General (Page 1,373)

ന്യൂഡൽഹി: ഗതിശക്തി ദേശീയ മാസ്റ്റർ പ്ലാൻ ഉദ്ഘാടനം ചെയ്ത് പ്രധാനമന്ത്രി നരേന്ദ്ര മോദി. രാജ്യത്തെ അടിസ്ഥാനവികസന പദ്ധതികൾക്ക് ശക്തിയും വേഗവും പകരാൻ വേണ്ടിയാണ് കേന്ദ്ര സർക്കാർ 100 ലക്ഷം കോടി രൂപയുടെ ഗതിശക്തി ദേശീയ മാസ്റ്റർ പ്ലാൻ ആവിഷ്‌ക്കരിച്ചത്. വിവിധ വകുപ്പുകളെ ഒറ്റ പ്ലാറ്റ്‌ഫോമിലാക്കിക്കൊണ്ട് ചെലവും സമയവും കുറയ്ക്കാൻ സഹായിക്കുന്നതാണ് പദ്ധതിയെന്ന് പ്രധാനമന്ത്രി വ്യക്തമാക്കി.

റോഡ് മുതൽ റെയിൽവേ വരെയും കൃഷി മുതൽ വ്യോമയാനം വരെയുമുള്ള മേഖലകളെ ബന്ധിപ്പിച്ചുകൊണ്ടാണ് ഗതിശക്തി പദ്ധതി നടപ്പാക്കുന്നത്. വികസന പ്രവർത്തനങ്ങളോട് അയഞ്ഞ സമീപനം കാണിക്കുന്നതിനാൽ നികുതിദായകന്റെ പണത്തെ അവഹേളിക്കുന്ന സാഹചര്യമാണ് നേരത്തെയുണ്ടായിരുന്നതെന്ന് പ്രധാനമന്ത്രി പറഞ്ഞു. പദ്ധതികൾ തമ്മിൽ പരസ്പര സഹകരണമുണ്ടായിരുന്നില്ലെന്നും മികച്ചനിലവാരമുള്ള അടിസ്ഥാന സൗകര്യങ്ങളില്ലാതെ വികസനം സാധ്യമല്ലെന്നും അദ്ദേഹം വിശദീകരിച്ചു.

ഗതിശക്തി പദ്ധതിയിലൂടെ അടുത്ത നാലഞ്ച് വർഷത്തിനുള്ളിൽ 200 വിമാനത്താവളങ്ങളും ഹെലിപാഡുകളും ജല എയ്റോഡ്രോമുകളും നിർമിക്കും. രാജ്യത്തിന്റെ മൊത്ത ആഭ്യന്തര ഉത്പാദനത്തിന്റെ (ജി.ഡി.പി.) 13 ശതമാനവും സാധന-സേവനങ്ങൾ എത്തിക്കുന്നതിനുള്ള ചെലവാണ്. ഇത് നമ്മുടെ മത്സരക്ഷമതയെ ബാധിക്കുന്നുണ്ട്. അതിനാൽ ഈ ചെലവ് കുറയ്ക്കുകയാണ് ഗതിശക്തി പദ്ധതിയിലൂടെ ലക്ഷ്യമിടുന്നതെന്നും അദ്ദേഹം അറിയിച്ചു.

സമയബന്ധിതമായി പദ്ധതികൾ പൂർത്തിയാക്കുന്ന സംസ്‌കാരം ഇന്ന് ഇന്ത്യ വകസിപ്പിച്ചു. മുൻനിശ്ചയിച്ചതിനെക്കാൾ നേരത്തേ പൂർത്തിയാക്കാനും തുടങ്ങിയെന്നും അദ്ദേഹം വിശദമാക്കി. 2014 ൽ പ്രധാനമന്ത്രിയായി ചുമതലയേറ്റതിനു ശേഷം, നേരത്തേ മുടങ്ങിപ്പോയ നൂറുകണക്കിന് പദ്ധതികളെ ഒറ്റ പ്ലാറ്റ്ഫോമിലേക്ക് കൊണ്ടുവന്ന് പ്രതിസന്ധികൾ പരിഹരിച്ച കാര്യത്തെ കുറിച്ചും അദ്ദേഹം സംസാരിച്ചു. 2014 വരെ 15,000 കിലോമീറ്റർ മാത്രമാണ് പൈപ്പ് ലൈൻ സ്ഥാപിച്ചതെങ്കിൽ ഇന്ന് 16,000-ത്തിലധികം കിലോമീറ്റർ പുതുതായി സ്ഥാപിക്കാനുള്ള പ്രവൃത്തി നടക്കുകയാണ്. 2014-നുമുമ്പ് അഞ്ചുവർഷ കാലയളവിൽ വെറും 1900 കിലോമീറ്റർ റെയിൽ പാതകളാണ് ഇരട്ടിപ്പിച്ചത്. എന്നാൽ, കഴിഞ്ഞ ഏഴു വർഷത്തിനുള്ളിൽ 9000 കിലോമീറ്റർ പാത ഇരട്ടിപ്പിച്ചു. 2014-നുമുമ്പ് അഞ്ചുവർഷ കാലയളവിൽ 3000 കിലോമീറ്റർ റെയിൽവേ ട്രാക്കുകൾ മാത്രം വൈദ്യുതീകരിച്ച സ്ഥാനത്ത് കഴിഞ്ഞ ഏഴു വർഷത്തിനുള്ളിൽ 24,000 കിലോമീറ്ററുകൾ വൈദ്യുതീകരിച്ചു. 2014-നുമുമ്പ് 250 കിലോമീറ്റർ മാത്രമുണ്ടായിരുന്ന മെട്രോ റെയിൽ സേവനം ഇപ്പോൾ 700 കിലോമീറ്ററായെന്നും അദ്ദേഹം കൂട്ടിച്ചേർത്തു.

