General (Page 1,316)

തിരുവനന്തപുരം: പ്ലാറ്റ്‌ഫോം ടിക്കറ്റ് നിരക്ക് കുറച്ച് റെയിൽവേ. കോവിഡ് നിയന്ത്രണങ്ങളിലെ ഇളവുകൾ കണക്കിൽ എടുത്താണ് പുതിയ തീരുമാനമെന്ന് റെയിൽവേ അധികൃതർ അറിയിച്ചു. കോവിഡ് വൈറസ് വ്യാപനത്തെ തുടർന്ന് റെയിൽവേ പ്ലാറ്റ്‌ഫോം ടിക്കറ്റ് നിരക്ക് 50 രൂപയായി ഉയർത്തിയിരുന്നു. ഈ നിരക്കാണ് ഇപ്പോൾ 10 രൂപയായി കുറച്ചിരിക്കുന്നത്.

വ്യാഴാഴ്ച്ച മുതൽ നിരക്ക് പ്രാബല്യത്തിൽ വന്നു. ദക്ഷിണ റെയിൽവേയുടെ തിരുവനന്തപുരം ഡിവിഷനിലെ എല്ലാ റെയിൽവേ സ്റ്റേഷനുകളിലും പ്ലാറ്റ്‌ഫോം ടിക്കറ്റ് നിരക്ക് 50 രൂപയിൽ നിന്ന് 10 രൂപയാക്കി മാറ്റുമെന്നാണ് റെയിൽ വൃത്തങ്ങൾ വ്യക്തമാക്കുന്നത്.

കോവിഡ് മഹാമാരിയുടെ സാഹചര്യങ്ങൾക്കിടെ 2021 ഒക്ടോബർ 07 മുതലാണ് തിരക്ക് കുറയ്ക്കാൻ ഉയർന്ന നിരക്കിൽ പ്ലാറ്റ്‌ഫോം ടിക്കറ്റുകൾ വിതരണം ചെയ്യാൻ ആരംഭിച്ചത്. അതേസമയം നിരക്ക് കുറച്ചതിന് ശേഷവും യാത്രക്കാർ മാസ്‌ക് ധരിച്ചും സാമൂഹിക അകലം പാലിച്ചും കൈകൾ ശുചീകരിച്ചും കോവിഡ് മാനദണ്ഡങ്ങൾ കർശനമായി പാലിക്കണമെന്നും റെയിൽവേ അഭ്യർത്ഥിച്ചു.

തിരുവനന്തപുരം: രാജ്യത്ത് കോവിഡ് മരണക്കണക്കുകളിൽ രണ്ടാം സ്ഥാനത്തുള്ള സംസ്ഥാനം കേരളം. അയൽ സംസ്ഥാനമായ കർണാടകയെ പിന്തള്ളിയാണ് രണ്ടാമതെത്തിയത്. മഹാരാഷ്ട്ര മാത്രമാണ് കോവിഡ് മരണ കണക്കുകളിൽ കേരളത്തിന് മുന്നിലുള്ളത്

1.41 ലക്ഷം കൊവിഡ് മരണങ്ങളാണ് മഹാരാഷ്ട്രയിൽ ഇതുവരെ റിപ്പോർട്ട് ചെയ്തത്. കഴിഞ്ഞ ദിവസത്തെ കണക്കുകൾ പരിശോധിക്കുമ്പോൾ കേരളത്തിൽ കോവിഡ് ബാധയെ തുടർന്ന് ജീവൻ നഷ്ടപ്പെട്ടത് 38,737 പേർക്കാണ്. അയൽ സംസ്ഥാനങ്ങളായ കർണാടകയിൽ 38,185 പേരും തമിഴ്നാട്ടിൽ 36,415 പേരുമാണ് മരണപ്പെട്ടത്.

