇ സർക്കാർ ലക്ഷ്യമിടുന്നത്. യു.എ.ഇ വിദേശ വാണിജ്യകാര്യ മന്ത്രി ഡോ. താനി അഹമ്മദ് അൽ സെയൂദിയുമായി മുഖ്യമന്ത്രി കൂടിക്കാഴ്ച്ച നടത്തിയിരുന്നു. ഇന്ത്യയിൽ ആരംഭിക്കുന്ന മൂന്ന് ഫുഡ് പാർക്കുകളിൽ ഒരെണ്ണം കേരളത്തിൽ തുടങ്ങണമെന്ന അഭ്യർത്ഥന കൂടിക്കാഴ്ച്ചയിൽ മുഖ്യമന്ത്രി മുന്നോട്ടുവെച്ചു. ഡോ. താനി മുഹമ്മദ് ഇക്കാര്യം സമ്മതിച്ചതായും വിശാദാംശങ്ങൾ ടെക്‌നിക്കൽ ടീമുമായി ചർച്ചചെയ്യുമെന്ന് അറിയിച്ചതായും മുഖ്യമന്ത്രി അറിയിച്ചു.

കേരളത്തിന്റെ സാമ്പത്തിക മേഖലയിൽ വലിയ മുന്നേറ്റം സൃഷ്ടിക്കാൻ ബൃഹത്തായ ഈ പദ്ധതി ഉതകുമെന്നതിൽ സംശയമില്ല. കേരളത്തിന്റെ വികസനത്തിനും സാമൂഹ്യപുരോഗതിയ്ക്കും യു.എ.ഇ സർക്കാർ നൽകുന്ന പിന്തുണയ്ക്ക് ഹൃദയപൂർവ്വം നന്ദി പറയുന്നുവെന്നും അദ്ദേഹം വ്യക്തമാക്കി.

ലൈഫ് പദ്ധതിയിൽ ദുബായ് റെഡ് ക്രസന്റുമായി ചേർന്നുള്ള ഭവന സമുച്ചയ നിർമാണത്തിന്റെ കാര്യവും മുഖ്യമന്ത്രിയും യുഎഇ വിദേശകാര്യ മന്ത്രിയും ചർച്ച ചെയ്തു. അതേസമയം ദുബായ് എക്സ്പോയിൽ പങ്കെടുക്കാൻ മുഖ്യമന്ത്രിയെ അദ്ദേഹം ക്ഷണിച്ചു. 2022 ഫെബ്രുവരിയിൽ എക്സ്പോയ്ക്ക് പങ്കെടുക്കാമെന്ന് മുഖ്യമന്ത്രി അദ്ദേഹത്തിന് ഉറപ്പു നൽകിയിട്ടുണ്ട്.