General (Page 1,277)

ബംഗളൂരു: കർണാടകയിലും രാത്രികാല കർഫ്യു പ്രഖ്യാപിച്ചു. ഡിസംബർ 28 മുതൽ പത്ത് ദിവസത്തേക്കാണ് രാത്രികാല കർഫ്യു. രാത്രി പത്ത് മണി മുതൽ പുലർച്ചെ അഞ്ച് മണി വരെയാണ് കർഫ്യൂ പ്രഖ്യാപിച്ചതെന്ന് അധികൃതർ അറിയിച്ചു. പുതുവത്സരാഘോഷങ്ങൾക്കായി എല്ലാ പൊതുയോഗങ്ങളും നിരോധിക്കാനും കർണാടക സർക്കാർ നിർദ്ദേശിച്ചു. ഒമിക്രോൺ വ്യാപനത്തിന്റെ പശ്ചാത്തലത്തിലാണ് തീരുമാനം.

സംസ്ഥാനത്ത് രാത്രി 10 മണിയ്ക്ക് ശേഷമുള്ള എല്ലാ പ്രവർത്തനങ്ങളും നിയന്ത്രിക്കും. ഹോട്ടലുകളിലും പബ്ബുകളിലും റസ്റ്റോറന്റുകളിലും 50 ശതമാനം ശേഷിയോടെ പ്രവർത്തിക്കാനും അനുമതി നൽകിയിട്ടുണ്ട്. പൊതുഗതാഗത സേവനങ്ങളുടെയും ചരക്കുകളുടെയും നീക്കത്തിന് നിയന്ത്രണങ്ങൾ ഉണ്ടാകില്ല. അടുത്ത 10 ദിവസത്തെ സ്ഥിതിഗതികളെ അടിസ്ഥാനമാക്കി, അധിക നിയന്ത്രണങ്ങൾ ആവശ്യമാണോ എന്ന് സർക്കാർ അവലോകനം ചെയ്യുമെന്ന് കർണാടക ആരോഗ്യ മന്ത്രി ഡോ. കെ. സുധാകർ അറിയിച്ചു. ചൊവ്വാഴ്ച്ച മുതൽ വിവാഹങ്ങൾ, മീറ്റിംഗുകൾ, സമ്മേളനങ്ങൾ തുടങ്ങി എല്ലാ ഒത്തുചേരലുകളിലും പങ്കെടുക്കുന്നവരുടെ എണ്ണം 300 ആയി പരിമിതപ്പെടുത്തണമെന്നും മന്ത്രി നിർദ്ദേശിച്ചു.

മഹാരാഷ്ട്രയോടും കേരള സംസ്ഥാനത്തോടും ചേർന്നുള്ള എല്ലാ അതിർത്തി ജില്ലകളിലും പോലീസ് പട്രോളിംഗും നിരീക്ഷണവും ശക്തമാക്കും. രാത്രി പത്ത് മണിക്ക് ശേഷമുള്ള വ്യക്തികളുടെ സഞ്ചാരം കർശനമായി നിരോധിച്ചു. അടിയന്തിര സാഹചര്യങ്ങളിൽ ഒഴിച്ചുകൂടാൻ സാധിക്കാത്ത യാത്രകൾക്ക് വിലക്ക് ബാധകമാകില്ല.

ആശുപത്രി ജീവനക്കാർ, രോഗികൾ, മാദ്ധ്യമപ്രവർത്തകർ മറ്റ് അടിയന്തര സേവനങ്ങൾക്കും നിയന്ത്രണം ബാധകമായിരിക്കില്ല. രാത്രിയിൽ പ്രവർത്തനം ആവശ്യമുള്ള വ്യവസായങ്ങളിലെയും കമ്പനികളിലെയും ജീവനക്കാർക്കും സഞ്ചാര വിലക്ക് ഏർപ്പെടുത്തില്ല. ടെലികോം, ഇന്റർനെറ്റ് സേവന ദാതാക്കളുടെ ജീവനക്കാർക്കും വാഹനങ്ങൾക്കും, ഐടി, ഐടിഇഎസ് കമ്പനികളിലെ ജീവനക്കാർ എന്നിവരുടെ നീക്കത്തിന് വിലക്കില്ല. എല്ലാത്തരം ചരക്കുകളുടെയും നീക്കം, സാധനങ്ങളുടെ ഹോം ഡെലിവറി, ഇകൊമേഴ്സ് കമ്പനികളുടെ പ്രവർത്തനങ്ങൾ നടത്താൻ അനുവാദമുണ്ട്. മാർഗനിർദേശങ്ങൾ അനുസരിച്ച് ബസുകൾ, ട്രെയിനുകൾ, മെട്രോ, വിമാന യാത്രകൾ എന്നിവയും നടത്താം.

ശ്രീനഗർ:ജമ്മു കശ്മീരിന് പ്രത്യേക പദവി നൽകിയിരുന്ന ആർട്ടിക്കിൾ 370 റദ്ദാക്കിയതിനെതിരെ വിമർശനവുമായി മുതിർന്ന കോൺഗ്രസ് നേതാവ് ഗുലാം നാബി ആസാദ്. കഴിഞ്ഞ രണ്ടര വർഷമായി ജമ്മു കശ്മീരിൽ വികസന മുരടിപ്പാണെന്ന് അദ്ദേഹം പറഞ്ഞു. ഇതിലും ഭേദം രാജഭരണമായിരുന്നുവെന്നും അദ്ദേഹം ചൂണ്ടിക്കാട്ടി.

