Highlights (Page 179)

തിരുവനന്തപുരം: സൈലന്റ് വാലി ദേശീയ ഉദ്യാനത്തിന്റെ സംരക്ഷിത മേഖലയിൽ കഴിഞ്ഞ വർഷം ഇറക്കിയ വിജ്ഞാപനത്തിന് വിദഗ്ധ സമിതി അംഗീകാരം നൽകി. 148 ചതുരശ്ര കിലോമീറ്റർ ഇനി പരിസ്ഥിതി ലോല(ഇഎസ്സെഡ്) മേഖലയാകും. കഴിഞ്ഞ വർഷം ഇറക്കിയ വിജ്ഞാപനം അതേപടിയാണ് വിദഗ്ധ സമിതി അംഗീകരിച്ചത്.

വന്യജീവി സങ്കേതത്തിനു ചുറ്റും പരമാവധി 9.8 കിലോമീറ്റർ വരെയാണ് പരിസ്ഥിതി ലോലമേഖലയുടെ വീതി. വിജ്ഞാപനം ആവാസ വ്യവസ്ഥയെയോ ജനങ്ങളുടെ കൃഷിഭൂമിയെയോ ബാധിക്കില്ലെന്നു മുൻപ് വ്യക്തമാക്കിയിരുന്നു.

സൈലന്റ് വാലി ദേശീയ ഉദ്യാനത്തിന്റെ സംരക്ഷിത മേഖലയെ ചൊല്ലി ഏറെ ആശങ്കകൾ നിലനിന്നിരുന്നു. ഈ ആശങ്കകൾ പരിഹരിച്ചുവെന്ന് സംസ്ഥാന സർക്കാർ കേന്ദ്ര വനം വകുപ്പ് മന്ത്രാലയത്തെ അറിയിക്കുകയും ചെയ്തു. തുടർന്നാണ് കഴിഞ്ഞ ഒക്ടോബർ 27 ന് പുറത്തിറക്കിയ കരടു വിജ്ഞാപനത്തിന് വിദഗ്ധ സമിതി അംഗീകാരം നൽകിയത്. ഇനി അന്തിമ വിജ്ഞാപനം പുറത്തിറക്കുമെന്ന് അധികൃതർ വ്യക്തമാക്കി.

ന്യൂഡൽഹി: പ്രധാനമന്ത്രി നരേന്ദ്ര മോദിക്ക് ലഭിച്ച വിലപ്പെട്ട സമ്മാനങ്ങൾ ലേലത്തിൽ വെച്ച് സാംസ്‌കാരിക മന്ത്രാലയം. ഒളിമ്പിക്സ് സ്വർണ്ണ മെഡൽ ജേതാവ് നീരജ് ചോപ്രയുടെ ജാവലിനും പിവി സിന്ധുവിന്റെ ബാഡ്മിന്റൺ റാക്കറ്റും ബാഗും ഉൾപ്പടെയുള്ളവയാണ് സാസംകാരിക മന്ത്രാലയം ലേലത്തിൽ വെച്ചിരിക്കുന്നത്. https:pmmementos.gov.in എന്ന വെബ് സൈറ്റിലൂടെ വ്യക്തികൾക്കും,സംഘടനകൾക്കും സെപ്റ്റംബർ 17 നും ഒക്ടോബർ 7 നും ഇടയിൽ ഇ-ലേലത്തിൽ പങ്കെടുക്കാനുള്ള അവസരമുണ്ട്.

ഒരു കോടി രൂപയാണ് നീരജിന്റെ ജാവലിന്റെ വില. 80 ലക്ഷം രൂപയാണ് സിന്ധുവിന്റെ ബാഗിന്റെ റാക്കറ്റിന്റെയും അടിസ്ഥാന വില. മറ്റൊരു വെങ്കല മെഡൽ ജേതാവ് ലോവലീനയുടെ ബോക്സിങ് ഗ്ലൗസും ലേലത്തിൽ വെച്ചിട്ടുണ്ട്. 80 ലക്ഷമാണ് ബോക്‌സിംഗ് ഗ്ലൗസിന്റെ അടിസ്ഥാന വില. വനിതാ ഹോക്കി താരങ്ങളുടെ കയ്യൊപ്പ് പതിപ്പിച്ച ഹോക്കി സ്റ്റിക്കുകൾ 80 ലക്ഷത്തിനാണ് ലേലത്തിൽ വെച്ചിരിക്കുന്നത്. പ്രധാനമന്ത്രിയ്ക്ക് ലഭിച്ച 2700 സമ്മാനങ്ങളാണ് വിൽപ്പനയ്ക്ക് വയ്ക്കുന്നത്. ഒക്ടോബർ 7 ആണ് ലേലത്തിൽ എൻട്രി സ്വീകരിക്കുന്ന അവസാന തീയതി.

