International (Page 126)

കൊളംബോ: ശ്രീലങ്കൻ ധനമന്ത്രി അലി സബ്രി രാജിവച്ചു. സത്യപ്രതിജ്ഞ ചെയ്ത് ഒരു ദിവസം പിന്നിടുമ്പോഴാണ് അലി സബ്രി രാജി വെച്ചത്. പ്രസിഡന്റ് ഗൊതബയ രജപക്സെയുടെ സഹോദരൻ ബസിൽ രജപക്സയെ മാറ്റിയാണ് അലി സബ്രിയെ നിയമിച്ചത്. നിലവിലെ സ്ഥിതി പഠിച്ച ശേഷം, പ്രതിസന്ധി മറികടക്കാൻ പുതിയ ധനമന്ത്രിയെ നിയമിക്കണമെന്ന് പ്രസിഡന്റിന് സമർപ്പിച്ച കത്തിൽ സബ്രി ആവശ്യപ്പെട്ടു.

നിയമവകുപ്പ് രാജിവച്ച ശേഷം മറ്റൊരു മന്ത്രി സ്ഥാനത്തെ കുറിച്ച് ചിന്തിച്ചിരുന്നില്ലെന്നും പാർലമെന്ററി ജനാധിപത്യം നിലനിർത്താനും സംവിധാനങ്ങൾ അതേപടി തുടരാനുമാണ് ധനമന്ത്രിയായി ചുമതലയേറ്റതെന്നും അദ്ദേഹം രാജി കത്ത് സമർപ്പിച്ച ശേഷം മാദ്ധ്യമങ്ങളോട് പ്രതികരിച്ചു. മുൻപെങ്ങുമില്ലാത്ത വിധം കടുത്ത പ്രതിസന്ധിയാണ് ശ്രീലങ്കയിൽ അനുഭവപ്പെടുന്നത്.

കഴിഞ്ഞ ദിവസം രാത്രി മുഴുവൻ ശ്രീലങ്കയിലെ തെരുവുകളിൽ ജനങ്ങൾ പ്രതിഷേധം നടത്തി. നെഗോമ്പോ പട്ടണത്തിൽ പൊലീസും ജനങ്ങളും ഏറ്റുമുട്ടി. രാഷ്ട്രീയ നേതാക്കളുടെ വീടുകൾ ജനങ്ങൾ വളഞ്ഞു. മുൻ മന്ത്രി ഗാമിനി ലോകഗിന്റെ വീടിന് തീയിടാനും ശ്രമം നടന്നു. അതേസമയം, സർവകക്ഷി സർക്കാരിൽ ചേരില്ലെന്ന് പ്രതിപക്ഷം അറിയിച്ചു.

ശ്രീലങ്കയിൽ കടുത്ത നിയന്ത്രണങ്ങളാമ് ഏർപ്പെടുത്തിയിരിക്കുന്നത്. രാജ്യവ്യാപക കർഫ്യൂ തുടരുകയാണ്. ക്രമസമാധാനം ഉറപ്പിക്കാനും സാധന സാമഗ്രികളുടെ വിതരണം ഉറപ്പുവരുത്താനുമാണ് അടിയന്തരാവസ്ഥ പ്രഖ്യാപിച്ചതെന്ന് പ്രസിഡന്റ് ഗൊതബായ രജപക്സെ നേരത്തെ അറിയിച്ചിരുന്നു.

ഇസ്ലാമാബാദ്: പാകിസ്താനിലെ രാഷ്ട്രീയ പ്രതിസന്ധിയിൽ ഇടക്കാല ഉത്തരവിന് തയാറാകാതെ സുപ്രീംകോടതി. പാകിസ്താനിലെ ഭരണ പ്രതിസന്ധിയിൽ സുപ്രീം കോടതിയിലെ മുഴുവൻ ജഡ്ജിമാരും ഉൾപ്പെട്ട ബെഞ്ച് വാദം കേൾക്കണമെന്ന പ്രതിപക്ഷത്തിന്റെ ആവശ്യം കോടതി അംഗീകരിച്ചില്ല. ചീഫ് ജസ്റ്റിസ് അധ്യക്ഷനായ അഞ്ചംഗ ബെഞ്ചാണ് വാദം കേട്ടത്. പാർലമെന്റ് പിരിച്ചുവിട്ടതിന് എതിരായ പ്രതിപക്ഷത്തിന്റെ ഹർജിയിൽ നാളെയും വാദം തുടരും.

