General (Page 1,347)

കൊച്ചി: കൊച്ചിയിൽ കോൺഗ്രസ് സമരത്തിനിടെയുണ്ടായ ആക്രമണവുമായി ബന്ധപ്പെട്ട് കോൺഗ്രസ് നേതാക്കൾക്കെതിരെ കേസെടുത്ത് പോലീസ്. ജാമ്യമില്ലാ കുറ്റം ചുമത്തിയാണ് കോൺഗ്രസ് നേതാക്കൾക്കെതിരെ പോലീസ് കേസെടുത്തിരിക്കുന്നത്. നടൻ ജോജു ജോർജിന്റെ പരാതിയുടെ അടിസ്ഥാനത്തിലാണ് നടപടി.

പിഡിപിപി ആക്ട് സെക്ഷൻ 5 ഉൾപ്പെടെയുള്ള വകുപ്പുകൾ പ്രതികൾക്കെതിരെ ചുമത്തിയിട്ടുണ്ട്. മുൻ മേയർ ടോണി ചമ്മിണിയുടെ നേതൃത്വത്തിലുള്ള ഏഴംഗ സംഘമാണ് ജോജുവിനെ വാഹനം തടഞ്ഞ് ആക്രമിച്ചതെന്നാണ് എഫ്‌ഐആറിൽ വ്യക്തമാക്കിയിട്ടുള്ളത്. ചമ്മിണി ഉൾപ്പെടുന്ന സംഘം വാഹനം തടഞ്ഞ ശേഷം ജോജുവിന്റെ ഷർട്ടിന് കുത്തിപ്പിടിച്ച് അസഭ്യം പറഞ്ഞുവെന്നും വാഹനത്തിന്റെ ചില്ല് കല്ലുകൊണ്ട് ഇടിച്ചുതകർത്തുവെന്നും എഫ്.ഐ.ആറിൽ വിശദമാക്കിയിട്ടുണ്ട്. ആറു ലക്ഷം രൂപയുടെ നഷ്ടം വാഹനത്തിനുണ്ടായെന്നും പോലീസ് പറഞ്ഞു.

ഇന്ധനവിലക്കയറ്റത്തിൽ പ്രതിഷേധിച്ച് എറണാകുളത്ത് ഇടപ്പള്ളി – വൈറ്റില ഹൈവേ ഉപരോധിച്ചുകൊണ്ട് കോൺഗ്രസ് നടത്തിയ പ്രതിഷേധ സമരമാണ് അക്രമത്തിൽ കലാശിച്ചത്. സമരത്തിനെതിരെ പ്രതികരിച്ചതിനാണ് ജോജുവിന്റെ കാർ കോൺഗ്രസ് പ്രവർത്തകർ ആക്രമിച്ചത്.

ജനങ്ങളെ ഉപദ്രവിച്ചുകൊണ്ടല്ല സമരം ചെയ്യേണ്ടെന്നായിരുന്നു ജോജു ജോർജിന്റെ പ്രതികരണം. ഒരുദിവസം സമരം ചെയ്താൻ വില കുറയുമോ എന്ന് ചോദിച്ചുകൊണ്ട് അദ്ദേഹം പ്രതിഷേധത്തിനെതിരെ രംഗത്തെത്തി. ജനങ്ങളും അദ്ദേഹത്തോടൊപ്പം അണിചേർന്നു. പ്രതിഷേധക്കാരും ജനങ്ങളുമായി രൂക്ഷമായ വാക്കേറ്റവും ഉണ്ടായി.

പോലീസ് ഇടപെട്ട് ഉപരോധം അവസാനിപ്പിച്ചതിനെ തുടർന്ന് ജോജു ജോർജിന്റെ വാഹനം മുന്നോട്ടെടുക്കവെ കോൺഗ്രസുകാർ വാഹനം തകർക്കുകയായിരുന്നു. ജോജു ജോർജ് മദ്യപിച്ച് ഷോ കാണിക്കുകയായിരുന്നുവെന്നായിരുന്നു കോൺഗ്രസ് ആരോപിച്ചിരുന്നത്. അതേസമയം ജോജു മദ്യപിച്ചിരുന്നില്ലെന്ന് വൈദ്യപരിശോധനയിൽ വ്യക്തമായിട്ടുണ്ട്.

തിരുവനന്തപുരം: പാലാ ബിഷപ്പ് ജോസഫ് കല്ലറങ്ങാട്ടിനെതിരെ കേസെടുത്ത് പോലീസ്. നാർക്കോട്ടിക് ജിഹാദ് പരാമാർശത്തിൽ മത സ്പർദ്ധ വളർത്തി എന്നതടക്കമുള്ള കുറ്റങ്ങൾ ചുമത്തിയാണ് ജോസഫ് കല്ലറങ്ങാട്ടിനെതിരെ പൊലീസ് കേസെടുത്തത്. പാലാ മജിസ്ട്രേറ്റ് കോടതി നിർദേശ പ്രകാരമാണ് നടപടി. കുറുവിലങ്ങാട് പൊലീസാണ് കേസ് രജിസ്റ്റർ ചെയ്തത്. ഓൾ ഇന്ത്യാ ഇമാംസ് കൗൺസിൽ കോട്ടയം ജില്ലാ പ്രസിഡന്റ് അബ്ദുൾ അസീസ് മൗലവി, അഡ്വ. കെ എൻ. പ്രശാന്ത്, അഡ്വ. സി.പി. അജ്മൽ എന്നിവർ നൽകിയ ഹർജിയിലാണ് കേസെടുത്തിരിക്കുന്നത്.

