International (Page 143)

മോസ്‌കോ: അമേരിക്കക്കെതിരെ നടപടിയുമായി റഷ്യ. അമേരിക്കൻ പ്രസിഡന്റ് ജോർജ് ബൈഡനും സ്റ്റേറ്റ് ഒഫ് സെക്രട്ടറി ആന്റണി ബ്ലിങ്കനും ഉൾപ്പെടെ 13 അമേരിക്കൻ ഉന്നത ഉദ്യോഗസ്ഥർക്കെതിരെ റഷ്യ ഉപരോധം ഏർപ്പെടുത്തി. പ്രതിരോധ സെക്രട്ടറി എ. ഓസ്റ്റിനും റഷ്യ ഉപരോധം ഏർപ്പെടുത്തിയവരുടെ പട്ടികയിലുണ്ട്. ഉപരോധമേർപ്പെടുത്തിയവരുടെ പട്ടികയിലുള്ള 13 പേർക്ക് റഷ്യയിലേക്ക് പ്രവേശിക്കാനും കഴിയില്ല. റഷ്യൻ വിദേശകാര്യ മന്ത്രാലയമാണ് ഇക്കാര്യം അറിയിച്ചത്.

അതേസമയം, റഷ്യയും അമേരിക്കയും തമ്മിലുള്ള നയതന്ത്ര ബന്ധങ്ങൾക്ക് ഉപരോധവും വിലക്കുകളും ബാധകമാകില്ലെന്ന് റഷ്യ അറിയിച്ചിട്ടുണ്ട്. ഉപരോധ പട്ടികയിലുള്ള ഏതെങ്കിലും വ്യക്തിക്ക് ചർച്ചകൾക്കും മറ്റുമായി റഷ്യയിൽ വരേണ്ടി വന്നാൽ വിഷയത്തിന്റെ ഗൗരവും അപ്പോഴത്തെ സ്ഥിതിയും അനുസരിച്ച് തീരുമാനമെടുക്കാമെന്നും റഷ്യ വ്യക്തമാക്കി.

യുക്രൈനിൽ സൈനിക നടപടി തുടരുമെന്നും യുക്രെയിൻ പോരാട്ടം നിർത്തിയാൽ മാത്രമേ തങ്ങൾ പിന്മാറൂവെന്നും നേരത്തെ റഷ്യൻ പ്രസിഡന്റ് വ്ലാഡിമിർ പുട്ടിൻ അറിയിച്ചിരുന്നു. എന്നാൽ, സംഘർഷം അവസാനിപ്പിക്കാൻ റഷ്യൻ പ്രസിഡന്റ് വ്ലാഡിമിർ പുട്ടിനുമായി നേരിട്ടുള്ള ഒരു കൂടിക്കാഴ്ച സംഘടിപ്പിക്കുക എന്നതാണ് തങ്ങളുടെ സംഘത്തിന്റെ പ്രധാന ദൗത്യമെന്ന് യുക്രൈൻ പ്രസിഡന്റ് വൊളൊഡിമിർ സെലെൻസ്‌കി പറഞ്ഞു.

കീവ്: യുക്രൈനിൽ പ്രശസ്ത അമേരിക്കൻ ഫിലിം മേക്കറിനെ റഷ്യൻ സൈന്യം വെടിവെച്ചുകൊന്നു. യുഎസ് ഫിലിം മേക്കറും മാദ്ധ്യമപ്രവർത്തകനുമായ ബ്രെന്റ് റെനോദാണ് കൊല്ലപ്പെട്ടത്. യുക്രൈൻ തലസ്ഥാനമായ കീവിൽ നിന്നും പലായനം ചെയ്യുന്ന സാധാരണ മനുഷ്യരുടെ ദൃശ്യങ്ങൾ ചിത്രീകരിക്കുന്നതിനിടയിലാണ് അദ്ദേഹത്തിന് വെടിയേറ്റത്. സംഘർഷ ബാധിത പ്രദേശങ്ങളിൽ നിന്നും നിരവധി മാദ്ധ്യമങ്ങൾക്കു വേണ്ടി അദ്ദേഹം ഡോക്യുമെന്ററികൾ നിർമ്മിച്ചിട്ടുണ്ട്.

