General (Page 1,458)

ന്യൂഡൽഹി: കോവിഡ് വാക്‌സിനുകൾ കൂട്ടികലർത്തുന്നത് സംബന്ധിച്ച് നിർണായക വെളിപ്പെടുത്തലുകളുമായി ഐസിഎംആർ. കൊവാക്‌സിനും, കൊവിഷീൽഡും മിശ്രിതമാക്കുന്നത് സുരക്ഷിതമാണെന്നും പ്രതിരോധശേഷി വർധിപ്പിക്കുമെന്നും ഐസിഎംആർ അറിയിച്ചു.

ഈ വാക്‌സിനുകൾ വെവ്വേറ എടുക്കുന്നതിലും ഫലപ്രദമാണ് മിശ്രിത രൂപമെന്നാണ് പുതിയ പഠനത്തിൽ ഐസിഎംആർ വിശദമാക്കുന്നത്. മിശ്രിത രൂപത്തിലുള്ള വാക്‌സിൻ സ്വീകരിച്ചവരുടെ പ്രതിരോധശേഷി മറ്റുള്ളവരേക്കാൾ കൂടുതലാണെന്ന് പഠനത്തിൽ തെളിഞ്ഞു. ഈ സാഹചര്യത്തിലാണ് വാക്‌സിൻ കോക്‌ടെയിൽ സുരക്ഷിതമാണെന്ന വിലയിരുത്തലിലേക്ക് ഐസിഎംആർ എത്തിയത്. മൂന്നാം തരംഗത്തിനടക്കം ഇടയാക്കിയേക്കാവുന്ന ആൽഫ, ബീറ്റ, ഡെൽറ്റ വകഭേദങ്ങളെ ചെറുക്കാൻ മിശ്രിത രൂപത്തിന് കഴിയുമെന്നും ഗവേഷകർ പഠനത്തിൽ ചൂണ്ടിക്കാട്ടുന്നു. കഴിഞ്ഞ ജൂലെയിൽ വാക്‌സിനുകൾ കൂട്ടികലർത്തിയുള്ള പരീക്ഷണത്തിന് ഡ്രഗ്‌സ് കൺട്രോളർ അനുമതി നൽകിയിരുന്നു. വെല്ലൂർ മെഡിക്കൽ കോളേജിലാണ് കൊവിഷീൽഡും കൊവാക്‌സിനും കൂട്ടികലർത്തിയുള്ള മരുന്ന് പരീക്ഷണം നടക്കുന്നത്.

രാജ്യത്തെ വാക്‌സിനേഷൻ ഡ്രൈവിന്റെ ആദ്യഘട്ടത്തിൽ ആദ്യ ഡോസ് കൊവാക്‌സിനും രണ്ടാം ഡോസ് കൊവിഷീൽഡും അബദ്ധത്തിൽ നൽകിയ സംഭവങ്ങൾ റിപ്പോർട്ട് ചെയ്തിരുന്നു. തുടർന്നാണ് വ്യത്യസ്ത വാക്‌സിനുകൾ നൽകുന്നത് ഫലപ്രദം ആണോയെന്നത് സംബന്ധിച്ച പഠനങ്ങൾ നടത്താൻ ഐസിഎംആർ തീരുമാനിച്ചത്. വിദേശ രാജ്യങ്ങളിൽ സമാന രീതിയിലുള്ള പരീക്ഷണങ്ങൾ വിജയം കണ്ടതിനെ തുടർന്നാണ് ഇന്ത്യയിൽ വാക്‌സിൻ കൂട്ടികലർത്തിയുള്ള പരീക്ഷണത്തിന് ഡ്രഗ്‌സ് കൺട്രോളർ അനുമതി നൽകിയത്. പരീക്ഷണം വിജയകരമെങ്കിൽ ആദ്യ ഡോസായി മിശ്രിത രൂപം നൽകാനും രണ്ടാം ഡോസായി മിശ്രിതത്തിലെ ഏതെങ്കിലും ഒരു വാക്‌സിൻ നൽകാനും പദ്ധതിയുണ്ട്.

ന്യൂഡൽഹി: പരാതി പരിഹാരത്തിനായി പുതിയ സംവിധാനം ആവിഷ്‌ക്കരിച്ച് ഇന്ത്യൻ റെയിൽവേ. വൺ റെയിൽ വൺ എന്ന ഹെൽപ്പ്ലൈൻ പദ്ധതിയാണ് റെയിൽവേ ആവിഷ്‌ക്കരിച്ചിരിക്കുന്നത്. പരാതി പരിഹാരമുൾപ്പെടെയുള്ള വിവിധ ആവശ്യങ്ങൾക്കായി ഉപയോഗിച്ചിരുന്ന ഹെൽപ്പ്ലൈൻ നമ്പറുകൾ ലയിപ്പിച്ചാണ് പുതിയ സേവനം രപീകരിച്ചിരിക്കുന്നത്.

