General (Page 1,368)

പത്തനംതിട്ട: പത്തനംതിട്ട, കോട്ടയം, ആലപ്പുഴ ജില്ലകളുടെ വിവിധ ഭാഗങ്ങളിൽ കുടിവെള്ള വിതരണം മുടങ്ങുമെന്ന് മുന്നറിയിപ്പ്. കനത്ത മഴയെ തുടർന്ന് മണിമല, പമ്പ എന്നീ നദികളിൽ കുത്തൊഴുക്ക് വർദ്ധിച്ചതോടെ പമ്പിങ് നിർത്തിവെച്ചതോടെയാണ് കുടിവെള്ള വിതരണം മുടങ്ങുന്നത്.

തിരുവല്ല, ചങ്ങനാശേരി നഗര പ്രദേശങ്ങളിലും കവിയൂർ, കുന്നന്താനം, കുറ്റൂർ, തിരുവൻവണ്ടൂർ, നിരണം, കടപ്ര, പെരിങ്ങര, നെടുമ്പ്രം, വാഴപ്പള്ളി, തൃക്കൊടിത്താനം, പായിപ്പാട്, കുട്ടനാട് എന്നീ പ്രദേശങ്ങളിലേയും കുടിവെള്ള വിതരണത്തിന് തടസം നേരിടുമെന്നാണ് തിരുവല്ല പി.എച്ച് സബ്ഡിവിഷൻ അസി.എക്സിക്യൂട്ടീവ് എഞ്ചിനീയർ അറിയിച്ചു.

മഴ ശക്തി പ്രാപിച്ചതോടെ ജല വിതരണത്തിനുള്ള പൈപ്പുകൾക്ക് ഉൾപ്പെടെ നാശം സംഭവിച്ചുവെന്നും അധികൃതർ വ്യക്തമാക്കി. കൂടാതെ നദികളിലെ കലങ്ങിയ വെള്ളം മൂലം പമ്പിങ് സംവിധാനവും തകരാറിലായിരിക്കുകയാണ്. കുടിവെള്ള പ്രശ്‌നങ്ങൾ പരിഹരിക്കാനുള്ള നടപടികൾ സ്വീകരിച്ചിരിക്കുകയാണെന്നും അധികൃതർ പറഞ്ഞു.

തിരുവനന്തപുരം: കെ റെയിൽ പദ്ധതിയ്‌ക്കെതിരെ വിമർശനവുമായി കോൺഗ്രസ് നേതാവ് കെ എസ് ശബരിനാഥൻ. സിൽവർലൈൻ പദ്ധതിയെ യുഡിഎഫ് എതിർക്കുന്നത് പാരിസ്ഥിതിക, സാമ്പത്തിക, സാമൂഹിക പ്രത്യാഘാതങ്ങൾ കാരണമാണെന്ന് അദ്ദേഹം പറഞ്ഞു. വികസനത്തിന് തങ്ങൾ എതിരല്ല, പക്ഷേ സാമ്പത്തികലാഭം മുന്നിൽ കണ്ടുള്ള അശാസ്ത്രീയ പദ്ധതികളെ നഖശിഖാന്തം എതിർക്കുമെന്ന് അദ്ദേഹം വ്യക്തമാക്കി. ഫേസ്ബുക്കിൽ പങ്കുവെച്ച കുറിപ്പിലൂടെയായിരുന്നു അദ്ദേഹത്തിന്റെ പ്രതികരണം.