ടൈം സ്റ്റുഡിയോയ്ക്കു വേണ്ടി അഭയാർത്ഥി പ്രശ്നങ്ങളെക്കുറിച്ച് ഡോക്യുമെന്ററി നിർമ്മിക്കുന്നതിന് വേണ്ടിയാണ് അദ്ദേഹം യുക്രൈനിൽ എത്തിയത്. കീവിനു നേർക്ക് റഷ്യൻ വ്യോമസേന നടത്തുന്ന ആക്രമണങ്ങളെ തുടർന്ന് വീടുപേക്ഷിച്ച് പലായനം ചെയ്യുന്ന സിവിലിയൻമാരുടെ ദൃശ്യങ്ങൾ പകർത്തുന്നതിനിടെയാണ് ഇദ്ദേഹത്തിന് നേരെ ആക്രമണം ഉണ്ടായത്. മാദ്ധ്യമപ്രവർത്തകരാണ് എന്നു വ്യക്തമാക്കുന്ന സ്റ്റിക്കർ പതിച്ച വാഹനത്തിലായിരുന്നു യാത്ര ചെയ്തിരുന്നതെങ്കിലും യാതൊരു പ്രകോപനവുമില്ലാതെ റഷ്യൻ സൈന്യം വെടിയുതിർക്കുകയായിരുന്നുവെന്ന് ബ്രെന്റ് റെനോദിനൊപ്പം ഉണ്ടായിരുന്ന ജുവാൻ ആറെൻഡോൻഡോ വ്യക്തമാക്കി. ആക്രമണത്തിൽ പരിക്കേറ്റ് ചികിത്സയിൽ കഴിയവെയാണ് അദ്ദേഹത്തിന്റെ പ്രതികരണം.

ഇറാഖ്, അഫ്ഗാനിസ്താൻ, സിറിയ തുടങ്ങിയ സ്ഥലങ്ങളിൽ നിന്നും ഇദ്ദേഹം ദൃശ്യങ്ങൾ പകർത്തിയിട്ടുണ്ട്. ന്യൂയോർക്ക് ടൈംസ്, ടൈം, സിബിഎസ്, വൈസ് ന്യൂസ് തുടങ്ങിയ മാധ്യമങ്ങൾക്കു വേണ്ടി ശ്രദ്ധേയമായ ഡോക്യുമെന്ററികൾ നിർമിച്ചിട്ടുണ്ട്. ഹാർവാർഡ് സർവകലാശാലയിലെ നീമെൻ ഫൗണ്ടേഷൻ ഫെലോ ആയിരുന്നു ബ്രെന്റ് റെനോദ്.

മോസ്‌കോ: യുക്രൈനെതിരായ യുദ്ധത്തിൽ ചൈനയിൽ നിന്ന് സൈനിക സഹായം തേടിയെന്ന റിപ്പോർട്ടുകൾ നിരസിച്ച് റഷ്യ. ചൈനയിൽ നിന്ന് സഹായം വാങ്ങുന്നതിനുളള ഗതികേടില്ലെന്നാണ് വിഷയത്തിൽ റഷ്യയുടെ പ്രതികരണം. യുക്രെയിനിൽ റഷ്യയുടെ ലക്ഷ്യം പൂർത്തിയാക്കാൻ മതിയായ ആയുധവും ആൾബലവും റഷ്യക്കുണ്ടെന്ന് സർക്കാർ വക്താവ് ദിമിത്രി പെസ്‌കോവ് അറിയിച്ചു.

യുക്രൈനിൽ യുദ്ധം നടത്താൻ റഷ്യ ചൈനയിൽ നിന്ന് സഹായം തേടിയെന്ന് അമേരിക്കയാണ് വെളിപ്പെടുത്തിയത്. അതേസമയം, അമേരിക്ക വ്യാജ വിവരങ്ങൾ പ്രചരിപ്പിക്കുകയാണെന്നും യുക്രൈൻ വിഷയത്തിൽ ചൈനയെ ലക്ഷ്യം വെക്കുകയാണെന്നും ചൈനീസ് വിദേശ കാര്യ വക്താവ് വ്യക്തമാക്കി. യുഎസ് തെറ്റായ വിവരങ്ങൾ പ്രചരിപ്പിക്കുകയാണെന്നാണ് ചൈനീസ് വിദേശകാര്യ മന്ത്രാലയത്തിന്റെ ആരോപണം.

