General (Page 1,447)

തിരുവനന്തപുരം: കേരളത്തിലെ കോവിഡ് സാഹചര്യങ്ങൾ വിലയിരുത്തി കേന്ദ്ര ആരോഗ്യമന്ത്രി മൻസുഖ് മാണ്ഡവ്യ. കേരളത്തിന് കൂടുതൽ വാക്സിൻ ലഭ്യമാക്കുമെന്ന് അദ്ദേഹം അറിയിച്ചു. മുഖ്യമന്ത്രി പിണറായി വിജയനുമായും ആരോഗ്യമന്ത്രി വീണാ ജോർജുമായും അദ്ദേഹം കൂടിക്കാഴ്ച്ച നടത്തി. സംസ്ഥാനത്തെ കോവിഡ് സ്ഥിതിഗതികളെ കുറിച്ച് യോഗത്തിൽ ചർച്ച ചെയ്തു.

കേരളത്തിന് ഘട്ടംഘട്ടമായി വാക്സിൻ ലഭ്യത ഉറപ്പാക്കുമെന്ന് കേന്ദ്ര ആരോഗ്യമന്ത്രി വ്യക്തമാക്കി. രാജ്യം വാക്സിൻ ഉത്പാദനം വർദ്ധിപ്പിച്ചതിനാൽ കേരളത്തിന് ആവശ്യമുള്ള വാക്സിൻ നൽകാനാകുമെന്ന് അദ്ദേഹം അറിയിച്ചു. ആഗസ്റ്റ്, സെപ്റ്റംബർ മാസങ്ങളിലേക്ക് കേരളത്തിന് ഒരു കോടി 11 ലക്ഷം വാക്സിനെങ്കിലും അനുവദിക്കണമെന്നായിരുന്നു കൂടിക്കാഴ്ച്ചയിൽ കേരളം ആവശ്യപ്പെട്ടിരുന്നത്.

സംസ്ഥാനത്തെ കോവിഡ് പ്രതിരോധ പ്രവർത്തനങ്ങളെ കൂടിക്കാഴ്ച്ചയിൽ കേന്ദ്ര ആരോഗ്യ മന്ത്രി അഭിനന്ദിച്ചു. അതേസമയം കോൺടാക്സ് ട്രേസിങ്ങിൽ കേരളം കൂടുതൽ ശ്രദ്ധ പുലർത്തണമെന്ന് ആരോഗ്യ സെക്രട്ടറി രാജേഷ് ഭൂഷൺ നിർദ്ദേശം നൽകി. വൈറസ് വ്യാപനത്തെ ചെറുക്കുന്ന നടപടികൾ ഊർജിതമാക്കണമെന്നും അദ്ദേഹം ആവശ്യപ്പെട്ടു. കേരളത്തിൽ ഒരാൾക്ക് കോവിഡ് വൈറസ് ബാധിച്ചാൽ സുഹൃത്തുക്കളിലേക്കും സഹപ്രവർത്തകരിലേക്കും വരെ രോഗം വ്യാപിക്കുന്നു. മറ്റു സംസ്ഥാനങ്ങളിൽ ബന്ധുക്കളിലേക്കു മാത്രമായി രോഗവ്യാപനം ചുരുക്കാൻ സാധിക്കുന്നുണ്ടെന്നും അദ്ദേഹം വിശദീകരിച്ചു. വാക്സിനേഷനിൽ കേരളം രാജ്യ ശരാശരിയേക്കാൾ മുന്നിലാണെന്നും കേരളത്തിലെ കോവിഡ് മരണ നിരക്ക് കുറവാണെന്നും അദ്ദേഹം കൂട്ടിച്ചേർത്തു. ഓണത്തിന് സംസ്ഥാനം കൂടുതൽ ജാഗ്രത പുലർത്തണമെന്ന് കേന്ദ്രം കേരളത്തിന് മുന്നറിയിപ്പ് നൽകി.

