General (Page 1,278)

തിരുവനന്തപുരം: കെ റെയിൽ പദ്ധതിയുമായി എൽഡിഎഫ് സർക്കാർ മുന്നോട്ടുപോകുമ്പോഴും ഇടതു ചേരിയിൽ ഭിന്നത രൂക്ഷമാകുന്നു. ജനങ്ങളുമായി ചർച്ചചെയ്യാതെ മുന്നോട്ട് പോകുന്നത് ജനാധിപത്യ വിരുദ്ധമാണെന്ന് ശാസ്ത്ര സാഹിത്യ പരിഷത്തിന്റെ വിമർശനം. കെ റെയിൽ പദ്ധതിയുമായി ബന്ധപ്പെട്ട് ഇടത് സംഘടനയായ ശാസ്ത്ര സാഹിത്യ പരിഷത്ത് ഉയർത്തുന്ന വിയോജിപ്പുകൾ പരിശോധിക്കുമെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ അറിയിച്ചു.

ജനാധിപത്യ വിരുദ്ധമായി കേരളത്തിൽ അങ്ങോളമിങ്ങോളം കല്ലുകൾ നാട്ടി അതിർത്തി നിർണയിക്കുന്ന പ്രവർത്തനങ്ങളിൽ നിന്ന് കെ.റെയിൽ അധികാരികളും കേരള സർക്കാറും പിൻവാങ്ങണമെന്നും പരിഷത്ത് പ്രസിഡന്റ് ഒ.എം. ശങ്കരൻ, ജനറൽ സെക്രട്ടറി പി.ഗോപകുമാർ എന്നിവർ അറിയിച്ചു. എൽ.ഡി.എഫ് സർക്കാർ അഭിമാന പദ്ധതിയായി കണക്കാക്കുന്ന കെ. റെയിലിനെതിരെ നിലപാട് കർക്കശമാക്കിയാണ് ഇടത് അനുകൂല ജനകീയ ശാസ്ത്ര സംഘടനയായ കേരള ശാസ്ത്ര സാഹിത്യ പരിഷത്ത് രംഗത്ത് വന്നത് റെയിൽവേ ലൈനിന്റെ അലൈന്മെന്റ് കൃത്യമായി നിർണയിക്കുകയോ പദ്ധതിയുടെ വിശദമായ പ്രോജക്ട് റിപ്പോർട്ട്, പാരിസ്ഥിതിക ആഘാത പഠനം, സാമൂഹിക ആഘാത പഠനം തുടങ്ങിയവ ജനങ്ങൾക്കിടയിൽ ചർച്ച നടത്തുകയോ ചെയ്തിട്ടില്ലെന്ന ആക്ഷേപവും ഉയരുന്നുണ്ട്.

വിദേശ ഫണ്ടിങ് ഏജൻസികളിൽ നിന്ന് വായ്പ ലഭിക്കാനാണ് തിരക്കിട്ട് അതിർത്തി നിർണയിക്കുന്നതെന്ന കെ. റെയിൽ അധികാരികളുടെ വിശദീകരണം പ്രതിഷേധാർഹമാണ്. എല്ലാ വിഭാഗം ജനങ്ങളെയും ഉൾക്കൊള്ളുന്നതും സാമൂഹിക നീതിക്ക് ഊന്നൽ നൽകുന്നതുമാണ് കേരളം അനുവർത്തിച്ചു വരുന്ന വികസന സമീപനം. ഈ സമീപനത്തെയാണ് കേരള വികസന മാതൃകയായി കണക്കാക്കുന്നത്. ഇതിനകം ലഭ്യമായ വസ്തുതകളും വിവരങ്ങളും വെച്ച് പരിശോധിക്കുമ്പോൾ കേരള വികസനത്തിനായിട്ടുള്ള പ്രവർത്തനങ്ങളിൽ ഇപ്പോൾ മുൻഗണന നൽകേണ്ട പദ്ധതിയല്ല കെ.റെയിലെന്നും പരിഷത്ത് ചൂണ്ടിക്കാട്ടുന്നു.

തിരുവനന്തപുരം: സംസ്ഥാന സർക്കാരിന്റെ സ്വപ്‌ന പദ്ധതി കെ റെയിലിന് പിന്തുണ നൽകാൻ ഉപാധി മുന്നോട്ടുവെച്ച് സിപിഐ. പദ്ധതിയുടെ വിശദമായ രൂപരേഖ പുറത്തുവിടണമെന്ന് ആവശ്യപ്പെടാനാണ് സിപിഐയുടെ തീരുമാനം. ഇക്കാര്യം ഉഭയകക്ഷി ചർച്ചയിൽ സിപിഎമ്മിനെ അറിയിക്കുമെന്നും സിപിഐ വൃത്തങ്ങൾ വ്യക്തമാക്കുന്നു.

