International (Page 153)

കീവ്: യുക്രൈനിൽ റഷ്യ ആക്രമണം തുടരുന്നു. ഖാർകീവിലും റഷ്യൻ സൈന്യം ഉഗ്ര സ്‌ഫോടനങ്ങൾ നടത്തി. റഷ്യൻ സൈന്യം കരമാർഗം ഖാർകീവിലേക്ക് കടന്നതായും അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നു. വ്യാവസായികമായി ഏറെ പ്രാധാന്യമുള്ള പ്രദേശമാണിത്. മലയാളികൾ ഉൾപ്പെടെ നിരവധി പേർ ഈ പ്രദേശത്തുണ്ടെന്നാണ് വിവരം. ജനവാസ കേന്ദ്രങ്ങളിലടക്കമാണ് സ്‌ഫോടനം ഉണ്ടായത്. റഷ്യൻ ഷെല്ലാക്രമണത്തിൽ ആറ് വയസുകാരി ഉൾപ്പെടെ 7 പേർ കൊല്ലപ്പെട്ടതായും വിവരമുണ്ട്.

ഖാർക്കീവിൽ വാതക പൈപ്പ് ലൈന് നേരെയും ആക്രമണം ഉണ്ടായിട്ടുണ്ട്. മേഖലയിൽ വലിയ തീപിടുത്തം അനുഭവപ്പെട്ടു. വിഷവാതകം ചോരുന്നതിനാൽ പ്രദേശവാസികൾ സുരക്ഷിത കേന്ദ്രത്തിലേക്ക് മാറണമെന്നാണ് അധികൃതർ നൽകുന്ന നിർദ്ദേശം.

ഖാർകീവിലെ ഒരു അപ്പാർട്ട്‌മെന്റിന് നേരെ റഷ്യൻ സൈന്യം വെടിയുതിർത്തതായും ഇതിൽ ഒരു സ്ത്രീ കൊല്ലപ്പെട്ടതായുമുള്ള റിപ്പോർട്ടും പുറത്തുവന്നിട്ടുണ്ട്. ഒൻപത് നില കെട്ടിടത്തിന് നേരെയാണ് വെടിവെപ്പുണ്ടായത്. യുക്രൈനെ ഏതുവിധേനയും വരുതിയിലാക്കാനാണ് റഷ്യയുടെ നീക്കം.

കീവ്: യുക്രൈനുമായി ചർച്ചക്ക് തയ്യാറെന്ന് അറിയിച്ച് റഷ്യ. ബെലാറൂസിൽ വച്ച് ചർച്ച നടത്താമെന്ന് റഷ്യ അറിയിച്ചു. ചർച്ചയക്കായി റഷ്യൻ പ്രതിനിധി സംഘം ബെലാറൂസിലെത്തി. ബെലാറൂസിൽ ചർച്ചയ്ക്കില്ലെന്നാണ് യുക്രൈൻ പ്രസിഡൻറ് സെലൻസ്‌കി മറുപടി നൽകിയത്. നാറ്റോ സഖ്യരാജ്യങ്ങളിലെ നഗരങ്ങൾ ചർച്ച നടത്താമെന്നാണ് അദ്ദേഹത്തിന്റെ നിർദ്ദേശം. വാഴ്‌സ, ഇസ്താംബൂൾ, ബൈകു എന്നിവിടങ്ങളിൽ ചർച്ച നടത്താമെന്നാണ് അദ്ദേഹത്തിന്റെ നിലപാട്.

റഷ്യക്കൊപ്പം നിൽക്കുന്ന രാജ്യമാണ് ബെലാറൂസ്. ആവശ്യമെങ്കിൽ ബെലാറൂസ് സൈന്യം റഷ്യൻ സൈന്യത്തിന് ഒപ്പം ചേരുമെന്ന് പ്രസിഡന്റ് പ്രഖ്യാപിക്കുകയും ചെയ്തിരുന്നു. അതിനാലാണ് ബെലാറൂസിൽ ചർച്ചയ്ക്കില്ലെന്ന് യുക്രൈൻ പ്രസിഡന്റ് അറിയിച്ചത്. യുക്രൈൻ നഗരങ്ങളിൽ കടന്നുകയറി റഷ്യ ആക്രമണം ശക്തമാക്കുന്നതിനിടെയാണ് ചർച്ചയ്ക്ക് സന്നദ്ധത അറിയിച്ച് റഷ്യ രംഗത്തെത്തിയത്. യുക്രൈന്റെ വിവിധ ഭാഗങ്ങളിലായി വലിയ ആക്രമണങ്ങളാണ് റഷ്യ നടത്തുന്നത്. ഒഡേസയിൽ ഡ്രോൺ ആക്രമണം നടന്നു. കീവിൽ സ്‌ഫോടനങ്ങൾ നടക്കുകയും വ്യോമാക്രമണ മുന്നറിയിപ്പ് പുറപ്പെടുവിക്കുകയും ചെയ്തിട്ടുണ്ട്.

