Highlights (Page 138)

ന്യൂഡൽഹി: രാജ്യത്തെ ഞെട്ടിച്ച് കോടികളുടെ വായ്പാ തട്ടിപ്പ്. മുംബൈ ആസ്ഥാനമായ സ്വകാര്യ കപ്പൽ നിർമാണ ശാലയായ എ.ബി.ജി ഷിപ്പ്‌യാർഡ് കമ്പനിയുടെ ഡയറക്ടർമാരാണ് കോടിക്കണക്കിന് രൂപയുടെ തട്ടിപ്പ് നടത്തിയത്. സംഭവവുമായി ബന്ധപ്പെട്ട് മുൻ ചെയർമാനും മാനേജിംഗ് ഡയറക്ടറുമായ റിഷി കമലേഷ് അഗർവാളിനെതിരെയും സ്ഥാപനത്തിനെതിരെയും സി.ബി.ഐ കേസ് രജിസ്റ്റർ ചെയ്തു.

22,842 കോടി രൂപയാണ് സ്‌റ്റേറ്റ് ബാങ്ക് ഓഫ് ഇന്ത്യ അടങ്ങുന്ന 28 ബാങ്കുകളുടെ കൺസോർഷ്യത്തെ കബളിപ്പിച്ച് ഇവർ തട്ടിയെടുത്തത്. എക്‌സിക്യൂട്ടീവ് ഡയറക്ടർ സന്താനം മുത്തസ്വാമി, ഡയറക്ടർമാരായ അശ്വനി കുമാർ, സുശീൽ കുമാർ അഗർവാൾ, രവി വിമൽ നവേടിയ, എ.ബി.ജി ഇൻറർനാഷനൽ പ്രൈവറ്റ് ലിമിറ്റഡ് എന്ന കമ്പനി തുടങ്ങിയവരും കേസിൽ പ്രതിചേർക്കപ്പെട്ടിട്ടുണ്ട്. 2012-17 കാലയളവിൽ റിഷി അഗർവാൾ ചെയർമാനായിരിക്കെ മറ്റ് ഡയറക്ടർമാരുമായി ഒത്തു ചേർന്ന് വായ്പയായി ലഭിച്ച കോടിക്കണക്കിന് രൂപ വകമാറ്റിയെന്നാണ് സിബിഐയുടെ കണ്ടെത്തൽ. 2019 നവംബർ എട്ടിന് എസ്ബിഐയാണ് ആദ്യം പരാതി നൽകിയത്.

പിന്നീട് 2020 ഓഗസ്റ്റിൽ സി.ബി.ഐ കൂടുതൽ വിവരങ്ങൾ ചോദിച്ചതിനെ തുടർന്ന് എസ്ബിഐ പരാതി പുതുക്കി നൽകിയിരുന്നു. 2022 ഫെബ്രുവരി ഏഴിനാണ് സി.ബി.ഐ എബിജിക്കെതിരെ കേസ് രജിസ്റ്റർ ചെയ്തത്. 2468.51 കോടിയാണ് സിബിഐ എബിജിക്ക് വായ്പയായി നൽകിയത്. ഐസിഐസിഐ ബാങ്ക് 7,089 കോടി രൂപയും ഐഡിബിഐ ബാങ്ക് 3,634 കോടിയും ബാങ്ക് ഓഫ് ബറോഡ 1,614 കോടിയും, പഞ്ചാബ് നാഷണൽ ബാങ്ക് 1,244 കോടിയും ഇന്ത്യൻ ഓവർസീസ് ബാങ്ക് 1228 കോടി രൂപയുമാണ് വായ്പയായി നൽകിയതെന്നാണ് കണ്ടെത്തൽ.

