International (Page 144)

വാഷിംഗ്ടൺ: പാകിസ്താനെ ഭയപ്പെടുത്തുന്ന റിപ്പോർട്ട് സമർപ്പിച്ച് അമേരിക്കൻ രഹസ്യാന്വേഷണ വിഭാഗം. യുഎസ് കോൺഗ്രസിലാണ് അമേരിക്കൻ രഹസ്യാന്വേഷണ വിഭാഗം റിപ്പോർട്ട് സമർപ്പിച്ചത്. പാകിസ്താന്റെ ഭാഗത്ത് നിന്നും എന്തെങ്കിലും പ്രകോപനമുണ്ടായാൽ ഇന്ത്യ ശക്തമായി തിരിച്ചടിക്കുമെന്നാണ് റിപ്പോർട്ടിൽ വ്യക്തമാക്കിയിട്ടുണ്ട്. മുൻകാലങ്ങളെ അപേക്ഷിച്ച് കൂടുതൽ ശക്തമായി ഇന്ത്യ പ്രതികരിക്കുമെന്നും നരേന്ദ്രമോദി ഇന്ത്യ ഭരിക്കുമ്പോൾ അതിനുള്ള സാദ്ധ്യത വളരെ കൂടുതലാണെന്നും റിപ്പോർട്ടിൽ ചൂണ്ടക്കാട്ടുന്നു.

അതേസമയം, നാഷണൽ ഇന്റലിജൻസ് ഡയറക്ടർ പുറത്തിറക്കിയ യുഎസ് ഇന്റലിജൻസ് കമ്മ്യൂണിറ്റിയുടെ വാർഷിക ഭീഷണി വിലയിരുത്തലിൽ ഇന്ത്യ ചൈന ബന്ധത്തെക്കുറിച്ചും പ്രതിപാദിക്കുന്നുണ്ട്. രണ്ട് ആണവശക്തികൾ തമ്മിലുള്ള സായുധ ഏറ്റുമുട്ടൽ വലിയ ഭീതിയുയർത്തുന്നതാണെന്ന് റിപ്പോർട്ടിൽ വ്യക്തമാക്കുന്നു. ഇരു രാജ്യങ്ങളും തമ്മിലുള്ള തർക്ക വിഷയങ്ങളിൽ യു എസ് ഇടപെടണമെന്നും റിപ്പോർട്ടിൽ പറഞ്ഞിട്ടുണ്ട്.

വാഷിങ്ടൺ: റഷ്യക്കെതിരെ കടുത്ത നടപടികളുമായി അമേരിക്ക. യുക്രൈൻ സംഘർഷം തുടരുന്ന സാഹചര്യത്തിലാണ് നടപടി. വ്യാപാര മേഖലയിൽ റഷ്യയ്ക്കുള്ള അഭിമത രാഷ്ട്രപദവി പിൻവലിക്കാനാണ് അമേരിക്കയുടെ തീരുമാനം. യുഎസ് പ്രസിഡന്റ് ജോ ബൈഡനാണ് ഇക്കാര്യം അറിയിച്ചത്. പവോഡ്ക, വജ്രം, സമുദ്ര ഭക്ഷ്യോൽപന്നങ്ങൾ എന്നിവയുടെ ഇറക്കുമതി നിരോധിക്കുമെന്നും അദ്ദേഹം അറിയിച്ചു.

യുക്രൈനെതിരെ രാസായുധം പ്രയോഗിച്ചാൽ റഷ്യ കടുത്ത പ്രത്യാഘാതം നേരിടേണ്ടി വരുമെന്ന മുന്നറിയിപ്പും ബൈഡൻ നൽകിയിട്ടുണ്ട്. റഷ്യൻ പാർലമെന്റ് അംഗങ്ങൾക്കും ബാങ്കിങ് ഉദ്യോഗസ്ഥർക്കും വിലക്കേർപ്പെടുത്തുമെന്നും ബൈഡൻ വ്യക്തമാക്കി. അതേസമയം, യുക്രൈനിലെ റഷ്യൻ അധിനിവേശം തടയാൻ വേണ്ടിയുള്ള അമേരിക്കയുടെ നേരിട്ടുള്ള ഇടപെടൽ അദ്ദേഹം നിഷേധിക്കുകയും ചെയ്തു.

യുക്രൈനിൽ റഷ്യയ്‌ക്കെതിരെ യുദ്ധം ചെയ്യില്ലെന്നും അദ്ദേഹം പറഞ്ഞു. നാറ്റോ സഖ്യത്തെ പിണക്കുന്ന അത്തരം നീക്കങ്ങൾ മൂന്നാം ലോക മഹായുദ്ധത്തിനു കാരണമാകുമെന്നും അദ്ദേഹം വ്യക്തമാക്കുന്നു.

കീവ്: യുക്രൈനുവേണ്ടി റഷ്യക്കെതിരെ പോരാടാൻ സേനയിൽ ചേർന്നത് 20,000 വിദേശികളെന്ന് റിപ്പോർട്ട്. ദ് കീവ് ഇൻഡിപെൻഡന്റാണ് ഇക്കാര്യം റിപ്പോർട്ട് ചെയ്തത്. വിദേശ പൗരന്മാർക്ക് ആവശ്യമെങ്കിൽ യുക്രൈൻ പൗരത്വത്തിനായി അപേക്ഷ നൽകാമെന്ന് യുക്രൈൻ ആഭ്യന്തര സഹമന്ത്രി പറഞ്ഞതായും റിപ്പോർട്ടുകളുണ്ട്. രാജ്യത്തിന് വേണ്ടി പോരാടാൻ തയാറായുള്ള വിദേശികളെ ഉൾപ്പെടുത്തി ‘രാജ്യാന്തരസേന’ രൂപീകരിക്കുമെന്നു നേരത്തെ യുക്രൈൻ പ്രസിഡന്റ് വൊളോഡിമിർ സെലെൻസ്‌കി അറിയിച്ചിരുന്നു.

