Highlights (Page 137)

തൃശൂർ: കോവിഡ് ചികിത്സയിൽ അഭിമാന നേട്ടവുമായി മുളങ്കുന്നത്തുകാവ് ഗവ. മെഡിക്കൽ കോളേജ് ആശുപത്രി. കോവിഡ് ബാധിതരായ 1106 ഗർഭിണികൾക്കാണ് ഗവ. മെഡിക്കൽ കോളേജ് ആശുപത്രിയിൽ സുരക്ഷിത പ്രസവത്തിന് സൗകര്യമൊരുക്കിയത്. 2020 ൽ 291 പേർക്കും, 2021 ൽ 736 പേർക്കും സുരക്ഷിത പ്രസവത്തിന് ആശുപത്രിയിൽ സൗകര്യമൊരുക്കിയിട്ടുണ്ട്. 2022 ൽ ഇതുവരെ കോവിഡ് ബാധിച്ച 79 പേരാണ് പ്രസവത്തിനെത്തിയത്.

മുളങ്കുന്നത്തുകാവ് ഗൈനക്കോളജി വിഭാഗം മേധാവി ഡോ. കെ ആർ രാധ, യൂണിറ്റ് മേധാവികളായ ഡോ. രാജേശ്വരിപിള്ള, ഡോ. റീന എന്നിവരുടെ നേതൃത്വത്തിലാണ് സൗകര്യങ്ങളൊരുക്കിയത്. മണിക്കൂറുകളോളം പിപിഇ കിറ്റ് ധരിച്ചാണ് ഇവർ കോവിഡ് രോഗികൾക്ക് സേവനം ഒരുക്കിയത്. ഗൈനക്കോളജി വകുപ്പിലെ മറ്റു ഡോക്ടർമാർ, റസിഡന്റ് ഡോക്ടർമാർ, നഴ്സുമാർ, നഴ്സിങ് അസിസ്റ്റന്റ്, ഗ്രേഡ് 2 ക്ലീനിങ് സ്റ്റാഫ് ഉൾപ്പെടെയുള്ളവരും സേവനങ്ങളിൽ പങ്കാളികളായി. കോവിഡ് വ്യാപനത്തിന്റെ ആദ്യഘട്ടത്തിൽ തന്നെ രോഗം ബാധിച്ച് പ്രസവത്തിനെത്തുന്നവർക്ക് ആശുപത്രിയിൽ പ്രത്യേക സംവിധാനമൊരുക്കിയിരുന്നു.

സിസേറിയൻ വേണ്ടിവന്നവർക്ക് കോവിഡ് ഓപ്പറേഷൻ തിയറ്റർ ഉൾപ്പെടെയുള്ള സൗകര്യങ്ങളും ഒരുക്കി. അനസ്‌തേഷ്യ വിഭാഗത്തിന്റെയും, ശിശുരോഗ വിഭാഗത്തിന്റെയുംകൂടി സഹകരണത്തോടെയും ഏകോപനത്തോടെയുമാണ് ചികിത്സാ സൗകര്യങ്ങൾ ഒരുക്കിയത്. പാലക്കാട്, മലപ്പുറം ജില്ലകളിലെയും ബഹുഭൂരിപക്ഷം പേരും ചികിത്സക്കായി ആശ്രയിക്കുന്നത് മുളങ്കുന്നത്തുകാവ് ഗവ. മെഡിക്കൽ കോളേജ് ആശുപത്രിയെയാണ്. കോവിഡ് ബാധിച്ച ഗർഭിണികൾക്ക് സുഖകരമായ ചികിത്സാ സൗകര്യം ഒരുക്കി നൽകുന്നതിനൊപ്പം 3000ലേറെയുള്ള കോവിഡ് ബാധിതരല്ലാത്ത ഗർഭിണികൾക്കും ആവശ്യമായ ചികിത്സയും ആശുപത്രിയിൽ നിന്നും നൽകുന്നുണ്ട്.

ന്യൂഡൽഹി: ഉക്രൈൻ വിടാൻ ഇന്ത്യൻ പൗരന്മാർക്കും വിദ്യാർത്ഥികൾക്കും നിർദേശം. ഇന്ത്യൻ എംബസിയാണ് ഇതുസംബന്ധിച്ച നിർദ്ദേശം നൽകിയത്. അത്യാവശ്യ കാര്യത്തിനല്ലാതെ അവിടെ തുടരുന്ന ഇന്ത്യക്കാർ എത്രയും വേഗം നാട്ടിലേക്ക് മടങ്ങണമെന്ന് അധികൃതർ നിർദ്ദേശിച്ചു. റഷ്യ- ഉക്രൈൻ സംഘർഷത്തിന്റെ പശ്ചാത്തലത്തിലാണ് നടപടി. ഉക്രൈനിലേക്കുള്ള താത്കാലിക യാത്രകളും ഒഴിവാക്കണമെന്നും നിർദ്ദേശമുണ്ട്.

അതേസമയം ഉക്രൈനിലുള്ള ഇന്ത്യൻ എംബസി താത്കാലികമായി അടയ്ക്കില്ല. അവിടെ ഇപ്പോഴും തുടരുന്ന ഇന്ത്യക്കാർ എന്ത് ആവശ്യമുണ്ടെങ്കിലും എംബസിയുമായി ബന്ധപ്പെടണമെന്ന് അധികൃതർ അറിയിച്ചു.

