General (Page 1,495)

തിരുവനന്തപുരം: ഉന്നത വിദ്യാഭ്യാസ വകുപ്പ് മന്ത്രി ആർ ബിന്ദുവിന്റെ പേരിൽ വ്യാജ ഫേസ്ബുക്ക് പ്രൊഫൈൽ. പരീക്ഷകൾ മാറ്റിവെച്ചതായുള്ള പ്രചാരണമാണ് വ്യാജ ഫേസ്ബുക്ക് പ്രൊഫൈൽ വഴി നടത്തുന്നത്. ജൂലൈ 7 മുതൽ നടത്താനിരുന്ന പോളിടെക്‌നിക് പരീക്ഷ മാറ്റിവെച്ചെന്നാണ് പ്രചാരണം. സംഭവവുമായി ബന്ധപ്പെട്ട് മന്ത്രി പോലീസിൽ പരാതി നൽകി.

തന്റെ ഔദ്യോഗിക ഫേസ്ബുക്ക് പേജ് എന്ന് തോന്നുന്ന വിധത്തിൽ വ്യാജ പേജ് ഉണ്ടാക്കി ജൂലായ് 7-ാം തീയതി തുടങ്ങാനിരുന്ന പോളിടെക്‌നിക് പരീക്ഷകൾ മാറ്റിവച്ചു എന്ന് പ്രചാരണം നടത്തുന്നതായി ശ്രദ്ധയിൽപ്പെട്ടിട്ടുണ്ടെന്നും ഇത് വസ്തുതാപരമായ വാർത്തയായി ആരും കരുതേണ്ടതില്ലെന്നും മന്ത്രി വ്യക്തമാക്കി. നിലവിലുള്ള സൈബർ നിയമങ്ങളനുസരിച്ച് ശിക്ഷാർഹമായ കുറ്റകൃത്യമാണ് ചെയ്തിരിക്കുന്നതെന്ന് ഇത് ചെയ്തവർ ഓർക്കണം. തികഞ്ഞ ഉത്തരവാദിത്തത്തോടെ മാത്രം ഉപയോഗിക്കേണ്ട സാമൂഹ്യ മാദ്ധ്യമങ്ങളെ ഇങ്ങനെ ദുരുപയോഗം ചെയ്യുന്നതും, മറ്റുള്ളവരെ തെറ്റിദ്ധരിപ്പിക്കുന്ന വിധത്തിൽ വ്യാജ വാർത്തകൾ പ്രചരിപ്പിക്കുവാനുള്ള ഇടമാക്കുന്നതും ഒഴിവാക്കാൻ ശ്രദ്ധിക്കണമെന്ന് മന്ത്രി അറിയിച്ചു.

ഈ സമയത്ത് നന്നായി പഠിച്ച് സർക്കാർ നിർദ്ദേശിക്കുന്ന എല്ലാ മുൻകരുതലും സ്വീകരിച്ച് പരീക്ഷ എഴുതുന്നതിനും, ഭാവി സുരക്ഷിതമാക്കുന്നതിനും വിദ്യാർത്ഥി സുഹൃത്തുക്കൾ ശ്രദ്ധിക്കണമെന്നും ബിന്ദു ആവശ്യപ്പെട്ടു.

തിരുവനന്തപുരം: തിരുവനന്തപുരം മൃഗശാലയിൽ രാജവെമ്പാലയുടെ കടിയേറ്റ് ജീവനക്കാരന് ദാരുണാന്ത്യം. ഹർഷാദ് എന്ന ജീവനക്കാരനാണ് മരിച്ചത്. പാമ്പിന് തീറ്റകൊടുക്കാൻ കയറിയ ഹർഷാദിന് കൂട് വൃത്തിയാക്കുന്നതിനിടെയായിരുന്നു രാജവെമ്പാലയുടെ കടിയേറ്റത്. ഇന്ന് ഉച്ചയോടെയായിരുന്നു സംഭവം.