ഇമ്രാൻ ഖാനെതിരെ ദേശീയ അസംബ്ലിയിൽ അവിശ്വാസം പ്രമേയം അവതരിപ്പിക്കുന്നത് തടയാൻ സ്പീക്കർക്ക് അധികാരമില്ല, അവിശ്വാസ പ്രമേയം തടയാൻ സ്പീക്കർ ഭരണഘടനാ വളച്ചൊടിച്ചു, മൂന്ന്, അവിശ്വാസം പരിഗണനയിൽ ഇരിക്കെ ദേശീയ അസംബ്ലി പിരിച്ചുവിടാൻ കഴിയില്ല തുടങ്ങിയ കാര്യങ്ങളാണ് പ്രതിപക്ഷം മുന്നോട്ടുവെയ്ക്കുന്നത്.

പാർലമെന്റ് പിരിച്ചുവിട്ടത് ഇടക്കാല ഉത്തരവിലൂടെ സ്റ്റേ ചെയ്യണമെന്ന പ്രതിപക്ഷ ആവശ്യം അംഗീകരിക്കാൻ കോടതി തയ്യാറായില്ല. എല്ലാ കാര്യങ്ങളിലും വിശദമായ വാദം കേട്ട് ഭരണഘടനാപരമായി വിധി പറയുമെന്ന് ചീഫ് ജസ്റ്റിസ് ഉമർ അതാ ബന്ദിയാൽ അറിയിച്ചു. രാജ്യത്തെ രാഷ്ട്രീയ പ്രതിസന്ധിയിൽ സൈന്യത്തിന് ഒന്നും ചെയ്യാനില്ലെന്ന് സൈനിക വക്താവ് ബാബർ ഇഫ്തികാർ വ്യക്തമാക്കി.

ഇസ്ലാമാബാദ്: ഇമ്രാൻ ഖാൻ പാകിസ്ഥാന്റെ പ്രധാനമന്ത്രിയല്ലെന്ന അറിയിപ്പുമായി പാക് കാബിനറ്റ് സെക്രട്ടറി. പാകിസ്ഥാൻ പ്രസിഡന്റ് അസംബ്ലി പിരിച്ചുവിട്ടതിനെ തുടർന്ന് 2022 ഏപ്രിൽ 3-ന് പാർലമെന്ററി കാര്യ മന്ത്രാലയം, ഇസ്ലാമിക് റിപ്പബ്ലിക് ഓഫ് പാകിസ്ഥാൻ ഭരണഘടനയുടെ ആർട്ടിക്കിൾ 48(1) പ്രകാരം ആർട്ടിക്കിൾ 58(1) പ്രകാരം ഇമ്രാൻ ഖാൻ പാകിസ്ഥാന്റെ പ്രധാനമന്ത്രിയല്ലെന്നും പ്രധാനമന്ത്രിയുടെ ഓഫീസ് പ്രവർത്തനം നിർത്തിയെന്നും വ്യക്തമാക്കി കാബിനറ്റ് സെക്രട്ടറി പ്രസ്താവന പുറത്തിറക്കി. പാക് ദേശീയ അസംബ്ലി പിരിച്ചുവിട്ടതിന് പിന്നാലെയാണ് അദ്ദേഹം ഇക്കാര്യം അറിയിച്ചത്.