അതേസമയം, യുദ്ധവിമാനങ്ങൾ നൽകാനുള്ള പോളണ്ടിന്റെ നീക്കം എതിർത്ത് അമേരിക്ക രംഗത്തെത്തി.യിട്ടുണ്ട്. പോളണ്ടിന്റെ തീരുമാനം ആശങ്കാജനകമാണെന്നും തീരുമാനം നാറ്റോ നയത്തിന് ചേർന്നതല്ലെന്നുമാണ് പെന്റഗൺ അറിയിച്ചിട്ടുള്ളത്. റഷ്യൻ നിർമ്മിത മിഗ് 29 വിമാനങ്ങൾ യുക്രൈന് നൽകുമെന്ന പോളണ്ടിന്റെ പ്രഖ്യാപനത്തിനെതിരെയാണ് അമേരിക്ക രംഗത്തെത്തിയത്.

ജർമനിയിലെ റാംസ്റ്റെയ്ൻ യുഎസ് വ്യോമതാവളത്തിലേക്ക് മിഗ്-29 പോർവിമാനം അയയ്ക്കാൻ തയാറാണെന്നാണ് പോളണ്ട് വിദേശകാര്യമന്ത്രാലയം അറിയിച്ചത്. മറ്റ് നാറ്റോ സഖ്യകക്ഷികളും അപ്രകാരം ചെയ്യണമെന്നും പോളണ്ട് അഭ്യർത്ഥിച്ചിരുന്നു. എന്നാൽ, ഇതുസംബന്ധിച്ച് പോളണ്ടുമായും നാറ്റോ സഖ്യരാജ്യങ്ങളുമായും ചർച്ച നടത്തുമെന്ന് പെന്റഗൺ അറിയിച്ചു. അതേസമയം, റഷ്യക്കെതിരായ ആക്രമണത്തിന് വ്യോമതാവളങ്ങൾ അനുവദിക്കുന്ന രാജ്യങ്ങൾ യുദ്ധത്തിന്റെ ഭാഗമായതായി കണക്കാക്കുമെന്ന് റഷ്യ കഴിഞ്ഞ ദിവസം മുന്നറിയിപ്പു നൽകിയിരുന്നു.

ന്യൂയോർക്ക്: ജനിതകമാറ്റം വരുത്തിയ പന്നിയുടെ ഹൃദയം സ്വീകരിച്ച രോഗി മരിച്ചു. അമേരിക്കൻ സ്വദേശിയായ ബെന്നറ്റാണ് മരിച്ചത്. 57 വയസായിരുന്നു. രണ്ടു മാസത്തെ ആശുപത്രിവാസത്തിനൊടുവിലാണ് അദ്ദേഹം മരണത്തിന് കീഴടങ്ങിയത്. ജനുവരി ഒൻപതിനാണ് ബെന്നറ്റിന് ശസ്ത്രക്രിയ നടന്നത്. ഏഴ് മണിക്കൂർ നീണ്ട ശസ്ത്രക്രിയ വൈദ്യശാസ്ത്ര ലോകത്ത് തന്നെ വഴിത്തിരിവ് സൃഷ്ടിക്കുകയായിരുന്നു. ബാൾട്ടിമോറിലെ മേരിലാൻഡ് മെഡിക്കൽ സെന്ററിലായിരുന്നു ശസ്ത്രക്രിയ നടന്നത്.

കൃത്യമായ സമയത്ത് അവയവം മാറ്റിവയ്ക്കാൽ നടക്കാത്തതിനാൽ അമേരിക്കയിൽ പന്ത്രണ്ടോളം പേർ ദിവസേന മരിക്കുന്നുവെന്നാണ് കണക്കുകൾ വ്യക്തമാക്കുന്നത്. അവയവം ലഭ്യതകുറവ് മൂലമാണ് ഇത്തരത്തിൽ മരണം സംഭവിക്കുന്നത്. 3,817 അമേരിക്കൻ പൗരന്മാരാണ് കഴിഞ്ഞവർഷം ഹൃദയം മാറ്റിവച്ചത്. ഇനിയും ഹൃദയശസ്ത്രക്രിയയ്ക്കായി ധാരാളം പേർ കാത്തുനിൽക്കുന്നുണ്ട്. ഇതോടെയാണ് മനുഷ്യഹൃദയം അല്ലാതെയുള്ള മറ്റ് വഴികളിൽ പരീക്ഷണം നടത്താൻ ഗവേഷകർ തീരുമാനിച്ചത്.

പുതിയ ജീൻ എഡിറ്റിംഗും ക്ലോണിംഗ് സാങ്കേതികവിദ്യകളുമാണ് പന്നി ഹൃദയം എന്ന ആശയത്തിലേക്ക് എത്തിച്ചത്. ജനിതകമാറ്റം വരുത്തിയ പന്നിയുടെ വൃക്ക മസ്തിഷ്‌ക മരണം സംഭവിച്ച ഒരാൾക്ക് വിജയകരമായി നേരത്തെ ഘടിപ്പിച്ചിരുന്നു. അതിന് ശേഷമാണ് ഹൃദയം മാറ്റിവെക്കൽ ശസ്ത്രക്രിയ നടത്തിയത്.