മൃഗാശാലയിൽ പാമ്പുകളെ പരിചരിക്കുന്ന ജോലിയായിരുന്നു കാട്ടക്കട സ്വദേശിയായ ഹർഷാദ് ചെയ്തു വന്നിരുന്നത്. പാമ്പ് കടിയേറ്റ് അവശനിലയിലായ ഹർഷാദ് പാർക്കിനുള്ളിൽ തന്നെ കുഴഞ്ഞു വീണു. തുടർന്ന് അദ്ദേഹം ഇരുമ്പ് വാതിലിൽ അടിച്ച് ശബ്ദമുണ്ടാക്കി. ഈ ശബ്ദം കേട്ട് മറ്റ് ജീവനക്കാർ എത്തി അദ്ദേഹത്തെ തിരുവനന്തപുരം മെഡിക്കൽ കോളേജ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

മൂന്ന് രാജവെമ്പാലകളാണ് തിരുവനന്തപുരം മൃഗശാലയിൽ ഉള്ളത്. മൃഗശാലയിൽ വന്യ ജീവികൾക്ക് തീറ്റ കൊടുക്കാൻ പോകുമ്പോൾ രണ്ട് പേർ ഉണ്ടാകാറാണ് പതിവ്. എന്നാൽ കോവിഡ് വൈറസ് വ്യാപനത്തിന്റെ പശ്ചാത്തലത്തിൽ 50 ശതമാനത്തിൽ താഴെ ജീവനക്കാർ മാത്രമേ മൃഗശാലയിൽ ഉണ്ടായിരുന്നുള്ളൂ. അതുകൊണ്ടാണ് ഒറ്റയ്ക്ക് പാമ്പിന് തീറ്റ കൊടുക്കാനായി പോയത്. മ്യൂസിയം പ്രോട്ടോക്കോൾ അനുസരിച്ച് മൃഗങ്ങളെ പരിചരിക്കാൻ ജീവനക്കാർ ഒറ്റയ്ക്ക് കൂട്ടിൽ കയറാൻ പാടില്ല. കുറഞ്ഞത് രണ്ട് പേർ ഉണ്ടാകണം. ഒരാൾ തീറ്റ കൊടുക്കുമ്പോൾ രണ്ടാമത്തെ ആൾ പരിസരം സുരക്ഷിതമാണോയെന്ന് പരിശോധിക്കണം.

തൃശൂർ: സംസ്ഥാനത്തെ സെൻട്രൽ ജയിലുകൾ നിയന്ത്രിക്കുന്നത് ക്രിമിനലുകളാണെന്ന വിമർശനം ശക്തമാകുന്നു. ജയിലിൽ നിന്നും മൊബൈൽ ഫോണുകളും മറ്റ് ഇലക്ട്രോണിക് ഉപകരണങ്ങളും വ്യാപകമായി പിടിച്ചെടുത്തിട്ടും കാര്യമായ അന്വേഷണം ഉണ്ടാകാത്തതാണ് ഇത്തരം വിമർശനങ്ങൾക്ക് കാരണം. 2019 – 2020 കാലഘട്ടത്തിൽ മാത്രം മൂന്ന് ജയിലുകളിൽ ജയിൽ ഉദ്യോഗസ്ഥരും പോലീസ് അധികൃതരും ചേർന്ന് നടത്തിയ റെയ്ഡിൽ നൂറോളം മൊബൈലുകളാണ് പിടിച്ചെടുത്തത്. ജയിലിൽ യഥേഷ്ടം ആരെയും ഫോൺ ചെയ്യാൻ സൗകര്യമുള്ളവരാണ് ഈ ഫോണുകൾ ഉപയോഗിച്ചിരുന്നത്.

