General (Page 1,293)

തിരുവനന്തപുരം: കോവിഡ് നിയന്ത്രണങ്ങളിൽ കൂടുതൽ ഇളവുകൾ നൽകി സംസ്ഥാന സർക്കാർ. ഉത്സവങ്ങളുമായി ബന്ധപ്പെട്ട ആചാരപരമായ കലാരൂപങ്ങൾ അനുവദിക്കാനാണ് തീരുമാനം. ഉത്സവങ്ങൾ, രാഷ്രീയ, സാംസ്‌കാരിക, സാമൂഹിക പരിപാടികളുൾപ്പെടെയുള്ള പൊതുചടങ്ങുകൾ എന്നിവയ്ക്ക് തുറന്ന ഇടങ്ങളിൽ പരമാവധി 300 പേരെയും മുറികൾ, ഹാളുകൾ പോലുള്ള അടഞ്ഞ ഇടങ്ങളിൽ പരമാവധി 150 പേരെയും അനുവദിക്കുമെന്ന് മുഖ്യമന്ത്രി പിണറായി വിജയൻ അറിയിച്ചു.

വിവാഹങ്ങൾ, മരണാനന്തര ചടങ്ങുകൾ എന്നിവയ്ക്ക് തുറന്ന ഇടങ്ങളിൽ പരമാവധി 200 ഉം അടഞ്ഞ ഇടങ്ങളിൽ പരമാവധി 100 ഉം പേർ എന്ന നില തുടരും. അനുവദനീയമായ ആളുകളുടെ എണ്ണം ലഭ്യമായ സ്ഥലത്തിന് ആനുപാതികമായിരിക്കണം. ശബരിമലയിൽ കഴിഞ്ഞദിവസം ചില ഇളവുകൾ അനുവദിച്ചിരുന്നു. അവിടെ ഒരു തരത്തിലും ജാഗ്രതക്കുറവ് പാടില്ലെന്നാണ് നിർദ്ദേശം.

സ്‌കൂളുകളിൽ എത്തുന്ന കുട്ടികൾക്ക് കോവിഡ് രോഗ ലക്ഷണങ്ങൾ കണ്ടാൽ ഉടൻ ആരോഗ്യപരിരക്ഷ നൽകാൻ നടപടി എടുക്കണം. കോവിഡാനന്തര രോഗങ്ങളെക്കുറിച്ച് അധ്യാപകരിൽ പൊതു ധാരണ ഉണ്ടാക്കണം. സ്‌കൂളുകൾ പൂർണതോതിൽ തുറക്കുന്ന കാര്യം ഇപ്പോൾ പരിഗണനയിലില്ല. കോവിഡ് ധനസഹായം സമയബന്ധിതമായി പൂർത്തീകരിക്കണമെന്ന് ജില്ലാ കലക്ടർമാരോട് മുഖ്യമന്ത്രി നിർദ്ദേശിച്ചു.

വാക്സിനേഷൻ നിരക്ക് കുറഞ്ഞ പാലക്കാട്, മലപ്പുറം, കോഴിക്കോട് ജില്ലകളിൽ അത് വർധിപ്പിക്കാൻ പ്രത്യേക ശ്രദ്ധ പുലർത്തണമെന്നും മുഖ്യമന്ത്രി അറിയിച്ചു. സംസ്ഥാനത്ത് 97 ശതമാനം പേർ ആദ്യ ഡോസ് വാക്സിനും 70 ശതമാനം പേർ രണ്ടാം ഡോസ് വാക്സിനും സ്വീകരിച്ചിട്ടുണ്ട്. 70 ലക്ഷം പേർക്ക് രണ്ടാം ഡോസ് നൽകാനുണ്ട്. അത് എത്രയും വേഗം പൂർത്തീകരിക്കണമെന്നും അദ്ദേഹം ആവശ്യപ്പെട്ടു.