മുംബൈ: ആഢംബര കപ്പലിലെ ലഹരിവിരുന്നിനിടെ അറസ്റ്റിലായ ബോളിവുഡ് നടൻ ഷാരുഖ് ഖാന്റെ മകൻ ആര്യൻ ഖാൻ സ്ഥിരമായി ലഹരി ഉപയോഗിക്കാറുണ്ടായിരുന്നെന്ന് നാർകോട്ടിക്‌സ് കൺട്രോൾ ബ്യൂറോ. മുംബൈ സെഷൻസ് കോടതിയിലാണ് നാർകോട്ടിക്‌സ് കൺട്രോൾ ബ്യൂറോ ഇക്കാര്യം അറിയിച്ചത്. ആര്യൻ ഖാന്റെ ജാമ്യാപേക്ഷയിൽ വാദം കേൾക്കുന്നതിനിടെയായിരുന്നു ആര്യൻ ഖാൻ സ്ഥിരമായി ലഹരി ഉപയോഗിക്കാറുണ്ടെന്ന് എൻസിബി പറഞ്ഞത്.

കഴിഞ്ഞ ഏതാനും വർഷങ്ങളായി ആര്യൻ ഖാൻ ലഹരി ഉപയോഗിച്ചിരുന്നു എന്നാണ് എൻസിബിക്കു വേണ്ടി ഹാജരായ അഡീഷനൽ സോളിസിസ്റ്റർ ജനറൽ അനിൽ സിങ് കോടതിയിൽ വാദിച്ചത്. അതേസമയം ആര്യൻ ഖാന്റെ ജാമ്യാപേക്ഷയിൽ വാദം പൂർത്തിയായി. ഒക്ടോബർ 20 ന് ജാമ്യാപേക്ഷയിൽ വിധി പറയും. അടുത്ത അഞ്ചു ദിവസത്തേക്ക് കോടതി അവധിയായതിനാലാണ് വിധി ഒക്ടോബർ 20 ലേക്ക് മാറ്റിയത്.

ആര്യൻ ഖാൻ ഒരിക്കൽ മാത്രമല്ല ലഹരി ഉപയോഗിച്ചത്. കഴിഞ്ഞ കുറച്ചു വർഷങ്ങളായി ലഹരി ഉപയോഗിക്കുന്നുണ്ട്. ആര്യൻ ഖാന്റെ സുഹൃത്ത് അർബാസിന്റെ പക്കൽനിന്ന് ആറു ഗ്രാം ചരസ് പിടിച്ചെടുത്തു. കൈവശം ലഹരിമരുന്നുണ്ടോയെന്ന് അന്വേഷണ ഉദ്യോഗസ്ഥൻ ചോദിച്ചപ്പോൾ, തന്റെ ഷൂസിൽ ലഹരിമരുന്ന് ഉണ്ടെന്ന് അർബാസ് പറഞ്ഞു. ക്രൂസിൽ ആര്യനൊപ്പം ലഹരി ഉപയോഗിക്കാൻ പോയതാണെന്ന് അർബാസ് സമ്മതിച്ചുവെന്നും അനിൽ സിങ് കോടതിയെ അറിയിച്ചു. ആര്യൻ ഖാന് ജാമ്യം നൽകുന്നതിനെ അദ്ദേഹം ശക്തമായി എതിർത്തു. ഇത് മഹാത്മാഗാന്ധിയുടെ നാടാണെന്നും ലഹരി ഉപയോഗം ചെറുപ്പക്കാരെ ബാധിക്കുന്നുവെന്നും കോടതിയെ അറിയിച്ചു. ‘നമ്മുടെ സ്വാതന്ത്ര്യസമര സേനാനികളുടെ മനസ്സിൽ ഇതൊന്നുമില്ല. ഇത് മഹാത്മാഗാന്ധിയുടെയും ബുദ്ധന്റെയും മണ്ണാണ്. അന്വേഷണം ഇപ്പോൾ പ്രാഥമിക ഘട്ടത്തിലാണ്. ഇപ്പോൾ ജാമ്യം നൽകുന്നതിനുള്ള ഘട്ടമല്ലെന്നും അദ്ദേഹം ചൂണ്ടിക്കാട്ടി.