മൊബൈൽ പിടിക്കുന്നവർക്ക് 5000 രൂപ പാരിതോഷികം ഉൾപ്പെടെ അന്ന് പ്രഖ്യാപിച്ചിരുന്നെങ്കിലും പിടികൂടിയ ഫോണുകൾ ഉപയോഗിച്ച് ഇവരുമായി ബന്ധപ്പെട്ടവർ ആരാണെന്ന് കണ്ടെത്താനുള്ള തുടർ നടപടികളൊന്നും ഉണ്ടായിരുന്നില്ല. ഉന്നത രാഷ്ട്രീയ നേതാക്കൾ മുതൽ ഭരണസിരാ കേന്ദ്രം നിയന്ത്രിച്ചിരുന്നവർ വരെ ജയിലിൽ ഫോൺ ഉപയോഗിച്ചവരുടെ പട്ടികയിൽ ഉണ്ടെന്നതാണ് അന്വേഷണം നിലയ്ക്കാൻ കാരണമായത്.

സിം ഇല്ലാത്ത മൊബൈൽ ഫോൺ ആണെങ്കിലും ഐ.എം.ഇ നമ്പർ ഉപയോഗിച്ച് ടവർ ലോക്കേറ്റ് ചെയ്ത് കോൾലിസ്റ്റ് പരിശോധിക്കാം എന്ന സംവിധാനമിരിക്കെയാണ് യാതൊരുവിധ അന്വേഷണവും നടക്കാത്തത്. ജയിലിലെ ഫോൺ ഉപയോഗത്തെ കുറിച്ച് ഇന്റലിജന്റ്സ് പോലും റിപ്പോർട്ട് ചെയ്തിരുന്നു.

ഓരോ സെൻട്രൽ ജയിലുകളിലും മതിൽക്കെട്ടിനുള്ളിൽ ഇരുപത് ഏക്കർ വരെ വിസ്തൃതിയുണ്ട്. ഇവിടെ പരിശോധന നടത്താൻ ഡോഗ് സ്‌ക്വാഡുണ്ടെങ്കിലും പരിശോധനയ്ക്ക് അനുമതി നൽകാറില്ല. മതവികാരം വ്രണപ്പെടും എന്ന കാരണം ചൂണ്ടിക്കാട്ടിയാണ് ഡോഗ് സ്‌ക്വാഡ് പരിശോധനയ്ക്ക് അനുമതി നൽകാത്തത്. തടവുപുള്ളികളുടെ പക്കൽ നിന്നും ഫോൺ പിടിച്ചാൽ മൂന്ന് മാസത്തെ തടവാണ് ശിക്ഷയായി ലഭിക്കുന്നത്. എന്നാൽ ജീവപര്യന്തം തടവിൽ കഴിയുന്നവർക്ക് മൂന്ന് മാസം കൂടി തടവ് ശിക്ഷ ലഭിച്ചാലും അവർക്ക് അതൊരു പ്രശ്‌നമല്ലാതാവുകയാണ്. അതിനാൽ തന്നെ വീണ്ടും ജയിലുകളിൽ തടവുപുള്ളികൾ ഫോൺ ഉപയോഗിക്കുന്നത് ആവർത്തിക്കുകയാണ്. വിഷയത്തിൽ ഋഷിരാജ് സിംഗ് മുതൽ യതീഷ് ചന്ദ്ര വരെ ഇടപെടൽ നടത്തിയെങ്കിലും കാര്യമായ ഫലമൊന്നും ഉണ്ടായിട്ടില്ല

തിരുവനന്തപുരം: സംസ്ഥാന പോലീസ് മേധാവിയായി അനിൽ കാന്ത് ചുമതലയേറ്റെടുക്കുമ്പോൾ നിരവധി വെല്ലുവിളികളാണ് അദ്ദേഹത്തെ കാത്തിരിക്കുന്നത്. പടിയിറങ്ങുന്ന നേരത്ത് ലോക്‌നാഥ് ബെഹ്‌റ വെളിപ്പെടുത്തിയ കാര്യങ്ങൾക്കെല്ലാം മറുപടി നൽകുക എന്ന വലിയ ഉത്തരവാദിത്വമാണ് അദ്ദേഹത്തിനുള്ളത്. ഐഎസ് സാന്നിദ്ധ്യം, സ്ലീപ്പിംഗ് സെല്ലുകൾ, ലൗ ജിഹാദ് തുടങ്ങിയ വിഷയങ്ങളെ സംബന്ധിച്ചെല്ലാം അനിൽ കാന്ത് മറുപടി നൽകേണ്ടി വരും.

