Highlights (Page 150)

തിരുവനന്തപുരം: അഗസ്ത്യാർകൂടത്തേക്കുള്ള പാത വീണ്ടും തുറക്കുന്നു. 44 ദിവസത്തേക്കാണ് ട്രക്കിംഗിന് അവസരം ഒരുക്കിയിരിക്കുന്നത്. ജനുവരി 14 മുതൽ ഫെബ്രുവരി 26-വരെയാണ് ട്രക്കിംഗിന് അനുമതി നൽകിയത്. പരമാവധി 100 പേർക്കാണ് ഒരു ദിവസം പ്രവേശനം അനുവദിക്കുന്നത്.

ഓൺലൈനായി ബുക്കിംഗ് നടത്തിവേണം യാത്രയ്ക്കുള്ള അനുമതി നേടേണ്ടതെന്ന് അധികൃതർ അറിയിച്ചു. അക്ഷയ കേന്ദ്രങ്ങളിലക്കം ബുക്കിംഗ് സംവിധാനം ഒരുക്കിയിട്ടുണ്ട്. ജനുവരി ആറിന് രാവിലെ 11-ന് ബുക്കിങ് ആരംഭിക്കും. 1331 രൂപയാണ് ഒരാൾക്കുള്ള ടിക്കറ്റ് നിരക്ക്. പൂജാദ്രവ്യങ്ങൾ, പ്ലാസ്റ്റിക്, മദ്യം, മറ്റ് ലഹരിപദാർഥങ്ങൾ എന്നിവ അഗസത്യാർകൂടത്തിൽ നിരോധിച്ചിട്ടുണ്ട്. ബോണക്കാട്, അതിരുമല എന്നിവിടങ്ങളിൽ ഇക്കോ-ഡെവലപ്മെന്റ് കമ്മിറ്റിയുടെ കാന്റീനുകൾ ഉണ്ടാകുമെന്നും അധികൃതർ വ്യക്തമാക്കി.

വനംവകുപ്പിന്റെ www.forest.kerala.gov.in എന്ന വെബ്സൈറ്റ് അല്ലെങ്കിൽ serviceonline.gov.in/trekking എന്ന ഓൺലൈനായി ബുക്ക് ചെയ്ത് ടിക്കറ്റെടുക്കാം. ജനുവരി ആറിന് രാവിലെ 11-ന് ബുക്കിങ് ആരംഭിക്കും. അക്ഷയ കേന്ദ്രങ്ങളിൽ ടിക്കറ്റ് ബുക്ക് ചെയ്യാൻ എത്തുന്നവർ അവരുടെയും ടീം അംഗങ്ങളുടെയും ഫോട്ടോ പതിച്ച തിരിച്ചറിയൽ കാർഡിന്റെ പകർപ്പുകൂടി കൊണ്ടുവരേണ്ടതാണ്. പരമാവധി 10 പേരുകൾ മാത്രമേ ഒരു ടിക്കറ്റിൽ ഉൾപ്പെടുത്താൻ സാധിക്കൂ. അക്ഷയ കേന്ദ്രങ്ങളിൽ ബുക്ക് ചെയ്യുമ്പോൾ പത്ത് പേർ വരെ ഉൾപ്പെടുന്ന ടിക്കറ്റിന് അധികമായി 70 രൂപയും അഞ്ച് പേർ വരെ ഉൾപ്പെടുന്ന സംഘത്തിന് 50 രൂപയും അധികമായി നൽകേണ്ടി വരും.

