General (Page 1,405)

തിരുവനന്തപുരം: ഇടതു വലതു മുന്നണികൾക്കെതിരെ രൂക്ഷ വിമർശനവുമായി ബിജെപി നേതാവ് അൽഫോൺസ് കണ്ണന്താനം. എൽഡിഎഫും യുഡിഎഫും കേരളത്തിൽ തീവ്രവാദം വളരുന്നതിന് സഹായിക്കുകയാണെന്ന് അദ്ദേഹം പറഞ്ഞു. അടുത്ത 5-10 വർഷത്തിനുള്ളിൽ കേരളം മറ്റൊരു അഫ്ഗാനിസ്താനായി മാറുമെന്നും അദ്ദേഹം വ്യക്തമാക്കി.

സംസ്ഥാനത്ത് വലിയ തോതിലാണ് താലിബാനിസം വളരുന്നത്. കഴിഞ്ഞ 25 വർഷത്തോളമായി കേരളത്തിലെ പല ഭാഗങ്ങളിലും ഇത് ഉയർന്നു വരുന്നുണ്ടെന്ന് അദ്ദേഹം അഭിപ്രായപ്പെട്ടു. ഭീകരസംഘടനകളുടെ പ്രധാന റിക്രൂട്ടിങ് കേന്ദ്രമായി കേരളം മാറിയെന്ന മുൻ ഡിജിപി ലോക്നാഥ് ബെഹ്റയുടെ പരാമർശവും അദ്ദേഹം ഓർമ്മിപ്പിച്ചു.

നാർക്കോട്ടിക്സ് ജിഹാദ് പരമാർശത്തിന് ശേഷം ക്രിസ്ത്യൻ വിഭാഗക്കാർക്കും പാലാ ബിഷപ്പിനും സുരക്ഷ നൽകണമെന്നും വിഷയത്തിൽ കേന്ദ്രം ഇടപെടണമെന്നും ബിജെപി ജനറൽ സെക്രട്ടറി ജോർജ് കുര്യനും ആവശ്യപ്പെട്ടിരുന്നു. ഇതിന് പിന്നാലെയാണ് അൽഫോൺസ് കണ്ണന്താനം പ്രതികരണവുമായി രംഗത്തെത്തിയിരിക്കുന്നത്.

കൊച്ചി: കോൺഗ്രസിൽ ഉടൻ നേതൃമാറ്റം വേണമെന്നാവശ്യപ്പെട്ട് ശശി തരൂർ എംപി. കോൺഗ്രസ് അദ്ധ്യക്ഷ പദവി ഒഴിയണമെന്ന് സോണിയ ഗാന്ധി തന്നെ പറയുന്നുണ്ടെന്നും ആ സാഹചര്യത്തിൽ എഐസിസിയിൽ ഉടൻ നേതൃമാറ്റം ഉണ്ടാകണമെന്നുമാണ് തരൂർ ആവശ്യപ്പെടുന്നത്. മുവാറ്റുപുഴയിൽ സംഘടിപ്പിച്ച ചടങ്ങിൽ പങ്കെടുത്ത് സംസാരിക്കവെയാണ് അദ്ദേഹത്തിന്റെ പ്രതികരണം.

അദ്ധ്യക്ഷ സ്ഥാനം ഒഴിയാൻ സോണിയ പലതവണ താൽപ്പര്യം പ്രകടിപ്പിച്ചിട്ടുള്ളതാണ്. അങ്ങനെയെങ്കിൽ പുതിയ നേതൃമാറ്റം ഉടൻ ഉണ്ടാകണമെന്നും. അത് കോൺ്ഗ്രസിന്റെ തിരിച്ചു വരവിന് കൂടുതൽ ഊർജ്ജം നൽകുമെന്നും അദ്ദേഹം പറഞ്ഞു. സോണിയ ഗാന്ധി മികച്ച നേതാവാണ്. രാഹുൽ അധ്യക്ഷ പദവി ഒഴിഞ്ഞ ശേഷം സോണിയ താൽക്കാലിക അദ്ധ്യക്ഷയായി ചുമതലയേൽക്കുകയായിരുന്നു. സ്ഥിരം അദ്ധ്യക്ഷൻ വേണമെന്ന ആവശ്യം നേതാക്കൾക്കിടയിലുണ്ട്. രാഹുൽ ആ സ്ഥാനത്തേക്ക് തിരിച്ചു വരികയാണെങ്കിൽ ഉടൻ ഉണ്ടാകണം. അടുത്ത തെരഞ്ഞെടുപ്പിൽ തിരിച്ചു വരണമെങ്കിൽ ഇപ്പോൾ തന്നെ കോൺഗ്രസിൽ അഴിച്ചുപണികൾ ആവശ്യമാണെന്നും അദ്ദേഹം കൂട്ടിച്ചേർത്തു.

