Entertainment (Page 209)

കൊച്ചി : ഒടിടി ചിത്രങ്ങളില്‍ ഇനി അഭിനയിച്ചാല്‍ ഫഹദ് ഫാസിലിനെ വിലക്കിയേക്കുമെന്ന് തിയറ്റർ സംഘടനയായ ഫിയോക്ക്. ഫഹദ് നായകനായ ചിത്രങ്ങള്‍ തുടര്‍ച്ചയായി ഒടിടിയിലൂടെ റിലീസ് ചെയ്യുന്ന സാഹചര്യത്തിലാണ് ഫിയോക്കിന്റെ മുന്നറിയിപ്പ്. ലോക്‌ഡൗണ്‍ കാലത്തും പിന്നീടും മൂന്ന് ചിത്രങ്ങളാണ് ഫഹദിന്റേതായി ഒടിടി റിലീസിനെത്തിയത്.

മഹേഷ് നാരായണ്‍ സംവിധാനം ചെയ്‌ത സീ യൂ സൂണ്‍, നസീഫ് യൂസഫ് ഇയ്യുദീന്റെ ഇരുള്‍, ദിലീഷ് പോത്തന്‍ സംവിധാനം ചെയ്‌ത ജോജി എന്നിവയായിരുന്നു ചിത്രങ്ങള്‍. ഇനിയും ഒടിടി റിലീസുകളോട് സഹകരിച്ചാല്‍ ഫഹദ് ചിത്രങ്ങള്‍ തിയേറ്റര്‍ കാണുകയില്ലെന്നാണ്‌ ഫിയോക്കിന്റെ നിലപാട്. മഹേഷ് നാരായണന്റെ ബിഗ് ബജറ്റ് ചിത്രം മാലിക്ക് ഉള്‍പ്പടെയുള്ള സിനിമകളുടെ പ്രദര്‍ശനത്തിന് വലിയ രീതിയിലുള്ള തടസങ്ങള്‍ നേരിടുമെന്ന് ഫിയോക്ക് മുന്നറിയിപ്പ് നല്‍കി.

പുതിയ ഫിയോക്ക് സമിതിയുടെ ആദ്യയോഗത്തിന് ശേഷമാണ് തീരുമാനം ഉണ്ടായത്. എന്നാൽ കഴിഞ്ഞ രണ്ട് മാസത്തിനിടെ രണ്ട് ചിത്രങ്ങൾ ഫഹദ് ഫാസിലിന്റേതായി ഒടിടിയിൽ റിലീസ് ചെയ്‌ത സാഹചര്യത്തിൽ ഇതിന്റെ വിശദീകരണം അറിയുന്നതിനായാണ്‌ ഫഹദിനെ ഫോണിൽ ബന്ധപ്പെട്ടതെന്ന്‌ ഫിയോക്‌ വിശദീകരിക്കുന്നു. രണ്ട് ചിത്രങ്ങളും ലോക്‌ഡൗണ്‍ സമയത്ത് ഒടിടിക്കു വേണ്ടി മാത്രം ഷൂട്ട് ചെയ്‌തതായിരുന്നുവെന്നും അദ്ദേഹം പറഞ്ഞതായി ഫിയോക് അംഗങ്ങൾ പറഞ്ഞു.

മാത്രമല്ല ഒടിടി സിനിമകളുമായി ഉടന്‍ സഹകരിക്കുന്നില്ലെന്ന ഉറപ്പും ഫഹദ് നൽകിയതായും ഇവർ അറിയിച്ചു. ജീത്തു ജോസഫ് സംവിധാനം ചെയ്‌ത ദൃശ്യം 2 തിയേറ്ററുകളില്‍ പ്രദര്‍ശിപ്പിക്കേണ്ട എന്നും സമിതി തീരുമാനിച്ചു. ആമസോണ്‍ പ്രൈമില്‍ റിലീസ് ചെയ്ത ഈ ചിത്രം തിയേറ്ററുകളില്‍ റിലീസ് ചെയ്യുമെന്ന് നേരത്തേ അഭ്യൂഹമുണ്ടായിരുന്നു