യുക്രൈനിൽ ആക്രമണം കടുപ്പിക്കാനായി റഷ്യ ചൈനയുടെ സൈനിക സഹായം തേടിയതായി കഴിഞ്ഞ ദിവസമാണ് അമേരിക്ക വെളിപ്പെടുത്തിയത്. ഏത് തരത്തിലെ ആയുധങ്ങളാണ് റഷ്യ ആവശ്യപ്പെട്ടതെന്ന് വ്യക്തമല്ലെന്നും അമേരിക്ക വെളിപ്പെടുത്തി. പടിഞ്ഞാറൻ രാജ്യങ്ങൾ ഏർപ്പെടുത്തിയ ഉപരോധങ്ങൾ നേരിടാൻ സാമ്പത്തിക സഹായവും റഷ്യ ചൈനയോട് ആവശ്യപ്പെട്ടതായി റിപ്പോർട്ടുകളുണ്ട്. യുക്രൈൻ സംഘർഷത്തിന്റെ പശ്ചാത്തലത്തിൽ വിസ, മാസ്റ്റർ കാർഡ് എന്നിവ റഷ്യയിൽ പ്രവർത്തനം അവസാനിപ്പിച്ചിരുന്നു. തുടർന്ന് അന്താരാഷ്ട്ര ഇടപാടുകൾക്കായി ചൈനീസ് സർക്കാരിന്റെ ഉടമസ്ഥതിലുള്ള യൂണിയൻ പേ, റഷ്യയുടെ മിർ എന്നിവ ചേർന്ന് നിർമിക്കുന്ന കോ- ബാഡ്ജ് കാർഡുകൾ പുറത്തിറക്കാനുള്ള സാദ്ധ്യതകളെക്കുറിച്ച് റഷ്യൻ ബാങ്കുകൾ ചൈനീസ് ബാങ്കുകളുമായി ചർച്ചകൾ നടത്തുകയാണെന്ന വിവരവും പുറത്തു വന്നിരുന്നു. അതേസമയം റഷ്യ ചൈനയിൽ നിന്നും ആയുധം വാങ്ങുകയാണെന്നുള്ള റിപ്പോർട്ടുകൾ അമേരിക്കയിലെ ചൈനീസ് എംബസിയുടെ വക്താവ് ലിയു പെൻഗ്യു നിഷേധിച്ചു.

ഉപരോധങ്ങൾ മറികടക്കാൻ റഷ്യയെ സഹായിക്കുന്നതിന് അമേരിക്കയുടെ ദേശീയ സുരക്ഷാ ഉപദേഷ്ടാവ് ജേക്ക് സള്ളിവൻ ചൈനയ്ക്ക് മുന്നറിയിപ്പ് നൽകിയിട്ടുണ്ട്. ചൈന പ്രത്യാഘാതം നേരിടേണ്ടി വരുമെന്നാണ് അമേരിക്കയുടെ മുന്നറിയിപ്പ്.

കീവ്: യുക്രൈനിൽ റഷ്യയുടെ സൈനിക നടപടി തുടരുമ്പോൾ ആശങ്കയായി യുക്രൈൻ ലാബുകളിലെ മാരക രോഗാണുക്കൾ. രാജ്യത്തെ ആരോഗ്യ ഗവേഷണ മേഖലയിൽ പ്രവർത്തിക്കുന്ന ഗവേഷണ കേന്ദ്രങ്ങളിലും ലാബുകളിലും അപകടകാരികളായ രോഗാണുക്കളെ സൂക്ഷിച്ചിട്ടുണ്ടെന്നാണ് റിപ്പോർട്ടുകൾ. റഷ്യൻ ആക്രമണത്തിൽ ഈ രോഗാണുക്കൾ പുറത്തുകടക്കാൻ സാധ്യതയുള്ളതിനാൽ അപകടകാരിയായ രോഗാണുക്കളെ നശിപ്പിച്ച് കളയണമെന്ന് ലോകാരോഗ്യ സംഘടന നിർദ്ദേശം നൽകിയതായും അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നു.