സെപ്റ്റംബർ 8 നാണ് കുറവിലങ്ങാട് മർത്ത് മറിയം ഫൊറോന പള്ളിയിൽ മാർ ജോസഫ് കല്ലറങ്ങാട്ട് വിവാദ പ്രസംഗം നടത്തിയത്. കേരളത്തിൽ നാർക്കോട്ടിക്‌സ് ജിഹാദുണ്ടെന്നായിരുന്നു പാലാ ബിഷപ്പിന്റെ പരാമർശം. കത്തോലിക്കാ യുവാക്കളെയും ഹൈന്ദവ യുവാക്കളെയും ലക്ഷ്യം വെച്ചുകൊണ്ട് മയക്കുമരുന്നിലും മറ്റ് ലഹരിക്കും അടിമയാക്കുന്നതിനുവേണ്ടി പ്രത്യേക സംഘങ്ങൾ കേരളത്തിൽ പലയിടത്തായി പ്രവർത്തിക്കുന്നുണ്ടെന്ന് അദ്ദേഹം പറഞ്ഞു.

ആയുധം ഉപയോഗിച്ച് യുദ്ധംചെയ്യാനാവാത്ത സ്ഥലങ്ങളിൽ ഇത്തരത്തിലുള്ള കുതന്ത്രങ്ങളിലൂടെ മറ്റു മതങ്ങളെ നശിപ്പിക്കുക എന്ന ലക്ഷ്യമാണ് ഇക്കൂട്ടർക്കുള്ളതെന്നുമായിരുന്നു ബിഷപ്പ് പറഞ്ഞിരുന്നത്. സെപ്തംബർ 24 നാണ് പാലാ ബിശഷപ്പിനെതിരെ കേസെടുക്കണമെന്നാവശ്യപ്പെട്ട് അബ്ദുൽ അസീസ് മൗലവി കുറവിലങ്ങാട് പൊലിസ് സ്റ്റേഷനിൽ പരാതി നൽകിയത്. എന്നാൽ, പൊലിസ് കേസെടുക്കാൻ തയ്യാറായിരുന്നില്ല. തുടർന്ന് അദ്ദേഹം എസ്. പിക്കും പരാതി നൽകിയിരുന്നു.

തൃശൂർ: റോഡിന് നടുവിലുള്ള വൈദ്യുതി പോസ്റ്റ് കാണാതെ റോഡ് ടാറിങ് നടത്തിയ സംഭവത്തിൽ ഉദ്യോഗസ്ഥരുടെ കണ്ണുതുറപ്പിച്ച് പൊതുമരാമത്ത് മന്ത്രി മുഹമ്മദ് റിയാസ്. റോഡിന്റെ നടുവിലുണ്ടായിരുന്ന വൈദ്യുതി പോസ്റ്റ് മന്ത്രിയുടെ ഇടപെടലിനെ തുടർന്ന് മാറ്റി. തമ്പുരാൻപടി-കണ്ടുബസാർ റോഡിൽ പുന്നയൂർ പഞ്ചായത്തിലെ ഏരിമ്മൽ ക്ഷേത്രത്തിന് സമീപമാണ് റോഡിന് നടുവിൽ വൈദ്യുതി പോസ്റ്റ് നിന്നത്. രണ്ടു ആഴ്ചയ്ക്ക് മുൻപാണ് റോഡ് ടാർ ചെയ്തത്.

റോഡിന്റെ നടുവിൽ വൈദ്യുതി പോസ്റ്റ് ഉണ്ടെന്ന് ചൂണ്ടിക്കാട്ടി പഞ്ചായത്ത് പ്രസിഡന്റ് ഉൾപ്പെടെയുള്ളവർ രംഗത്തെത്തിയിരുന്നു. എന്നാൽ പോസ്റ്റ് മാറ്റാനുള്ള തുക എസ്റ്റിമേറ്റിൽ ഇല്ലെന്നായിരുന്നു നിർമാണം നടത്തുന്ന നാഷണൽ ഹൈവേ അതോറിറ്റി വിഭാഗം പറഞ്ഞിരുന്നത്.