നല്ല ശാരീരികക്ഷമതയുള്ളവർ മാത്രമാകും ട്രക്കിംഗിന് അനുമതി ലഭിക്കുക. 14 വയസ്സിന് താഴെയുള്ള കുട്ടികൾക്ക് ട്രക്കിംഗിന് അനുമതി ഉണ്ടാകില്ല. സ്ത്രീകൾക്ക് അപേക്ഷിക്കാൻ അനുമതിയുണ്ട്. എന്നാൽ ഇവർക്ക് പ്രത്യേക പരിഗണനകളൊന്നും ഉണ്ടാകില്ല. ടിക്കറ്റ് പ്രിന്റ് ഔട്ടിന്റെ പകർപ്പും ഫോട്ടോ പതിച്ച തിരിച്ചറിയിൽ കാർഡുമായി എത്തിയാൽ മാത്രമേ ട്രക്കിംഗിന് അനുമതി ലഭിക്കു. പത്ത് പേരടങ്ങുന്ന സംഘത്തിനൊപ്പം ഒരു ഗൈഡിനെ അനുവദിക്കും. രണ്ട് ഡോസ് വാക്‌സിനേഷൻ എടുത്തതിന്റെ സർട്ടിഫിക്കറ്റ് പകർപ്പും അല്ലെങ്കിൽ യാത്രയ്ക്ക് 72 മണിക്കൂറിനുള്ളിൽ എടുത്ത ആർ.ടി.പി.സി.ആർ. നെഗറ്റീവ് സർട്ടിഫിക്കറ്റും യാത്രയ്ക്ക് നിർബന്ധമാണ്.

അതേസമയം ട്രക്കിംഗിനെത്തുന്നവർ വനംവകുപ്പ് ഉദ്യോഗസ്ഥരുടെ നിർദ്ദേശങ്ങൾ കൃത്യമായി പാലിക്കണമെന്നാണ് അധികൃതർ നൽകിയിരിക്കുന്ന നിർദ്ദേശം. കൂടുതൽ വിവരങ്ങൾക്കായി തിരുവനന്തപുരം പി ടി പി നഗറിലുള്ള വൈൽഡ്‌ലൈഫ് വാർഡൻറെ ഓഫീസുമായി ബന്ധപ്പെടാം. ഫോൺ നമ്പർ: 0471-2360762.

തിരുവനന്തപുരം: യുവനടി ആക്രമിക്കപ്പെട്ട കേസിൽ വീണ്ടും മുഖ്യമന്ത്രിയുടെ പിന്തുണ തേടി ഡബ്ല്യുസിസി. നടി ആക്രമിക്കപ്പെട്ട കേസിൽ അഞ്ചാം വർഷത്തിലേക്ക് കടക്കുന്ന ഇരയുടെ പോരാട്ടത്തിന് സമഗ്രമായ അന്വേഷണവും തൃപ്തികരമായ വിചാരണയും ഉറപ്പാക്കുന്ന ഇടപെടൽ മുഖ്യമന്ത്രിയുടെ ഭാഗത്ത് നിന്നുണ്ടാകണമെന്ന അഭ്യർത്ഥനയാണ് ഡബ്ല്യുസിസി മുന്നോട്ട് വെച്ചിരിക്കുന്നത്.

ദിലീപിനെതിരെ സംവിധായകൻ ബാലചന്ദ്രകുമാർ നടത്തിയ വെളിപ്പെടുത്തൽ അന്വേഷിക്കണമെന്നാവശ്യപ്പെട്ട് ഇരയായ നടി കഴിഞ്ഞ ദിവസം ഡിജിപിക്കും മുഖ്യമന്ത്രിക്കും പരാതി നൽകിയിരുന്നു. ഇതിന് പിന്നാലെയാണ് ഡബ്ല്യുസിസിയുടെ പ്രതികരണം. ഫേസ്ബുക്കിൽ പങ്കുവെച്ച കുറിപ്പിലൂടെയാണ് ഡബ്ല്യുസിസി മുഖ്യമന്ത്രിയുടെ പിന്തുണ ആവശ്യപ്പെട്ടത്. അവൾക്കൊപ്പം എന്ന ഹാഷ്ടാഗോടെയാണ് പോസ്റ്റ് പങ്കുവെച്ചിട്ടുള്ളത്.