പ്രധാനമന്ത്രി ഇമ്രാൻ ഖാന്റെ ശുപാർശ പ്രകാരമാണ് പാക് ദേശീയ അസംബ്ലി പിരിച്ചുവിട്ടത്. പ്രധാനമന്ത്രിയുടെ ഉപദേശം അനുസരിച്ച്, പാകിസ്ഥാൻ ഭരണഘടനയുടെ ആർട്ടിക്കിൾ 101 പ്രകാരം മുഹമ്മദ് സർവാറിനെ പഞ്ചാബ് ഗവർണർ സ്ഥാനത്തു നിന്ന് നീക്കം ചെയ്യാനും ഒമർ സർഫ്രാസ് ചീമയെ പഞ്ചാബ് ഗവർണറായി നിയമിക്കാനും പ്രസിഡന്റ് ആരിഫ് അൽവി അനുമതി നൽകി.

ഇമ്രാൻ ഖാനെതിരായ അവിശ്വാസ വോട്ടെടുപ്പ് സ്പീക്കർ അനുവദിച്ചിരുന്നില്ല. വോട്ടെടുപ്പ് ആവശ്യമില്ലെന്നാണ് സഭ നിയന്ത്രിച്ച ഡെപ്യൂട്ടി സ്പീക്കർ ഖാസിം ഖാൻ സൂരി അറിയിച്ചത്. വിദേശ ഗൂഢാലോചനയിൽ പാകിസ്താൻ അസംബ്ലി പങ്കാളിയാകാനില്ലെന്ന് വ്യക്തമാക്കിയാണ് സ്പീക്കർ വോട്ടെടുപ്പ് ആവശ്യം തള്ളിയത്. തുടർന്ന് സഭ പിരിയുകയും ചെയ്തിരുന്നു.

കൊളംബോ: ശ്രീലങ്കൻ മന്ത്രിസഭയിലെ എല്ലാ മന്ത്രിമാരും രാജിവച്ചു. പ്രധാനമന്ത്രി മഹീന്ദ രാജപക്സെ ഒഴികെയുള്ള മുഴുവൻ മന്ത്രിമാരുമാണ് രാജിവച്ചത്. സാമ്പത്തിക പ്രതിസന്ധിയെ തുടർന്ന് ശ്രീലങ്കയിൽ ജനരോക്ഷം ശക്തമാകുന്നതിനിടെയാണ് നടപടി.

അതേസമയം, മഹീന്ദ രാജപക്സെ പ്രധാനമന്ത്രിയായി തുടരുമെന്നാണ് റിപ്പോർട്ടുകൾ. മഹീന്ദ രാജപക്സെ രാജിവച്ചുവെന്ന തരത്തിലുള്ള വാർത്തകൾ കഴിഞ്ഞ ദിവസം പ്രചരിച്ചിരുന്നെങ്കിലും ഇത് നിഷേധിച്ച് കൊണ്ട് പ്രധാനമന്ത്രിയുടെ ഓഫീസ് രംഗത്തെത്തിയിരുന്നു.

അർദ്ധരാത്രിയോടെ പ്രത്യേക ക്യാബിനറ്റ് യോഗം ചേരുകയും, മന്ത്രിമാരെല്ലാം രാജിവയ്ക്കുകയും ചെയ്തുവെന്നാണ് വിവരം. പ്രധാനമന്ത്രിയുടെ മകൻ നമൽ രജപക്‌സെ ഉൾപ്പെടെ മന്ത്രിസഭയിലെ 26 പേർ രാജി സമർപ്പിച്ചു. അതേസമയം, ശ്രീലങ്കയിൽ ജനകീയ പ്രക്ഷോഭങ്ങൾക്ക് തടയിടുന്നതിന്റെ ഭാഗമായി രാജ്യവ്യാപക കർഫ്യൂ പ്രഖ്യാപിച്ചിട്ടുണ്ട്.

