International (Page 215)

വാഷിംഗ്ടൺ: ഗർഭഛിദ്രത്തിന് അനുകൂലമായി വാദിക്കുന്ന നേതാക്കളെ ക്രൈസ്തവ ആരാധനയിൽ നിന്ന് മാറ്റി നിർത്തുന്നതിനുള്ള നീക്കവുമായി കത്തോലിക്കാ സഭ. യുഎസ് കത്തോലിക് ബിഷപ്പ് കോൺഫറൻസിൽ ഇതിനായുള്ള കരടിന് ധാരണയായതായാണ് റിപ്പോർട്ട്. 55 വോട്ടുകൾക്കെതിരെ 168 വോട്ടുകൾക്കാണ് കരട് ധാരണയായത്. ഗർഭഛിദ്രം സംബന്ധിച്ച അവകാശങ്ങളിൽ യുഎസ് പ്രസിഡന്റ് ജോ ബൈഡനടക്കമുള്ളവരുടെ തീരുമാനത്തെ സ്വാധീനിക്കുന്നതിന് വേണ്ടിയാണ് കത്തോലിക്കാ സഭ ഇത്തരമൊരു നീക്കം നടത്തുന്നത്. ഗർഭഛിദ്ര അവകാശത്തിന് അനുകൂല നിലപാട് സ്വീകരിക്കുന്ന നേതാക്കൾക്ക് കുർബാന സ്വീകരണം ഉൾപ്പെടെയുള്ള കാര്യങ്ങളിൽ വിലക്കേർപ്പെടുത്താനാണ് കരടിൽ ധാരണയായിരിക്കുന്നത്.

ജിമ്മി കാർട്ടറിന് ശേഷം ക്രിസ്തുമത വിശ്വാസങ്ങളെ ശക്തമായി പിന്തുടരുന്ന വ്യക്തിയും കത്തോലിക്കാ വിശ്വാസിയായ രണ്ടാമത്തെ അമേരിക്കൻ പ്രസിഡന്റുമാണ് ജോ ബൈഡൻ. അമേരിക്കയിലെ വലിയ സഭയെന്ന നിലയിൽ ശർഭഛിദ്രത്തിന് അവകാശം നൽകുന്ന നിലയിലുള്ള തീരുമാനങ്ങളെ എതിർക്കാനുള്ള നീക്കമെന്ന നിലയിലാണ് ഈ തീരുമാനമെന്നാണ് കത്തോലിക്കാ സഭയുടെ വിശദീകരണം. അതേസമയം അതൊരു സ്വകാര്യ വിഷയമാണെന്നും പ്രാവർത്തികമാകാൻ സാധ്യതയില്ലെന്നുമാണ് സഭയുടെ നീക്കത്തെ കുറിച്ച് ജോ ബൈഡൻ പ്രതികരിച്ചത്. ഇത്തരമൊരു നിലപാട് സഭയ്ക്ക് തിരിച്ചടിയാവുമെന്നാണ് കരടിനെ എതിർക്കുന്ന ബിഷപ്പുമാർ മുന്നറിയിപ്പ് നൽകുന്നത്.

ടെല്‍ അവീവ് : ഇസ്രയേലിന് നേരെ ഹമാസിന്റെ പ്രകോപനത്തെ തുടര്‍ന്ന് ഗാസ അതിര്‍ത്തിയില്‍ ഇസ്രായേല്‍ ശക്തമായ വ്യോമാക്രമണം നടത്തി.
അഗ്നിബാധ ഉണ്ടാക്കുന്ന ബലൂണുകള്‍ ഉപയോഗിച്ച് തെക്കന്‍ ഇസ്രായേലില്‍ മൂന്ന് ദിവസം തുടര്‍ച്ചയായി ഹമാസ് ആക്രമണം നടത്തിയിരുന്നു. തുടര്‍ന്നാണ് ഇസ്രയേലിന്റെ പ്രത്യാക്രമണം. ബെയ്റ്റ് ലാഹിയയിലെ ഹമാസ് നിയന്ത്രണത്തിലുള്ള കെട്ടിടം ഇസ്രായേല്‍ ആക്രമണത്തില്‍ തകര്‍ത്തു. ആക്രമണത്തില്‍ ആര്‍ക്കും പരിക്കേറ്റിട്ടില്ലെന്ന് ഹമാസ് വ്യക്തമാക്കി.

ന്യൂയോര്‍ക്ക്: കോവിഡ് ഇന്ത്യയെ തകര്‍ത്തുവെന്ന് മുന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഒരു അന്താരാഷ്ട്ര മാദ്ധ്യമത്തിന് നല്‍കിയ അഭിമുഖത്തില്‍ സംസാരിക്കുമ്പോഴായിരുന്നു മുന്‍ അമേരിക്കന്‍ പ്രസിഡന്റിന്റെ പരാമര്‍ശം. ആഗോളതലത്തില്‍ കൊവിഡ് വ്യാപനത്തിന് ഉത്തരവാദികളായ ചൈന യു എസിന് 10 ട്രില്യണ്‍ ഡോളര്‍ നഷ്ടപരിഹാരമായി നല്‍കണമെന്നും കൊവിഡ് തകര്‍ത്ത രാജ്യങ്ങള്‍ ഒരിക്കലും പഴയതുപോലെയാകില്ലെന്നും അദ്ദേഹം ചൂണ്ടിക്കാട്ടി.