ലഹരി ഉപയോഗം കുട്ടികളെ ബാധിക്കുന്നു. അവർ കോളജിൽ പോകുന്ന കുട്ടികളാണ്. പക്ഷേ അതു ജാമ്യത്തിനായി പരിഗണിക്കേണ്ടതില്ല. നമ്മുടെ രാജ്യത്തിന്റെ ഭാവി ഈ തലമുറയെ ആശ്രയിച്ചിരിക്കുന്നുവെന്നും അദ്ദേഹം വിശദമാക്കി.

ന്യൂഡൽഹി: മുൻ പ്രധാനമന്ത്രിയും കോൺഗ്രസ് നേതാവുമായ ഇന്ദിരാഗാന്ധിയെ പ്രശംസിച്ച് പ്രതിരോധമന്ത്രി രാജ്‌നാഥ് സിംഗ്. ഇന്ദിര ഗാന്ധി വർഷങ്ങളോളം രാജ്യത്തെ നയിക്കുക മാത്രമല്ല ചെയ്തത് യുദ്ധസമയത്ത് മുന്നിൽ നിന്ന് പ്രവർത്തിക്കുകയും ചെയ്തുവെന്ന് രാജ്‌നാഥ് സിംഗ് പറഞ്ഞു. 1971 ൽ പാകിസ്താനെതിരായ യുദ്ധത്തിലെ ഇന്ദിരാഗാന്ധിയുടെ നേതൃപാടവത്തെയാണ് അദ്ദേഹം പ്രശംസിച്ച് സംസാരിച്ചത്. ‘സായുധ സേനയിലെ സ്ത്രീകൾ’ എന്ന വിഷയത്തിൽ ഷാങ്ഹായി കോ ഓപറേഷൻ ഓർഗനൈസേഷൻ നടത്തിയ വെബിനാറിൽ സംസാരിക്കുകയായിരുന്നു അദ്ദേഹം.

രാജ്യത്തിന്റെ വികസനത്തിൽ സ്ത്രീശക്തിയുമായി യോജിച്ച് പ്രവർത്തിക്കുന്നതിൽ ഇന്ത്യയ്ക്ക് നല്ല അനുഭവ പാരമ്പര്യമാണുള്ളത്. രാജ്യ സുരക്ഷയുടേയും രാഷ്ട്ര നിർമ്മാണത്തിന്റേയും വിവിധ മേഖലകളിൽ സ്ത്രീകളുടെ സംഭാവനകൾ അംഗീകരിക്കുകയും അവ എടുത്ത് പറയേണ്ടതുമാണെന്ന് അദ്ദേഹം വ്യക്തമാക്കി. റാണി ലക്ഷ്മി ഭായിയെക്കുറിച്ചും മുൻ രാഷ്ട്രപതി പ്രതിഭാ പാട്ടീലിനെക്കുറിച്ചും അദ്ദേഹം പരിപാടിയിൽ സംസാരിച്ചു.

രാജ്യത്തെ സംരക്ഷിക്കാൻ വേണ്ടിയും ജനങ്ങളുടെ അവകാശങ്ങൾ സംരക്ഷിക്കാൻ വേണ്ടിയും നിരവധി സ്ത്രീകൾ കൈയിൽ ആയുധമേന്തിയിട്ടുണ്ട്. അത്തരത്തിൽ ഏറ്റവും കൂടുതൽ ആദരിക്കപ്പെടേണ്ട വ്യക്തികളിൽ ഒരാളാണ് റാണി ലക്ഷ്മി ഭായ്. പ്രതിഭാ പാട്ടീൽ ഇന്ത്യയുടെ രാഷ്ട്രപതിയും സായുധ സേനയുടെ പരമോന്നത കമാൻഡറുമായിരുന്നുവെന്നും രാജ്‌നാഥ് സിംഗ് കൂട്ടിച്ചേർത്തു.