കഴിഞ്ഞയാഴ്ച ചേർന്ന സി.പി.ഐ സംസ്ഥാന കൗൺസിലിൽ കെ.റെയിലിനെതിരെ രൂക്ഷ വിമർശനം ഉയർന്നിരുന്നു. മുൻമന്ത്രി വി.എസ് സുനിൽകുമാർ ഉൾപ്പടെയുള്ള ആളുകൾ പദ്ധതിക്കെതിരെ പരസ്യമായി രംഗത്തെത്തിയിരുന്നു. തുടർന്നാണ് പദ്ധതിയെ പിന്തുണയ്ക്കാനായി ഉപാധിവെയ്ക്കാൻ സിപിഐ തീരുമാനിച്ചത്. അതേസമയം നേരത്തെ സി.പി.എം അനുകൂല സംഘടനയായിരുന്ന കേരള ശാസ്ത്ര സാഹിത്യ പരിഷത്തും ഡി.പി.ആർ പുറത്തുവിടണമെന്ന് നേരത്തെ ആവശ്യപ്പെട്ടിരുന്നു.

കെ റെയിലിന്റെ ഡിപിആർ പുറത്തുവിടാൻ സർക്കാർ ഇതുവരെ തയ്യാറായിട്ടില്ല. ഡി.പി.ആർ ഒരു രഹസ്യ രേഖയാണെന്നും ഇത് പൊതുമണ്ഡലത്തിൽ വരുന്നത് പദ്ധതിയുടെ സുരക്ഷയെ ബാധിക്കുമെന്നുമാണ് കെ.റെയിൽ എം.ഡി ഉൾപ്പടെയുള്ളവരുടെ വിശദീകരണം.

തിരുവനന്തപുരം: രാജ്യത്ത് ഒറ്റ വോട്ടർ പട്ടിക എന്ന കേന്ദ്ര സർക്കാരിന്റെ നിർദ്ദേശം നടപ്പാക്കാൻ പ്രായോഗിക തടസ്സങ്ങളുണ്ടെന്ന് സംസ്ഥാന തിരഞ്ഞെടുപ്പ് കമ്മിഷൻ കേന്ദ്ര തിരഞ്ഞെടുപ്പ് കമ്മിഷനെ അറിയിക്കാൻ സാധ്യത. പാർലമെന്റ്, നിയമസഭ, തദ്ദേശഭരണ തിരഞ്ഞെടുപ്പുകൾക്ക് ഒറ്റവോട്ടർപട്ടിക എന്ന നിർദ്ദേശത്തിൽ രാഷ്ട്രീയ കക്ഷികൾക്കുള്ള നിലപാടിനെ കുറിച്ചും തെരഞ്ഞെടുപ്പ് കമ്മീഷൻ അന്വേഷിക്കുമെന്നാണ് വിവരം.

ലോക്സഭാ, നിയമസഭാ തിരഞ്ഞെടുപ്പുകൾക്കായി കേന്ദ്ര തിരഞ്ഞെടുപ്പ് കമ്മിഷൻ നിശ്ചയിക്കുന്ന വോട്ടർപ്പട്ടികയും തദ്ദേശ തിരഞ്ഞെടുപ്പിന് അതാത് സംസ്ഥാന കമ്മിഷനുകൾ നിശ്ചയിക്കുന്ന വോട്ടർപ്പട്ടികയുമാണ് നിലവിലുള്ളത്. രണ്ടിനും വോട്ടർപ്പട്ടിക തയ്യാറാക്കുന്ന രീതിയിലും വോട്ടർപ്പട്ടികയിലും വ്യത്യാസമുണ്ട്. ഒറ്റ വോട്ടർ പട്ടികയായി പുനഃക്രമീകരിക്കുമ്പോൾ, തദ്ദേശ വാർഡ് തലത്തിൽ ഇടയ്ക്കിടെയുണ്ടാകുന്ന ഉപതിരഞ്ഞെടുപ്പുകളിൽ സംസ്ഥാന കമ്മിഷന് വോട്ടർപ്പട്ടിക പുതുക്കൽ വെല്ലുവിളിയാകും.

ഒരു നിശ്ചിത വാർഡിലേക്ക് മാത്രമായി വോട്ടർപ്പട്ടിക പുതുക്കി നിശ്ചയിക്കുക അസാദ്ധ്യമാണ്. നിയമസഭാ മണ്ഡല തലത്തിലെ ബൂത്തടിസ്ഥാനത്തിലുള്ള വോട്ടർപ്പട്ടിക മാത്രമാകും പൊതുവായി നിലവിലുണ്ടാകുക എന്നിരിക്കെ, മൊത്തത്തിൽ വോട്ടർപ്പട്ടിക പുതുക്കി നിശ്ചയിക്കുകയെന്നത് അപ്രായോഗികമാണെന്ന് സംസ്ഥാന തെരഞ്ഞെടുപ്പ് കമ്മിഷണർ എ. ഷാജഹാൻ അഭിപ്രായപ്പെട്ടു. പട്ടിക ക്രമീകരണം തീർത്തും വ്യത്യസ്തം തദ്ദേശ തിരഞ്ഞെടുപ്പിൽ വോട്ടർ പട്ടിക ക്രമീകരിക്കുന്നത് ഓരോ വാർഡിലെയും ബൂത്തുകൾ കണക്കാക്കിയാണ്.

