General (Page 1,280)

പാലക്കാട്: ആർ.എസ്.എസ് പ്രവർത്തകൻ സഞ്ജിത്തിനെ കൊലപ്പെടുത്തിയ കേസിലെ പ്രതികൾക്കെതിരെ ലുക്ക് ഔട്ട് നോട്ടീസ് പുറത്തിറക്കി പോലീസ്. നാല് പ്രതികൾക്കെതിരെയാണ് പോലീസ് ലുക്ക് ഔട്ട് നോട്ടീസ് പുറപ്പെടുവിച്ചത്. എസ്.ഡി.പി.ഐ- പോപ്പുലർ ഫ്രണ്ട് പ്രവർത്തകരായ ഹാറൂൺ, നൗഫൽ, ഇബ്രാഹീം, ഷംസീർ എന്നീ പ്രതികളുടെ പേരിലാണ് ലുക്ക് ഔട്ട് നോട്ടീസ് പുറപ്പെടുവിച്ചത്.

അതേസമയം കൊലയാളികൾക്ക് ആയുധം തയ്യാറാക്കി നൽകിയ കാമ്പ്രത്ത്ചളള ഷാജഹാനെ പോലീസ് പിടികൂടി. കേസിൽ പിടിയിലായ പ്രതി നസീറിന്റെ സുഹൃത്താണ് ഷാജഹാൻ. മുതലമട പഞ്ചായത്ത് സെക്രട്ടറിയായ നസീറാണ് കൊലപാകത്തിലെ പ്രതികൾക്ക് വാഹനം എത്തിച്ചു നൽകിയത്.

കേസുമായി ബന്ധപ്പെട്ട് ഇതുവരെ നാലു പേരെയാണ് പോലീസ് അറസ്റ്റ് ചെയ്തത്. 12 പേരെയാണ് കേസിൽ പ്രതിചേർത്തിരിക്കുന്നത്. മറ്റുള്ളവർക്കായുള്ള അന്വേഷണം പുരോഗമിക്കുകയാണ്.

തിരുവനന്തപുരം: സംവിധായകൻ രഞ്ജിത്ത് കേരള ചലച്ചിത്ര അക്കാദമി ചെയർമാനായേക്കും. ഇതുസംബന്ധിച്ച ഔദ്യോഗിക പ്രഖ്യാപനം ഉടൻ ഉണ്ടായേക്കുമെന്നാണ് വിവരം. മന്ത്രിസഭയാണ് ഇതുസംബന്ധിച്ച തീരുമാനമെടുത്തത്. സംവിധായകൻ കമൽ ആണ് ചലച്ചിത്ര അക്കാദമിയിലെ നിലവിലെ ചെയർമാൻ. 2016 ലാണ് കമലിനെ ചെയർമാനായി തെരഞ്ഞെടുത്തത്.

അതേസമയം ചെയർമാൻ സ്ഥാനത്തേക്കുള്ള ഔദ്യോഗിക പ്രഖ്യാപനത്തിന് ശേഷം വിഷയത്തിൽ പ്രതികരണം നടത്താമെന്ന് രഞ്ജിത്ത് അറിയിച്ചു. 1987 ൽ ഒരു ‘മെയ് മാസ പുലരി’ എന്ന സിനിമയിലൂടെയാണ് രഞ്ജിത്ത് സിനിമ രചനയിലേക്ക് എത്തുന്നത്. 2001 ൽ ദേവാസുരത്തിന്റെ രണ്ടാം ഭാഗമായ രാവണപ്രഭു എന്ന ചിത്രം സംവിധാനം ചെയ്താണ് അദ്ദേഹം സംവിധാനമേഖലയിലേക്ക് കടന്നു വന്നത്. നിരവധി സിനിമകളിൽ അദ്ദേഹം വേഷമിടുകയും ചെയ്തിട്ടുണ്ട്.

തിരുവനന്തപുരം: രാഷ്ട്രപതി രാംനാഥ് കോവിന്ദിന്റെ തിരുവനന്തപുരം സന്ദർശനത്തിനിടെ സുരക്ഷാ വീഴ്ച്ച. തിരുവനന്തപുരം മേയറുടെ വാഹനം രാഷ്ട്രപതിയുടെ വാഹന വ്യൂഹത്തിലേക്ക് കയറ്റാൻ ശ്രമം നടന്നു. സംഭവം കഴിഞ്ഞ ദിവസം രാഷ്ട്രപതിയുടെ വാഹനം വിമാനത്താവളത്തിൽ നിന്ന് പൂജപ്പുരയിലേക്ക് വരവെയാണ് മേയർ ആര്യ രാജേന്ദ്രന്റെ കാർ രാഷ്ട്രപതിയുടെ വാഹന വ്യൂഹത്തിലേക്ക് കടന്നു കയറിയത്.

