General (Page 1,292)

തിരുവനന്തപുരം: സാമ്പത്തിക പ്രതിസന്ധിക്കിടെ വീണ്ടും അധികാര ധൂർത്തുമായി സർക്കാർ. മുഖ്യമന്ത്രിയ്ക്ക് ഉൾപ്പടെ ഉപയോഗിക്കുന്നതിനായി വീണ്ടും കേരളം ഹെലികോപ്ടർ വാടകയ്ക്കെടുത്തു. കേരള പൊലീസുമായാണ് കരാർ. ഡൽഹി ആസ്ഥാനമായി പ്രവർത്തിക്കുന്ന ചിപ്‌സൺ ഏവിയേഷനുമായാണ്. കേരളാ പോലീസ് കരാറിൽ ഏർപ്പെട്ടിരിക്കുന്നത്. മാസം എൺപത് ലക്ഷം രൂപയാണ് ഹെലികോപ്ടറിന് വാടകയായി നൽകേണ്ടത്. ഈ തുകയിൽ ഇരുപത് മണിക്കൂറാണ് സഞ്ചരിക്കാനാവുക, അധികമായി വരുന്ന ഓരോ മണിക്കൂറിനും 90,000 രൂപ വീതം നൽകണം. ആറ് സീറ്റുള്ള ഹെലികോപ്ടർ മൂന്ന് വർഷത്തേയ്ക്കാണ് വാടകക്കെടുക്കുന്നത്.

ചിപ്‌സൺ ഏവിയേഷനാണ് ഏറ്റവും കുറഞ്ഞ തുകയുടെ ക്വട്ടേഷൻ നൽകിയത്. അടുത്ത വർഷം മുഖ്യമന്ത്രിക്കായി ഇരട്ട എഞ്ചിനുള്ള പുതിയ ഹെലികോപ്ടറെത്തുമെന്ന റിപ്പോർട്ടുകൾ നേരത്തെ പുറത്തു വന്നിരുന്നു. 15 വർഷത്തിലേറെ പഴക്കമില്ലാത്ത ഹെലികോപ്ടറാണ് വി.ഐ.പി യാത്രയ്ക്കായി തിരഞ്ഞെടുക്കുന്നത്. തെരഞ്ഞെടുക്കുമ്പോൾ സുരക്ഷയ്ക്കാണ് ഏറ്റവും അധികം പ്രാധാന്യം നൽകുക.

തമിഴ്‌നാട്, ഒഡീഷ, മഹാരാഷ്ട്ര മുഖ്യമന്ത്രിമാർക്കായി ഹെലികോപ്ടർ സർവീസ് നടത്തുന്നത് ചിപ്‌സൺ ഏവിയേഷനാണ്. വ്യോമ നിരീക്ഷണം, മാവോയിസ്റ്റുകൾക്കായി വനമേഖലയിൽ നിരീക്ഷണം, രക്ഷാപ്രവർത്തനം, അതിർത്തി പ്രദേശങ്ങളിലും തീരദേശത്തും വിനോദ സഞ്ചാരതീർത്ഥാടന മേഖലകളിലും നിരീക്ഷണം, അടിയന്തര ഘട്ടങ്ങളിലെ പൊലീസിന്റെയും വിശിഷ്ട വ്യക്തികളുടെയും യാത്ര തുടങ്ങിയ ആവശ്യങ്ങൾക്കായാണ് പോലീസ് ഹെലികോപ്ടർ വാടകയ്ക്ക് എടുക്കുന്നത്. ഹെലികോപ്ടറിനുള്ള ചെലവ് പൊലീസ് നവീകരണത്തിനുള്ള കേന്ദ്ര ഫണ്ടിൽ നിന്നാണ് ചെലവാക്കുന്നത്.

തിരുവനന്തപുരം: മുല്ലപ്പെരിയാറിൽ പുതിയ ഡാം നിർമ്മിക്കണമെന്ന് ആവശ്യപ്പെട്ട് കേരളാ കോൺഗ്രസ് നേതാക്കൾ നടത്തുന്ന സമരം ഉദ്ഘാടനം ചെയ്ത് പി.ജെ.ജോസഫ് എംഎൽഎ. ലോക്‌സഭയും രാജ്യസഭയും പാസാക്കിയ ഡാം സുരക്ഷാ നിയമം മുല്ലപ്പെരിയാറിന്റെ കാര്യത്തിൽ ബാധകമാക്കണമെന്ന് അദ്ദേഹം ആവശ്യപ്പെട്ടു. മരം മുറി ഉത്തരവിനു പിന്നിൽ ഉന്നതരാണെന്നും ഇതുമായി ബന്ധപ്പെട്ട ഉദ്യോഗസ്ഥന്റെ സസ്‌പെൻഷൻ ഉടൻ പിൻവലിച്ചത് അതുകൊണ്ടാണെന്നും അദ്ദേഹം കുറ്റപ്പെടുത്തി.

