Highlights (Page 144)

ന്യൂഡൽഹി: ജോലി സംബന്ധമായതും, സർക്കാർ സംബന്ധമായതുമായ വിവരങ്ങൾ കൈമാറാൻ വാട്ട്‌സ്ആപ്പ്, ടെലഗ്രാം തുടങ്ങിയ ആപ്പുകൾ ഉപയോഗിക്കരുതെന്ന് സർക്കാർ ജീവനക്കാർക്ക് നിർദേശം നൽകി കേന്ദ്രം. കേന്ദ്ര സർക്കാർ പുറത്തിറക്കിയ ഏറ്റവും പുതിയ കമ്യൂണിക്കേഷൻ മാർഗ്ഗരേഖയിലാണ് ഇക്കാര്യം വ്യക്തമാക്കിയിട്ടുള്ളത്. ഈ ആപ്ലിക്കേഷനുകൾ സ്വകാര്യ കമ്പനികൾ വിദേശത്ത് നിന്നും നിയന്ത്രിക്കുന്നവയാണെന്നാണ് മാർഗനിർദേശത്തിൽ ചൂണ്ടിക്കാട്ടുന്നത്.

വാട്ട്‌സ്ആപ്പ്, ടെലഗ്രാം എന്നിവ സർക്കാർ ജീവനക്കാർ ഔദ്യോഗിക വിവരങ്ങൾ കൈമാറാൻ ഉപയോഗിക്കുന്നതിലെ സുരക്ഷ പ്രശ്‌നങ്ങൾ വിവിധ രഹസ്വന്വേഷണ ഏജൻസികൾ ചൂണ്ടിക്കാട്ടിയിരുന്നു. ഈ സാഹചര്യത്തിലാണ് കേന്ദ്രസർക്കാർ പുതുക്കിയ മാർഗ്ഗരേഖ പുറത്തിറക്കിയത്. വർക്ക് ഫ്രം ഹോം ജോലിയിൽ ഏർപ്പെടുന്ന ജീവനക്കാർ പൂർണ്ണമായും ഇ- ഓഫീസ് അപ്ലിക്കേഷൻ വഴി മാത്രമേ ആശയ വിനിമയം നടത്താൻ പാടുള്ളൂവെന്ന് കേന്ദ്രസർക്കാർ അറിയിച്ചു.

നാഷണൽ ഇൻഫോമാറ്റിക്‌സ് സെന്റർ നിർമ്മിച്ച വിപിഎൻ വഴിയുള്ള ഇ-ഓഫീസ് വഴി മാത്രമെ ജോലി സമയത്ത് ജോലി സംബന്ധമായ പ്രധാന രേഖകൾ കൈമാറാൻ പാടുള്ളൂ. എല്ലാ മന്ത്രിമാരും അവരുടെ ഓഫീസുകളും ഇപ്പോൾ ഇതിൽ നിന്നും വ്യത്യസ്തമായി പ്രവർത്തിക്കുന്നുണ്ടെങ്കിൽ അത് മാറ്റാൻ വേണ്ടി അടിയന്തര നടപടികൾ സ്വീകരിക്കണം. ഒഫീഷ്യൽ രേഖകൾ ഒരിക്കലും മൊബൈലിൽ ഫയലുകളായ സൂക്ഷിക്കരുതെന്നും നിർദ്ദേശമുണ്ട്.

അനൗദ്യോഗികമല്ലാത്ത ഒരു ആപ്പ് വഴിയും ഔദ്യോഗിക രേഖകൾ കൈമാറരുതെന്നും മാർഗനിർദ്ദേശത്തിൽ പറയുന്നു. സ്വകാര്യ ഉടമസ്ഥതയിലുള്ള സെർവറുകളിൽ സർക്കാറിന്റെ രേഖകൾ എത്തുന്നത് രാജ്യ സുരക്ഷ സംബന്ധമായ പ്രശ്‌നങ്ങൾ ഉണ്ടാക്കുമെന്നും മുന്നറിയിപ്പുണ്ട്. രാജ്യസുരക്ഷ പോലുള്ള സുപ്രധാന വിഷയങ്ങൾ ചർച്ച ചെയ്യുന്ന യോഗങ്ങളിൽ മന്ത്രിമാർ, ഉന്നത ഉദ്യോഗസ്ഥർ എന്നിവർ ഒരിക്കലും സ്മാർട്ട്‌ഫോൺ, സ്മാർട്ട് വാച്ച് എന്നിവ ഉപയോഗിക്കരുത്. തന്ത്ര പ്രധാന ഓഫീസുകളിൽ വെർച്വൽ അസിസ്റ്റൻറുകളായ ആമസോൺ അലക്‌സ, ഗൂഗിൾ ഹോം, ആപ്പിൾ ഹോം പോഡ് എന്നിവയും ഉപയോഗിക്കരുതെന്ന് കേന്ദ്ര സർക്കാർ അറിയിച്ചു.