റോഡിലേക്ക് കയറി നിൽക്കുന്ന 21 പോസ്റ്റുകൾ മാറ്റാൻ 3.10 ലക്ഷം രൂപയുടെ എസ്റ്റിമേറ്റ് തയാറാക്കിയെങ്കിലും പോസ്റ്റുകൾ മാറ്റാതെയാണ് ഉദ്യോഗസ്ഥർ റോഡ് ടാർ ചെയ്തത്. ഇക്കാര്യം ചൂണ്ടിക്കാട്ടി പുന്നയൂരിലെ പൊതുപ്രവർത്തകനാണ് മന്ത്രിയ്ക്ക് പരാതി നൽകിയത്. പ്രദേശത്ത് റോഡിലേക്ക് കയറി നിൽക്കുന്ന 20 പോസ്റ്റുകൾ അടുത്ത ദിവസം മാറ്റുമെന്ന് അധികൃതർ അറിയിച്ചു.

തിരുവനന്തപുരം: തിരുവനന്തപുരം മെഡിക്കൽ കോളേജിൽ ആരോഗ്യമന്ത്രി വീണാ ജോർജ് മിന്നൽ സന്ദർശനം നടത്തിയതിന് പിന്നാലെ വിമർശനവുമായി ഡോക്ടർമാർ. മെഡിക്കൽ കോളേജിലെ സാഹചര്യം കാലങ്ങളായി ഇങ്ങനെ തന്നെയാണെന്നും, ഇതിന് പരിഹാരമാവശ്യപ്പെട്ട് പലപ്പോഴായി മന്ത്രിയെ തന്നെ സമീപിച്ചിട്ടുണ്ടെന്നുമാണ് പിജി ഡോക്ടർമാരുടെ സംഘടന വ്യക്തമാക്കുന്നത്. മന്ത്രി വലിച്ചു കീറിയ പോസ്റ്റർ തയ്യാറാക്കിയ ഡോക്ടറും വീണാ ജോർജ്ജിനെതിരെ വിമർശനവുമായി രംഗത്തെത്തിയിട്ടുണ്ട്.

വ്യാഴാഴ്ച രാത്രിയാണ് ആരോഗ്യ മന്ത്രി മെഡിക്കൽ കോളേജിൽ മിന്നൽ സന്ദർശനം നടത്തിയത്. ആശുപത്രിയിലെ വീഴ്ച്ചകൾ മന്ത്രി ചൂണ്ടിക്കാട്ടിയിരുന്നു. മുതിർന്ന ഡോക്ടർമാർ ആ സമയത്ത് ഡ്യൂട്ടിയിലുണ്ടായിരുന്നില്ല. കൃത്യമായ ഡ്യൂട്ടി ചാർട്ട് ഇല്ലാത്തതും ഉത്തരവാദിത്വപ്പെട്ടവർ സ്ഥലത്തില്ലാത്തതും മന്ത്രി ചൂണ്ടിക്കാട്ടി. മെഡിക്കൽ കോളേജിലെ പരിമിതികൾ സഹിക്കണമെന്ന് ആവശ്യട്ട് വാർഡിന്റെ ഭിത്തിയിൽ പതിച്ചിരുന്ന പോസ്റ്റർ മന്ത്രി നീക്കം ചെയ്യിപ്പിക്കുകയും ചെയ്തു. ഇതിനെതിരെയാണ് പോസ്റ്റർ തയ്യാറാക്കിയ ഡോക്ടർ മുഹമ്മദ് യാസീൻ രംഗത്തെത്തിയത്.

മെഡിക്കൽ കോളേജിൽ ഹൗസ് സർജൻസി ചെയ്യുന്ന സമയത്ത് താനാണ് ആ പോസ്റ്റർ തയ്യാറാക്കി ഒട്ടിച്ചതെന്നാണ് യാസീൻ ഫേസ്ബുക്കിലൂടെ വ്യക്തമാക്കുന്നത്. ഭൗതിക സൗകര്യങ്ങൾ വർദ്ധിപ്പിക്കുകയും കൂടുതൽ ജീവനക്കാരെ നിയമിക്കുകയും ചെയ്തില്ലെങ്കിൽ ഇനിയും ഇത്തരം പോസ്റ്റുകൾ പ്രത്യക്ഷപ്പെടുമെന്നും അദ്ദേഹം അഭിപ്രായപ്പെട്ടു. ഇളക്കി മാറ്റിക്കാൻ മന്ത്രിയും ഇളക്കി മാറ്റാൻ സ്റ്റാഫും ഉണ്ടാവും. പക്ഷേ അവിടെ കുറച്ച് സൗകര്യങ്ങളും കുറച്ച് സ്റ്റാഫിനെയും കൂടി കൊടുത്താൽ പോസ്റ്റർ ഒട്ടുന്നത് അങ്ങ് ഒഴിവാക്കാമായിരുന്നുവെന്നും യാസീൻ കൂട്ടിച്ചേർത്തു. പോസ്റ്റർ പതിപ്പിക്കാനുണ്ടായ സാഹചര്യത്തെ കുറിച്ചും യാസീൻ വിശദീകരിക്കുന്നുണ്ട്.