വിവിധ ആവശ്യങ്ങൾക്കായി ഇനി മുതൽ ഒറ്റ ഹെൽപ്പ്ലൈൻ നമ്പർ മാത്രമായിരിക്കും ഉണ്ടായിരിക്കുക. 139 എന്ന നമ്പറിലേക്കാണ് ഇനി റെയിൽവേയുടെ സേവനങ്ങൾക്കായി ബന്ധപ്പെടേണ്ടത്. 24 മണിക്കൂറും ലഭ്യമാകുന്ന ഈ ഹെൽപ്പ് ലൈന് നമ്പറിലേക്ക് എല്ലാ അന്വേഷണ ആവശ്യങ്ങൾക്കും ബന്ധപ്പെടാം.

ഉപഭോക്തൃ പരാതികൾ, അന്വേഷണം, നിർദേശം, സഹായം എന്നിവയ്ക്കായാണ് റെയിൽ മദദ് ഒരുക്കിയിരിക്കുന്നത്. 12 ഭാഷകളിൽ മദദിലൂടെ സേവനം ലഭ്യമാകും. പരാതികൾ വേഗത്തിൽ പരിഹരിക്കുന്നതിനായി യാത്രക്കാർക്ക് വെബ്, ആപ്പ്, എസ്എംഎസ്, സോഷ്യൽ മീഡിയ, ഹെൽപ്പ് ലൈൻ എന്നിവയും റെയിൽ മമദ് നൽകുന്നു. ഹെൽപ്പ്ലൈൻ മുഖേനേ ലഭിച്ച 99.93 ശതമാനം പരാതികളും പരിഹരിക്കാനായെന്നും പദ്ധതിക്ക് മികച്ച പ്രതികരണം ലഭിച്ചെന്നും കേന്ദ്ര റെയിൽവേ മന്ത്രി അശ്വിനി വൈഷ്ണവ് രാജ്യസഭയെ അറിയിച്ചു.

ന്യൂഡൽഹി: ഇസ്ലാമിക് സ്റ്റേറ്റ്‌സ് ഭീകര സംഘടനയിലേക്ക് കേരളത്തിൽ നിന്നും റിക്രൂട്ടിംഗ് സജീവം. ഇതുസംബന്ധിച്ച കൂടുതൾ തെളിവുകളാണ് ഇപ്പോൾ പുറത്തു വരുന്നത്. ദേശീയ അന്വേഷണ ഏജൻസി കഴിഞ്ഞദിവസം അറസ്റ്റ് ചെയ്തവർ കേരളത്തിൽ നിന്നടക്കം റിക്രൂട്ട്മെന്റിന് ശ്രമിച്ചിരുന്നതായുള്ള വിവരം കണ്ടെത്തിയിട്ടുണ്ട്. ടെലിഗ്രാം, ഇൻസ്റ്റഗ്രാം, ഹൂപ്പ് തുടങ്ങിയ സാമൂഹ്യ മാദ്ധ്യമങ്ങളിലൂടെയാണ് ഇസ്ലാമിക് സ്റ്റേറ്റ്‌സിലേക്കുള്ള റിക്രൂട്ട്‌മെന്റ് നടത്താൻ ശ്രമിച്ചിരുന്നത്.

പിടിയിലായവരുടെ ലക്ഷ്യം ഐസിസ് ഇന്ത്യൻ ഘടകം രൂപീകരിക്കുകയായിരുന്നുവെന്ന് എൻഐഎ കണ്ടെത്തിയിട്ടുണ്ട്. അറസ്റ്റിലായ നാലുപേരും കേരളത്തിൽ പലതവണ എത്തിയിരുന്നുവെന്നും എൻഐഎയുടെ അന്വേഷണത്തിൽ തെളിഞ്ഞു. കൂടുതൽ വിവരങ്ങൾ ശേഖരിക്കാൻ ഇവരെ ഡൽഹിയിലെ എൻ.ഐ.എ ആസ്ഥാനത്ത് എത്തിച്ചിരിക്കുകയാണ്. കേരളത്തിലും കർണാടകത്തിലും ഐസിസ് റിക്രൂട്ടിംഗ് സജീവമാണെന്ന് കഴിഞ്ഞ വർഷം ഐക്യരാഷ്ട്ര സംഘടനയും മുന്നറിയിപ്പ് നൽകിയിരുന്നു. ഇസ്ലാമിക് സ്‌റ്റേറ്റ്‌സിന്റെ റിക്രൂട്ടിംഗ് ഗ്രൗണ്ടായി കേരളം മാറിയെന്ന് മുൻ ഡി.ജി.പി ലോക് നാഥ് ബെഹറയും വെളിപ്പെടുത്തിയിരുന്നു.