മുഖ്യമന്ത്രിയും വനം മന്ത്രിയും അറിയാതെ ഉത്തരവ് ഇറങ്ങില്ല. മരം മുറി വിഷയത്തിൽ മുഖ്യമന്ത്രി മൗനം തുടരുകയാണ്. മുല്ലപ്പെരിയാർ ഡാമിന്റെ ബലക്ഷയത്തെക്കുറിച്ച് ആദ്യം പറഞ്ഞത് കേന്ദ്ര ജല കമ്മീഷനാണ്. മുല്ലപ്പെരിയാർ ഡാമിനെ സംബന്ധിച്ച രണ്ടു പഠന റിപ്പോർട്ടുകൾ അണക്കെട്ടിന്റെ ബലക്ഷയം ചൂണ്ടിക്കാട്ടിയിട്ടുള്ളതാണെന്ന് അദ്ദേഹം വ്യക്തമാക്കി. രണ്ടു ദിവസം കൊണ്ട് മുല്ലപ്പെരിയാറിന്റെ വൃഷ്ടി പ്രദേശത്ത് 65 സെന്റിമീറ്റർ മഴയുണ്ടാകാൻ സാധ്യത നിലനിൽക്കുന്നതായും അങ്ങനെ സംഭവിച്ചാൽ അണക്കെട്ട് 136 അടി ജലനിരപ്പിൽ നിൽക്കുമ്പോൾ പോലും ജലനിരപ്പ് 160 അടിക്കു മുകളിൽ ഉയർന്ന് അണക്കെട്ടിനു മുകളിലൂടെ 11 മണിക്കൂറിൽ കൂടുതൽ ജലം ഒഴുകുമെന്നും അങ്ങനെ ഉണ്ടായാൽ അണക്കെട്ട് തകരുമെന്നും ഡോ. ഗോസൈന്റെ റിപ്പോർട്ടിൽ പറഞ്ഞിട്ടുണ്ടെന്നും അദ്ദേഹം പറഞ്ഞു.

തമിഴ്നാടിനു കത്ത് എഴുതിയതു കൊണ്ടു മാത്രം കാര്യമില്ല. മുല്ലപ്പെരിയാർ വിഷയത്തിൽ സർക്കാർ ഉണർന്നു പ്രവർത്തിക്കണമെന്നും അദ്ദേഹം ആവശ്യപ്പെട്ടു.

കൊച്ചി: സംസ്ഥാനത്ത് ഭീതിതമായ സാഹചര്യമാണെന്ന് ഹൈക്കോടതി. ആളുകളുടെ കാൽ വെട്ടിയെടുക്കുന്നു, അതു നടുറോഡിൽ എറിയുന്നു, എത്ര ഭീതിതമായ സാഹചര്യമാണിതെന്നും എവിടേക്കാണ് നമ്മുടെ പോക്കെന്നും ഹൈക്കോടതി ചോദിക്കുന്നു. കഴിഞ്ഞ ദിവസം പന്ത്രണ്ടു പേർ ചേർന്ന് ഒരാളെ വെട്ടിക്കൊന്ന് കാൽ വെട്ടി നടുറോഡിൽ എറിഞ്ഞതു പരാമർശിച്ചു കൊണ്ടായിരുന്നു കോടതിയുടെ പരാമർശം. പട്ടിക വിഭാഗക്കാർക്കു ഭൂമി അനുവദിക്കുന്നതുമായി ബന്ധപ്പെട്ട ഒരു കൂട്ടം ഹർജികൾ പരിഗണിക്കുന്നതിനിടെയാണ് കോടതിയുടെ ഭാഗത്ത് നിന്നും നിർണായക പരാമർശം ഉണ്ടായത്.

