കോഴിക്കോട്: കോവിഡ് പ്രോട്ടോകോൾ ലംഘിച്ച് ബലിതർപ്പണം നടത്തിയ നൂറു പേർക്കെതിരെ കേസ്. കോഴിക്കോട് വരയ്ക്കൽ കടപ്പുറത്താണ് സംഭവം. ആൾക്കൂട്ടമുണ്ടാക്കി ബലിതർപ്പണം നടത്തിയ നൂറ് പേർക്കെതിരെയാണ് പോലീസ് കേസെടുത്തത്. ഇന്ന് രാവിലെയാണ് സംഭവം.
വരയ്ക്കൽ ദേവീക്ഷേത്രത്തിലെ പൂജാരികളടക്കം കണ്ടാലറിയാവുന്ന നൂറ് പേർക്കെതിരെയാണ് വെള്ളയിൽ പോലീസ് കേസെടുത്തത്. പകർച്ചവ്യാധി നിയമ പ്രകാരമാണ് നടപടി.
കോവിഡ് നിയന്ത്രണങ്ങളുടെ പശ്ചാത്തലത്തിൽ പൊതുഇടങ്ങളിൽ ബലിതർപ്പണം നടത്തരുതെന്നായിരുന്നു നിർദ്ദേശം. ആലുവ മണപ്പുറത്തും ഇത്തവണ ബലിതർപ്പണം ഉണ്ടായിരുന്നില്ല. കോവിഡ് മാനദണ്ഡം പാലിച്ച് വീടുകളിൽ ബലിതർപ്പണ ചടങ്ങുകൾ നടത്താനായിരുന്നു നിർദ്ദേശിച്ചിരുന്നത്. കഴിഞ്ഞ വർഷവും പിതൃതർപ്പണ ചടങ്ങുകൾ വീടുകളിലാണ് നടന്നത്.
തെക്കൻ കേരളത്തിൽ ഏറ്റവും കൂടുതൽ പേരെത്തുന്ന തിരുവല്ലം, മദ്ധ്യകേരളത്തിലെ തിരുനാവായ തുടങ്ങിയ ക്ഷേത്രങ്ങളിലും ഇത്തവണ ബലിതർപ്പണം ഉണ്ടായിരുന്നില്ല.