തിരുവനന്തപുരം: സമഗ്ര മാറ്റത്തിനൊരുങ്ങി സഹകരണ മേഖല. ക്രമക്കേടുകളും തട്ടിപ്പും തടയുന്നതിനായാണ് സഹകരണ മേഖലയിൽ അടിമുടി മാറ്റങ്ങൾ വരുത്തുന്നത്. കരുവന്നൂർ സർവീസ് സഹകരണ ബാങ്ക് തട്ടിപ്പ് പുറത്തുവന്നതിന് പിന്നാലെയാണ് നടപടി. കരുവന്നൂരിലെ ബാങ്ക് തട്ടിപ്പ് പുറത്തു വന്നത് സഹകരണ സംഘങ്ങളുടെ വിശ്വാസ്യതയെ പോലും ബാധിച്ചിരുന്നു.

സഹകരണ സംഘങ്ങളിൽ നടത്തുന്ന ഓഡിറ്റ് പരിശോധനയിൽ, ക്രിമിനൽ സ്വഭാവമുള്ള ക്രമക്കേടുകൾ ശ്രദ്ധയിൽപ്പെട്ടാൽ പോലീസിനെയോ മറ്റ് അന്വേഷണ ഏജൻസികളെയോ അറിയിച്ച് അടിയന്തരമായി കേസ് രജിസ്റ്റർ ചെയ്ടാനും അന്വേഷണം ആരംഭിക്കാനും സഹകരണ നിയമത്തിൽ ഭേദഗതി വരുത്താനാണ് തീരുമാനമെന്നാണ് റിപ്പോർട്ടുകൾ. സഹകരണ വിജിലൻസ് അന്വേഷിക്കുന്ന പരാതികളിലും കേസുകളിലും ക്രിമിനൽ നടപടി പ്രകാരം കോടതിയിൽ കേസ് ഫയൽ ചെയ്യുന്നതിന് ആവശ്യമായ ഭേദഗതിയും നിയമത്തിലുണ്ടാകും. കൃത്യമായ ഇടവേളകളിൽ സഹകരണ ബാങ്കുകളിൽ പരിസോധന നടത്തും. ഇടയ്ക്കിടെ മിന്നൽ പരിശോധനകളും ഉണ്ടാകും.

നടപടി ക്രമങ്ങളിലെ വീഴ്ചയും വകുപ്പ് ഉദ്യോഗസ്ഥരുടെ കൃത്യവിലോപവും ഗൗരവ കുറ്റമായി കണക്കാക്കുകയും അടിയന്തര നടപടി സ്വീകരിക്കുകയും ചെയ്യും. ഇൻസ്പെക്ഷൻ പെർഫോമ പരിഷ്‌കരിക്കുകയും സഹകരണ വകുപ്പിലെ സ്റ്റാഫ് പാറ്റേൺ പുതുക്കുകയും ചെയ്യും. നിലവിലുള്ള സ്റ്റാഫ് പാറ്റേൺ 1981 ലാണ് അംഗീകരിച്ചത്. ഇപ്പോഴത്തെ സഹകരണ സംഘങ്ങളുടെ എണ്ണത്തിനും ജോലിഭാരത്തിനും അനുസരിച്ചായിരിക്കും സ്റ്റാഫ് പാറ്റേൺ പുതുക്കുന്നത്. താലൂക്ക്, ജനറൽ വിഭാഗം ഓഫിസുകളിലെ യൂണിറ്റ് ഇൻസ്പെക്ടർമാരെ ഫീൽഡ് ജോലികളിൽ കാര്യക്ഷമമായി ഉപയോഗിക്കും.

