രാത്രിയിൽ ലൈറ്റിട്ട് ഉറങ്ങുന്ന ശീലമുള്ളവരാണോ; പഠനം പറയുന്നത് ഇങ്ങനെ….
രാത്രിയിൽ ലൈറ്റിട്ട് ഉറങ്ങുന്ന ശീലമുള്ളവരാണോ നിങ്ങൾ. എങ്കിൽ ആ ശീലം അത്ര നല്ലതല്ലെന്നാണ് പഠനങ്ങൾ വ്യക്തമാക്കുന്നത്. രാത്രി ഉറക്കത്തിനിടയിൽ മുറിയിൽ മിതമായ തോതിലുള്ള വെളിച്ചമാണെങ്കിൽ പോലും അത് ശരീരത്തെ ദോഷകരമായി ബാധിക്കുമെന്നാണ് ഗവേഷകർ വ്യക്തമാക്കുന്നത്. യുഎസിലെ നോർത്ത് വെസ്റ്റേൺ യൂണിവേഴ്സിറ്റിയിലെ ഗവേഷകർ നടത്തിയ പഠനത്തിലാണ് ഇക്കാര്യം വ്യക്തമാക്കിയിട്ടുള്ളത്. പിഎൻഎഎസ് ജേണലിലാണ് പഠനം പ്രസിദ്ധീകരിച്ചത്.
്ഉറക്കത്തിൽ മുറിയിലെ മിതമായ വെളിച്ചം സമ്പർക്കം പുലർത്തുന്നത് ഗ്ലൂക്കോസ്, ഹൃദയ സംബന്ധമായ നിയന്ത്രണങ്ങൾ എന്നിവയെ ബാധിക്കുമെന്നും ഇത് ഹൃദ്രോഗം, പ്രമേഹം, മെറ്റബോളിക് സിൻഡ്രോം എന്നിവയ്ക്കുള്ള അപകട ഘടകങ്ങളാണെന്നും യൂണിവേഴ്സിറ്റിയിലെ ഫെയിൻബർഗ് സ്കൂൾ ഓഫ് മെഡിസിനിലെ സ്ലീപ്പ് മെഡിസിൻ മേധാവി ഡോ. ഫിലിസ് സീ വ്യക്തമാക്കി.
രാത്രിയിൽ ഉറക്കത്തിൽ പ്രകാശം കൊള്ളുന്നത് ഒഴിവാക്കുകയോ കുറയ്ക്കുകയോ ചെയ്യേണ്ടതാണെന്നും ഗവേഷകർ മുന്നറിയിപ്പ് നൽകുന്നു. മിതമായ പ്രകാശം ശരീരത്തെ ഉയർന്ന ജാഗ്രതാവസ്ഥയിലേക്ക് നയിച്ചതായി അന്വേഷകർ കണ്ടെത്തി. ഈ അവസ്ഥയിൽ, ഹൃദയമിടിപ്പ് വർദ്ധിക്കുന്നതിനൊപ്പം ഹൃദയം ചുരുങ്ങുന്നതിന്റെ ശക്തിയും ഓക്സിജൻ നിറഞ്ഞ രക്തപ്രവാഹത്തിനായി നിങ്ങളുടെ രക്തക്കുഴലുകളിലേക്ക് എത്ര വേഗത്തിൽ രക്തം എത്തിക്കുന്നു എന്നതിന്റെ നിരക്കും വർദ്ധിക്കുന്നുവെന്നും പഠനത്തിൽ പറയുന്നുണ്ട്.