ന്യൂഡൽഹി: ബോർഡർ സെക്യൂരിറ്റി ഫോഴ്സിന് കൂടുതൽ അധികാരം നൽകി കേന്ദ്ര സർക്കാർ. അന്താരാഷ്ട്ര അതിർത്തി പങ്കിടുന്ന മൂന്ന് സംസ്ഥാനങ്ങളിലാണ് ബിഎസ്എഫിന് കൂടുതൽ അധികാരം നൽകിയത്. കേന്ദ്ര ആഭ്യന്തര മന്ത്രാലയമാണ് ഇതുസംബന്ധിച്ച തീരുമാനമെടുത്തത്.

പാകിസ്താൻ, ബംഗ്ലാദേശ് എന്നീ രാജ്യങ്ങളുമായി അതിർത്തി പങ്കിടുന്ന പശ്ചിമ ബംഗാൾ, പഞ്ചാബ്, അസം തുടങ്ങിയ സംസ്ഥാനങ്ങളിലാണ് ബിഎസ്എഫിന് കൂടുതൽ അധികാരം നൽകുക. അതിർത്തിയുടെ 50 കിലോമീറ്ററിനുള്ളിൽ പരിധിയിൽ തിരച്ചിൽ, കസ്റ്റഡി, അറസ്റ്റ് എന്നിവക്കാണ് ബിഎസ്എഫിന് അധികാരം നൽകിയത്. നേരത്തെ ഇത് 15 കിലോമീറ്ററായിരുന്നു. അതിർത്തി സംസ്ഥാനങ്ങളിൽ ഡ്രോൺ ഉപയോഗിച്ചുള്ള ആക്രമണങ്ങൾ വർധിച്ച സാഹചര്യത്തിലാണ് ബിഎസ്എഫിന് അധികാരം വർധിപ്പിച്ച് നൽകാൻ ആഭ്യന്തര മന്ത്രാലയം തീരുമാനിച്ചത്. അതിർത്തി സംരക്ഷണവും നുഴഞ്ഞുകയറ്റവും തടയുകയാണ് ബിഎസ്എഫിന്റെ പ്രധാന ചുമതല.

പുതിയ തീരുമാനം ഗുണകരമാണെന്നാണ് ബിഎസ്എഫ് ഉദ്യോഗസ്ഥർ പറയുന്നത്. ഇന്റലിജൻസ് വിവരം ലഭിച്ചാൽ ഇനി ലോക്കൽ പൊലീസിന്റെ അനുമതിക്കായി കാത്തിരിക്കേണ്ടതില്ലെന്നും ഉടൻ പ്രവർത്തിക്കാമെന്നും സീനിയർ ബിഎസ്എഫ് ഓഫീസർ പ്രതികരിച്ചു. ഇനി മൂന്ന് സംസ്ഥാനങ്ങളിലും സംസ്ഥാന പൊലീസിന്റെ അനുമതിയില്ലാതെ തിരച്ചിലിനും അറസ്റ്റിനും ബിഎസ്എഫിന് അധികാരമുണ്ടാകും. സിആർപിസി, പാസ്പോർട്ട് ആക്ട് എന്നിവ പ്രകാരം കേസെടുക്കാനും ബിഎസ്എഫിന് കഴിയും. മണിപ്പൂർ, നാഗാലാൻഡ്, മിസോറം, ത്രിപുര, ലഡാക്ക് എന്നീ സംസ്ഥാനങ്ങളിലും ബിഎസ്എഫിന് അറസ്റ്റ് അധികാരം നൽകിയിട്ടുണ്ട്. എന്നാൽ ഗുജറാത്തിലെ ബിഎസ്എഫിന്റെ അധികാര പരിധി 80 കിലോമീറ്ററിൽ നിന്ന് 50 കിലോമീറ്ററായി കുറക്കുകയും രാജസ്ഥാനിൽ 50 കിലോമീറ്ററായി നിലനിർത്തുകയും ചെയ്തിട്ടുണ്ട്.