ഈ ഘട്ടത്തിലുണ്ടാകുന്ന ഒഴിവ് നികത്താനായി കൂടുതൽ തസ്തികകൾ സൃഷ്ടിക്കും. താലൂക്ക് തല യൂണിറ്റുകൾ സംഘങ്ങളുടെ എണ്ണത്തിന് ആനുപാതികമായി പുനഃക്രമീകരിക്കുന്നതിനുള്ള നടപടി സ്വീകരിക്കും. സഹകരണ സംഘം ഓഫിസിലെ ഒരു ഉദ്യോഗസ്ഥനെ രണ്ടു വർഷത്തിൽ കൂടുതൽ ഒരു സ്ഥലത്തു നിയോഗിക്കില്ല. വകുപ്പ് ഓഡിറ്റർമാരെ മൂന്നു വർഷത്തിൽ കൂടുതലും തുടരാൻ അനുവദിക്കില്ല. സഹകരണ വകുപ്പിൽ ജീവനക്കാരുടെ സ്ഥലംമാറ്റം സമയബന്ധിതമായി നടപ്പിലാക്കും. സ്ഥലംമാറ്റ നിബന്ധനകൾ കർശനമായി നടപ്പിലാക്കുമെന്നും റിപ്പോർട്ടുകളുണ്ട്. ഭരണസമിതി അംഗങ്ങൾക്ക് രണ്ട് ടേം മാത്രമാക്കിയേക്കും. അഴിമതി രഹിതവും സുതാര്യവുമായ ഇടപാടുകളിലൂടെ സഹകരണ സംഘങ്ങളുടെ വിശ്വാസ്യത വർധിപ്പിക്കുക എന്ന ലക്ഷ്യത്തോടെയാണ് പുതിയ മാറ്റങ്ങൾക്ക് തയ്യാറെടുക്കുന്നത്.

കോഴിക്കോട്: മരം കൊള്ളയുമായി ബന്ധപ്പെട്ട മുഴുവൻ കുറ്റവും റവന്യു വകുപ്പിന്റെ തലയിൽ കെട്ടിവച്ച് വനം വകുപ്പിന്റെ അന്വേഷണ റിപ്പോർട്ട്. റവന്യുവിൽ നിന്നുള്ള വിവാദ ഉത്തരവും ഈ ഉത്തരവിന്റെ ചുവടുപിടിച്ച് വിവിധ തഹസിൽദാർമാർ നൽകിയ നിർദേശങ്ങളുമാണ് മരംകൊള്ളയ്ക്ക് കാരണമെന്നാണ് വനംവകുപ്പിന്റെ അന്വേഷണ റിപ്പോർട്ടിൽ വ്യക്തമാക്കിയിരിക്കുന്നത്. വനം വിജിലൻസ് പിസിസിഎഫ് ഗംഗാസിങ് ജൂൺ 25 ന് സർക്കാരിന് സമർപ്പിച്ച് റിപ്പോർട്ടിലാണ് ഇക്കാര്യങ്ങൾ ചൂണ്ടിക്കാട്ടിയിരിക്കുന്നത്. 2248 തേക്ക് മരങ്ങളും (1612 മെട്രിക് ടൺ) 171 ഈട്ടി മരങ്ങളും (327.584s മട്രിക് ടൺ) അനധികൃതമായി മുറിച്ചിട്ടുണ്ടെന്നും റിപ്പോർട്ടിൽ വ്യക്തമാക്കിയിട്ടുണ്ട്.

28 വനം റേഞ്ച് ഓഫിസുകളുടെ പരിധിയിൽ മരംമുറി നടന്നു. പട്ടയ ഭൂമിയിൽ അനധികൃത മരങ്ങൾ മുറിക്കാനായി 483 പെർമിറ്റുകൾ നൽകി. മിക്ക സ്ഥലത്തും റവന്യു അധികൃതർ നൽകിയ ബാധ്യതാരഹിത സർട്ടിഫിക്കറ്റിന്റെ അടിസ്ഥാനത്തിലാണ് മരം മുറി അനുവദിച്ചത്. ഏറ്റവും കൂടുതൽ മരങ്ങൾ മുറിച്ചത് എറണാകുളത്ത് നിന്നാണ്. 205 മരങ്ങളാണ് ഇവിടെ നിന്നും മുറിച്ച് മാറ്റിയത്. രണ്ടാം സ്ഥാനത്തുള്ളത് ഇടുക്കിയാണ്. നേര്യമംഗലം റേഞ്ചിൽ മാത്രം 147 പെർമിറ്റുകൾ നൽകി. അടിമാലിയിൽ 56, മുള്ളരിങ്ങാട് 46, തട്ടേക്കാട് 40, മച്ചാട് 35 എന്നിങ്ങനെ പെർമിറ്റുകൾ നൽകി. സർക്കാർ വില കണക്കാക്കി മാത്രം ആകെ 1441.751 ലക്ഷത്തിന്റെ മരം മുറിച്ചുവെന്നും റിപ്പോർട്ടിൽ പറയുന്നു.