ടോക്കിയോ ഒളിമ്പിക്സിൽ മെഡലുകൾ നേടിയ ഒളിമ്പ്യന്മാരുടെയും പാരാലിമ്പ്യന്മാരുടെയും സ്‌പോർട്‌സ് ഗിയറും മറ്റ് ഉപകരണങ്ങളും, അയോധ്യയിലെ രാമക്ഷേത്രം, തീർത്ഥാനട കേന്ദ്രമായ ചാർധാം, രുദ്രാക്ഷ് കൺവെൻഷൻ സെന്റർ എന്നിവയുടെ പ്രതിരൂപങ്ങൾ, ശിൽപ്പങ്ങൾ, പെയിന്റിംഗുകൾ, അംഗവസ്ത്രങ്ങൾ എന്നിവയാണ് ലേലം ചെയ്യുന്നത്. ഗംഗയെ സംരക്ഷിക്കാനും പുനരുജ്ജീവിപ്പിക്കാനും ലക്ഷ്യമിട്ടുള്ള നമാമി ഗംഗ മിഷനിലേക്ക് ഇ-ലേലത്തിൽ നിന്നുള്ള വരുമാനം നൽകുമെന്നും സാംസ്‌കാരിക മന്ത്രാലയം വ്യക്തമാക്കിയിട്ടുണ്ട്.

മുൻപും പ്രധാനമന്ത്രിക്ക് കിട്ടിയ സമ്മാനങ്ങൾ ലേലം ചെയ്തിരുന്നു. വിൽപ്പനയ്ക്ക് വെക്കുന്ന സമ്മാനങ്ങളുടെ ചിത്രങ്ങളും വിവരങ്ങളും കേന്ദ്ര സാംസ്‌കാരിക മന്ത്രാലയം ഓൺലൈൻ വഴി നൽകും. 2014 മുതൽ 2018 വരെ കിട്ടിയ 1800 സമ്മാനങ്ങൾ മൂന്നു മാസത്തോളം പ്രദർശനത്തിന് വച്ച ശേമാണ് ലേലത്തിന് വിറ്റത്. ഗുജറാത്ത് മുഖ്യമന്ത്രിയായിരുന്ന കാലത്തു പ്രധാനമന്ത്രി മോദി തനിക്കു ലഭിച്ച മെമെന്റോകൾ ലേലത്തിലൂടെ കൈമാറുകയും അതുവഴി ലഭിക്കുന്ന പണം പെൺകുട്ടികളുടെ വിദ്യാഭ്യാസത്തിനു നീക്കിവെക്കുകയും ചെയ്തിരുന്നു.

കാൻബെറ: ചൈനയ്‌ക്കെതിരെ കൈകോർത്ത് ലോകശക്തികൾ. ഇന്തോ – പസഫിക്ക് മേഖലയിൽ ചൈനയ്‌ക്കെതിരെ അമേരിക്കയും ഓസ്‌ട്രേലിയയും ബ്രിട്ടനും ത്രിരാഷ്ട്ര ഉടമ്പടി പ്രഖ്യാപിച്ചു. പുതിയ ത്രിരാഷ്ട്ര ഉടമ്പടി പ്രഖ്യാപിക്കുന്നതിന് മുന്നോടിയായി ഓസ്ട്രേലിയൻ പ്രധാനമന്ത്രി സ്‌കോട്ട് മോറിസൺ നരേന്ദ്ര മോദിയുടെ സഹകരണം അഭ്യർത്ഥിച്ചു. നരേന്ദ്ര മോദിയുടെ സഹകരണം തേടി ഓസ്‌ട്രേലിയൻ പ്രധാനമന്ത്രി അദ്ദേഹത്തെ ഫോണിൽ ബന്ധപ്പെട്ടു. ഉടമ്പടി സംബന്ധിച്ച കൂടുതൽ വിവരങ്ങൾ അദ്ദേഹം നരേന്ദ്ര മോദിയോട് വിശദീകരിച്ചു.