അതേസമയം ബിഎസ്എഫിന് കൂടുതൽ അധികാരം നൽകിയതിനെതിരെ വിമർശനങ്ങളും ഉയരുന്നുണ്ട്. സംസ്ഥാനങ്ങളുടെ അധികാരം കവരുന്നതാണ് കേന്ദ്ര സർക്കാർ തീരുമാനമെന്ന് പഞ്ചാബ് മുഖ്യമന്ത്രി ചരൺജിത് സിങ് ചന്നി കുറ്റപ്പെടുത്തി. കേന്ദ്ര സർക്കാറിന്റെ ഏകപക്ഷീയമായ തീരുമാനത്തെ ശക്തമായി അപലപിക്കുന്നു. 50 കിലോമീറ്ററിനുള്ളിൽ ബിഎസ്എഫിന് കൂടുതൽ അധികാരം നൽകുന്നത് ഫെഡറലിസത്തിനെതിരെയുള്ള ആക്രമണമാണെന്നും തീരുമാനം പിൻവലിക്കണമെന്ന് ആഭ്യന്തര മന്ത്രി അമിത് ഷായോട് ആവശ്യപ്പെടുകയാണെന്നും അദ്ദേഹം പറഞ്ഞു.

ന്യൂഡൽഹി: ഗർഭഛിദ്രത്തിനുള്ള സമയപരിധി 24 ആഴ്ചയാക്കി ഉയർത്തി കേന്ദ്ര സർക്കാർ. ആരോഗ്യ മന്ത്രാലയമാണ് ഇതുസംബന്ധിച്ച ഉത്തരവ് പുറത്തിറക്കിയത്. ലൈംഗികാതിക്രമത്തിന് ഇരയായവർ, ഗർഭിണിയായിരിക്കെ വിവാഹബന്ധം വേർപെടുത്തുകയോ വിധവയാകുകയോ ചെയ്തവർ, ഗുരുതര ശാരീരിക മാനസിക പ്രശ്നങ്ങളുള്ളവർ, സർക്കാർ പുനരധിവാസ കേന്ദ്രങ്ങളിൽ കഴിയുന്നവർ തുടങ്ങിയവർക്ക് 24 ആഴ്ചയ്ക്കുള്ളിലാണെങ്കിൽ ഗർഭം അലസിപ്പിക്കാമെന്നാണ് പുതിയ ഉത്തരവ്. നേരത്തെ 20 ആഴ്ച്ച വരെയായിരുന്നു ഗർഭഛിദ്രം നടത്താൻ കഴിഞ്ഞിരുന്നത്.

കുട്ടിയുടെയോ അമ്മയുടെ ജീവൻ അപകടത്തിലാകുന്ന സാഹചര്യവും ഗുരുതര വൈകല്യ സാധ്യതയും പരിഗണിച്ചാണ് 24 ആഴ്ചയ്ക്കു ശേഷം ഗർഭഛിദ്രം അനുവദിക്കുക. ഗർഭഛിദ്രം വേണമോയെന്നു തീരുമാനിക്കാൻ മെഡിക്കൽ ബോർഡിലേക്ക് കൂടുതൽ വിദഗ്ധരെ ഉൾപ്പെടുത്താം. ഗർഭഛിദ്രം ആവശ്യപ്പെടുന്ന ആളെയും അവരുടെ മെഡിക്കൽ രേഖകളും ബോർഡ് പരിശോധിക്കണമെന്നും അപേക്ഷയിൽ 3 ദിവസത്തിനുള്ളിൽ തീരുമാനമെടുക്കണമെന്നും കേന്ദ്ര സർക്കാർ ഉത്തരവിൽ വ്യക്തമാക്കുന്നു. എല്ലാ സുരക്ഷാ നടപടികളോടെയുമാണു ഗർഭഛിദ്രം നടക്കുന്നതെന്ന് ബോർഡ് ഉറപ്പാക്കണമെന്നും കൗൺസലിംഗ് നൽകണമെന്നും ഉത്തരവിൽ നിർദ്ദേശിച്ചിട്ടുണ്ട്.

ഉത്തരവിലെ മറ്റ് പ്രധാന ഭേദഗതികൾ:

• 20 മുതൽ 24 ആഴ്ച വരെയുള്ള ഗർഭം അലസിപ്പിക്കാൻ 2 ഡോക്ടർമാരുടെ അനുമതി വേണം.
• ഗർഭം ധരിച്ചു 9 ആഴ്ചയ്ക്കുള്ളിലാണെങ്കിൽ മൂന്നാഴ്ചയിൽ കുറയാത്ത പ്രവൃത്തി പരിചയമുള്ള ഡോക്ടർക്കു ഗർഭഛിദ്രം നടത്താം.
• 24 ആഴ്ചയ്ക്കു മുകളിലാണെങ്കിൽ ഗർഭഛിദ്രത്തിനുള്ള അപേക്ഷ പരിഗണിക്കേണ്ടത് സംസ്ഥാന സർക്കാർ നിയോഗിക്കുന്ന മെഡിക്കൽ ബോർഡാണ്.