റവന്യു വകുപ്പിൽ നിന്ന് ഒക്ടോബർ 24 ന് ഇറക്കിയ ഉത്തരവ് അതേപടി പാലിച്ച് മരം മുറിക്കാൻ അപേക്ഷ നൽകുന്നവരെ തടഞ്ഞാൽ നടപടിയുണ്ടാവുമെന്ന് കോന്നി തഹസിൽദാർ വില്ലേജ് ഓഫിസർമാർക്ക് നിർദേശം നൽകിയിരുന്നു. കൈവശ സർട്ടിഫിക്കറ്റ് നൽകേണ്ടത് വില്ലേജ് ഓഫിസറുടെ ചുമതല ആണെന്നും തഹസിൽദാർ അറിയിച്ചിരുന്നു. അടിമാലി റേഞ്ചിനു കീഴിൽ ദേവികുളം തഹസിൽദാർ, വെള്ളത്തൂവൽ കൊന്നത്തടി മണ്ണാർകണ്ടം ആനവിരത്തി വില്ലേജ് ഓഫിസർമാർ ബാധ്യതാരഹിത സർട്ടിഫിക്കറ്റുകൾ നൽകിയെന്നും റിപ്പോർട്ടിലുണ്ട്.

അടിമാലിയിൽ ഒരു പെർമിറ്റ് ഉപയോഗിച്ച് 5 തേക്ക് മരങ്ങൾ വരെ വെട്ടി. 18 കൂറ്റൻ ഈട്ടിമരങ്ങൾ മുറിക്കാനുള്ള െപർമിറ്റ് നൽകിയത് ഒക്ടോബർ 24 ന്റെ ഉത്തരവ് റദ്ദാക്കിയ ശേഷമാണ്. മണ്ണാർകണ്ടം വില്ലേജ് ഓഫിസറുടെ സർട്ടിഫിക്കറ്റ് വച്ചാണ് നേര്യമംഗലത്ത് പെർമിറ്റ് നൽകിയത്. ഇതിനു പുറമെ, 44 പെർമിറ്റുകൾ ഉത്തരവ് റദ്ദാക്കിയ ശേഷം നൽകി. എരുമേലി, അച്ചൻകോവിൽ, തെൻമല, പത്തനാപുരം, കുളത്തൂപ്പുഴ, പരുത്തിപ്പള്ളി, പാലോട്, അഞ്ചൽ എന്നിവിടങ്ങളിൽ നിന്നും പെർമിറ്റുകൾ നൽകിയത് ഉത്തരവ് റദ്ദാക്കിയ ശേഷമാണ്. മച്ചാട് റേഞ്ചിൽ 35 പെർമിറ്റുകൾ നൽകിയതിൽ 5 എണ്ണവും ഉത്തരവ് റദ്ദാക്കിയ ശേഷമാണെന്ന് റിപ്പോർട്ടിൽ വിശദമാക്കുന്നു.