നേരത്തെ കോൺഗ്രസിൽ നേതൃമാറ്റം വേണമെന്നാവശ്യപ്പെട്ട് സോണിയ ഗാന്ധിയെ നേരിൽക്കണ്ട് 21 കോൺഗ്രസ് നേതാക്കൾ കത്ത് നൽകിയിരുന്നു. ഇതിൽ ഒരാളാണ് ശശി തരൂർ.

തിരുവനന്തപുരം: കോൺഗ്രസിന് പാർട്ട് ടൈം ജോലിക്കാരെ വേണ്ടെന്ന് കെ മുരളീധരൻ എംപി. പാർട്ടിയ്ക്ക് മുഴുവൻ സമയ പ്രവർത്തകരെ മതിയെന്നും അദ്ദേഹം പറഞ്ഞു. അച്ചടക്കം താനുൾപ്പെടെ എല്ലാവർക്കും ബാധകമാണെന്നും ഇനി വിട്ടുവീഴ്ച ഇല്ലെന്നും അദ്ദേഹം പറഞ്ഞു.

ശീലങ്ങൾ മാറണം. തെരഞ്ഞെടുപ്പ് വരുമ്പോൾ സ്ഥാനാർത്ഥിയെ പാര വയ്ക്കുന്ന ആളുകളെ പാർട്ടിയ്ക്ക് വേണ്ട. ആദർശത്തിന്റെ പേരിലല്ല ഇപ്പോൾ മൂന്നുേപർ പാർട്ടി വിട്ടത്. എ കെ ജി സെന്ററിൽ സ്വീകരിക്കുന്ന തരത്തിൽ അവർ അധ:പതിച്ചുവെന്നും ജി സുധാകരനെ പുറത്താൻ നോക്കുന്ന പാർട്ടിയിലേക്കാണ് അവർ പോയതെന്നും കെ മുരളീധരൻ വിമർശിച്ചു. തിരുവനന്തപുരം ജില്ല കോൺഗ്രസ് കമ്മറ്റി സംഘടിപ്പിച്ച ശിൽപശാലയിൽ സംസാരിക്കവെയാണ് അദ്ദേഹത്തിന്റെ പ്രതികരണം.

കോൺഗ്രസിന്റെ ഭരണഘടന തന്നെ സെമി കേഡർ ആണ്. എന്നാൽ പ്രത്യേക യോഗങ്ങൾ വിളിച്ചുള്ള സെമി കേഡർ അല്ല ഉദ്ദേശിക്കുന്നതെന്നും അദ്ദേഹം വ്യക്തമാക്കി. മുഖ്യമന്ത്രി പിണറായി വിജയനെ കെ മുരളീധരൻ പുകഴ്ത്തുകയും ചെയ്തി. എല്ലാ വിഭാഗങ്ങളെയും ഒരുമിച്ച് കൊണ്ടു പോയ കെ കരുണാകരന്റെ ശൈലിയാണ് പിണറായിക്ക്. ജാതി മത വിഭാഗങ്ങളെ ഒരുമിച്ച് കൊണ്ടു പോകാനുള്ള അസാധാരണ ശേഷി പിണറായിക്ക് ഉണ്ടെന്നായിരുന്നു അദ്ദേഹത്തിന്റെ പരാമർശം.

നേമത്ത് അടിയൊഴുക്കുകൾ ഉണ്ടായി. അത് തടയാൻ കഴിഞ്ഞെങ്കിൽ ജയിക്കാൻ കഴിഞ്ഞേനെയെന്നും കെ മുരളിധരൻ അഭിപ്രായപ്പെട്ടു. സ്റ്റാൻ സ്വാമിയെ കൊന്നവരാണ് ഇപ്പോൾ പാലാ ബിഷപ്പിന് പിന്തുണ നൽകുന്നത്. ബി ജെ പി ക്ക് വളരാൻ സി പി എം സഹായം ചെയ്യുകയാണെന്നും അദ്ദേഹം കുറ്റപ്പെടുത്തി.