കേരളത്തിന്റെ പ്രകൃതിയുടെ പ്രത്യേകതകൾ മനസ്സിലാക്കാതെ നടക്കുന്ന അശാസ്ത്രീയമായുള്ള വികസന പ്രവർത്തനങ്ങളുടെ ദൂഷ്യവശങ്ങൾ ഇന്ന് നമ്മൾ വീണ്ടും അനുഭവിക്കുകയാണ്. ഒന്നും രണ്ടും പ്രളയങ്ങൾ കഴിഞ്ഞപ്പോഴും നമ്മൾ പഠിക്കുന്നില്ല എന്നുള്ളത് ഒരു യാഥാർത്ഥ്യമാണ്. സിൽവർ ലൈൻ പദ്ധതിക്ക് വേണ്ടി എമ്പാങ്ക്‌മെന്റുകളും പാലങ്ങളും നിർമ്മിക്കുമ്പോൾ, മലയോര മേഖലയിലും സമതലത്തിലും ഭാവിയിലുണ്ടാകാൻ പോകുന്ന അനന്തരഫലങ്ങൾ ഭയപ്പെടുത്തുന്നതാണ് എന്നാണ് വിദഗ്ധർ പറയുന്നത്. ഈ പദ്ധതിക്ക് ജനങ്ങളെ സാക്ഷ്യപ്പെടുത്തിയിട്ടുള്ള ഒരു പൂർണമായ പാരിസ്ഥിതിക ആഘാത പഠനം നടത്താത്തതും വിചിത്രമാണെന്ന് അദ്ദേഹം കുറ്റുപ്പെടുത്തി.

സാമ്പത്തികമായും സിൽവർ ലൈൻ ഒരു വെള്ളാനയാണ്. 65,000 കോടി രൂപയുടെ എസ്റ്റിമേറ്റ് പദ്ധതി പൂർത്തിയാകുമ്പോൾ ഏകദേശം 1,20,000 കോടി രൂപയാകുമെന്നാണ് പറയപ്പെടുന്നത്. കടുത്ത സാമ്പത്തിക പ്രതിസന്ധി നേരിടുന്ന സമയത്ത്, കോവിഡ് ബ്രിഗേഡ് പോലും നിർത്തിവെക്കേണ്ടിവന്ന സാഹചര്യത്തിൽ എവിടുന്നാണ് കേരളം ഇത്രയും ധനസമാഹരണം നടത്തുന്നതെന്ന് അദ്ദേഹം ചോദിച്ചു. എന്നുമാ

സിൽവർലൈന്റെ ഫിനാൻഷ്യൽ പ്രൊജക്ഷൻസ് സുതാര്യമല്ല. സർക്കാരിന്റെ കണക്ക് പ്രകാരം ഇന്ത്യയിലെ ഏറ്റവും തിരക്കുള്ള മുംബൈ-അഹമ്മദാബാദ് റൂട്ടിനെക്കാളും പാസ്സഞ്ചർ ട്രാഫിക് ഉണ്ടാകുമെന്നുള്ള അനുമാനവും വിശ്വസിക്കാൻ വയ്യ. തെറ്റായിട്ടുള്ള ഫിനാൻഷ്യൽ പ്രൊജക്ഷൻസ് കാരണം ഇപ്പോൾ പറയപ്പെടുന്ന 2000 രൂപയുടെ ടിക്കറ്റിനെക്കാൾ നിരക്കുയരും. പിന്നെയെങ്ങനെയാണ് ഈ പദ്ധതി സാധാരണക്കാരന് പ്രാപ്യമാകുന്നതെന്നും ശബരിനാഥൻ ചോദിക്കുന്നു.