ഫേസ്ബുക്ക് കുറിപ്പിന്റെ പൂർണ്ണരൂപം:

അതിജീവിച്ചവളുടെ ഇതുവരെയുള്ള യാത്ര, അവൾക്കു ചുറ്റുമുള്ള സമൂഹത്തിന്റെയും ഭരണകൂട വ്യവസ്ഥയുടെയും നേർക്കാഴ്ചയാണ്. നീതിക്ക് വേണ്ടിയുള്ള അവളുടെ പോരാട്ടത്തിന്റെ അഞ്ചാം വാർഷികത്തിലേക്ക് കടക്കുമ്പോൾ സമഗ്രമായ അന്വേഷണവും തൃപ്തികരമായ വിചാരണയും ഉറപ്പാക്കുന്ന ഇടപെടലാണ് മുഖ്യമന്ത്രിയുടെ ഭാഗത്ത് നിന്ന് ഞങ്ങളുടെ സഹപ്രവർത്തക ആവശ്യപ്പെട്ടിരിക്കുന്നത്. അതിജീവിച്ച വ്യക്തിക്കൊപ്പം നിന്നുകൊണ്ട് നീതി നടപ്പാക്കുമെന്ന് ഉറപ്പുവരുത്താൻ ഗവൺമെന്റിനോടും മുഖ്യമന്ത്രിയോടും ഞങ്ങൾ ആവശ്യപ്പെടുന്നു.

തിരുവനന്തപുരം: സംസ്ഥാനത്തെ ആറു നഗരങ്ങളെ അവയുടെ സവിശേഷതകളുടെ പേരിൽ ബ്രാൻഡ് ചെയ്യാനൊരുങ്ങുന്നു. തിരുവനന്തപുരം, കൊല്ലം, തൃശൂർ, കൊച്ചി, കോഴിക്കോട്, കണ്ണൂർ തുടങ്ങിയ നഗരങ്ങളെയാണ് സവിശേഷതകളുടെ പേരിൽ ബ്രാൻഡ് ചെയ്യുന്നത്. തദ്ദേശ സ്ഥാപനങ്ങൾക്ക് ഭരണകാര്യങ്ങളിൽ പരിശീലനം നൽകുന്ന കിലയുടെ നേതൃത്വത്തിലാണ് പദ്ധതി നടപ്പിലാക്കുന്നത്. വികസനം, സഹകരണം, പൈതൃകം, സംസ്‌കാരം എന്നിവ ഇത്തരത്തിൽ പരിപോഷിപ്പിക്കാമെന്നാണ് വിലയിരുത്തപ്പെടുന്നത്. തിരുവനന്തപുരത്തെ സമാധാന നഗരമായിട്ടാണ് ( സിറ്റ് ഒഫ് പീസ്) ബ്രാൻഡ് ചെയ്യുന്നത്.

തലസ്ഥാന നഗരി, മതസൗഹാർദ്ദം, ഉയർന്ന ജനസംഖ്യ, അനുദിനം വികസനം എന്നിവ കണക്കിലെടുത്താണ് തീരുമാനം. ജില്ലയിലെ ക്രമസമാധാനം, ആരോഗ്യ സംരക്ഷണം, വിദ്യാഭ്യാസം, സുരക്ഷ, വാണിജ്യം, കല, വിനോദം, പരിസ്ഥിതി, ഭരണസംവിധാനം എന്നിവ മെച്ചപ്പെടുത്തുന്ന രീതിയിലാകും ജില്ലയെ ബ്രാൻഡ് ചെയ്യുക. ജൈവ വൈവിദ്ധ്യ നഗരമായിട്ടാണ് കൊല്ലം ജില്ലയെ ബ്രാൻഡ് ചെയ്യുന്നത്. അഷ്ടമുടി, ശാസ്താംകോട്ട കായലുകൾ, കല്ലടയാറ്, കണ്ടൽകാടുകൾ ഇവയുടെ സംരക്ഷണവും സർക്യൂട്ടിലുണ്ട്. കൊച്ചി രൂപകൽപ്പനയുടെ നാടാണ്. മെട്രോ നഗരം, വ്യാപാര, വ്യവസായ കേന്ദ്രം, ഭൂമിക്ക് പൊന്നുവില, ഫ്‌ളാറ്റ് സമുച്ചയങ്ങൾ എന്നിവയുടെ അടിസ്ഥാനത്തിലാണ് പുതിയ പേര് നൽകിയിരിക്കുന്നത്.