ചൈനയുടെ ആധിപത്യത്തെ പ്രതിരോധിക്കാനുള്ള ശ്രമങ്ങളുടെ ഭാഗമായാണ് അമേരിക്ക, യു.കെ, ഓസ്‌ട്രേലിയ എന്നീ രാജ്യങ്ങൾ ചേർന്ന് പുതിയ സുരക്ഷാ സഖ്യം രൂപീകരിച്ചത്. സുരക്ഷാ കരാർ ഇന്തോ-പസഫിക് മേഖലയിൽ സ്ഥിരത കൊണ്ടുവരുമെന്ന് യുഎസ് പ്രസിഡന്റ് ജോ ബൈഡനും യുകെ പ്രധാനമന്ത്രി ബോറിസ് ജോൺസനും ഓസ്ട്രേലിയൻ പ്രധാനമന്ത്രി സ്‌കോട്ട് മോറിസനും എന്നിവർ സംയുക്ത പ്രസ്താവനയിലൂടെ അറിയിച്ചു.

സഖ്യത്തിന്റെ ഭാഗമായി അണുവായുധ ശേഷിയുള്ള എട്ട് അന്തർവാഹിനികൾ ഓസ്ട്രേലിയയിൽ നിർമിക്കും. ത്രിരാഷ്ട്ര ഉടമ്പടിയുടെ ഭാഗമായി വരുന്ന 18 മാസങ്ങളിൽ മൂന്ന് രാജ്യങ്ങളും വിവിധ മേഖലകളിൽ സഹകരിക്കും. പുതിയ സുരക്ഷാ ഉടമ്പടി വരുന്നത് ഇന്ത്യയ്ക്കും ഗുണകരമാണെന്നാണ് പ്രതീക്ഷിക്കപ്പെടുന്നത്.

കൊച്ചി: കേരളത്തിലെ ഐ ടി ജീവനക്കാരുടെ ക്ഷേമ സംഘടന പ്രതിധ്വനിയും ഐ ടി കമ്പനികളും ചേർന്ന് സംഘടിപ്പിക്കുന്ന സൗജന്യ വെർച്വൽ ജോബ് ഫെയറിന് തുടക്കം കുറിച്ചു. തിരുവനന്തപുരം ടെക്‌നോപാർക്ക്, കൊച്ചി ഇൻഫോപാർക്ക്, കോഴിക്കോട് സൈബർപാർക്ക് എന്നിവിടങ്ങളിലെ നൂറിലേറെ കമ്പനികളിലായി രണ്ടായിരത്തിലേറെ തൊഴിലവസരങ്ങളാണ് ജോബ് ഫെയറിൽ ഉള്ളത്. കേരളത്തിന് അകത്തും പുറത്തുമുള്ള ഐടി ജോലി തേടുന്നവർക്ക് സെപ്തംബർ 21 വരെ jobs.prathidhwani.org എന്ന പോർട്ടലിൽ സൗജന്യമായി രജിസ്റ്റർ ചെയ്യാം. ബഹുരാഷ്ട്ര കമ്പനികളായ യുഎസ്ടി, അലയൻസ്, എച്ച്എൻആർ ബ്ലോക്ക്, ക്വസ്റ്റ് ഗ്ലോബൽ, ടാറ്റ എൽക്‌സി തുടങ്ങി നൂറിലേറെ കമ്പനികളാണ് ഈ പോർട്ടൽ വഴി ജീവനക്കാരെ തെരഞ്ഞെടുക്കുന്നത്.