നീണ്ട 36 വർഷക്കാലത്തെ ഔദ്യോഗിക ജീവിതം അവസാനിപ്പിച്ചാണ് ലോക്‌നാഥ് ബെഹ്‌റ പടിയിറങ്ങിയത്. കേരളം ഭീകര സംഘടനകളുടെ റിക്രൂട്ടിംഗ് ലക്ഷ്യമാകുന്നുവെന്നും മലയാളികളുടെ ഭീകരബന്ധം ആശങ്ക ഉണ്ടാക്കുന്നുവെന്നും ഉൾപ്പെടെ നിർണായക വെളിപ്പെടുത്തലുകളാണ് ലോക്‌നാഥ് ബെഹ്‌റ നടത്തിയിരിക്കുന്നത്. വിദ്യാഭ്യാസമുള്ളവരെപ്പോലും വർഗീയ വത്കരിക്കുകയാണ് ഭീകര സംഘടനകളുടെ ലക്ഷ്യമെന്നും അദ്ദേഹം പറഞ്ഞിരുന്നു. സംസ്ഥാനത്ത് സ്ലീപ്പർ സെല്ലുകളില്ലെന്ന് പറയാനാകില്ലെന്നും അദ്ദേഹം അഭിപ്രായപ്പെട്ടിരുന്നു.

അതേസമയം ലോക്‌നാഥ് ബെഹ്‌റയുടെ പരാമർശങ്ങൾക്കെതിരെ പോപ്പുലർ ഫ്രണ്ട് ഓഫ് ഇന്ത്യ രംഗത്തെത്തിയിരുന്നു. കേരളം ഭീകരസംഘടനകളുടെ റിക്രൂട്ടിംഗ് ലക്ഷ്യമായി മാറുന്നുവെന്ന പ്രസ്താവനയിൽ ലോക്‌നാഥ് ബെഹ്‌റ വ്യക്തത വരുത്തണമെന്നായിരുന്നു പോപ്പുലർ ഫ്രണ്ട് ഓഫ് ഇന്ത്യയുടെ ആവശ്യം. വിദ്യാസമ്പന്നർ ഭീകരവാദികളുടെ വലയിലാണെന്നാണ് ഡിജിപി പറയുന്നത്. അങ്ങനെയൊരു സാഹചര്യമുണ്ടെങ്കിൽ അന്വേഷിച്ച് കണ്ടെത്തി വിശദാംശങ്ങൾ വ്യക്തമാക്കേണ്ട ഉത്തരവാദിത്വം ഡിജിപിയ്ക്കുണ്ട്. അത്തരക്കാരെ പൊതുസമൂഹത്തിന് മുന്നിൽ തുറന്നുകാട്ടേണ്ടത് പോലിസ് മേധാവിയാണ്. എന്നാൽ ഇതൊന്നും പറയാതെ ഒരു സംസ്ഥാനത്തെയാകെ ഭീതിയിലാഴ്ത്തുന്ന പരാമർശം നടത്തിയല്ല സംസ്ഥാനത്തിന്റെ പോലിസ് മേധാവി പടിയിറങ്ങേണ്ടതെന്നായിരുന്നു പോപ്പുലർ ഫ്രണ്ട് ഓഫ് ഇന്ത്യ വ്യക്തമാക്കിയിരുന്നത്.

തിരുവനന്തപുരം: കെ.എസ്.ആർ.ടി.സി ജീവനക്കാരുടെ ശമ്പളവും സർവീസ് സംബന്ധമായ വിവരങ്ങളും ഇനി ഓൺലൈനായി ലഭ്യമാകും. ജി-സ്പാർക്ക് സേവനം വഴിയാണ് വിവരങ്ങൾ ലഭ്യമാകുക. സർക്കാർ ജീവനക്കാർക്ക് ലഭ്യമാകുന്നതു പോലെ തന്നെ ഇനി കെ.എസ്.ആർ.ടി.സി ജീവനക്കാർക്കും അവരുടെ ലീവ്, ശമ്പളം, പി.എഫ് തുടങ്ങിയ എല്ലാ വിവരങ്ങളും വിരൽതുമ്പിൽ ലഭ്യമാകുന്ന സേവനമാണ് ജി സ്പാർക്ക്.