ന്യൂഡൽഹി: സർക്കാരും ഗവർണറും തമ്മിലുള്ള ഏറ്റുമുട്ടലിൽ പ്രതികരണവുമായി എസ്എഫ്ഐ. സർവകലാശാലകളിലെ ചാൻസലർ പദവി ഗവർണർ ഒഴിയുന്നുവെങ്കിൽ ഒഴിയട്ടെയെന്ന് എസ്എഫ്‌ഐ വ്യക്തമാക്കി.

ഗവർണർ തന്നെ ചാൻസലറായി ഇരിക്കണമെന്ന് ആർക്കാണ് നിർബന്ധമുള്ളതെന്ന് എസ്എഫ്ഐ അഖിലേന്ത്യാ പ്രസിഡന്റ് വി.പി. സാനു ചോദിച്ചു. ചാൻസലർ പദവി ഗവർണറിൽ നിന്ന് മുഖ്യമന്ത്രി ഏറ്റെടുക്കട്ടെയെന്നും അദ്ദേഹം അഭിപ്രായപ്പെട്ടു.’അയ്യോ, അച്ഛാ പോകല്ലേ’ എന്ന് ഗവർണറോട് പറയേണ്ടതില്ലെന്നും അദ്ദേഹം പരിഹസിച്ചു.

ചാൻസലർ പദവി ഒഴിയുമെന്നാണ് അദ്ദേഹം പറയുന്നത്. അദ്ദേഹം ചാൻസലറായി ഇരിക്കണമെന്ന് ആർക്കാണ് നിർബന്ധമുള്ളത്. അദ്ദേഹം അല്ലെങ്കിൽ മറ്റൊരാൾ. അത് മുഖ്യമന്ത്രിയോ അല്ലെങ്കിൽ മറ്റൊരെങ്കിലുമോ എന്ന് നിയമസഭ തീരുമാനിക്കട്ടെ. ഗവർണർ തന്നെയായിരിക്കണം സംസ്ഥാനത്തെ യൂണിവേഴ്സിറ്റികളുടെ എല്ലാം ചാൻസലർ എന്ന് ഭരണഘടനയിൽ പറഞ്ഞിരിക്കുന്നതൊന്നുമല്ലല്ലോയെന്നും അദ്ദേഹം ചോദിക്കുന്നു.

അത്തരത്തിലൊരു നിർദേശം എവിടെയുമില്ല. അതുകൊണ്ട് അദ്ദേഹം പോകുന്നുവെങ്കിൽ പോകട്ടെ. ഇത്തരത്തിൽ നിരന്തരമായി വിവാദമുണ്ടാക്കാനുള്ള ശ്രമമാണ് ഗവർണറുടെ ഭാഗത്ത് നിന്നും ഉണ്ടാകുന്നത്. സംസ്ഥാന സർക്കാരിനെ അടിക്കാനുള്ള വടിയായി, ബിജെപിയുടേയും കോൺഗ്രസിന്റെയും കളിപ്പാവയായി ഗവർണർ മാറരുതെന്ന ആവശ്യവും അദ്ദേഹം മുന്നോട്ടുവെച്ചു.

തിരുവനന്തപുരം: കണ്ണൂർ വിസി പുനർനിയമനത്തിന് ശുപാർശ ചെയ്തത് ഉന്നതവിദ്യാഭ്യാസ മന്ത്രി ആർ ബിന്ദു. കണ്ണൂർ സർവകലാശാലയിലെ അക്കാദമിക് മികവ് മുന്നോട്ട് കൊണ്ട് പോകാൻ പുനർ നിയമനം വേണമെന്നും ഗോപിനാഥ് രവീന്ദ്രന്റെ പേര് മുന്നോട്ട് വയ്ക്കുന്നുവെന്നും വ്യക്തമാക്കി മന്ത്രി ഗവർണർക്ക് നൽകിയ കത്ത് പുറത്തു വന്നു. ഗോപിനാഥ് രവീന്ദ്രന്റെ പേര് മുന്നോട്ട് വയ്ക്കുന്നത് സെർച്ച് കമ്മിറ്റി ഇല്ലാത്തതിനാലാണെന്നാണ് കത്തിൽ വ്യക്തമാക്കുന്നത്.