നിയമസഭാ മണ്ഡലത്തിനകത്ത് വരുന്ന നിശ്ചിതയെണ്ണം ബൂത്തുകൾ കണക്കാക്കി അതിന്റെ അടിസ്ഥാനത്തിലാണ് നിയമസഭാ, ലോക്സഭാ തെരഞ്ഞെടുപ്പുകൾക്ക് പട്ടിക ക്രമീകരിച്ചുവരുന്നത്. രണ്ടും രണ്ടുതരം ബൂത്തുകളാണ്. ഇതടക്കമുള്ള പ്രായോഗിക ബുദ്ധിമുട്ടുകൾ കേന്ദ്ര തിരഞ്ഞെടുപ്പു കമ്മിഷന്റെ ശ്രദ്ധയിൽപ്പെടുത്താനാണ് തെരഞ്ഞെടുപ്പ് കമ്മീഷന്റെ തീരുമാനം.

കണ്ണൂർ: പ്രതിപക്ഷത്തിനെതിരെ രൂക്ഷ വിമർശനവുമായി മുഖ്യമന്ത്രി പിണറായി വിജയൻ. നാടിന്റെ വികസനത്തിനെതിരെയാണ് പ്രതിപക്ഷം നിൽക്കുന്നതെന്ന് അദ്ദേഹം പറഞ്ഞു. എതിർപ്പുണ്ടെന്നു കരുതി കെ റെയിൽ പദ്ധതിയിൽ നിന്നു പിന്മാറില്ലെന്നു മുഖ്യമന്ത്രി വ്യക്തമാക്കി. കണ്ണൂരിൽ സിപിഎം സമ്മേളനത്തിൽ സംസാരിക്കവെയാണ് അദ്ദേഹത്തിന്റെ പരാമർശം.

കെ റെയിൽ പദ്ധതി ഇപ്പോൾ വേണ്ട എന്നാണ് പ്രതിപക്ഷം പറയുന്നത്. ഇപ്പോൾ ഇല്ല എങ്കിൽ പിന്നെ എപ്പോൾ എന്നതാണ് ചോദ്യം. ഗെയിലും ദേശീയപാതയും നടപ്പാക്കിയില്ലേയെന്നും അദ്ദേഹം ചോദിക്കുന്നു. ഒരു നാടിനെ ഇന്നിൽ തളച്ചിടാൻ നോക്കരുത്. വരുന്ന തലമുറയുടെ ശാപം ഉണ്ടാക്കാൻ ഇടയാക്കരുത്. നമ്മുടെ ഇച്ഛാശക്തിക്ക് മുന്നിൽ മഹാമാരിക്ക് പോലും അടിയറവ് പറയേണ്ടി വന്നു. കെ റെയിൽ പദ്ധതിയുടെ എതിർപ്പിന്റെ അടിസ്ഥാനം എന്താണെന്നും അദ്ദേഹം ചോദിച്ചു. നിങ്ങളുള്ളപ്പോൾ വേണ്ട എന്നു മാത്രമാണ് യുഡിഎഫ് പറയുന്നതെന്നും അദ്ദേഹം അറിയിച്ചു.

മുസ്ലിം ലീഗ് സമൂഹത്തിൽ വർഗീയനിറം പകർത്താൻ നോക്കുകയാണ്. വഖഫ് വിഷയത്തിൽ ഈ നീക്കമാണു നടന്നതെന്നു അദ്ദേഹം അഭിപ്രായപ്പെട്ടു. ഒമിക്രോണിൽ നല്ല ജാഗ്രത കാണിക്കണം. വാക്‌സിനെടുക്കാത്തവർ എത്രയും വേഗം സ്വീകരിക്കണമെന്നും അദ്ദേഹം അഭ്യർത്ഥിച്ചു. ബിജെപിയെ നേരിടുന്നതിൽ പ്രാദേശിക പാർട്ടികളെ പ്രോത്സാഹിപ്പിക്കുകയാണ് വേണ്ടത്. അതിനൊപ്പം കമ്യൂണിസ്റ്റ് പാർട്ടിയുണ്ടാകുമെന്നും അദ്ദേഹം കൂട്ടിച്ചേർത്തു.