ന്യൂഡൽഹി: കോവിൻ പോർട്ടലിൽ നിന്ന് ഉപയോക്താക്കളുടെ വിവരങ്ങൾ ചോർന്നിട്ടില്ലെന്ന് വ്യക്തമാക്കി കേന്ദ്ര സർക്കാർ. എല്ലാ ഉപയോക്താക്കളുടേയും വിവരങ്ങൾ കോവിൻ പോർട്ടലിൽ സുരക്ഷിതമാണെന്ന് കേന്ദ്ര സർക്കാർ വിശദമാക്കി. കോവിൻ പോർട്ടലിൽ നിന്നും ഡാറ്റ ചോരുന്നതായി റിപ്പോർട്ടുകളുണ്ടായിരുന്നു. ഈ സാഹചര്യത്തിലാണ് വിശദീകരണവുമായി കേന്ദ്ര സർക്കാർ രംഗത്തെത്തിയത്.

കോവിൻ പോർട്ടലിൽ രജിസ്റ്റർ ചെയ്യുന്ന വ്യക്തികളുടെ മേൽവിലാസമോ ആർടിപിസിആർ പരിശോധന ഫലങ്ങളോ ചോരുന്നില്ലെന്ന് അന്വേഷണത്തിൽ തെളിഞ്ഞതായി ആരോഗ്യ മന്ത്രാലയം വ്യക്തമാക്കി. കോവിഡ് വാക്‌സിൻ വിതരണത്തിനായി ആരംഭിച്ച പോർട്ടലിൽ എവിടേയും പയോക്താക്കളുടെ വിവരങ്ങൾ സ്ഥിരമായി ശേഖരിക്കപ്പെടുന്നില്ലെന്നും മന്ത്രാലയം വിശദീകരിച്ചു.

അതേസമയം കോവിൻ പോർട്ടലിൽ ഒരു നമ്പറിൽ നിന്നുള്ള വാക്‌സിൻ ബുക്കിംഗ് പരിധി കേന്ദ്ര സർക്കാർ ഉയർത്തി. ഇപ്പോൾ ഒരു നമ്പർ ഉപയോഗിച്ച് ആറ് അംഗങ്ങൾക്ക് വരെ രജിസ്റ്റർ ചെയ്യാൻ കഴിയും.

ന്യൂഡൽഹി: ക്ലബ്ഹൗസ് ചർച്ചയിൽ മുസ്ലിം സ്ത്രീകൾക്കെതിരെ ലൈംഗികാധിക്ഷേപം നടത്തിയ സംഭവത്തിൽ മുഖ്യപ്രതി പിടിയിൽ. ഉത്തർപ്രദേശ് സ്വദേശിയായ 18 കാരനാണ് പിടിയിലായത്. പോലീസിന്റെ ചോദ്യം ചെയ്യലിൽ ഇയാൾ കുറ്റം സമ്മതിച്ചു. മറ്റൊരാളുടെ നിർദേശപ്രകാരമാണ് ക്ലബ് ഹൗസിൽ ഓഡിയോ ചാറ്റ്റൂം ആരംഭിച്ചതെന്ന് ഇയാൾ പോലീസിനോട് പറഞ്ഞു. റൂം തുറന്ന ശേഷം മോഡറേറ്റർ അവകാശം അയാൾക്ക് കൈമാറിയെന്നും ഇയാൾ പോലീസിന് മൊഴി നൽകി. ഡൽഹി പൊലീസിന്റെ സൈബൽ സെൽ വിഭാഗമാണ് ഇയാളെ ചോദ്യം ചെയ്തത്.

വ്യാജപേരിലാണ് ഇയാൾ ക്ലബ് ഹൗസിൽ റൂം തുറന്നത്. സംഭവത്തിൽ കഴിഞ്ഞ ദിവസം ഹരിയാനയിൽ നിന്നും മൂന്നു പേരെ മുംബൈ ക്രൈംബ്രാഞ്ച് സൈബർ പോലീസ് അറസ്റ്റ് ചെയ്തിരുന്നു.

അതേസമയം കേസിൽ അഞ്ചുപേരെ തിരിച്ചറിഞ്ഞെന്നും കൂടുതൽ പേരും ഡൽഹിക്ക് പുറത്താണെന്നും ഡൽഹി പോലീസ് വ്യക്തമാക്കി. ഇതിൽ ഒരാൾ മലയാളിയാണെന്നാണ് വിവരം. അറസ്റ്റിലായ പ്രതികളെ കൂടുതൽ ചോദ്യം ചെയ്യാനായി ഡൽഹിയിൽ എത്തിച്ചിട്ടുണ്ട്.