ജറുസലേം: ഒരിക്കൽ പോലും വാക്‌സിൻ സ്വീകരിക്കാതെ കോവിഡ് വന്നവരുടെ പ്രതിരോധ ശേഷിയുമായി താരതമ്യം ചെയ്യുമ്പോൾ കോവിഡിനെ തടഞ്ഞ് രണ്ടു വാക്‌സിൻ എടുത്തവർ ഏറെ പിന്നിലെന്ന പഠന റിപ്പോർട്ട് പുറത്ത്. ഒരിക്കൽ കോവിഡ് ബാധിച്ച് സുഖപ്പെട്ടതിലൂടെ നേടിയെടുത്ത പ്രതിരോധശേഷിയുടെ ഏഴയലത്തെത്താൻ വാക്‌സിൻ എടുത്ത, രോഗം ബാധിക്കാത്തവരുടെ പ്രതിരോധശേഷിക്ക് കഴിയില്ല എന്നാണ് പുതിയ പഠനത്തിൽ കണ്ടെത്തിയിട്ടുള്ളത്.

കോവിഡ് വാക്‌സിനുകളുടെ ആരംഭകാലം മുതൽ തന്നെ രോഗബാധയിലൂടെ ഉണ്ടാകുന്ന ആർജ്ജിത പ്രതിരോധശേഷിയാണോ അതോ വാക്‌സിൻ നൽകുന്ന പ്രതിരോധമാണോ കൂടുതൽ ഫലപ്രദമെന്നത് സംബന്ധിച്ച് തർക്കങ്ങൾ നടന്നിരൂന്നു. പല പഠനങ്ങളും ഇതുമായി ബന്ധപ്പെട്ട് നടത്തിയിട്ടുണ്ട്. ഇതുസംബന്ധിച്ച് ഏറ്റവും ഒടുവിൽ പുറത്തു വന്നത് ഇസ്രായേൽ നടത്തിയ പഠന റിപ്പോർട്ടാണ്. 500 പേരെ ഉൾപ്പെടുത്തിക്കൊണ്ടുള്ള പഠനമാണ് ഇസ്രായേലിൽ നടത്തിയത്.

ഇതിൽ കോവിഡ് വന്ന സുഖം പ്രാപിച്ചവരും അടുത്ത കാലത്ത് വാക്‌സിന്റെ രണ്ട് ഡോസുകളും എടുത്തവരും ഉണ്ടായിരുന്നു. കഴിഞ്ഞ ഒരു വർഷക്കാലമായി ഇവരെ നിരന്തരം നിരീക്ഷിച്ച് സ്ഥിരമായി ഇവരുടെ രക്തപരിശോധനകൾ നടത്തി രക്തത്തിലെ ആന്റിബോഡിയുടെ അളവ് കണക്കാക്കുകയും അതുപോലെ പ്രതിരോധ ശേഷി കണക്കാക്കുകയും ചെയ്തിരുന്നു. ഏതു തരത്തിലുള്ള പ്രതിരോധമാണ് നല്ലത് എന്നകാര്യത്തിൽ ഇപ്പോഴും വ്യക്തതയില്ലെന്നു തന്നെയാണെന്നാണ് വിദഗ്ധർ പറയുന്നത്. ചില സാഹചര്യങ്ങളിൽ രോഗബാധയിൽ നിന്നും സുഖം പ്രാപിച്ചവരിൽ വളരെ കുറഞ്ഞ അളവിൽ മാത്രം ആന്റിബോഡി കണ്ടെത്തിയിട്ടുണ്ട്. വാക്‌സിനും അതുപോലെ ആർജ്ജിത പ്രതിരോധ ശേഷിയും ഒരുമിച്ച് പ്രവർത്തിക്കുന്നതാണ് നല്ലതെന്നും വിദഗ്ധർ അഭിപ്രായപ്പെടുന്നു.