യുക്രൈൻ നഗരങ്ങളിൽ സൈനിക നീക്കം ശക്തമാക്കിയ റഷ്യ ബോംബാക്രമണവും തുടരുകയാണെന്ന് ബയോസെക്യൂരിറ്റി വിദഗ്ധർ വ്യക്തമാക്കി. ലാബുകൾക്ക് നേരെ ആക്രമണമുണ്ടായാൽ രോഗാണുക്കൾ പുറത്തേക്ക് കടക്കുന്നതിനും തുടർന്ന് വ്യാപനത്തിന് സാധ്യതയുണ്ടെന്നും ബയോസെക്യൂരിറ്റി വിദഗ്ധർ അറിയിച്ചു. റഷ്യൻ ആക്രമണത്തിൽ അപകടകാരികളായ രോഗാണുക്കൾ പുറത്തുകടക്കാൻ സാധ്യതയുണ്ടെങ്കിൽ അവയെ നശിപ്പിക്കാനാണ് യുക്രൈൻ ആരോഗ്യ മന്ത്രാലയത്തിനും ബന്ധപ്പെട്ട വകുപ്പുകൾക്കും ഡബ്ല്യൂ.എച്ച്.ഓ നിർദേശം നൽകിയിരിക്കുന്നത്.

കോവിഡ് ഉൾപ്പെടെയുള്ള മൃഗങ്ങളെയും മനുഷ്യരെയും ഒരുപോലെ ബാധിക്കുന്ന അപകടകരമായ രോഗങ്ങളുടെ ഭീഷണി നേരിടുന്നതുമായി ബന്ധപ്പെട്ട് പ്രവർത്തിക്കുന്ന നിരവധി ലാബുകൾ യുക്രൈനിൽ പ്രവർത്തിക്കുന്നുണ്ട്. യൂറോപ്യൻ യൂണിയൻ, യുഎസ്, ഡബ്ല്യുഎച്ച്ഒ എന്നിവരുടെ പിന്തുണയോടെയാണ് ഈ ലാബുകൾ പ്രവർത്തിക്കുന്നത്. യുക്രൈൻ സർക്കാരിന് കീഴിലുള്ള ലാബുകളുടെ സുരക്ഷ സംവിധാനങ്ങൾ ശക്തമാക്കുന്നതിൽ വർഷങ്ങളായി സഹകരിച്ച് പ്രവർത്തിക്കുന്നുണ്ടെന്ന് ലോകാരോഗ്യ സംഘടന നേരത്തെ അറിയിച്ചിരുന്നു.

ജനീവ: കോവിഡ് അടിയന്തരാവസ്ഥ അവസാനിപ്പിക്കുന്നത് സംബന്ധിച്ച് മാനദണ്ഡങ്ങൾ രൂപപ്പെടുത്തുന്നതിനുള്ള ചർച്ച ആരംഭിച്ച് ലോകാരോഗ്യ സംഘടന. കോവിഡ് വൈറസ് വ്യാപനം ആരംഭിച്ച് രണ്ട് വർഷത്തിന് ശേഷമാണ് ലോകാരോഗ്യ സംഘടന ആഗോള ആരോഗ്യ അടിയന്തരാവസ്ഥ അവസാനിപ്പിക്കുന്നത് സംബന്ധിച്ച ചർച്ചകൾ നടത്തുന്നത്. എന്നാൽ കോവിഡ് അടിയന്തരാവസ്ഥ അവസാനിപ്പിക്കുന്നത് സംബന്ധിച്ച് ഒരു പ്രഖ്യാപനം നടത്തുന്ന കാര്യത്തെ കുറിച്ച് ലോകാരോഗ്യ സംഘടന നിലവിൽ ചിന്തിക്കുന്നില്ല.

അടിയന്തരാവസ്ഥ അവസാനിപ്പിക്കുന്നതിനുള്ള മാനദണ്ഡങ്ങൾ എപ്രകാരം രൂപപ്പെടുത്താം എന്നതിനെ കുറിച്ച് മാത്രമാണ് നിലവിൽ ചർച്ചകൾ നടക്കുന്നത്. കോവിഡ് വൈറസ് വ്യാപനത്തിന്റെ പശ്ചാത്തലത്തിൽ 2020 ജനുവരി 30-നാണ് ലോകാരോഗ്യ സംഘടന പൊതുജനാരോഗ്യ അടിയന്തരാവസ്ഥ പ്രഖ്യാപിച്ചത്.