തിരുവനന്തപുരം: കെപിസിസി അദ്ധ്യക്ഷൻ കെ സുധാകരനെതിരെ രൂക്ഷ വിമർശനവുമായി വിദ്യാഭ്യാസ മന്ത്രി വി ശിവൻകുട്ടി. മുഖ്യമന്ത്രിയുടെ ചികിത്സയെ വരെ അവഹേളിച്ച കെ പി സി സി അധ്യക്ഷൻ കെ സുധാകരൻ മനുഷ്യഹൃദയമുള്ളയാളല്ല എന്ന് പറയേണ്ടി വരുമെന്ന് അദ്ദേഹം പറഞ്ഞു. മുഖ്യമന്ത്രിക്കും സി പി ഐ എം സംസ്ഥാന സെക്രട്ടറിക്കുമെതിരായ കത്ത് കെ സുധാകരൻ സമൂഹമാധ്യമത്തിൽ നിന്ന് പിൻവലിച്ചത് സ്വമനസാലെയല്ല എന്നത് വ്യക്തമാണ്. എതിർപ്പ് ശക്തമായതോടെയാണ് സുധാകരൻ കത്ത് പിൻവലിച്ചതെന്ന് അദ്ദേഹം വ്യക്തമാക്കി.

ആർക്കെങ്കിലും അസുഖം വരുമ്പോഴോ ചികിത്സയ്ക്ക് പോകുമ്പോഴോ വിളിച്ച് കൂടെയുണ്ട് എന്ന് പറയുന്നവരാണ് മലയാളികൾ. ഇക്കാര്യത്തിൽ രാഷ്ട്രീയ വ്യത്യാസങ്ങൾ ഇല്ല. മകന് അപകടം പറ്റിയതറിഞ്ഞ് കരഞ്ഞുകൊണ്ട് ട്രെയിനിൽ തലസ്ഥാനത്തേക്ക് യാത്രചെയ്യുന്ന കോൺഗ്രസ് നേതാവ് രാജ്‌മോഹൻ ഉണ്ണിത്താനെ വിവരമറിഞ്ഞ് ട്രെയിനിൽ ഉണ്ടായിരുന്ന ഇ പി ജയരാജൻ കൂടെയിരുന്ന് ആശ്വസിപ്പിച്ചതും അദ്ദേഹത്തിന്റെ കാറിൽ ഒരുമിച്ച് ആശുപത്രിയിലെത്തിയതും രാജ്‌മോഹൻ ഉണ്ണിത്താൻ തുറന്നു പറഞ്ഞിട്ട് നാളുകളേറെ ആയിട്ടില്ല. ചികിത്സയിലായിരുന്ന കെ കരുണാകരനെ ഇ കെ നായനാർ കാണാൻ വന്ന ദൃശ്യം ഇപ്പോഴും മലയാളിയുടെ മനസ്സിൽ ഉണ്ട്. ആ പാരമ്പര്യമുള്ള മലയാളിയുടെ മനസ്സിൽ ആണ് കെ സുധാകരൻ വിഷം കുത്തിവെക്കാൻ ശ്രമിക്കുന്നതെന്ന് അദ്ദേഹം കുറ്റപ്പെടുത്തി.

സുധാകരൻ സമൂഹമാദ്ധ്യമത്തിൽ നിന്ന് കത്ത് പിൻവലിച്ചുവെങ്കിലും കത്തിന്റെ കോപ്പി കോൺഗ്രസ് ഗ്രൂപ്പുകളിൽ ഇപ്പോഴും പ്രചരിക്കുന്നുണ്ട്. കെ സുധാകരന്റെ അനുയായികളാണ് ഇതിനുപിന്നിൽ. എതിർപ്പ് ശക്തമായപ്പോൾ നാട്ടുകാരുടെ കണ്ണിൽ പൊടിയിടാൻ സമൂഹമാധ്യമത്തിൽ നിന്ന് കത്ത് പിൻവലിച്ച കെ സുധാകരൻ അത് വ്യാപകമായി പ്രചരിപ്പിക്കുന്ന അണികളെ വിലക്കാൻ തയ്യാറായിട്ടില്ല. കേരളത്തിലെ രാഷ്ട്രീയ അന്തരീക്ഷം മലിനമാക്കാനുള്ള കെ സുധാകരന്റെ ഇത്തരം പ്രവർത്തനങ്ങൾക്ക് പിന്തുണ നൽകുന്നുണ്ടോയെന്ന് എ കെ ആന്റണിയും ഉമ്മൻചാണ്ടിയും അടക്കമുള്ള കോൺഗ്രസിന്റെ മുതിർന്ന നേതാക്കൾ വ്യക്തമാക്കണം. കെ മുരളീധരൻ ഇക്കാര്യത്തിൽ മനുഷ്യസ്‌നേഹപരമായ പ്രസ്താവന നടത്തിയത് നന്നായെന്ന് അദ്ദേഹം അഭിപ്രായപ്പെട്ടു.