ഇസ്ലാമാബാദ്: പാക് അസംബ്ലിയിൽ അരങ്ങേറിയത് നാടകീയ നീക്കങ്ങൾ. ഇമ്രാൻ ഖാനെതിരായ അവിശ്വാസ വോട്ടെടുപ്പ് അനുവദിച്ചില്ല. വോട്ടെടുപ്പ് ആവശ്യമില്ലെന്നാണ് സഭ നിയന്ത്രിച്ച ഡെപ്യൂട്ടി സ്പീക്കർ ഖാസിം ഖാൻ സൂരി അറിയിച്ചത്. വിദേശ ഗൂഢാലോചനയിൽ പാകിസ്താൻ അസംബ്ലി പങ്കാളിയാകാനില്ലെന്ന് വ്യക്തമാക്കിയാണ് സ്പീക്കർ വോട്ടെടുപ്പ് ആവശ്യം തള്ളിയത്. തുടർന്ന് സഭ പിരിയുകയും ചെയ്തു.

അതേസമയം, ദേശീയ അസംബ്ലി പിരിച്ചുവിടാൻ പ്രസിഡന്റിനോട് ശുപാർശ ചെയ്തതായി ഇമ്രാൻ ഖാൻ പ്രതികരിച്ചു. രാജ്യം തിരഞ്ഞെടുപ്പിന് തയ്യാറാകണമെന്നും അദ്ദേഹം പറഞ്ഞു. തിരഞ്ഞെടുപ്പ് വരെ രാജ്യത്ത് കാവൽ പ്രധാനമന്ത്രിയായി തുടരുമെന്നും ഇമ്രാൻ ഖാൻ അറിയിച്ചു.

എന്നാൽ ദേശീയ അസംബ്ലി പിരിച്ചുവിടാനുള്ള ഇമ്രാന്റെ നീക്കം അംഗീകരിക്കില്ലെന്നാണ് പ്രതിപക്ഷം പറയുന്നത്. തീരുമാനത്തിനെതിരെ സുപ്രീം കോടതിയെ സമീപിക്കുമെന്നും പ്രതിപക്ഷം കൂട്ടിച്ചേർത്തു.

ഇസ്ലാമാബാദ്: പ്രതിസന്ധി ഘട്ടത്തെ എങ്ങനെ നേരിടണമെന്ന് തനിക്ക് വ്യക്തമായ ധാരണയുണ്ടെന്ന് പാക് പ്രധാനമന്ത്രി ഇമ്രാൻ ഖാൻ. തന്റെ ആളുകൾ കരുതലോടെയും ജീവനോടെയും ഇരിക്കാനാണ് താൻ ആഗ്രഹിക്കുന്നതെന്നും മറ്റേതെങ്കിലും രാജ്യത്താണ് ഇതെല്ലാം സംഭവിക്കുന്നതെങ്കിലും ജനങ്ങൾ ഇതിനോടകം തെരുവിലിറങ്ങുമായിരുന്നുവെന്നും അദ്ദേഹം പറഞ്ഞു.

നിങ്ങളെല്ലാവരും ഇന്നും നാളെയും തെരുവിൽ ഇറങ്ങണമെന്ന് ഞാൻ ആവശ്യപ്പെടുകയാണ്. നിങ്ങളുടെ മനഃസാക്ഷിക്കു വേണ്ടിയും രാജ്യത്തിന്റെ താൽപര്യത്തിനു വേണ്ടിയും ഇത് ചെയ്യണം. ഒരു പാർട്ടിയും അങ്ങനെ ചെയ്യാൻ നിങ്ങളെ നിർബന്ധിക്കില്ല. നിങ്ങളുടെ കുഞ്ഞുങ്ങളുടെ ഭാവിക്കു വേണ്ടി നിങ്ങൾ തെരുവിലിറങ്ങണമെന്നും അദ്ദേഹം വ്യക്തമാക്കി.

ഇപ്പോഴുണ്ടായ എല്ലാ പ്രതിസന്ധികൾക്കും പിന്നിൽ വിദേശ ശക്തികളുടെ ഗൂഢാലോചനയാണെന്നും അദ്ദേഹം ആരോപിച്ചു. ഞായറാഴ്ച്ച പാകിസ്താനിൽ വിശ്വാസ് വോട്ടെടുപ്പ് നടക്കാനിരിക്കെയാണ് ഇമ്രാൻ ഖാന്റെ പ്രതികരണം.