ഗോപിനാഥ് രവീന്ദ്രന്റെ കാലത്ത് കണ്ണൂർ സർവകലാശാല വലിയ മികവാണ് പുലർത്തിയത്. അതിനാൽ വി.സിയെ പുനർ നിയമിക്കണമെന്നും ബിന്ദും കത്തിൽ ഗവർണറോട് ആവശ്യപ്പെട്ടിരുന്നു. വിഷയത്തിൽ പ്രതിപക്ഷത്തിന്റെ വിമർശനം ശക്തമാകുന്നതിനിടയിലാണ് മന്ത്രി ഗവർണറിന് നൽകിയ കത്ത് പുറത്തു വന്നിരിക്കുന്നത്.

കണ്ണൂർ വിസി പുനർ നിയമനത്തിന് ഗവർണറോട് ആവശ്യപ്പെട്ടത് മന്ത്രിയാണെന്നായിരുന്നു പ്രതിപക്ഷം ആദ്യം മുതൽ തന്നെ ആരോപിച്ചിരുന്നത്. എന്നാൽ വിഷയത്തിൽ പ്രതികരണം നടത്താൻ മന്ത്രി തയ്യാറായിരുന്നില്ല. ഇതിനിടെ കത്ത് പുറത്തു വന്നിരിക്കുന്നത് സർക്കാരിനെ പ്രതിരോധത്തിലാക്കിയിരിക്കുകയാണ്.

തിരുവനന്തപുരം: കോവിഡ് വാക്‌സിനേഷൻ സ്വീകരിക്കാത്ത അധ്യാപകർക്കെതിരെ നിലപാട് കടുപ്പിച്ച് സംസ്ഥാന സർക്കാർ. സർക്കാർ നിർദേശങ്ങൾ പാലിച്ചില്ലെങ്കിൽ അധ്യാപകർക്കെതിരെ കർശന നടപടി സ്വീകരിക്കുമെന്ന് വിദ്യാഭ്യാസ മന്ത്രി വി ശിവൻകുട്ടി മുന്നറിയിപ്പ് നൽകി.

അധ്യാപകർ ആഴ്ചയിലൊരിക്കൽ കോവിഡ് പരിശോധന നടത്തണമെന്നും നിർദേശങ്ങൾ കൃത്യമായി പാലിക്കുന്നുണ്ടോയെന്ന് പരിശോധിക്കുമെന്നും മന്ത്രി അറിയിച്ചു. വാക്സിനെടുക്കാൻ സാധിക്കാത്തതിന് കാരണം രേഖാമൂലം അറിയിക്കാൻ സർക്കാർ അധ്യാപകർക്ക് നിർദേശം നൽകിയിരുന്നുവെന്നും അദ്ദേഹം പറഞ്ഞു.

കോവിഡ് വാക്സിൻ സ്വീകരിക്കാത്ത അധ്യാപകരുടെ പട്ടിക നേരത്തെ സർക്കാർ തയാറാക്കിയിരുന്നു. ഇവർക്ക് സർക്കാർ ഷോക്കോസ് നോട്ടിസ് നൽകുകയും ചെയ്തിരുന്നു. നിലവിൽ ആയിരത്തിലധികം അധ്യാപകർ വാക്സിൻ ഇനിയും എടുത്തിട്ടില്ലെന്നാണ് കണക്കുകൾ വ്യക്തമാക്കുന്നത്. മലപ്പുറത്താണ് ഏറ്റവും കൂടുതൽ അധ്യാപകർ വാക്സിനെടുക്കാനുള്ളത്. സംസ്ഥാനത്ത് സ്‌കൂളുകൾ തുറക്കുന്നതിനു മുൻപ് തന്നെ മാർഗരേഖ തയ്യാറാക്കിയിരുന്നു. വാക്‌സിൻ എടുക്കാത്തവർ ക്യാമ്പസിനകത്ത് പ്രവേശിക്കേണ്ടതില്ലെന്ന് മാർഗരേഖയിൽ വ്യക്തമാക്കിയിട്ടുണ്ടെന്നും അദ്ദേഹം അഭിപ്രായപ്പെട്ടിരുന്നു.