വയനാട്ടിൽ വില്ലേജ് ഓഫിസർമാരുടെ സർട്ടിഫിക്കറ്റിന്റെ ബലത്തിലാണ് ഈട്ടിമരങ്ങൾ മുറിച്ചത്. വനം ഉദ്യോഗസ്ഥരുടെ അറിവില്ല. 26 തേക്കും 3 ഈട്ടിയും മുറിച്ചത് ഒരു അനുമതിയും ഇല്ലാതെ. സുൽത്താൻ ബത്തേരിയിൽനിന്ന് 60 തേക്കും അനുമതി ഇല്ലാതെ മുറിച്ചു. 100 ക്യുബിക് മീറ്ററിൽ മുകളിൽ മരം മുറിച്ചത് നേര്യമംഗലം, മച്ചാട്, അടിമാലി റേഞ്ചുകളിൽ. വയനാട്ടിൽ മുട്ടിൽ സൗത്ത് വില്ലേജ് ഓഫിസറാണ് മരംമുറിക്ക് പൂർണ ഉത്തരവാദി. കൽപ്പറ്റയിലും സുൽത്താൻ ബത്തേരിയിലും രേഖകളില്ലാതെ മരം മുറിച്ച പട്ടയ ഉടമകൾ മാത്രമാണ് കുറ്റക്കാർ. എടവണ്ണയിൽ റേഞ്ച് ഫോറസ്റ്റ് ഓഫിസർ സർട്ടിഫിക്കറ്റ് നൽകിയെങ്കിലും വെട്ടിയ മരങ്ങളെല്ലാം തിരിച്ചു പിടിച്ചിട്ടുണ്ട്. അടിമാലിയിൽ റേഞ്ച് ഓഫിസറും വിവിധ വില്ലേജ് ഓഫിസർമാരുമാണ് ഉത്തരവാദികൾ. 8 പാസുകൾ ഒരു രേഖയുമില്ലാതെ നൽകിയ അടിമാലി റേഞ്ച് ഓഫിസർ കുറ്റക്കാരനാണ്. ഉത്തരവ് റദ്ദാക്കിയ ശേഷം 18 പെർമിറ്റുകൾ ഈ റേഞ്ച് ഓഫിസർ നൽകിയതും തെറ്റാണ്. പട്ടയ ഭൂമിയിലെ മരമാണെന്ന് വ്യക്തമായിട്ടും മച്ചാട് റേഞ്ച് ഓഫിസർ 35 പെർമിറ്റുകൾ നൽകി. ഇതിൽ 5 എണ്ണം ഉത്തരവ് റദ്ദാക്കിയ ശേഷമാണ് നൽകിയത്. പേട്ടിക്കാട് റേഞ്ചിൽ 13 പെർമിറ്റുകൾ അനധികൃതമായി നൽകിയിട്ടുണ്ട്. എന്നാൽ മരം തിരികെ പിടിക്കാൻ നടപടി എടുത്തതിനാൽ റേഞ്ചർക്കെതിരെ നടപടി വേണ്ട.

കോതമംഗലത്ത് വില്ലേജ് ഓഫിസർ നൽകിയ സർട്ടിഫിക്കറ്റിലെ അപാകതകൾ പിഴവായി. റേഞ്ച് ഓഫിസറും വില്ലേജ് ഓഫിസറും ഉത്തരവാദികളാണ്. ഉത്തരവ് റദ്ദാക്കിയ ശേഷം പെർമിറ്റ് നൽകിയ കുളത്തൂപ്പുഴ റേഞ്ച് ഓഫിസറും മുള്ളരിങ്ങാട് വില്ലേജ് ഓഫിസറും എരുമേലി റേഞ്ച് ഓഫിസറും നോർത്ത് വില്ലേജ് ഓഫിസറും ഉത്തരവാദികളാണ്. മരം സംരക്ഷിക്കാൻ പട്ടയ ഉടമകൾക്ക് പൂർണ ഉത്തരവാദിത്തം ഉണ്ടെന്നും പട്ടയ ഭൂമിയിൽ സർക്കാരിലേക്ക് നിക്ഷിപ്തമാക്കിയ മരങ്ങളുടെ കണക്ക് അടിയന്തരമായി വനം ഉദ്യോഗസ്ഥർക്ക് കൈമാറണമെന്നും റിപ്പോർട്ടിൽ ചൂണ്ടിക്കാട്ടുന്നു.

തിരുവനന്തപുരം: ബിജെപി സംസ്ഥാന അദ്ധ്യക്ഷൻ കെ സുരേന്ദ്രനെതിരെ കേസ്. സ്വാതന്ത്ര്യ ദിനാചരണത്തിന്റെ ഭാഗമായി ദേശീയ പതാക തലകീഴായി ഉയർത്തിയ സംഭവത്തിലാണ് നടപടി. തിരുവനന്തപുരം മ്യൂസിയം പൊലീസാണ് സുരേന്ദ്രനെതിരെ നടപടി സ്വീകരിച്ചത്. ആർ പ്രതീപ് എന്നയാളാണ് സുരേന്ദ്രനെതിരെ പരാതി നൽകിയത്.