ന്യൂഡൽഹി: കോൺഗ്രസിനും രാഹുൽഗാന്ധിക്കുമെതിരെ ആഞ്ഞടിച്ച് പ്രധാനമന്ത്രി നരേന്ദ്ര മോദി. ഇന്ത്യ-ചൈന അതിർത്തി തർക്കം, തൊഴിലില്ലായ്മ തുടങ്ങിയ വിഷയങ്ങളിൽ പാർലമെന്റിൽ കൃത്യമായ മറുപടി പറയാൻ തയ്യാറാകുന്നില്ലെന്ന് വിമർശിച്ച കോൺഗ്രസിനെതിരെയാണ് പ്രധാനമന്ത്രി വിമർശനവുമായി രംഗത്തെത്തിയത്. കേൾക്കാൻ തയ്യാറാകാത്ത, പാർലമെന്റിൽ വരാത്ത ആൾക്ക് താനങ്ങനെ മറുപടി നൽകുമെന്ന് പ്രധാനമന്ത്രി പരിഹസിച്ചു. വാർത്താ ഏജൻസിയ്ക്ക് നൽകിയ പ്രത്യേക അഭിമുഖത്തിലാണ് പ്രധാനമന്ത്രി കോൺഗ്രസിനെതിരെ വിമർശനം ഉന്നയിച്ചത്.

ചോദ്യങ്ങളിൽ വിശദമായ ഉത്തരങ്ങൾ അതത് മന്ത്രാലയങ്ങൾ നൽകിയിട്ടുണ്ട്. ആവശ്യമുള്ളപ്പോഴെല്ലാം ചില സമയങ്ങളിൽ താൻ തന്നെ സംസാരിച്ചിട്ടുണ്ട്. പാർലമെന്റിൽ നടക്കുന്ന ചർച്ചകളെ സ്വാഗതം ചെയ്യുന്നുവെന്നും താനും തന്റെ സർക്കാരും ആരേയും ആക്രമിക്കുന്നില്ലെന്നും ചർച്ചയിൽ വിശ്വസിക്കുന്നുവെന്നും അദ്ദേഹം അറിയിച്ചു. തങ്ങൾ ആരേയും അക്രമിക്കുന്നില്ല. ചർച്ചകളും സംവാദങ്ങളും നടത്തുന്നതിലാണ് തങ്ങൾ വിശ്വസിക്കുന്നത്. ചില സമയത്ത് വാദപ്രതിവാദങ്ങളാകും. പാർലമെന്റിൽ ചില തടസ്സപ്പെടുത്തലുകൾ ഉണ്ടായേക്കും. ഈ വിഷയങ്ങളിലൊന്നും തനിക്ക് അസ്വസ്ഥയുണ്ടാകാൻ ഒരു കാരണവുമില്ല. എല്ലാ വിഷയങ്ങളിലും ഞാൻ വസ്തുതകൾ നൽകുകയും വസ്തുതകളുടെ അടിസ്ഥാനത്തിൽ എല്ലാ വിഷയങ്ങളിലും സംസാരിക്കുകയും ചെയ്തിട്ടുണ്ട്. ചില വിഷയങ്ങളിൽ നമ്മുടെ വിദേശകാര്യ മന്ത്രാലയവും പ്രതിരോധ മന്ത്രാലയവും വിശദമായ ഉത്തരങ്ങൾ നൽകിയിട്ടുണ്ട്. ആവശ്യമുള്ളിടത്തെല്ലാം ഞാനും സംസാരിച്ചിട്ടുണ്ട്. സഭയിൽ ഇരിക്കാൻ തയ്യാറാകാത്ത, കേൾക്കാൻ തയ്യാറാകാത്ത ഒരു വ്യക്തിയോട് ഞാനെങ്ങനെ മറുപടി പറയുമെന്നും അദ്ദേഹം ചോദിക്കുന്നു.

ആരെയെങ്കിലും അക്രമിക്കാനുള്ള ഭാഷ എനിക്കറിയില്ല. അത് എന്റെ സ്വഭാവത്തിലും ഇല്ലെന്നും പ്രധാനമന്ത്രി പറഞ്ഞി. എന്നാൽ യുക്തിയുടേയും വസ്തുതകളുടേയും അടിസ്ഥാനത്തിൽ മാദ്ധ്യമങ്ങൾ സഭയിലെ തന്റെ വാക്കുകൾ വ്യാഖ്യാനിച്ച് ചില വിവാദങ്ങൾ ഉണ്ടാക്കിയേക്കാമെന്നും അദ്ദേഹം ചൂണ്ടിക്കാട്ടി.