ഭീതിപ്പെടുത്തുന്ന സാഹചര്യമാണ് സംസ്ഥാനത്തെന്ന് ജസ്റ്റിസ് ദേവൻ രാമചന്ദ്രൻ ചൂണ്ടിക്കാട്ടി. അവർ മയക്കുമരുന്നിന് അടിമകളായിരിക്കാം. എവിടേക്കാണ് നമ്മുടെ പോക്കെന്ന് ചിന്തിക്കണമെന്നും കോടതി ചൂണ്ടിക്കാട്ടി. എല്ലാവർക്കും വീടു നൽകുമെന്ന് സർക്കാർ പറയുന്നുണ്ട്. എന്നാൽ അവരുടെ ഉപജീവനം സർക്കാർ എങ്ങനെ ഉറപ്പാക്കുമെന്ന ചോദ്യവും കോടതി ഉന്നയിച്ചു. കേരളത്തിൽ മറ്റ് സംസ്ഥാനങ്ങളിൽനിന്നുള്ള അൻപതു ലക്ഷത്തിലേറെ പേർ ജോലി ചെയ്യുന്നുണ്ട്. എന്നാൽ ഇവിടത്തുകാർക്കു ജോലിയില്ലാത്ത സ്ഥിതിയുണ്ടെന്നും ഇതാണ് യുവാക്കളെ മയക്കുമരുന്നിലും കുറ്റകൃത്യത്തിലും എത്തിക്കുന്നതെന്നും കോടതി അഭിപ്രായപ്പെട്ടു.

കൊച്ചി: ആലുവ സി ഐക്കെതിരെ നടപടി ആവശ്യപ്പെട്ട് സമരം ചെയ്ത കോൺഗ്രസുകാർക്കെതിരെ തീവ്രവാദ ബന്ധം ചുമത്തി കേസെടുത്ത പോലീസ് നടപടിയിൽ വിശദീകരണം തേടി മുഖ്യമന്ത്രി പിണറായി വിജയൻ. റൂറൽ എസ് പി കാർത്തിക്കിനെ വിളിച്ചുവരുത്തിയാണ് സംഭവത്തിൽ മുഖ്യമന്ത്രി വിശദീകരണം ആവശ്യപ്പെട്ടിരിക്കുന്നത്. സംഭവത്തിന്റെ കേസ് ഫയലുകൾ അദ്ദേഹം വിശദമായി പരിശോധിക്കുകയും ചെയ്തു. തുടർന്ന് മുഖ്യമന്ത്രി കേസ് അന്വേഷിച്ച ഉദ്യോഗസ്ഥരായ സ്‌പെഷ്യൽ ബ്രാഞ്ച് എസ് പി, ഡി വൈ എസ് പി എന്നിവരെ വിളിച്ചു വരുത്തുകയും വിശദീകരണം ചോദിക്കുകയുമായിരുന്നു.

മോഫിയ പർവീൺ ആത്മഹത്യ ചെയ്ത സംഭവത്തിൽ സംഭവത്തിൽ ആലുവ സി ഐക്കെതിരെ നടപടി ആവശ്യപ്പെട്ടാണ് കോൺഗ്രസ് പ്രവർത്തകർ സമരം ചെയ്തത്. സമരം ചെയ്ത കോൺഗ്രസ് പ്രവർത്തകരുടെ കസ്റ്റഡി റിപ്പോർട്ടിലാണ് പൊലീസ് തീവ്രവാദ ബന്ധം ആരോപിച്ചത്. സമരത്തിന് നേതൃത്വം നൽകിയ ആലുവ എം എൽ എ അൻവർ സാദത്ത് ഉൾപ്പെടെയുള്ളവർ സംഭവത്തിൽ ഇടപ്പെട്ടിരുന്നു. പിന്നീട് രണ്ട് പൊലീസ് ഉദ്യോഗസ്ഥരെ സസ്‌പെൻഡ് ചെയ്യുകയും ചെയ്തിരുന്നു. ഇതിന് പിന്നാലെയാണ് മുഖ്യമന്ത്രിയുടെ ഇടപെടൽ. ആലുവ ഗസ്റ്റ് ഹൗസിലേക്ക് മുഖ്യമന്ത്രി ഉദ്യോഗസ്തരെ നേരിട്ട് വിളിച്ചു വരുത്തുകയായിരുന്നു.

അതേസമയം മുഖ്യമന്ത്രിയും ഉദ്യോഗസ്ഥരും തമ്മിലുള്ള കൂടിക്കാഴ്ചക്കു പിന്നാലെ ആലുവ സി ഐ ബൈജു പോൾ അവധിയിൽ പ്രവേശിച്ചു. വ്യക്തിപരമായ കാരണങ്ങളാലാണ് സി ഐ അവധിയിൽ പ്രവേശിച്ചതെന്നാണ് ഔദ്യോഗിക വൃത്തങ്ങൾ നൽകുന്ന വിശദീകരണം.