കോവിഡ് രണ്ടാം തരംഗത്തിൽ സംസ്ഥാനത്ത് മരണങ്ങൾ സംഭവിച്ചിട്ടില്ലെന്ന് കാണിക്കാൻ കേരള സർക്കാർ കള്ളക്കണക്ക് പുറത്തുവിടുകയായിരുന്നുവെന്നാണ് കഴിഞ്ഞ ദിവസം ആരോഗ്യ മന്ത്രാലയം അറിയിച്ചിരുന്നത്. ഒരു മാസത്തിനുള്ളിൽ പഴയ 8,684 കൊവിഡ് മരണങ്ങളാണ് കേരളം കണക്കിൽ ഉൾപ്പെടുത്തിയതെന്നും ആരോഗ്യമന്ത്രാലയം കണ്ടെത്തിയിരുന്നു. മരണങ്ങളും കോവിഡ് കേസുകളും മറച്ചുപിടിച്ചതാണ് കഴിഞ്ഞ മൂന്നുനാലു മാസങ്ങളായി സംസ്ഥാനത്തെ കൊവിഡ് സാഹചര്യം ഗുരുതരമായി മാറാൻ കാരണമെന്നും അധികൃതർ കുറ്റപ്പെടുത്തുന്നു.

കോവിഡ് മരണങ്ങൾക്ക് നഷ്ടപരിഹാരം നൽകാനുള്ള കേന്ദ്രസർക്കാർ തീരുമാനത്തിന് പിന്നാലെയാണ് ഒളിപ്പിച്ചുവെച്ച കോവിഡ് മരണങ്ങളുടെ കണക്കുകൾ കേരളം പുറത്തുവിടാൻ ആരംഭിച്ചത്. രാജ്യമെങ്ങും കൊവിഡ് രണ്ടാം തരംഗം ആഞ്ഞടിച്ച ഏപ്രിലിൽ രാജ്യത്തെ ആകെ കൊവിഡ് മരണങ്ങളിൽ വെറും 1.4 ശതമാനം മാത്രമായിരുന്നു കേരളത്തിലെന്നാണ് സംസ്ഥാന സർക്കാർ അവകാശപ്പെട്ടിരുന്നത്. മെയിൽ 2.8 ശതമാനവും ജൂണിൽ 6.4 ശതമാനവും മരണങ്ങളാണ് സംസ്ഥാനം റിപ്പോർട്ട് ചെയ്തത്. എന്നാൽ ഓഗസ്റ്റിൽ ഇത് ഒറ്റയടിക്ക് 26.9 ശതമാനമായി വർധിച്ചു.

അതേസമയം സെപ്തംബറിൽ രാജ്യത്തെ ആകെ കൊവിഡ് മരണങ്ങളിൽ 45.2 ശതമാനവും ഒക്ടോബറിൽ 64.7 ശതമാനവുമാണ് കേരളത്തിൽ റിപ്പോർട്ട് ചെയ്തത്. നവംബറിൽ 77.4 ശതമാനം കൊവിഡ് മരണങ്ങൾ കേരളത്തിൽ നിന്ന് മാത്രം റിപ്പോർട്ട് ചെയ്തത്. ഏപ്രിൽ, മെയ്, ജൂൺ മാസങ്ങളിൽ മറച്ചുവെച്ച കോവിഡ് മരണങ്ങളാണ് സെപ്തംബർ, ഒക്ടോബർ, നവംബർ മാസങ്ങളിലായി കേരളം പുറത്തുവിട്ടത്.

തിരുവനന്തപുരം: നിലവിൽ നിശ്ചയിച്ചിരിക്കുന്നതിനെക്കാൾ കൂടിയ സ്‌കെയിലിൽ കെ.എസ്.ആർ.ടി.സി ജീവനക്കാരുടെ ശമ്പള വർദ്ധന നടപ്പാക്കാനൊരുങ്ങി സർക്കാർ. പരിഗണനയിലുള്ള ശമ്പള സ്‌കെയിൽ ഉൾപ്പെടുന്ന റിപ്പോർട്ട് നാളെ കെ.എസ്.ആർ.ടി.സി ധനവകുപ്പിന് കൈമാറുമെന്നും ഇക്കാര്യത്തിൽ ചർച്ച നടത്തി അന്തിമ തീരുമാനം സ്വീകരിക്കുമെന്നും അധികൃതർ വ്യക്തമാക്കി.