തുമ്പ സെന്റ് സേവ്യേർസ് മുതൽ മേയറുടെ വാഹനം രാഷ്ട്രപതിയുടെ വാഹന വ്യൂഹത്തിന് സമാന്തരമായി സഞ്ചരിച്ചിരുന്നു. ജനറൽ ആശുപത്രിയുടെ ഭാഗത്തെത്തിയപ്പോൾ മേയറുടെ വാഹനം രാഷ്ട്രപതിയുടെ വാഹന വ്യൂഹത്തിന്റെ ഉള്ളിലേക്ക് കയറ്റി. പതിനാല് വാഹനങ്ങളായിരുന്നു രാഷ്ട്രപതിയ്ക്ക് അകമ്പടി സേവിക്കാനിരിക്കുന്നത്.

മേയറിന്റെ വാഹനം എട്ടാമത്തെ വാഹനത്തിന്റെ പുറകിലായതോടെ വാഹനങ്ങൾക്ക് പെട്ടെന്ന് ബ്രേക്ക് പിടിക്കേണ്ടി വന്നു. തലനാരിഴയക്കാണ് അപകടത്തിൽ നിന്നും രക്ഷപ്പെട്ടത്. പ്രോട്ടോക്കോൾ പ്രകാരം രാഷ്ട്രപതിയുടെ വാഹന വ്യൂഹത്തിന് ഉള്ളിലേക്ക് മറ്റൊരു വാഹനത്തിന് കയറാനുള്ള അനുവാദമില്ല. എന്നാൽ പ്രോട്ടോകോൾ ലംഘനം നടന്നിട്ടുണ്ടോയെന്ന് അറിയില്ലെന്നാണ് ആര്യാ രാജേന്ദ്രൻ അറിയിച്ചത്.

തിരുവനന്തപുരം: പോത്തൻകോട് അച്ഛനും മകൾക്കും നേരെ ഗുണ്ടാ ആക്രമണം നടന്ന സംഭവത്തിൽ പ്രതികരണവുമായി മന്ത്രി ജി ആർ അനിൽ. സംഭവം നിർഭാഗ്യകരമാണെന്ന് അദ്ദേഹം പറഞ്ഞു. പോലീസ് കൂടുതൽ ജാഗ്രതയോടെ നീങ്ങണമെന്നും അദ്ദേഹം ആവശ്യപ്പെട്ടു.

വിഷയത്തിൽ ഗൗരവമായ പോലീസ് ഇടപെടലിന് അപ്പോൾ തന്നെ നിർദേശം നൽകിയിരുന്നു. ഇത്തരം സംഭവങ്ങൾ ആവർത്തിക്കാതിരിക്കാൻ നടപടി സ്വീകരിക്കണം. പോലീസിന് മേൽ രാഷ്ട്രീയ നിയന്ത്രണത്തിനും മേൽനോട്ടത്തിനും കുറവില്ല. രാഷ്ട്രീയ കൊലപാതകങ്ങൾ സംബന്ധിച്ച് പൊലീസിന് വീഴ്ച ഉണ്ടായെന്ന ആരോപണത്തിൽ കഴമ്പില്ലെന്നും ഇത്തരം ആക്ഷേപങ്ങൾ ഇത്തരം സംഭവങ്ങൾ ഉണ്ടാകുമ്പോൾ പതിവാണെന്നും അദ്ദേഹം ചൂണ്ടിക്കാട്ടി.

പോലീസ് ജാഗ്രതയോടെ നീങ്ങിയില്ലെങ്കിൽ, പിന്നീട് എന്തെന്ന് അപ്പോൾ പറയാമെന്ന് അദ്ദേഹം മുന്നറിയിപ്പ് നൽകുകയും ചെയ്തു. അതേസമയം കേസിൽ പ്രതികൾ ഒളിവിലാണെന്നാണ് പോലീസ് വ്യക്തമാക്കുന്നത്. പോത്തൻകോട് നടുറോഡിൽ വെച്ചാണ് അച്ഛനും മകൾക്കും നേരെ ഗുണ്ടാ ആക്രമണം ഉണ്ടായത്.