പഠന നഗരമായിട്ടാണ് തൃശൂരിനെ കണക്കാക്കിയിരിക്കുന്നത്. സാഹിത്യനഗരമായാണ് കോഴിക്കോടിനെ ബ്രാൻഡ് ചെയ്തിരിക്കുന്നത്. വായനശാലകൾ ഏറ്റവും കൂടുതലുള്ള നഗരം. മലബാർ ടൂറിസം സർക്യൂട്ട്, ലിറ്റററി ഫെസ്റ്റിവൽ തുടങ്ങിയവയെല്ലാം കോഴിക്കോട് ജില്ലയിലുണ്ട്.

തിരുവനന്തപുരം: സംസ്ഥാനത്ത് രാത്രികാല നിയന്ത്രണം നീട്ടില്ല. പുതുവർഷാഘോഷങ്ങളുടെ നിയന്ത്രണത്തിനും ഒമിക്രോൺ വ്യാപന സാധ്യത കുറയ്ക്കുന്നതിനും വേണ്ടിയാണ് സംസ്ഥാനത്ത് രാത്രികാല നിയന്ത്രണങ്ങൾ ഏർപ്പെടുത്തിയത്. നിലവിൽ ഏർപ്പെടുത്തിയിരിക്കുന്ന നിയന്ത്രണങ്ങൾ തിങ്കളാഴ്ച പുലർച്ചെ അവസാനിക്കും.

ഡിസംബർ 30 മുതൽ ജനുവരി രണ്ട് വരെയാണ് നിയന്ത്രണങ്ങൾ ഏർപ്പെടുത്തിയത്. രാത്രി 10 മുതൽ പുലർച്ചെ അഞ്ച് വരെയുളള സമയങ്ങളിലായിരുന്നു നിയന്ത്രണം. രാത്രി 10 മണിയ്ക്ക് ശേഷം കടകൾ പ്രവർത്തിക്കുന്നതിനും കൂട്ടംചേർന്ന് നിൽക്കുന്നതിനും വിലക്കേർപ്പെടുത്തിയിരുന്നു. കേരളത്തിലെ കോവിഡ് സ്ഥിതിഗതികൾ വിലയിരുത്തിയ ശേഷമായിരിക്കും ഇനി നിയന്ത്രണങ്ങൾ വേണമോയെന്ന കാര്യത്തിൽ തീരുമാനമെടിക്കുക.

അതേസമയം സംസ്ഥാനത്ത് ഇന്ന് 45 പേർക്ക് കൂടി ഒമിക്രോൺ സ്ഥിരീകരിച്ചു. എറണാകുളം 16, തിരുവനന്തപുരം 9, തൃശൂർ 6, പത്തനംതിട്ട 5, ആലപ്പുഴ, കോഴിക്കോട് 3 വീതം, മലപ്പുറം 2, വയനാട് 1 എന്നിങ്ങനെയാണ് ഒമിക്രോൺ സ്ഥിരീകരിച്ചത്. ഇതിൽ 9 പേർ ഹൈ റിസ്‌ക് രാജ്യങ്ങളിൽ നിന്നും 32 പേർ ലോ റിസ്‌ക് രാജ്യങ്ങളിൽ നിന്നും വന്നതാണ്. 4 പേർക്കാണ് സമ്പർക്കത്തിലൂടെ ഒമിക്രോൺ ബാധിച്ചത്. ആലപ്പുഴയിലെ 3 പേർക്കും തൃശൂരിലെ ഒരാൾക്കുമാണ് സമ്പർക്കത്തിലൂടെ ഒമിക്രോൺ ബാധിച്ചത്.