ശമ്പള പരിഷ്‌കരണം സംബന്ധിച്ച വ്യക്തമായ റിപ്പോർട്ട് സമർപ്പിക്കണമെന്ന് ധന-ഗതാഗത വകുപ്പ് സെക്രട്ടറിമാർ നടത്തിയ ചർച്ചയിലാണ് ആവശ്യപ്പെട്ടത്. കോവിഡിന് വൈറസ് വ്യാപനത്തിന് ശേഷം സർക്കാർ സഹായം കൊണ്ടു മാത്രമാണ് കെ.എസ്.ആർ.ടി.സി ജീവനക്കാരുടെ ശമ്പളം നൽകുന്നത്. അതു തുടരേണ്ടി വരുമെന്നതിനാലാണ് ധനവകുപ്പ് കൃത്യമായ റിപ്പോർട്ട് തേടിയത്. നേരത്തെ 20,000 രൂപയിൽ ആരംഭിക്കുന്ന ശമ്പള സ്‌കെയിലാണ് തയ്യാറാക്കിയത്. എന്നാൽ ഈ സ്‌കെയിൽ ജീവനക്കാരുടെ സംഘടനകൾ തള്ളി. 23,700 ൽ തുടങ്ങുന്ന സ്‌കെയിൽ വേണമെന്ന ആവശ്യമാണ് ജീവനക്കാർ മുന്നോട്ടു വെച്ചത്.

ഇത് വൻ സാമ്പത്തിക ബാദ്ധ്യത വരുത്തുമെന്ന് കണ്ട് ഗതാഗത വകുപ്പും നിഷേധിച്ചിരുന്നു. രണ്ട് സ്‌കെയിലുകൾക്കുമൊപ്പം ഇതിനിടയിൽ വരുന്ന രണ്ട് സ്‌കെയിലുകൾ കൂടി കെ.എസ്.ആർ.ടി.സി തയ്യാറാക്കി നൽകും. ഇങ്ങനെ തയ്യാറാക്കുന്ന റിപ്പോർട്ടിൽ ഒരോ സ്‌കെയിലും നടപ്പിലാക്കുമ്പോൾ എത്ര ബാദ്ധ്യതയുണ്ടാകുമെന്ന കണക്ക് ഉൾക്കൊള്ളിക്കണമെന്നും ഏത് സാഹചര്യത്തിലും അതിനപ്പുറത്തേക്ക് ബാദ്ധ്യത പോകില്ലെന്ന ഉറപ്പ് കൂടി കെ.എസ്.ആർ.ടി.സി നൽകണമെന്നും ധനവകുപ്പ് വ്യക്തമാക്കിയിട്ടുണ്ട്.

ഓരോ തസ്തികയിലും ശമ്പള സ്‌കെയിലിലും എത്ര ജീവനക്കാരാണുള്ളത്, ഓരോ തസ്‌കികയ്ക്കും എത്ര രൂപ ശമ്പളമായും ആനുകൂല്യമായും നൽകുന്നുണ്ട്, വർദ്ധിപ്പിക്കുമ്പോൾ അത് എത്രയാകും എന്ന കണക്കും സമർപ്പിക്കണമെന്നും ധനവകുപ്പ് നിർദ്ദേശിച്ചു.

അതേസമയം ആദ്യം തയ്യാറാക്കിയ ശമ്പള വർദ്ധന പാക്കേജിൽ പ്രതിമാസം 9 കോടി രൂപയുടെ അധിക ബാദ്ധ്യത വരും. ജീവനക്കാരുടെ സംഘടന ആവശ്യപ്പെടുന്ന സർക്കാർ ജീവനക്കാരുടേതിനു തുല്യമായ വർദ്ധന നടപ്പിലാക്കിയാൽ ബാദ്ധ്യത 30 കോടി വരെയാകും. ഇപ്പോൾ 84 കോടി രൂപയാണ് ശമ്പളത്തിനു മാത്രമായി ആവശ്യം വരുന്നത്.

