International (Page 214)

വാഷിംഗ്ടൺ: അനധികൃത കുടിയേറ്റം, അഭയാർത്ഥി പ്രശ്നം, അതിർത്തി സുരക്ഷിതത്വം എന്നീ വിഷയങ്ങൾ പഠിച്ചു പരിഹാരമാർഗങ്ങൾ നിർദ്ദേശിക്കുന്നതിനുള്ള ചുമതലകളിൽ നിന്നും വൈസ് പ്രസിഡന്റ് കമലാ ഹരിസിനെ ഒഴിവാക്കണമെന്നാവശ്യപ്പെട്ട് യു എസ് ഹൗസ് റിപ്പബ്ലിക്കൻ അംഗങ്ങൾ. ഇക്കാര്യം വ്യക്തമാക്കി യുഎസ് പ്രസിഡന്റ് ജോ ബൈഡന് യുഎസ് റിപ്പബ്ലിക്കൻ അംഗങ്ങൾ കത്തയച്ചുവെന്നാണ് റിപ്പോർട്ട്.

ഇത്തരം വിഷയങ്ങൾ കൈകാര്യം ചെയ്യുന്നതിൽ കമലാ ഹാരിസ് തീർത്തും പരാജയമാണെന്നാണ് കത്തിൽ ആരോപിക്കുന്നത്. കഴിഞ്ഞ 85 ദിവസമായി തന്നിൽ അർപ്പിതമായ ചുമതലകൾ ഒന്നും തന്നെ ഇവർ നിർവഹിക്കുന്നില്ലെന്നും കത്തിൽ പറയുന്നു. രണ്ടു ദശാബ്ദങ്ങൾക്കുള്ളിൽ അമേരിക്ക നേരിടുന്ന ഏറ്റവും ഗുരുതരമായ സ്ഥിതി വിശേഷമാണ് അതിർത്തി പ്രദേശങ്ങളിൽ ഉണ്ടായിരിക്കുന്നത്. അതിർത്തി സംരക്ഷണം ഏറ്റെടുത്തിരിക്കുന്ന ബോർഡർ പെട്രോൾ ഏജന്റിനെ സന്ദർശിച്ചു കാര്യങ്ങൾ അന്വേഷിച്ചറിയുന്നതിനു പോലും കമല ഹാരിസ് ഇതുവരെ തയ്യാറായിട്ടില്ലെന്നത് ഉൾപ്പെടെ ഗുരുതര ആരോപണങ്ങൾ കത്തിൽ ചൂണ്ടിക്കാട്ടുന്നു.

മേയ് മാസം മാത്രം 180,000 കുടിയേറ്റക്കാരാണു അമേരിക്കയിലേക്ക് നുഴഞ്ഞു കയറാൻ ശ്രമിച്ചത്. സതേൺ ബോർഡറിലൂടെ പ്രവേശിച്ചവരിൽ റഷ്യ, ബ്രസീൽ, ക്യൂബ, ഹേത്തി തുടങ്ങിയ രാജ്യങ്ങളിൽ നിന്നുള്ളവരും ഉൾപ്പെടുന്നു. അതിർത്തി പ്രശ്നം ഏറ്റവും രൂക്ഷമായിരിക്കുന്ന ടെക്സസ് – മെക്സിക്കോ അതിർത്തിയിലെ പ്രശ്നങ്ങളെ കുറിച്ചു നാളിതുവരെ കമലാ ഹാരിസ് താനുമായി ബന്ധപ്പെടാൻ ശ്രമിച്ചിട്ടില്ലെന്ന് ടെക്സസ് ഗവർണർ ഗ്രെഗ് ഏബട്ടും പരാതിപ്പെട്ടു. അതിർത്തി പ്രശ്നങ്ങൾ പരിഹരിക്കുന്നതിൽ ബൈഡൻ ഭരണകൂടം തീർത്തും പരാജയമാണെന്നും റിപ്പബ്ലിക്കൻ അംഗങ്ങൾ ആരോപിക്കുന്നു.

ന്യൂഡൽഹി: പുതിയ ഐടി ചട്ടങ്ങൾ രൂപീകരിച്ചത് സാമൂഹിക മാദ്ധ്യമങ്ങളിലെ സാധാരണ ഉപഭോക്താക്കളെ ശാക്തീകരിക്കാനാണെന്ന് ഇന്ത്യ. ഐക്യരാഷ്ട്ര സഭയ്ക്ക് (യുഎൻ) നൽകിയ മറുപടിയിലാണ് ഇന്ത്യ ഇക്കാര്യം വ്യക്തമാക്കിയത്. രാജ്യത്തെ പുതിയ ഐടി ചട്ടങ്ങൾ മനുഷ്യാവകാശ ലംഘനമല്ലെന്നും ഇന്ത്യ വ്യക്തമാക്കി.