പ്രതിധ്വനിയുടെ വിർച്വൽ ജോബ് ഫെയർ ഓട്ടോമേറ്റഡ് സംവിധാനം മുഖേന പോർട്ടലിൽ രജിസ്റ്റർ ചെയ്യുന്ന ഉദ്യോഗാർത്ഥികളിൽ നിന്ന് ഐ ടി കമ്പനികൾ തേടുന്ന ശരിയായ ടെക്നിക്കൽ സ്‌കിൽസെറ്റ് ഉള്ളവരെ കമ്പനി കണ്ടെത്തും. തുടർന്ന് ഇത്തരത്തിൽ കണ്ടെത്തുന്നവരെ കമ്പനികൾ ഇന്റർവ്യൂ ചെയ്യും. സെപ്തംബർ 22 മുതൽ 30 വരെയുള്ള തീയതികളിൽ കമ്പനികൾ നേരിട്ടാണ് ഇന്റർവ്യൂ സംഘടിപ്പിക്കുന്നത്.

സംസ്ഥാനത്തെ ഐടി കമ്പനികളിൽ വലിയ തൊഴിലവസരങ്ങളാണ് അടുത്തിടെയായി റിപ്പോർട്ട് ചെയ്യപ്പെടുന്നത്. പുതുതായി കോഴ്‌സ് പൂർത്തിയാക്കിയവർ ഉൾപ്പെടെ യോഗ്യരായ ഐടി പ്രൊഫഷനലുകളെ വേഗത്തിൽ കണ്ടെത്താനാണ് കമ്പനികൾ പ്രതിധ്വനിയുമായി സഹകരിച്ച് വെർച്വൽ ജോബ് ഫെയറിന്റെ ഭാഗമായത്. കേരളത്തിലെ മാത്രമല്ല ബാംഗ്ലൂർ, ചെന്നൈ, ഹൈദരാബാദ്, പൂനെ തുടങ്ങിയ പ്രധാന ഐ ടി ഹബ്ബുകളിലുള്ള മലയാളികളായ ഐ ടി പ്രൊഫഷനലുകൾ കേരളത്തിൽ വന്നു ജോലി ചെയ്യാൻ താല്പര്യപ്പെടുന്നുണ്ടെന്നാണ് വിവരം. അവർക്കു കൂടി അവസരമൊരുക്കിയാണ് ഈ ജോബ് ഫെയർ വിഭാവനം ചെയ്തിരിക്കുന്നതെന്ന് പ്രതിധ്വനി പ്രസിഡന്റ് റനീഷ് എ ആർ അറിയിച്ചു.

കോപ്പൻഹേഗൻ: ഡെൻമാർക്കിലെ ഫെറോ ദ്വീപിലെ വിനോദ വേട്ടയിൽ ഒറ്റദിവസം കൊന്നൊടുക്കിയത് 1500 ഓളം ഡോൾഫിനുകളെ. ദ്വീപിലെ സ്‌കാലബൊട്നൂർ ബീച്ചിൽ വർഷം തോറും നടക്കുന്ന ഗ്രൈൻഡഡ്രാപ് എന്ന വിനോദ കടൽവേട്ടയിലാണ് ഇത്രയധികം ഡോൾഫിനുകളെ കൊന്നൊടുക്കിയത്. 400 വർഷത്തോളമായി ഇവിടെ ഇത്തരത്തിൽ വിനോദ വേട്ട നടക്കാറുണ്ട്. എണ്ണിയാലൊടുങ്ങാത്ത ഡോൾഫിനുകളെയും തിമിംഗലങ്ങളെയുമാണ് എല്ലാവർഷവും ഇവിടെ വേട്ടയാടുന്നത്.

ഡെൻമാർക്കിന് കീഴിലുള്ള സ്വയം ഭരണ ദ്വീപായ ഫെറോയിൽ നൂറ്റാണ്ടുകളായി തുടർന്നുവരുന്ന വിനോദവേട്ടയാണിത്. അതിനാൽ തന്നെ ഇത് ഫെറോ ദ്വീപിൽ നിയമാനുസൃതവും അംഗീകൃതവുമാണ്. തീരത്തോട് ചേർന്ന് ഡോൾഫിനുകളുടെയും തിമിംഗലങ്ങളുടെയും ചാകര കാണുമ്പോഴാണ് ദ്വീപ് ജനത ഈ വിനോദം ആരംഭിക്കുന്നത്. പ്രത്യേക പരിശീലനവും ലൈസൻസുള്ള ആളുകൾക്ക് മാത്രമേ ഡോൾഫിനുകളെ വേട്ടയാടാൻ അനുവാദം നൽകിയിട്ടുള്ളു. ഫെറോ ദ്വീപ് തീരത്തോട് ചേർന്ന് ചത്തു കിടക്കുന്ന ഡോൾഫിനുകളുടെ ചിത്രങ്ങളും വീഡിയോകളും സമൂഹ മാദ്ധ്യമങ്ങളിൽ പ്രചരിക്കുന്നുണ്ട്. വിനോദ വേട്ടയ്‌ക്കെതിരെ ആഗോള തലത്തിൽ തന്നെ പ്രതിഷേധം ഉയർന്നിരിക്കുകയാണ്. ഇത്രയും ക്രൂരമായ വേട്ടയാടൽ അനുവദിക്കരുതെന്നാണ് കടൽജീവി സംരക്ഷണ ഗ്രൂപ്പുകളുടെ ആവശ്യം. കടൽ വേട്ടക്കെതിരെ നടപടി വേണമെന്നും ഇവർ ആവശ്യപ്പെടുന്നു.