ന്യൂഡൽഹി: പിൻസീറ്റിൽ നടുവിലായി ഇരിക്കുന്നവർക്ക് ഉൾപ്പടെ മുഴുവൻ യാത്രക്കാർക്കും ധരിക്കാനുള്ള സീറ്റ് ബെൽറ്റ് കാറുകളിൽ ഘടിപ്പിക്കണമെന്ന് നിർദ്ദേശം നൽകാനൊരുങ്ങി കേന്ദ്ര സർക്കാർ. വാഹനനിർമാതാക്കൾക്ക് ഇതുസംബന്ധിച്ച നിർദ്ദേശം ഉടൻ കേന്ദ്ര ഗതാഗത മന്ത്രാലയം നൽകുമെന്നാണ് റിപ്പോർട്ട്. ഇതുമായി ബന്ധപ്പെട്ട കരടുമാർഗരേഖ ഈ മാസം പുറത്തിറങ്ങുമെന്നും ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നു.

ത്രീ പോയിന്റ് സേഫ്റ്റി സീറ്റ് ബെൽറ്റ് അഥവാ വൈ ആകൃതിയിലെ ബെൽറ്റ് ഘടിപ്പിക്കാനാണ് നിർദേശം നൽകുന്നത്. നിലവിൽ ഇന്ത്യയിൽ നിർമിക്കുന്ന മിക്കവാറും കാറുകളിലും മുന്നിലിരിക്കുന്നവർക്കും പിന്നിലിരിക്കുന്ന രണ്ടുപേർക്കും മാത്രമാണ് ത്രീ പോയിന്റ് സേഫ്റ്റി സീറ്റ് ബെൽറ്റ് നൽകിയിരിക്കുന്നത്. നിലവിൽ പിന്നിലിരിക്കുന്നവർ സീറ്റ് ബെൽറ്റ് ധരിക്കാത്തത് കുറ്റകരമല്ല. എന്നാൽ പുതിയ നിർദേശം പ്രാബല്യത്തിൽ വരുമ്പോൾ പിന്നിലിരിക്കുന്നവർക്കും സീറ്റ് ബെൽറ്റ് ധരിക്കുന്നത് നിർബന്ധമാക്കും.

ഇപ്പോൾ ചുരുക്കം ചില കാറുകളിൽ നടുവിലുള്ള സുരക്ഷാ ബെൽറ്റുണ്ട്. ചിലതിൽ വയറിന് കുറുകെയായി ധരിക്കുന്ന ലാപ് ബെൽറ്റുകളാണ് പിന്നിലിരിക്കുന്നവർക്കായി കാണപ്പെടാറുള്ളത്. സ്വീഡിഷ് കാർ നിർമാതാക്കളായ വോൾവോ ആദ്യമായി അവതരിപ്പിച്ച ത്രീ പോയിന്റ് സേഫ്റ്റി സീറ്റ് ബെൽറ്റ് ലാപ് ബെൽറ്റിനേക്കാൾ ഏറെ സുരക്ഷിതമാണെന്ന് കണ്ടെത്തിയിട്ടുണ്ട്.

കാറുകൾ സുരക്ഷിതമാക്കുന്നതിന് വേണ്ടി സർക്കാർ സ്വീകരിക്കുന്ന രണ്ടാമത്തെ നടപടിയാണിത്. കാറുകളിൽ ആറ് എയർ ബാഗുകൾ സർക്കാർ അടുത്തിടെ നിർബന്ധമാക്കിയിരുന്നു. ഇതിന് പിന്നാലെയാണ് പിൻസീറ്റിൽ സീറ്റ് ബെൽറ്റും നിർബന്ധമാക്കാനൊരുങ്ങുന്നത്.