ജമ്മു കശ്മീരിൽ ആറു മാസം കൂടുമ്പോൾ തലസ്ഥാനം മാറ്റുന്ന ദർബാർ മൂവ് എന്ന സമ്പ്രദായത്തെ താൻ പിന്തുണയ്ക്കുന്നു. രാജഭരണത്തിൽ തുടങ്ങിവച്ച ഈ സമ്പ്രദായം കശ്മീരിന്റെയും ജമ്മുവിന്റെയും വികസനത്തിന് വലിയ പങ്കുവഹിച്ചിട്ടുള്ളതാണ്. നിലവിലെ സർക്കാരിനെക്കാളും നന്നായി ജമ്മു-കശ്മീർ ഭരിച്ചത് ഏകാധിപതികളെന്ന് ചരിത്രം വിളിച്ച രാജാക്കൻമാരാണൈന്നും അദ്ദേഹം അഭിപ്രായപ്പെട്ടു.

ദർബാർ മൂവ്, ഭൂമിയുടെയും ജോലിയുടെയും സംരക്ഷണം. ജമ്മു കശ്മീരിലെ ബിസിനസ്, വികസനം, കൃഷി തുടങ്ങി എല്ലാ കാര്യങ്ങളിലും ഇപ്പോൾ പ്രതിസന്ധിയാണ്. ദാരിദ്രത്തിലേക്കാണ് സംസ്ഥാനം നീങ്ങുന്നതെന്നും അദ്ദേഹം കുറ്റപ്പെടുത്തി.

ന്യൂഡൽഹി: പഞ്ചാബ് നിയമസഭാ തെരഞ്ഞെടുപ്പിൽ മത്സരിക്കാനൊരുങ്ങി കർഷകർ. ഇതിനായി കേന്ദ്രത്തിന്റെ വിവാദ നിയമങ്ങൾക്കെതിരെ പോരാടിയ 22 കർഷക സംഘടനകളുടെ നേതൃത്വത്തിൽ പാർട്ടി രൂപീകരിച്ചു. സംയുക്ത സമാജ് മോർച്ച എന്നാണ് പാർട്ടിയുടെ പേര്.

ബൽബീർ സിങ് രജേവാൾ സംയുക്ത സമാജ് മോർച്ചയെ നയിക്കുമെന്നാണ് വിവരം. 117 സീറ്റിലും കർഷകർ മത്സരിക്കുമെന്നാണ് റിപ്പോർട്ട്. തെരഞ്ഞെടുപ്പിൽ മത്സരിക്കുന്നില്ലെന്നാണ് സംയുക്ത കിസാൻ മോർച്ച ഔദ്യോഗികമായി അറിയിച്ചിരിക്കുന്നത്. തെരഞ്ഞെടുപ്പ് പ്രചാരണത്തിനായി സംയുക്ത കിസാൻ മോർച്ചയുടെ പേര് എവിടെയും ഉപയോഗിക്കാൻ പാടില്ലെന്നും നേതാക്കൾ അറിയിച്ചു.

ഇതിനു പിന്നാലെയാണ് 22 കർഷക സംഘടനകൾ ചേർന്ന് പാർട്ടി രൂപീകരിച്ചിരിക്കുന്നത്. പോരാട്ടം ജയിക്കാൻ കഴിയുമെങ്കിൽ തെരഞ്ഞെടുപ്പിൽ ജയിക്കാനും സാധിക്കുമെന്ന് ബികെയു നേതാവ് ഹർമീത് സിങ് കഡ്യാൻ അറിയിച്ചു. ജനങ്ങളുടെ താത്പര്യമാണ് സംയുക്ത സമാജ് മോർച്ച അവതരിപ്പിക്കുന്നതെന്നും അദ്ദേഹം പറഞ്ഞു.

ന്യൂഡൽഹി: കോവിഡ് വൈറസിന്റെ ജനിതക വകഭേദമായ ഒമിക്രോണിനെ നേരിടാൻ എല്ലാ മുൻകരുതലുകളും സ്വീകരിച്ചതായി പ്രധാനമന്ത്രി നരേന്ദ്ര മോദി. പ്രതിമാസ റേഡിയോ പരിപാടിയായ മൻ കി ബാത്തിലൂടെ രാജ്യത്തെ അഭിസംബോധന ചെയ്യുകയായിരുന്നു അദ്ദേഹം.

രാജ്യത്തെ വാക്‌സിനേഷൻ 140 കോടി ഡോസ് പിന്നിട്ടത് ഓരോ ഇന്ത്യാക്കാരന്റെയും വിജയമാണ്. പ്രതിസന്ധി ഘട്ടത്തിൽ രാജ്യം ഒന്നിച്ച് നിന്നുവെന്നും പുതുവർഷത്തിൽ കൂടുതൽ ഉത്തരവാദിത്തമുണ്ടെന്നും അദ്ദേഹം വ്യക്തമാക്കി. ഹെലികോപ്ടർ അപകടത്തിൽ മരിച്ച ജനറൽ ബിപിൻ റാവത്തിനെയും വരുൺ സിംഗിനെയും അദ്ദേഹം അനുസ്മരിക്കുകയും ചെയ്തു. അസാദ്ധ്യമായത് ചെയ്ത് കാണിച്ച ധീരസൈനികനായിരുന്നു വരുൺ സിംഗെന്ന് പ്രധാനമന്ത്രി പറഞ്ഞു.

ഭാരതമാതാവിന്റെ മഹിമ വാനോളം ഉയർത്താൻ എന്നും വീരന്മാർ പ്രയത്നിക്കുകയാണ്. അവർ നമ്മെ നിരവധി കാര്യങ്ങളാണ് പഠിപ്പിക്കുന്നത്. വരുണിന്റെ ജീവിതവും നമുക്ക് ഒരു പാഠപുസ്തകമാണെന്നും നരേന്ദ്രമോദി കൂട്ടിച്ചേർത്തു.