കോഴിക്കോട്: സംസ്ഥാനത്ത് പിടികൂടിയ സമാന്തര ടെലിഫോൺ എക്‌സ്‌ചേഞ്ചുകൾ സൈബർ തീവ്രവാദമാണെന്നു പൊലീസ്. കോടതിയിലാണ് പൊലീസ് ഇക്കാര്യം അറിയിച്ചത്. ഇന്റർനെറ്റ് സൗകര്യങ്ങൾ തീവ്രവാദത്തിനായി ഉപയോഗിക്കുന്നതു തടയുന്ന, ഐടി ആക്ടിലെ 66 എഫ് വകുപ്പ് കേസിൽ ഉൾപ്പെടുത്തുകയും ചെയ്തു. കേസിൽ 66 എഫ് വകുപ്പ് ചുമത്തുന്നതിനുള്ള പ്രാഥമിക തെളിവുകൾ ഉണ്ടെന്നാണ് കോടതിയുടെ നിരീക്ഷണം.

തനിക്കെതിരെയുള്ള എഫ്‌ഐആർ റദ്ദാക്കണമെന്നാവശ്യപ്പെട്ട് കോഴിക്കോട് സമാന്തര എക്‌സ്‌ചേഞ്ച് കേസിലെ നാലാം പ്രതി അബ്ദുൽ ഗഫൂർ ഹൈക്കോടതിയിൽ ഹർജി സമർപ്പിച്ചിരുന്നു. ഇതേ തുടർന്നാണ് പൊലീസിന്റെ കണ്ടെത്തൽ പ്രോസിക്യൂഷൻ കോടതിയെ അറിയിച്ചത്.

സമാന്തര എക്‌സ്‌ചേഞ്ച് കേസുകളിലെ പ്രതിയായ ഇബ്രാഹിം പുല്ലാട്ടിൽ 168 പാക്കിസ്ഥാൻ പൗരന്മാരുമായി ബന്ധപ്പെട്ടതിന്റെ തെളിവുകൾ പൊലീസിന് ലഭിച്ചിരുന്നു. പാകിസ്താൻ സ്വദേശി മുഹമ്മദ് റഹീം, ബംഗ്ലദേശ് സ്വദേശി സാഹിർ, ചൈന സ്വദേശിനികളായ ഫ്‌ലൈ, ലീ എന്നിവർക്ക് സമാന്തര ടെലിഫോൺ എക്‌സ്‌ചേഞ്ച് വഴി ഇന്ത്യയിലേക്ക് റൂട്ട് വിൽപന നടത്തിയിരുന്നെന്ന് ഇയാൾ പൊലീസിനോട് വെളിപ്പെടുത്തുകയും ചെയ്തിരുന്നു.

തിരുവനന്തപുരം: പൊൻമുടി വിനോദ സഞ്ചാര കേന്ദ്രം സഞ്ചാരികൾക്കായി തുറന്നു നൽകുന്നു. ബുധനാഴ്ച മുതലാണ് പൊൻമുടി വിനോദസഞ്ചാര കേന്ദ്രം തുറന്നു നൽകുന്നത്. നിയന്ത്രണ വിധേയമായിട്ടായിരിക്കും വിനോദസഞ്ചാര കേന്ദ്രത്തിന്റെ പ്രവർത്തനം.

കോവിഡ് വൈറസ് വ്യാപനത്തെ തുടർന്നും കനത്ത മഴയിൽ റോഡ് തകർന്നത് മൂലവും പൊൻമുടി അടച്ചിട്ടിരിക്കുകയായിരുന്നു. കഴിഞ്ഞ ദിവസം ചേർന്ന ജില്ലാ വികസന സമിതിയാണ് പൊൻമുടി തുറക്കാൻ തീരുമാനിച്ചത്. അപകടാവസ്ഥയിലുള്ള റോഡ് ഭാഗത്ത് കാവൽ ഏർപ്പെടുക്കാനും ധാരണയായിട്ടുണ്ട്.