ഡോക്ടർമാരും എൻജിനിയർമാരും ഉൾപ്പെടെ ഉന്നതവിദ്യാഭ്യാസമുള്ള യുവാക്കളെ വശത്താക്കാനാണ് ഇസ്ലാമിക് സ്റ്റേറ്റ്‌സ് ശ്രമിക്കുന്നതെന്നും കേന്ദ്ര ഇന്റലിജൻസുമായി ചേർന്ന് ഭീകരവിരുദ്ധ സ്‌ക്വാഡ് സ്ലീപ്പർ സെല്ലുകൾ കണ്ടെത്തുമെന്നും ബെഹറ പറഞ്ഞിരുന്നു. എന്നാൽ സംസ്ഥാനത്ത് സൈബർ പട്രോളിംഗ് പോലും കാര്യക്ഷമമല്ലാത്ത അവസ്ഥയാണിപ്പോൾ. സംസ്ഥാനത്ത് രഹസ്യാന്വേഷണ, ആഭ്യന്തര സുരക്ഷാ വിഭാഗങ്ങൾ നിർജ്ജീവമാണ്. മാവോയിസ്റ്റുകൾ, ബോഡോ തീവ്രവാദികൾ, അൽ ക്വ ഇദ, ഇന്ത്യൻ മുജാഹിദ്ദീൻ എന്നിവയ്ക്കെല്ലാം കേരള ബന്ധമുണ്ടെന്നാണ് റിപ്പോർട്ട്.

ന്യൂഡൽഹി: ടോക്കിയോ ഒളിമ്പിക്‌സിൽ സ്വർണ്ണ മെഡൽ നേടിയ നീരജ് ചോപ്രയ്ക്ക് അഭിനന്ദന പ്രവാഹവുമായി ഇന്ത്യ. രാഷ്ട്രപതി രാം നാഥ് കോവിന്ദും പ്രധാനമന്ത്രി നരേന്ദ്ര മോദിയും ഉൾപ്പെടെയുള്ള നിരവധി പ്രമുഖർ അദ്ദേഹത്തിന് അഭിനന്ദനം അറിയിച്ചു. ചരിത്രം കുറിക്കാനുള്ള തടസം നീരജ് ചോപ്ര നീക്കിയെന്ന് രാഷ്ട്രപതി വ്യക്തമാക്കി. ട്വിറ്ററിലൂടെയായിരുന്നു അദ്ദേഹം ഇക്കാര്യം അറിയിച്ചത്.

നീരജിന്റെ ജാവ്ലിനിലെ സ്വർണ്ണം ചരിത്രം കുറിച്ചു. തികച്ചും അപ്രതീക്ഷിതമായ വിജയമാണ് നീരജ് ചോപ്ര കൈവരിച്ചത്. നീരജിന്റെ നേട്ടം ചരിത്ര നിമിഷമാണ്. എല്ലാ യുവാക്കൾക്കും അദ്ദേഹത്തിന്റെ വിജയം പ്രചോദനമാണ്. ആദ്യ ഒളിമ്പിക്സിൽ തന്നെ സ്വർണ നേട്ടം കൈവരിച്ച നീരജിന് എല്ലാ ആശംസകളും നേരുന്നുന്നു. രാജ്യം വളരെ സന്തോഷത്തിലാണ്- രാഷ്ട്രപതി ട്വിറ്ററിൽ കുറിച്ചു.

നീരജിന് എല്ലാ ആശംസകളും നേരുന്നുവെന്നും തികച്ചും അസാധാരണ പ്രകടനമാണ് അദ്ദേഹം കാഴ്ച്ചവെച്ചത്. പ്രധാനമന്ത്രി പറഞ്ഞു. രാജ്യം എന്നും നീരജ് ചോപ്രയുടെ നേട്ടം ഓർക്കുമെന്നും അദ്ദേഹം പറഞ്ഞു. ടോക്കിയോ ഒളിമ്പിക്സിൽ ഇന്ത്യക്കായി സ്വർണ്ണം നേടിയ നീരജിന്റെ നേട്ടം ഇന്ത്യൻ സൈന്യത്തിനുള്ള ബഹുമതിയെന്ന് പ്രതിരോധ മന്ത്രി രാജ്നാഥ് സിംഗ് വ്യക്തമാക്കി. സ്വതന്ത്ര ഭാരത ചരിത്രത്തിൽ ആദ്യമായി ഒളിമ്പിക്സ് ട്രാക് ആൻഡ് ഫീൽഡ് വിഭാഗത്തിലെ സ്വർണ്ണം നേടിയ നീരജ് ചോപ്രയ്ക്ക് അഭിനന്ദനങ്ങൾ. ഒട്ടും പ്രതീക്ഷിക്കാത്ത വിഭാഗത്തിലാണ് നീരജ് കരുത്തുറ്റ പ്രകടനം നടത്തിയത്. ചരിത്രം കുറിച്ച നീരജിന്റെ പ്രകടനത്തിൽ ഏറെ അഭിമാനം കൊള്ളുന്നുവെന്ന് അദ്ദേഹം കൂട്ടിച്ചേർത്തു.

നീരജിന്റെ നേട്ടം രാജ്യത്തിനും ഇന്ത്യൻ സൈന്യത്തിനും ഏറെ അഭിമാനം നൽകുന്നുവെന്നും പ്രതിരോധ മന്ത്രി പറഞ്ഞു. ഒളിമ്പിക്സിലെ യുദ്ധമുഖത്ത് ഒരു യാഥാർത്ഥ സൈനിക നായിട്ടാണ് നീരജ് പോരാടിയതെന്നും അദ്ദേഹം ട്വീറ്റ് ചെയ്തു.