ലോകത്ത് പല രാജ്യങ്ങളിലും കോവിഡ് കേസുകളിൽ കുറവുണ്ടായിട്ടുണ്ടെങ്കിലും ഹോങ്കോങ്ങിൽ കോവിഡ് കേസുകൾ ഉയരുന്നതായി റിപ്പോർട്ടുണ്ട്. ചൈനയിലും കോവിഡ് കേസുകൾ ഉയരുന്നതായി റിപ്പോർട്ടുകളുണ്ട്.

മോസ്‌കോ: വിവിധ രാജ്യങ്ങൾ റഷ്യയ്ക്ക് ഏർപ്പെടുത്തിയ ഉപരോധം പിൻവലിച്ചില്ലെങ്കിൽ അന്താരാഷ്ട്ര ബഹിരാകാശ നിലയത്തെ അത് പ്രതികൂലമായി ബാധിക്കുമെന്ന് മുന്നറിയിപ്പ് നൽകി റഷ്യ. അന്താരാഷ്ട്ര ബഹിരാകാശ നിലയത്തിലെ പങ്കാളികളായ രാജ്യങ്ങൾക്കാണ് റഷ്യ മുന്നറിയിപ്പ് നൽകിയത്. ഇത്തരത്തിൽ ഉപരോധം തുടർന്നാൽ അത് അന്താരാഷ്ട്ര നിലയത്തിന്റെ നിലനിൽപ്പിന് ഭീഷണിയാകുമെന്ന് റഷ്യ അറിയിച്ചു.

ഇതുസംബന്ധിച്ച് അന്താരാഷ്ട്ര ബഹിരാകാശ നിലയത്തിൽ പങ്കാളികളായ രാജ്യങ്ങൾക്ക് റഷ്യ കത്തയക്കുകയും ചെയ്തു. അമേരിക്ക, കാനഡ, യൂറോപ്പ് തുടങ്ങിയ ബഹിരാകാശ സഖ്യ രാജ്യങ്ങൾക്കാണ് റഷ്യ കത്തയച്ചത്. റഷ്യൻ ബഹിരാകാശ ഏജൻസിയായ റോസ്‌കോസ്‌മോസിന്റെ മേധാവി ദിമിത്രി റോഗോസ് ഇക്കാര്യം ട്വിറ്ററിലൂടെ അറിയിച്ചിരുന്നു.

യുക്രൈനെതിരായ റഷ്യൻ ആക്രമണത്തിന്റെ പുതിയ സാഹചര്യത്തിൽ വിലക്കിയാൽ ഉണ്ടാകുന്ന പ്രത്യാഘാതം ഓർമ്മിപ്പിച്ച് റഷ്യൻ ബഹിരാകാശ ഏജൻസി തലവൻ നേരത്തെയും രംഗത്ത് വന്നിരുന്നു. ബഹിരാകാശ പദ്ധതികളിലുൾപ്പെടെ സഹകരണം അവസാനിപ്പിച്ചാൽ ഐഎസ്എസിനെ ആരു രക്ഷിക്കും? എന്നാണ് റഷ്യൻ ബഹിരാകാശ ഏജൻസിയായ റോസ്‌കോസ്‌മോസിന്റെ മേധാവി ദിമിത്രി റോഗോസ് ഫെബ്രുവരി 27ന് ട്വിറ്ററിലൂടെ ചോദിക്കുന്നത്.

യുഎസ് സ്‌പേസ് ഏജൻസി നാസയും റഷ്യൻ ഏജൻസി റോസ്‌കോസ്‌മോസും, യൂറോപ്യൻ ബഹിരാകാശ ഏജൻസിയുമാണ് അന്താരാഷ്ട്ര ബഹിരാകാശ നിലയം നടത്തിപ്പിലെ പ്രധാനികൾ. റഷ്യൻ സഹകരണം വേണ്ടെന്ന് വച്ചാൽ ഉള്ള സ്ഥിതി ഭീകരമായിരിക്കും എന്ന സൂചനയാണ് റഷ്യൻ ഏജൻസിയുടെ മേധാവി മുന്നോട്ടു വെയ്ക്കുന്നത്.