അച്ഛനും മകളും സഞ്ചരിച്ച വാഹനം തടഞ്ഞുനിർത്തി നാലംഗ ഗുണ്ടാസംഘം ആക്രമണം നടത്തുകയായിരുന്നു. കാറിൽ പ്രധാനറോഡിലൂടെ വരികയായിരുന്നു അച്ഛനും മകളും. ഇതിനിടെ വാഹനം തിരിക്കാൻ ശ്രമിക്കുകയായിരുന്ന ഗുണ്ടാസംഘം ഇവരോട് കാർ പിന്നോട്ടെടുക്കാൻ ആവശ്യപ്പെട്ടു. എന്നാൽ പ്രധാനറോഡിൽ നിരവധി വാഹനങ്ങളുണ്ടായതിനാൽ കാർ പിന്നോട്ടെടുക്കാൻ കഴിഞ്ഞില്ല. ഇതാണ് ഗുണ്ടാസംഘത്തെ പ്രകോപിപ്പിച്ചത്. തുടർന്ന് ഗുണ്ടകൾ കാറിൽ നിന്നിറങ്ങി ഇവരെ ആക്രമിക്കുകയായിരുന്നു. അച്ഛനെ മർദ്ദിക്കുന്നത് തടയാൻ ശ്രമിച്ചപ്പോഴാണ് മകൾക്ക് നേരെ ആക്രമണം ഉണ്ടായത്.

ഗുണ്ടാസംഘത്തിനെതിരെ ഇവർ പോലീസിൽ പരാതി നൽകിയിട്ടുണ്ട്. മകളെ കടന്നു പിടിക്കാൻ ശ്രമിച്ചതായും ആരോപണമുണ്ട്. പള്ളിപ്പുറം സ്വർണക്കവർച്ച കേസിലെ പ്രതി ഫൈസൽ അടക്കമുള്ളവരാണ് ഗുണ്ടാസംഘത്തിലുണ്ടായിരുന്നതെന്നാണ് സൂചന.

കോട്ടയം: പെൺകുട്ടികളുടെ വിവാഹപ്രായം ഉയർത്തുന്ന വിഷയത്തിൽ നിലപാട് വ്യക്തമാക്കി ഓർത്തഡോക്സ് സഭ. പെൺകുട്ടികളുടെ വിവാഹപ്രായം 18 വയസിൽ നിന്നും 21 വയസാക്കി ഉയർത്തുന്നതിൽ ഓർത്തഡോക്‌സ് സഭയ്ക്ക് യാതൊരുവിധ എതിർപ്പുമില്ലെന്ന് സഭാ പരമാദ്ധ്യക്ഷൻ മാത്യൂസ് ത്രിതീയൻ കതോലിക്ക ബാവ വ്യക്തമാക്കി.

21 വയസാണ് പുരുഷന്മാരുടെ വിവാഹ പ്രായം. അതിനാൽ പെൺകുട്ടികൾക്കും 21 ആക്കി ഏകീകരിക്കുന്നതിൽ സഭയ്ക്ക് എതിർപ്പില്ലെന്നും അദ്ദേഹം അറിയിച്ചു. അമേരിക്കയിലും യൂറോപ്പിലുമുള്ള സഭയിൽ കുട്ടികൾ 40 വയസ്സായാലും വിവാഹത്തിന് തയ്യാറാകുന്നില്ലെന്നാണ് പ്രശ്നമെന്നും അദ്ദേഹം ചൂണ്ടിക്കാട്ടി.

അതേസമയം സഭാ തർക്കവുമായി ബന്ധപ്പെട്ടും അദ്ദേഹം പ്രതികരിച്ചു. നിയമം കൊണ്ടുവരുന്ന കാര്യം സർക്കാർ പറഞ്ഞിട്ടില്ല. ഇക്കാര്യത്തിൽ സമന്വയം ഉണ്ടാകുമെന്നാണ് പ്രതീക്ഷിക്കുന്നത്. തർക്കം നിലനിൽക്കുന്നിടത്ത് കോടതി വിധി നടപ്പിലാക്കാൻ പോലീസ് സഹായിക്കുമെന്ന് കരുതുന്നുവെന്നും അദ്ദേഹം അഭിപ്രായപ്പെട്ടു.