ഇന്ത്യ ഇപ്പോള്‍ തകര്‍ന്നുപോയിരിക്കുകയാണ്. എല്ലാ രാജ്യങ്ങളും തകര്‍ന്നടിഞ്ഞിരിക്കുകയാണെന്നും ട്രംപ് ചൂണ്ടിക്കാട്ടി.വൈറസ് എവിടെ നിന്നാണ് വന്നത്, എങ്ങനെയാണ് വന്നത് എന്നതിനെ കുറിച്ച് കണ്ടത്തണമെന്നും രണ്ട് സാമ്പത്തിക ശക്തികളിലൊന്നായ ചൈന തീര്‍ച്ചയായും സഹായഹസ്തം നീട്ടേണ്ടതുണ്ടെന്നും ട്രംപ് ആവശ്യപ്പെട്ടു.2019ല്‍ ചൈനയിലെ വുഹാനിലാണ് കൊവിഡ് ആദ്യം റിപ്പോര്‍ട്ട് ചെയ്യുന്നത്. വുഹാനിലെ ലാബില്‍ നിന്ന് ചോര്‍ന്നതാണ് വൈറസ് എന്ന് ആരംഭഘട്ടത്തില്‍ തന്നെ ട്രംപ് ആരോപിച്ചിരുന്നു. ട്രംപിന്റെ പരാമര്‍ശം വരുംദിവസങ്ങളില്‍ കൂടുതല്‍ ചര്‍ച്ചകള്‍ക്ക് വഴിയൊരുക്കും.

ജനീവ: അമേരിക്കയും റഷ്യയും തമ്മിലുള്ള ബന്ധം മോശമായിരിക്കുന്ന സാഹചര്യത്തില്‍ ജോ ബൈഡനും വ്‌ലദീമീര്‍ പുടിനും തമ്മില്‍ കൂടിക്കാഴ്ച നടത്തി.ആയുധനിയന്ത്രണവും റഷ്യയുടെ സൈബര്‍ ആക്രമണമെന്ന അമേരിക്കയുടെ ആരോപണവും ചര്‍ച്ച ചെയ്‌തെന്നാണ് സൂചന. ആദ്യഘട്ട ചര്‍ച്ച 2 മണിക്കൂറാണ് ബൈഡനും പുടിനും നടത്തിയത്. ഒപ്പം യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കനും റഷ്യന്‍ വിദേശകാര്യ സെക്രട്ടറി സെര്‍ഗെയ് ലാവ്‌റോവും ഉണ്ടായിരുന്നു. തുടര്‍ന്ന് കൂടുതല്‍ ഉന്നതഉദ്യോഗസ്ഥരുടെ സാന്നിധ്യത്തിലാണു ചര്‍ച്ച രണ്ടാം ഘട്ടത്തിലേക്കു കടന്നത്.

റഷ്യയെ വന്‍ശക്തിയെന്ന് വിശേഷിപ്പിച്ചാണ് ബൈഡന്‍ ചര്‍ച്ചയ്ക്കു തുടക്കമിട്ടത്. സമാധാനത്തിന്റെ നഗരമായ ജനീവയിലേക്കു സ്വാഗതമെന്നു പറഞ്ഞായിരുന്നു സ്വിസ് പ്രസിഡന്റ് ഗയ് പാമലിന്‍ ഇരു നേതാക്കളെയും വരവേറ്റത്.യുക്രെയ്‌നിലെ ക്രൈമിയ റഷ്യ പിടിച്ചെടുത്തതും യുഎസ് പ്രസിഡന്റ് തിരഞ്ഞെടുപ്പിലെ റഷ്യന്‍ ഇടപെടലും സമീപകാല ഹാക്കിങ് പരമ്പരകളും ഉള്‍പ്പെടെ ഒരുപാട് പ്രശ്‌നങ്ങളുടെ പശ്ചാത്തലത്തിലാണ് ബൈഡനും പുടിനും തമ്മില്‍ ചര്‍ച്ച നടത്തിയത്.

പാരിസ്: ഫ്രാന്‍സിലും മാസ്‌ക് നിര്‍ബന്ധമല്ലാതാക്കി. കോവിഡ് കേസുകള്‍ കുറയുകയും വാക്‌സിനേഷന്‍ വേഗത്തിലുമാക്കിയതോടെയാണ് മാസ്‌ക് മാറ്റാനുള്ള അനുമതി ഫ്രാന്‍സ് നല്‍കിയത്. ജൂണ്‍ 20 മുതല്‍ രാത്രി നിരോധനവും നീക്കുമെന്ന് പ്രധാനമന്ത്രി ജീന്‍ കാസ്റ്റക്‌സ് അറിയിച്ചു. നേരത്തെ തീരുമാനിച്ചതിലും 10 ദിവസം നേരത്തെയാണ് രാത്രി നിരോധനം നീക്കുന്നത്. രാജ്യത്തെ ആരോഗ്യസ്ഥിതി വിചാരിച്ചതിലും വേഗത്തില്‍ പൂര്‍വസ്ഥിതിയില്‍ എത്തുന്നുണ്ടെന്നും പ്രധാനമന്ത്രി പറഞ്ഞു.എന്നാല്‍ തിരക്കേറിയ സ്ഥലങ്ങളില്‍ മാസ്‌ക് നിര്‍ബന്ധമായിരിക്കും.