രാജ്യത്തെ ഐടി ചട്ടങ്ങളിൽ യുഎൻ മനുഷ്യാവകാശ കൗൺസിൽ പ്രതിനിധികൾ ആശങ്ക പ്രകടിപ്പിച്ചിരുന്നു. ഈ സാഹചര്യത്തിലാണ് ഇന്ത്യ ഇക്കാര്യങ്ങൾ വിശദീകരിച്ച് ഐക്യരാഷ്ട്ര സഭയ്ക്ക് മറുപടി നൽകിയത്. അഭിപ്രായ സ്വാതന്ത്ര്യം തടസപ്പെടുത്തുന്ന ചട്ടങ്ങളിൽ ഇന്ത്യ മാറ്റം വരുത്തണെന്ന് അഭ്യർഥിച്ച് യുഎന്നിലെ പ്രത്യേക സമിതി കേന്ദ്രസർക്കാരിന് കത്തയച്ചിരുന്നു. ഇത് കണക്കിലെടുത്താണ് ഇന്ത്യയുടെ വിശദീകരണം.

വിശാലമായ ചർച്ചകൾക്ക് ശേഷമാണ് പുതിയ ഐടി ചട്ടങ്ങൾ കൊണ്ടുവന്നത്. സാമൂഹിക മാദ്ധ്യമങ്ങളിലൂടെ ചൂഷണം ചെയ്യപ്പെടുന്ന ഇരകൾക്ക് പരാതി നൽകാൻ ഒരിടം വേണം. പൊതുജനങ്ങളിൽ നിന്ന് ഉൾപ്പെടെ വിവിധ മേഖലയിലുള്ളവരുമായി ചർച്ച നടത്തിയ ശേഷമാണ് ഐടി ചട്ടങ്ങൾ തയ്യാറാക്കിയതെന്നും കേന്ദ്രം വ്യക്തമാക്കി. ഐടി ചട്ടം അഭിപ്രായ സ്വാതന്ത്ര്യത്തെ ബാധിക്കുമെന്ന ആശങ്കകൾ തെറ്റാണ്. ഇന്ത്യയുടെ ജനാധിപത്യ മൂല്യങ്ങൾ ലോകമെമ്പാടും അംഗീകരിക്കപ്പെട്ടതാണ്. അഭിപ്രായ സ്വാതന്ത്ര്യം ഇന്ത്യൻ ഭരണഘടന ഉറപ്പുനൽകുന്നുണ്ടെന്നും സ്വതന്ത്രമായ നീതിന്യായ വ്യവസ്ഥയും ശക്തമായ മാദ്ധ്യമങ്ങളും ഇന്ത്യൻ ജനാധിപത്യ ഘടനയുടെ ഭാഗമാണെന്നും ഇന്ത്യ അറിയിച്ചു.

ടെഹ്‌റാൻ: ഇറാന്റെ പ്രഡിഡന്റായി ഇബ്രാഹിം റെയ്‌സി തെരഞ്ഞെടുക്കപ്പെട്ടു. 90 ശതമാനം വോട്ടുകൾ നേടിയാണ് റെയ്‌സിയുടെ വിജയം. ഇറാന്റെ ആത്മീയ നേതാവ് ആയത്തുള്ള ഖമേനിയുടെ വിശ്വസ്തനാണ് ഇബ്രാഹിം റെയ്‌സി. ആയത്തുള്ള ഖമേനിയുടെ പിന്തുണയോടെയാണ് ഇബ്രാഹിം റെയ്‌സി വിജയിച്ചത്.

ഇറാൻ പ്രസിഡന്റായിരുന്ന ഹസൻ റുഹാനിയുടെ പക്ഷക്കാർക്ക് തെരഞ്ഞെടുപ്പ് കമ്മീഷൻ വിലക്കേർപ്പെടുത്തിയതിനാൽ ഇബ്രാഹിം റെയ്‌സി വിജയിക്കുമെന്ന് നേരത്തെ തന്നെ റിപ്പോർട്ടുകളുണ്ടായിരുന്നു. മനുഷ്യവകാശ ലംഘനങ്ങളുടെ പേരിൽ അമേരിക്കയുടെ ഉപരോധം നേരിടുന്നയാളാണ് റെയ്സി. ഇറാനിലെ ജുഡീഷ്യറിയുടെ മേധാവി കൂടിയാണ് റെയ്സി. 1980 കളിൽ ആയിരക്കണക്കിന് രാഷ്ട്രീയ തടവുകാരെ വധശിക്ഷയ്ക്ക് വിധിച്ചെന്ന ആരോപണമാണ് റെയ്സിക്കെതിരെയുള്ളത്. ഇക്കാര്യം ചൂണ്ടിക്കാട്ടിയാണ് യുഎസ് റെയ്‌സിയ്ക്ക് ഉപരോധം ഏർപ്പെടുത്തിയിരിക്കുന്നത്.