തിരുവനന്തപുരത്തെ ബി.ജെ.പി സംസ്ഥാന കമ്മിറ്റി ഓഫീസിൽ പതാക ഉയർത്തുന്നതിനിടെയായിരുന്നു സുരേന്ദ്രന് അബദ്ധം സംഭവിച്ചത്. വീഴ്ച്ച സംഭവിച്ചുവെന്ന് മനസിലായതോടെ ദേശീയ പതാക തിരിച്ചിറക്കി, ശരിയായി വീണ്ടും ഉയർത്തുകയായിരുന്നു. ഇതുമായി ബന്ധപ്പെട്ട ദൃശ്യങ്ങൾ പോലീസ് പരിശോധിച്ചിരുന്നു. തുടർന്നാണ് കേസ് രജിസ്റ്റർ ചെയ്യാൻ തീരുമാനിച്ചത്.

അതേസമയം കയർ കുരുങ്ങിയതുകൊണ്ടാണ് ഇത്തരമൊരു സംഭവം ഉണ്ടായതെന്നാണ് ബിജെപി വൃത്തങ്ങൾ വ്യക്തമാക്കുന്നത്.

തിരുവനന്തപുരം: ഗതാഗത വകുപ്പിലെ ഉദ്യോഗസ്ഥൻമാർ ഭാര്യമാരെ സ്ത്രീധനത്തിന്റെ പേരിൽ പീഡിപ്പിച്ചാൽ കർശന നടപടിയുണ്ടാകുമെന്ന് മുന്നറിയിപ്പ്. ഗതാഗതമന്ത്രി ആൻറണി രാജുവാണ് ഇക്കാര്യം അറിയിച്ചത്. സ്ത്രീധന പീഡന കേസുകളിൽ ഉദ്യോഗസ്ഥർക്കെതിരെ 45 ദിവസത്തിനകം അന്വേഷണം പൂർത്തിയാക്കി കർശന നടപടി സ്വീകരിക്കുമെന്ന് അദ്ദേഹം പറഞ്ഞു.

പല വകുപ്പിലും സ്ത്രീധന പീഡന കഥകൾ കേൾക്കുന്നുണ്ടെന്നും ഓരോ വകുപ്പും നിയമങ്ങൾ നിശ്ചയ ദാർഢ്യത്തോടെ നടപ്പാക്കുമെന്നും അദ്ദേഹം വ്യക്തമാക്കി. സർക്കാർ ജീവനക്കാർ ആണെന്ന അഹങ്കാരത്തിൽ ഭാര്യമാരെ അടിമകളാക്കി വെക്കുന്ന നിരവധി കുടുംബങ്ങളുണ്ട്. സർക്കാർ ഉദ്യോഗസ്ഥർക്കെതിരെ പരാതികളുണ്ടായാൽ കർശന നടപടി സ്വീകരിക്കും. സ്ത്രീധന പീഡനം നടത്തിയ ഉദ്യോഗസ്ഥനെ പിരിച്ചുവിട്ട ആദ്യ സംസ്ഥാനമാണ് കേരളമെന്നും അദ്ദേഹം വിശദമാക്കി.

സ്ത്രീധന പീഡനത്തെത്തുടർന്ന് ആത്മഹത്യ ചെയ്ത വിസ്മയയുടെ ഭർത്താവ് കിരൺ കുമാറിനെയാണ് സംസ്ഥാന സർക്കാർ സർവീസിൽ നിന്ന് പിരിച്ചുവിട്ടത്. വകുപ്പുതല അന്വേഷണത്തിന് ശേഷം കുറ്റം ചെയ്തതായി തെളിഞ്ഞതിനെ തുടർന്നാണ് നടപടി.