സർക്കാരിന്റെ ഏത് പദ്ധതിയെയും കണ്ണടച്ച് എതിർക്കുന്ന നിലപാടാണ് കെ സുധാകരന്റേത്. മുഖ്യമന്ത്രിക്കെതിരെ അടിസ്ഥാനരഹിതവും അസത്യം നിറഞ്ഞതും ജനാധിപത്യവിരുദ്ധവുമായ പ്രസ്താവനകൾ നടത്തുക എന്നത് കെ സുധാകരൻ പതിവാക്കിയിരിക്കുകയാണെന്നും അദ്ദേഹം കൂട്ടിച്ചേർത്തു.

തിരുവനന്തപുരം: കോവിഡ് വ്യാപനത്തിന്റെ പശ്ചാത്തലത്തിൽ തിരുവനന്തപുരത്ത് നിയന്ത്രണങ്ങൾ കർശനമാകുന്നു. ജില്ലയിലെ മാളുകളിലെ കളിസ്ഥലങ്ങൾ പൂർണമായി അടച്ചിടാനാണ് തീരുമാനം. ജില്ലാ കളക്ടറാണ് ഇക്കാര്യം അറിയിച്ചത്. പൊതുചടങ്ങുകൾക്കോ യോഗങ്ങൾക്കോ എന്തെങ്കിലും അനുമതി നൽകിയിട്ടുണ്ടെങ്കിൽ റദ്ദാക്കുന്നതായും കളക്ടർ വ്യക്തമാക്കി. ബി കാറ്റഗറി നിയന്ത്രണങ്ങൾ വ്യക്തമാക്കി ജില്ലാ കളക്ടർ ഇറക്കിയ ഉത്തരവിലാണ് ഇക്കാര്യം നിർദ്ദേശിക്കുന്നത്.

ആശുപത്രിയിൽ പ്രവേശിപ്പിക്കപ്പെടുന്നവരിൽ 10 ശതമാനത്തിന് മുകളിൽ കോവിഡ് രോഗികൾ നിലവിലുള്ളതിനാലാണ് തിരുവനന്തപുരം ജില്ലയെ ബി കാറ്റഗറിയിൽ ഉൾപ്പെടുത്തിയത്. ഈ സാഹചര്യത്തിലാണ് ജില്ലാ ഭരണകൂടം നിയന്ത്രണങ്ങൾ കർശനമാക്കാൻ തീരുമാനിച്ചത്. സാമൂഹിക-രാഷ്ട്രീയ-സാംസ്‌കാരിക-മത-സാമുദായികപരമായ പൊതുചടങ്ങുകൾക്ക് ഇനിയൊരറിയിപ്പ് ഉണ്ടാകുന്നതുവരെ വിലക്കേർപ്പെടുത്തിയതായി കളക്ടർ അറിയിച്ചു. വിവാഹ, മരണാനന്തര ചടങ്ങുകൾക്ക് 20 പേർ മാത്രമേ പങ്കെടുക്കാൻ അനുമതിയുള്ളു. ആരാധനാലയങ്ങളിലെ പ്രാർത്ഥനകളും മറ്റ് ചടങ്ങുകളും ഓൺലൈനായി നടത്തണമെന്നും നിർദ്ദേശമുണ്ട്്.

മാളുകളിലെ കളിസ്ഥലങ്ങൾ പൂർണമായും അടച്ചിടണം. ഒൻപത് വരെയുള്ള ക്ലാസുകൾ ഓൺലൈനായും 10 മുതൽ 12 വരെയുള്ള ക്ലാസുകൾ ഓഫ്‌ലൈനായും നടത്താം. ബഡ്‌സ് സ്‌കൂളുകൾക്കും തെറാപ്പികളുമായി ബന്ധപ്പെട്ട് നടത്തുന്ന സ്‌പെഷൽ സ്‌കൂളുകൾക്കും ഓഫ്‌ലൈൻ ക്ലാസുകൾ നടത്താം. എന്നാൽ ഇവിടങ്ങളിൽ ക്ലസ്റ്റർ രൂപപ്പെട്ടാൽ 15 ദിവസത്തേക്ക് അടച്ചിടണം. ജനുവരി 23, 30 തിയതികളിൽ അവശ്യസർവീസുകൾക്ക് മാത്രമാണ് പ്രവർത്തനാനുമതി നൽകിയിട്ടുള്ളത്.