അതേസമയം വാസിൽകീവിലെ എണ്ണ സംഭരണ ശാലയ്ക്ക് നേരെ റഷ്യ മിസൈൽ ആക്രമണം നടത്തി. കാർകീവിൽ വാതക പൈപ്പ് ലൈന് നേരെയും ആക്രമണം നടന്നു.

കീവ്: റഷ്യയുടെ ക്രൂരതകൾ പുറത്തുവിട്ട് ബ്രിട്ടൺ. യുക്രൈൻ തലസ്ഥാനം കീവ് പിടിച്ചെടുക്കാൻ ടാങ്കുകളും പടക്കോപ്പുകൾക്കും ഒപ്പം മൊബൈൽ ശ്മശാനങ്ങളും റഷ്യ എത്തിച്ചിരുന്നുവെന്ന വാർത്തകളാണ് ബ്രിട്ടൺ പുറത്തുവിടുന്നത്. സ്വന്തം സേനയിലെ ആൾനാശം കുറച്ച് കാണിക്കുന്നതിന് വേണ്ടിയും, സിവിലിയൻമാരുടെ ഉൾപ്പെടെ മരണ സംഖ്യ കുറയ്ക്കുന്നതിനുമാണ് റഷ്യ മൊബൈൽ ശ്മശാനങ്ങൾ യുക്രെയിനിലേക്ക് അയച്ചത്.

ഒരു സമയം ഒന്നിലേറെ മൃദേഹങ്ങൾ ദഹിപ്പിക്കാൻ കഴിയുന്ന റഷ്യൻ ട്രക്കുകളുടെ ചിത്രങ്ങളാണ് ബ്രിട്ടീഷ് പ്രതിരോധ മന്ത്രാലയം കഴിഞ്ഞ ദിവസം പുറത്തുവിട്ടിരുന്നത്. സംഘർഷം ആരംഭിച്ചതിന് പപിന്നാലെ കുട്ടികൾ ഉൾപ്പെടെ 198 സിവിലിയന്മാരെങ്കിലും കൊല്ലപ്പെട്ടതായാണ് യുക്രൈൻ വ്യക്തമാക്കുന്നത്. അതേസമയം, റഷ്യയുടെ നൂറുകണക്കിനോളം സൈനികരെ കൊലപ്പെടുത്തിയതായും യുക്രൈൻ വ്യക്തമാക്കി.

യുക്രൈൻ പിടിച്ചടക്കാനായി റഷ്യ കീവിലേക്ക് കൂടുതൽ സൈനികരെ അയക്കുകയാണ്. യുക്രൈനെതിരെയുള്ള സൈനിക നീക്കത്തിൽ അമേരിക്ക ഉൾപ്പെടെയുള്ള രാജ്യങ്ങൾ റഷ്യയ്‌ക്കെതിരെ രംഗത്തെത്തിയിട്ടുണ്ട്. റഷ്യയ്ക്ക് ഉപരോധം ഏർപ്പെടുത്താനാണ് അമേരിക്ക ഉൾപ്പെടെയുള്ള രാജ്യങ്ങളുടെ നീക്കം.

ലണ്ടൻ: എതിരാളിയുടെ ശക്തി മനസ്സിലാക്കാതെ, അമിത ആത്മവിശ്വാസത്തിൽ എടുത്തു ചാടി യൂദ്ധത്തിനൊരുങ്ങിപ്പുറപ്പെട്ട പുടിൻ പുലിവാലു പിടിക്കുമെന്ന് ബ്രിട്ടീഷ് രഹസ്യാന്വേഷണ ഏജൻസിയായ എം 16 തലവൻ റിച്ചാർഡ് മുറേ. ആയുധശക്തികൊണ്ട് മണ്ണുകീഴടക്കിയാലും, യുക്രെയിനികളുടെ മനസ്സ് കീഴടക്കാത്തിടത്തോളം കാലം യുദ്ധം ജയിച്ചു എന്ന് പുടിന് പറയാനാകില്ല എന്നു പറയുന്ന പ്രൊഫസർ ഫ്രീഡ്മാൻ എഴുതിയ ഒരു ലേഖനം പങ്കുവെച്ചുകൊണ്ടായിരുന്നു അദ്ദേഹത്തിന്റെ പരാമർശം. യുക്രൈന് മേൽ റഷ്യ പ്രതീക്ഷിച്ചത്ര വേഗം വിജയം നേടാൻ കഴിയില്ലെന്നാണ് രഹസ്യാന്വേഷണ ഏജൻസികൾ അറിയിക്കുന്നത്.