റഷ്യ ഉക്രൈനെ ഏത് നിമിഷവും ആക്രമിക്കാനുള്ള സാഹചര്യമാണ് നിലനിൽക്കുന്നതെന്നാണ് യുഎസിന്റെ മുന്നറിയിപ്പ്. ഉക്രൈൻ അതിർത്തികളിൽ റഷ്യൻ സൈന്യം നിലയുറപ്പിച്ചിട്ടുണ്ട്.

അതേസമയം യുക്രൈനിൽ നിന്നും തിരിച്ചെത്താൻ അമേരിക്കയും പൗരന്മാർക്ക് നിർദ്ദേശം നൽകിയിരുന്നു. ഉടൻ തന്നെ യുക്രൈൻ വിടണമെന്നാണ് പ്രസിഡന്റ് ജോ ബൈഡൻ അമേരിക്കൻ പൗരന്മാർക്ക് നൽകിയിരിക്കുന്ന നിർദ്ദേശം.

തിരുവനന്തപുരം: ഡയമണ്ട് വില കുത്തനെ കൂടി. 13 വർഷത്തിന് ശേഷമാണ് ഇത്തരത്തിൽ ഡയമണ്ട് വിലയിൽ വൻ വർധനവ് രേഖപ്പെടുത്തുന്നത്. ഒരു കാരറ്റിന് 15000 രൂപ മുതൽ 25000 രൂപ വരെ വർധനവാണ് ഉണ്ടായിട്ടുള്ളത്.

വിലവർധനയുടെ സാഹചര്യത്തിൽ നിർമ്മാതാക്കൾ ഡയമണ്ട് വിതരണം താത്ക്കാലികമായി നിർത്തിവെച്ചു. ഇറക്കുമതി ചെയ്യുന്ന റഫ് ഡയമണ്ടിന്റെ വിലയിലുണ്ടായ വർധനവാണ് ഇപ്പോഴുണ്ടായ വിലക്കയറ്റത്തിന് കാരണം. 2009ലും ഡയമണ്ടിന് സമാനമായ രീതിയിൽ വിലവർധനവ് രേഖപ്പെടുത്തിയിരുന്നു.

കോവിഡ് വൈറസ് വ്യാപനത്തെ തുടർന്ന് പല ഡയമണ്ട് സെന്ററുകളിലും നിർമ്മാണം പകുതിയായി കുറഞ്ഞിരുന്നു. ഇതും വിലവർധനവിന് കാരണമായിട്ടുണ്ട്. ഡയമണ്ട് ആവശ്യത്തിന് ലഭിക്കാത്തതിനാൽ ഡയമണ്ട് ആഭരണ നിർമ്മാണ മേഖല പ്രതിസന്ധിയിലാണ്. കഴിഞ്ഞ ബജറ്റിൽ പോളിഷ് ചെയ്ത ഡയമണ്ടിന് 2.5% നികുതി കുറച്ചിരുന്നു.

തിരുവനന്തപുരം: കെ റെയിൽ പദ്ധതിയുമായി ബന്ധപ്പെട്ട സർവ്വേ നടപടികൾ തുടരാമെന്ന് ഹൈക്കോടതി. ഹൈക്കോടതി ഡിവിഷൻ ബെഞ്ചാണ് ഇതുസംബന്ധിച്ച ഉത്തരവ് പുറപ്പെടുവിച്ചത്. തങ്ങളുടെ ഭൂമിയിൽ സർവേ നടത്തുന്നത് തടയണമെന്നാവശ്യപ്പെട്ട് ചിലർ നൽകിയ ഹർജിയിൽ നേരത്തെ ജസ്റ്റിസ് ദേവൻ രാമചന്ദ്രന്റെ സിംഗിൾ ബെഞ്ച് നൽകിയ സ്റ്റേ ഡിവിഷൻ ബെഞ്ച് റദ്ദാക്കുകയും ചെയ്തു. സിംഗിൾ ബെഞ്ച് ഉത്തരവിനെതിരേ സർക്കാർ നൽകിയ അപ്പീൽ അനുവദിച്ചുകൊണ്ടാണ് ഡിവിഷൻ ബെഞ്ച് ഉത്തരവ് പുറപ്പെടുവിച്ചത്.

തങ്ങളുടെ അധികാരത്തിന് അപ്പുറമുള്ള കാര്യങ്ങളിൽ സിംഗിൾ ബെഞ്ച് ഇടപെടുന്നതായാണ് സർക്കാർ കോടതിയെ അറിയിച്ചത്. സിൽവർ ലൈൻ പദ്ധതിയെ എതിർക്കുന്നത് വലിയ തിരിച്ചടിയാകുമെന്നും സർക്കാർ പറഞ്ഞിരുന്നു.

സാമൂഹ്യാഘാത പഠനത്തെ അടക്കം അത് ബാധിക്കുമെന്നും സർക്കാർ കോടതിയെ അറിയിച്ചു. അതേസമയം ഡിപിആറിന്റെ വിശദാംശങ്ങൾ ഹാജരാക്കണമെന്ന് സിംഗിൽ ബെഞ്ച് സർക്കാരിന് നൽകിയ നിർദ്ദേശം ഡിവിഷൻ ബെഞ്ച് ഒഴിവാക്കുകയും ചെയ്തു.