ജൂലൈ 2 ന് ഗതാഗത മന്ത്രി ആന്റണി രാജുവാണ് ജി- സ്പാർക്കിന്റെ ഉദ്ഘാടനം നിർവ്വഹിക്കുന്നത്. ചീഫ് ഓഫീസ് കോൺഫറൻസ് ഹാളിൽ വെച്ചാണ് ഉദ്ഘാടനം. ഓരോ ജീവനക്കാരനും സ്വന്തമായ യൂസർ ഐഡി ഉപയോഗിച്ച് പി.എഫ് സബ്‌സ്‌ക്രിപ്ഷൻ വിവരങ്ങൾ, ശമ്പള ബിൽ എന്നിവ കാണാനും കോപ്പി എടുക്കാനും ജി-സ്പാർക്കിലൂടെ കഴിയും. കെ.എസ്.ആർ.ടി.സിയെ സംബന്ധിച്ചിടത്തോളം ജീവനക്കാരുടെ മുഴുവൻ വിവരങ്ങളും മാനേജ്‌മെന്റ് തല നയരൂപീകരണത്തിന് എളുപ്പത്തിൽ ലഭ്യമാകുകയും ചെയ്യും. ജി സ്പാർക്ക് നടപ്പിലാക്കുന്ന കേരളത്തിലെ ആദ്യത്തെ പൊതുമേഖല സ്ഥാപനമാണ് കെഎസ്ആർടിസി. ജി-സ്പാർക്ക് ഏറ്റവും വലിയ പൊതു മേഖല സ്ഥാപനവും കെഎസ്ആർടിസി തന്നെയാണ്.

അതേസമയം കെഎസ്ആർടിസിയിൽ ടിക്കറ്റേതര വരുമാനം വർദ്ധിപ്പിക്കുന്നതിന് വേണ്ടി കൊമേഷ്യൽ വിഭാഗവും രൂപീകരിക്കും. ലോജിസ്റ്റിസ് & കൊറിയർ, അഡ്വർടൈസ്‌മെൻറ്, ബസ് ടെർമിനൽ കം ഷോപ്പിംഗ് കോപ്ലക്‌സുകളിലെ സ്ഥാപനങ്ങൾ വാടകയ്ക്ക് നൽകൽ ഉൾപ്പെടെയുള്ളവ വിപുലമാക്കുന്നതിന് വേണ്ടിയാണ് കൊമേഷ്യൽ വിഭാഗം ആരംഭിക്കുന്നത്.

ഇതിനായുള്ള അഞ്ചു ദിവസത്തെ മാർക്കറ്റിങ് ഓറിയന്റേഷൻ ട്രെയിനിങ് പ്രോഗ്രാമിന് എസ്. സി. എം. എസ് സ്‌കൂൾ ഓഫ് ടെക്നോളജി ആൻഡ് മാനേജ്മെന്റിൽ തുടക്കമായി. ലോജിസ്റ്റിക്‌സ് ആൻഡ് കൊറിയർ സർവീസ് ഉൾപ്പെടെ വിവിധ ഡിപ്പോകളിലെ വരുമാന വർദ്ധനവുണ്ടാക്കുന്ന മേഖലകളുടെ സാധ്യതകൾ കണ്ടെത്തുന്നതിനും പ്രാവർത്തികമാക്കുന്നതിനുമാണ് പരിശീലനം. കെ. എസ്. ആർ. ടി. സിയിലെ വിവിധ ഡിപ്പാർട്‌മെന്റുകളിലെ തിരഞ്ഞെടുക്കപ്പെട്ട ഉദ്യോഗസ്ഥർക്കാണ് പരിശീലനം നൽകുക.