വികലമായ ആസൂത്രണമായിരുന്നു റഷ്യൻ സൈന്യം നടത്തിയതെന്നാണ് അദ്ദേഹം പറയുന്നത്. പ്രതീക്ഷിക്കാത്ത ചെറുത്തു നിൽപ് ഉണ്ടായപ്പോൾ റഷ്യ സൈന്യം പകച്ചുപോയെന്നും അദ്ദേഹം അറിയിച്ചു. യുക്രൈൻ സൈന്യത്തേക്കാൾ ഏറെ യുക്രൈൻ ജനതയുടെ പ്രതിരോധമാണ് റഷ്യയുടെ പദ്ധതികളെ തകിടം മറിക്കുന്നതെന്നും അദ്ദേഹം അഭിപ്രായപ്പെട്ടു. സൈനിക ശക്തി താരതമ്യം ചെയ്യുമ്പോൾ റഷ്യയ്ക്ക് മുന്നിൽ യുക്രൈൻ ഒന്നുമല്ല. എന്നിട്ടും അതിന് ആനുപാതികമായ മുന്നേറ്റം യുദ്ധമുന്നണിയിൽ ഉണ്ടാക്കാൻ റഷ്യയ്ക്ക് കഴിയുന്നില്ല എന്നത് തന്നെ യുക്രൈൻ സൈന്യത്തിന്റെയും ജനതയുടെയും നിശ്ചയദാർഢ്യത്തിന് ഉത്തമോദാഹരണമാണെന്നും അദ്ദേഹം ചൂണ്ടിക്കാട്ടി.

യുദ്ധം പത്ത് ദിവസത്തിൽ അധികം നീണ്ടു നിന്നാൽ റഷ്യ കൂടുതൽ സാമ്പത്തിക ബുദ്ധിമുട്ടിലേക്ക് നീങ്ങുമെന്ന റിപ്പോർട്ടുകളും പുറത്തു വരുന്നുണ്ട്.

ഇസ്ലാമാബാദ്: ചരിത്രത്തിലാദ്യമായി ഹിന്ദു സൈനികോദ്യോഗസ്ഥന് ലെഫ്റ്റനന്റ് കേണൽ പദവി നൽകി പാകിസ്താൻ. കെലാഷ് കുമാർ എന്ന ഉദ്യോഗസ്ഥനാണ് പാകിസ്താൻ പ്രമോഷൻ നൽകിയത്. മേജർ പദവിയിൽ നിന്നാണ് കെലാഷ് കുമാറിനെ ലെഫ്റ്റനന്റ് കേണലായി ഉയർത്തിയത്.

കെലാഷ് കുമാർ ഹിന്ദു വിഭാഗത്തിൽ നിന്നുള്ള ആദ്യത്തെ മേജർ കൂടിയാണെന്നും അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നു. സിന്ധ് പ്രവിശ്യയിലെ താർ ജില്ലയിൽ നിന്നുള്ള സൈനികനാണ് കെലാഷ് കുമാർ. പാകിസ്താൻ സായുധ സേനയുടെ മാദ്ധ്യമ വിഭാഗം പുറത്തിറക്കിയ പ്രസ്താവനയിൽ കെലാഷ് കുമാറിനെ വിശേഷിപ്പിക്കുന്നത് ബ്രില്യന്റ് ഓഫീസർ എന്നാണ്.

പാകിസ്താൻ മിലിട്ടറി അക്കാദമിയിൽ നിന്നാണ് കെലാഷ് കുമാർ പരിശീലനം പൂർത്തിയാക്കിയത്. നിരവധി പുരസ്‌കാരങ്ങൾ അദ്ദേഹത്തിന് ലഭിച്ചിട്ടുണ്ട്. എം ബി ബി എസ് ബിരുധദാരി കൂടിയാണ് കെലാഷ്. പാകിസ്താനിലെ ഒറ്റപ്പെട്ട പ്രദേശങ്ങളായ തർപാർക്കർ, ഗിൽജിത്-ബാൾട്ടിസ്താൻ, ഹുൻസ വാലി എന്നിവിടങ്ങളിലെ സാധാരണക്കാർക്കിടയിൽ ഇദ്ദേഹം സൗജന്യ മെഡിക്കൽ ക്യാമ്പുകൾ സംഘടിപ്പിച്ചിരുന്നു.