വലിയ ആഘോഷങ്ങളോടെയാണ് ദ്വീപിൽ കടൽവേട്ട നടക്കുന്നത്. തിമിംഗലങ്ങളെയും ഡോൾഫിനേയും വേട്ടയാടി തീരത്തെത്തിച്ച് കഴുത്തറുക്കുന്നത് കാണാൻ നിരവധി ആളുകൾ ഇവിടേക്ക് എത്താറുണ്ട്. കഴിഞ്ഞ ഞായറാഴ്ച മാത്രം 1428 ഡോൾഫിനുകളെ ദ്വീപ് വാസികൾ കൊന്നെടുക്കിയിട്ടുണ്ടെന്നാണ് റിപ്പോർട്ട്. ഇതുവരെയുള്ള കടൽവേട്ടയിലെ ഏറ്റവും ഉയർന്ന കണക്കാണിത്.

തിരുവനന്തപുരം: പങ്കാളിത്തപെൻഷൻ പദ്ധതി പുന:പരിശോധിക്കണമെന്നാവശ്യപ്പെട്ട് പ്രക്ഷോഭം നടത്താനൊരുങ്ങി സിപിഐയുടെ സർക്കാർ ജീവനക്കാരുടെ സംഘടന. പെൻഷൻ പദ്ധതി പുനപരിശോധിക്കുന്നതിനെക്കുറിച്ച് പഠിച്ച സമിതിയുടെ റിപ്പോർട്ട് പ്രസിദ്ധപ്പെടുത്തണമെന്നാണ് ജോയിന്റ് കൗൺസിലിന്റെ ആവശ്യം. വിവരാവകാശപ്രകാരം റിപ്പോർട്ട് ചോദിച്ചിട്ടും സംഘടനക്ക് നൽകിയിരുന്നില്ല.

2013 ഏപ്രിൽ ഒന്ന് മുതൽ ജോലിയിൽ പ്രവേശിച്ചവർക്ക് പങ്കാളിത്ത പെൻഷനാണ് ഉള്ളത്. ഈ പദ്ധതി പിൻവലിക്കുന്നതിനെക്കുറിച്ച് പഠിക്കാൻ വേണ്ടി ഒന്നാം പിണറായി സർക്കാർ പ്രത്യേക സമിതിയെ നിയമിച്ചിരുന്നു. റിട്ട ജില്ലാ ജഡ്ജി എസ് സതീശ്ചന്ദ്രബാബുന്റെ നേതൃത്വത്തിലുള്ള സമിതിയെയാണ് സർക്കാർ നിയോഗിച്ചത്. കഴിഞ്ഞ ഏപ്രിൽ 30 നാണ് കമ്മീഷൻ റിപ്പോർട്ട് സമർപ്പിച്ചത്.

റിപ്പോർട്ടിന്റെ വിശദാംശങ്ങൾ ഇതുവരെ പുറത്ത് വിട്ടിട്ടില്ല. ഈ റിപ്പോർട്ടിന്റെ വിശദാംശങ്ങൾ വിവരാവകാശരേഖ പ്രകാരം ചോദിച്ചപ്പോൾ റിപ്പോർട്ട് സർക്കാർ പരിശോധിക്കുകയാണെന്നാണ് ജോയിന്റ് കൗൺസിലിന് ലഭിച്ച മറുപടി.