കേരളം കാണാത്ത രീതിയിലുള്ള കുടിയൊഴുപ്പിക്കലും സ്ഥലമേറ്റെടുപ്പും വലിയ സാമൂഹിക ഭീതി സൃഷ്ടിച്ചിട്ടുണ്ട്. വീടുകളും വ്യാപാരസ്ഥാപനങ്ങളും ആരാധനാലയങ്ങളും എല്ലാം നിലംപരിശാകുന്ന പദ്ധതിക്കെതിരെ മലബാറിലും കൊച്ചിയിലും മധ്യതിരുവിതാംകൂറിലും പെരുകിവരുന്ന സമരങ്ങൾ ഇതിന് സാക്ഷ്യമാണ്. കേരളത്തിലെ നാഷണൽ ഹൈവേ, സ്റ്റേറ്റ് ഹൈവേ, എംസി റോഡ് എന്നിവിടങ്ങളിലെ സ്ഥലമേറ്റെടുപ്പ് പൂർത്തിയാക്കി, വീതിയുള്ള റോഡുകൾ നിർമ്മിക്കുകയാണെങ്കിൽ തന്നെ റോഡിലെ തിരക്കും അപകടങ്ങളും കുറയും. അതിനുള്ള മുടക്കുമുതൽ ഇപ്പോഴുള്ളതിന്റെ പകുതിപോലുമാകില്ല. ജനങ്ങളുമായി, പ്രതിപക്ഷമായി, വിദഗ്ധരുമായി ബന്ധപ്പെടാതെ തിരശ്ശീലയ്ക്ക് പിന്നിൽ ചിലർ എഴുതി ഉണ്ടാക്കിയ ഒരു പ്രോജക്ട് റിപ്പോർട്ടിന്റെ പേരിൽ സിൽവർലൈൻ പദ്ധതി നടപ്പിലാക്കുന്നത് ദൂരവ്യാപകമായിട്ടുള്ള പ്രത്യാഘാതങ്ങളുണ്ടാക്കുമെന്ന് അദ്ദേഹം മുന്നറിയിപ്പ് നൽകി.

തിരുവനന്തപുരം: സംസ്ഥാനത്ത് വിവിധ ഭാഗങ്ങളിൽ ഉണ്ടായ ഉരുൾപൊട്ടലിനെയും മഴക്കെടുതിയെയും തുടർന്നുള്ള രക്ഷാപ്രവർത്തനത്തിൽ വീഴ്ച ഉണ്ടായിട്ടില്ലെന്ന് വ്യക്തമാക്കി റവന്യൂമന്ത്രി കെ രാജൻ. ദുരന്തം അറിഞ്ഞയുടൻ രക്ഷാപ്രവർത്തനം ആരംഭിച്ചുവെന്ന് അദ്ദേഹം പറഞ്ഞു. രക്ഷാപ്രവർത്തനത്തിൽ എന്തെങ്കിലും പാളിച്ചയുണ്ടായോയെന്ന് പരിശോധിക്കുമെന്നും അദ്ദേഹം വ്യക്തമാക്കി.

രക്ഷാപ്രവർത്തനങ്ങളുടെ ഭാഗമായി ദേശീയ ദുരന്ത പ്രതികരണ സേനയുടെ ഓരോ ടീമുകളെ പത്തനംതിട്ട, ആലപ്പുഴ, ഇടുക്കി, എറണാകുളം, തൃശൂർ, മലപ്പുറം ജില്ലകളിൽ ഇതിനോടകം വിന്യസിച്ചിട്ടുണ്ട്. ഇതുകൂടാതെ 5 ടീമിനെക്കൂടി ഇടുക്കി, കോട്ടയം, കൊല്ലം, കണ്ണൂർ , പാലക്കാട് ജില്ലകളിലും വിന്യസിച്ചു. ഇന്ത്യൻ ആർമിയുടെ രണ്ടു ടീമുകളിൽ ഒരു ടീം തിരുവനന്തപുരത്തും, ഒരെണ്ണം കോട്ടയത്തും വിന്യസിച്ചിട്ടുണ്ടെന്ന് അദ്ദേഹം വിശദമാക്കി.

ഡിഫെൻസ് സ്സെക്യൂരിറ്റി കോർപ്‌സിന്റെ ടീമുകൾ ഒരെണ്ണം കോഴിക്കോടും ഒരെണ്ണം വയനാടും വിന്യസിച്ചിട്ടുണ്ട്. എയർ ഫോഴ്സിന്റെ രണ്ടു ചോപ്പറുകൾ തിരുവനന്തപുരം, കൊച്ചിയിലെ ഐഎൻഎസ് ഗരുഡ എന്നിവിടങ്ങളിൽ സജ്ജമായി നിൽപ്പുണ്ട്. ആവശ്യം വരുന്ന സാഹചര്യത്തിൽ ഏതു നിമിഷവും ഇവരെ വിന്യസിക്കാനാകും. സന്നദ്ധസേനയും സിവിൽ ഡിഫെൻസും അടിയന്തര സാഹചര്യങ്ങൾ അഭിമുഖീകരിക്കാൻ സജ്ജമായിട്ടുണ്ടെന്നും അദ്ദേഹം കൂട്ടിച്ചേർത്തു.