തിരുവനന്തപുരം: ബിജെപി സംസ്ഥാന അദ്ധ്യക്ഷൻ കെ സുരേന്ദ്രനെതിരെ പരാതി. ഹലാൽ ഭക്ഷണത്തിന്റെ പേരിൽ മുസ്ലീങ്ങൾക്കെതിരെ വ്യാജപ്രചാരണവും വിവിധ മത സമൂഹങ്ങൾക്കിടയിൽ സ്പർധ വളർത്തുക എന്ന ലക്ഷ്യത്തോടെ വിവാദ പരാമർശവും നടത്തി എന്നാരോപിച്ചാണ് കെ സുരേന്ദ്രനെതിരെ വെൽഫെയർ പാർട്ടി പരാതി നൽകിയത്.

കെ. സുരേന്ദ്രനെതിരെ കേസെടുക്കണമെന്ന് ആവശ്യപ്പെട്ട് വെൽഫെയർ പാർട്ടി തിരുവനന്തപുരം ജില്ലാ ജനറൽ സെക്രട്ടറി അഡ്വ. ജി. അനിൽകുമാറാണ് കണ്ടോൺമെന്റ് സ്റ്റേഷനിലും സിറ്റി പൊലീസ് കമ്മീഷണർക്കും പരാതി നൽകിയത്. കേരളത്തിലെ മുസ്ലീങ്ങൾ നടത്തുന്ന വിവിധ ഹോട്ടലുകളിൽ പാകം ചെയ്യുന്നത് ഉസ്താക്കന്മാർ തുപ്പിയ ഭക്ഷണമാണെന്ന വ്യാജ ആരോപണമാണ് കെ. സുരേന്ദ്രൻ ഉന്നയിച്ചിരിക്കുന്നതെന്നാണ് പരാതിയിൽ പറയുന്നത്. ഹലാൽ ബോർഡുള്ള ഹോട്ടലുകൾ മതതീവ്രവാദികളുടെ നേതൃത്വത്തിൽ പ്രവർത്തിക്കുന്നവയാണെന്നാണ് സുരേന്ദ്രന്റെ ആരോപണം. ശബരിമലയിൽ പോലും ഹലാൽ ശർക്കരയാണ് വിതരണം ചെയ്യുന്നതെന്ന് യാതൊരു തെളിവുമില്ലാതെയാണ് അദ്ദേഹം പറയുന്നതെന്നും പരാതിയിൽ വ്യക്തമാക്കിയിട്ടുണ്ട്.

മുസ്ലിം സമൂഹത്തിനെതിരെ വിദ്വേഷം പ്രചരിപ്പിച്ച് ഹിന്ദു – മുസ്ലിം – ക്രിസ്ത്യൻ സമുദായങ്ങൾക്കിടയിൽ ഭിന്നതയും ശത്രുതയും വളർത്തുകയും അതുവഴി വർഗീയ ധ്രുവീകരണവുമാണ് ബിജെപി ലക്ഷ്യമിടുന്നത്. വിവാദ പരാമർശത്തിൽ കേരളത്തിലെ മതസമൂഹങ്ങൾ തമ്മിലുള്ള സൗഹാർദാന്തരീക്ഷം തകർക്കുന്നതിനു വേണ്ടി സംഘ്പരിവാർ ബോധപൂർവം സൃഷ്ടിച്ച കെട്ടുകഥയാണ് ഹലാൽ വിവാദമെന്നും ഇതിനെതിരെ ശക്തമായ നിയമനടപടി കൈക്കൊള്ളണമെന്നും പരാതിയിൽ ആവശ്യപ്പെടുന്നുണ്ട്.