കൊച്ചി: എൻഎസ്എസിന് തിരിച്ചടി. മുന്നാക്ക സമുദായങ്ങളിലെ പിന്നാക്കക്കാരെ കണ്ടെത്താനുള്ള സാമ്പിൾ സർവേയ്ക്ക് സ്റ്റേയില്ലെന്ന് ഹൈക്കോടതി വ്യക്തമാക്കി. എ വി രാമകൃഷ്ണപിള്ള കമ്മിഷൻ ശുപാർശയിൽ തീരുമാനമെടുക്കണമെന്നാണ് ഹൈക്കോടതി സർക്കാരിന് നൽകിയിരിക്കുന്ന നിർദ്ദേശം. ജനുവരി 31 ന് മുൻപ് കോടതിയിൽ റിപ്പോർട്ട് സമർപ്പിക്കണമെന്നും നിർദ്ദേശമുണ്ട്. സാമ്പിൾ സർവേയ്ക്കെതിരായ എൻഎസ്എസിന്റെ ഹർജി ജനുവരി 31 ന് വീണ്ടും കോടതി പരിഗണിക്കും. മുന്നാക്കക്കാരിലെ പിന്നാക്കക്കാരെ കണ്ടെത്താൻ സമഗ്ര സർവേ നടത്തുന്നതിൽ സ്‌റ്റേ ഏർപ്പെടുത്തണമെന്നാവശ്യപ്പെട്ടാണ് എൻഎസ്എസ് ഹർജി ഹർജി സമർപ്പിച്ചത്.

നിലവിൽ നടക്കുന്ന സാമ്പിൾ സർവേ ആർക്കോ വേണ്ടിയുള്ള പ്രഹസനമാണെന്നാണ് എൻഎസ്എസ് പറയുന്നത്. ഭാവിയിൽ ആധികാരിക രേഖയായി മാറേണ്ടതാണ് സർവേ. അതിനാൽ തന്നെ സംവിധാനത്തിലും മാതൃകയിലും യോഗ്യരായ ഉദ്യോഗസ്ഥരെക്കൊണ്ട് വിവര ശേഖരണം നടത്തണമെന്നും എൻഎസ്എസ് ആവശ്യപ്പെടുന്നു. എൻഎസ്എസിന്റെ ആവശ്യങ്ങൾ അടിസ്ഥാന രഹിതമാണെന്ന കമ്മിഷന്റെ കണ്ടെത്തൽ അപലപനീയമാണെന്നും കമ്മിഷൻ നിലപാട് പുനഃപരിശോധിച്ച് സെൻസസ് എടുക്കുന്ന രീതിയിൽ സർവേ പൂർത്തിയാക്കണമെന്നും എൻഎസ്എസ് ഹർജിയിൽ ചൂണ്ടിക്കാട്ടിയിട്ടുണ്ട്.

മുന്നാക്ക സമുദായങ്ങളിലെ പാവപ്പെട്ടവർക്ക് പത്ത് ശതമാനം സംവരണമാണ് ഏർപ്പെടുത്തുന്നത്. 164 മുന്നാക്കസമുദായങ്ങളാണ് സംസ്ഥാനത്തുള്ളതെന്നാണ് കണക്കുകൾ വ്യക്തമാക്കുന്നത്. മുന്നാക്ക സമുദായത്തിൽ സാമ്പത്തികമായി പിന്നോക്കമുള്ളവർക്ക് സംവരണത്തിനുള്ള വാർഷിക വരുമാന പരിധി നാല് ലക്ഷമായാണ് നിശ്ചയിച്ചിരിക്കുന്നത്.