തിരുവനന്തപുരം: കനത്ത മഴയും ഉരുൾപൊട്ടലും നാശം വിതച്ച കോട്ടയം ജില്ലയ്ക്ക് അടിയന്തര ധനസഹായം അനുവദിച്ചു. എട്ടു കോടി അറുപത് ലക്ഷം രൂപയാണ് സംസ്ഥാന ദുരന്ത പ്രതികരണ നിധിയിൽ നിന്നും ജില്ലാ കളക്ടർക്ക് അനുവദിച്ചത്. അടിയന്തര ദുരിതാശ്വാസ പ്രവർത്തനങ്ങൾക്കാണ് പണം അനുവദിച്ചത്.

കോട്ടയം, മീനച്ചൽ, കാഞ്ഞിരപ്പള്ളി താലൂക്കുകളിൽ കനത്ത നാശനഷ്ടമാണ് ഉണ്ടായത്. മൂന്നു താലൂക്കുകളിൽ നിന്നും 1706 പേരെ വിവിധ ക്യാമ്പുകളിലേക്ക് മാറ്റി പാർപ്പിക്കുകയും ചെയ്തു. സംസ്ഥാനത്ത് കഴിഞ്ഞ ചൊവ്വാഴ്ച മുതൽ ഇന്ന് ആറു മണി വരെ ഉണ്ടായ കാലവർഷ കെടുതിയിൽ 35 പേർ മരിച്ചുവെന്ന് സർക്കാർ കണക്കുകൾ വ്യക്തമാക്കുന്നത്. കോട്ടയം കൂട്ടിക്കലിലും ഇടുക്കി കൊക്കയാറിലും ഇന്നലെയുണ്ടായ ഉരുൾപൊട്ടലിൽ കുഞ്ഞുങ്ങളടക്കം പതിനാറ് പേരാണ് മരിച്ചത്.

അതേസമയം കൂട്ടിക്കൽ പഞ്ചായത്തിലെ പ്ലാപള്ളി, കവാലി പ്രദേശങ്ങളിലുണ്ടായ ഉരുൾപൊട്ടലിൽ ജീവൻ നഷ്ടമായവരുടെ കുടുംബങ്ങൾക്ക് നാല് ലക്ഷം രൂപ നൽകുമെന്ന് റവന്യൂ മന്ത്രി കെ.രാജൻ പറഞ്ഞു. പ്രദേശത്ത് തെളിഞ്ഞ കാലാവസ്ഥയായിരുന്നത് രക്ഷാ പ്രവർത്തനങ്ങൾക്ക് ഗുണകരമായിട്ടുണ്ട്. തിരച്ചിലിനും രക്ഷാപ്രവർത്തനങ്ങൾക്കും സാധ്യമായ എല്ലാ ഇടപെടലുകളും നടത്താൻ സർക്കാരിന് സാധിച്ചതായും അദ്ദേഹം പറഞ്ഞു. പോലീസ്, ഫയർ ഫോഴ്‌സ് എന്നിവയ്ക്കു പുറമെ ഒരു കരസേന, എയർലിഫ്റ്റിംഗ് ടിം പ്രദേശവാസികൾ തുടങ്ങിയവർ രക്ഷാ പ്രവർത്തനത്തിൽ പങ്കാളികളായി. കക്കി, ഇടുക്കി ഡാമുകൾ തുറക്കേണ്ട സാഹചര്യം പരിശോധിക്കുന്നതിന് ബന്ധപ്പെട്ട ഉദ്യോഗസ്ഥരുടെ യോഗം ചേർന്നു സ്ഥിതിഗതികൾ വിലയിരുത്തിയതായും മന്ത്രി അറിയിച്ചു.