ദുല്‍ഖര്‍ സല്‍മാന്‍ മുഴുനീള പോലീസ് വേഷവുമായി എത്തുന്ന റോഷന്‍ ആന്‍ഡ്രൂസ് ചിത്രം സല്യൂട്ടിന്റെ ഷൂട്ടിംഗ് പൂര്‍ത്തിയായി.ബോളിവുഡ് താരവും മോഡലുമായ ഡയാന പെന്റിയാണ് ചിത്രത്തില്‍ നായികയാകുന്നത്.മനോജ് കെ. ജയന്‍, അലന്‍സിയര്‍, ബിനു പപ്പു, വിജയകുമാര്‍, ലക്ഷ്മി ഗോപാല സ്വാമി, സാനിയ അയ്യപ്പന്‍ തുടങ്ങിയവര്‍ മറ്റു പ്രധാന വേഷങ്ങളില്‍ എത്തുന്നു.
സിനിമ പൂര്‍ത്തിയാക്കുവാന്‍ അകമഴിഞ്ഞ് സഹായിച്ച ദുല്‍ഖറിനും കൂടെ വര്‍ക്ക് ചെയ്തവര്‍ക്കും നന്ദി പറഞ്ഞ് സംവിധായകന്‍ റോഷന്‍ ആന്‍ഡ്രൂസ് സോഷ്യല്‍ മീഡിയയില്‍ പങ്ക് വെച്ച കുറിപ്പ് ഇപ്പോള്‍ ശ്രദ്ധേയമാകുകയാണ്.

റോഷന്‍ ആന്‍ഡ്രൂസിന്റെ കുറിപ്പ്

ഡിക്യു.. ഏറെ സ്‌നേഹത്തോടെയും ബഹുമാനത്തോടെയും നമ്മള്‍ എല്ലാവരും വിളിക്കുന്നത് അങ്ങനെയാണ്. എന്റെ എന്നത്തേയും ഒരു സ്വപ്നമായ താങ്കളോടൊപ്പം ഒരു സിനിമ എന്നത് യാഥാര്‍ഥ്യമാക്കി തന്ന അങ്ങേക്ക് ഹൃദയത്തില്‍ നിന്നും നന്ദിയര്‍പ്പിക്കുന്നു. ഒന്നിച്ചു പ്രവര്‍ത്തിച്ച ഓരോ നാളിലും താങ്കള്‍ എത്രയേറെ നന്മയുള്ള വ്യക്തിയാണ് എന്ന് ഞാന്‍ തിരിച്ചറിയുകയായിരുന്നു. ആ ഒരു മേന്മ തന്നെയാണ് താങ്കളെ മികച്ചൊരു അഭിനേതാവും ആക്കിത്തീര്‍ത്തിരിക്കുന്നത്. ദുല്‍ഖറിനൊപ്പം വര്‍ക്ക് ചെയ്യുക എന്നത് കരിയറില്‍ ഒഴിച്ചുകൂടാനാവാത്ത ഒരു അനുഭവമാണെന്ന് തന്നെ ഞാന്‍ എന്റെ സുഹൃത്തുക്കളായ എല്ലാ സംവിധായകരോടും തീര്‍ച്ചയായും പറയും. കൂടാതെ താങ്കളുടെ പ്രൊഡക്ഷന്‍ കമ്പനി മലയാളത്തിലെ തന്നെ ഏറ്റവും മികച്ചവയില്‍ ഒന്നാണ്. ആ കമ്പനിക്ക് വേണ്ടി ഒരു സിനിമ ചെയ്യുവാന്‍ സാധിച്ചത് ഞാന്‍ ഒരു ഭാഗ്യമായി കരുതുന്നു. ഏറ്റവും മികച്ച പ്രൊഡക്ഷന്‍ കമ്പനികളില്‍ ഒന്നിനോടൊപ്പവും ഏറ്റവും മികച്ച നടന്മാരില്‍ ഒരാളോടൊപ്പവും ഏറ്റവും നല്ല മനുഷ്യന്മാരില്‍ ഒരാളോടൊപ്പവും അതോടൊപ്പം സിനിമ ലോകത്ത് നിന്നും ഞാന്‍ നേടിയെടുത്ത ഏറ്റവും നല്ല സുഹൃത്തുക്കളില്‍ ഒരാളോടൊപ്പവും വര്‍ക്ക് ചെയ്യുവാനുള്ള അസുലഭ അവസരമാണ് താങ്കള്‍ എനിക്ക് നല്‍കിയത്. നമ്മള്‍ പ്രതീക്ഷിച്ചതിനും അപ്പുറത്തെ തലത്തിലേക്ക് അരവിന്ദ് കരുണാകരനെ എത്തിക്കുവാന്‍ സഹായിച്ച താങ്കളോട് എത്ര നന്ദി പറഞ്ഞാലും മതിയാവുകയില്ല. ഇത് എഴുതുമ്പോഴും അരവിന്ദ് കരുണാകരനെ അയാളാക്കി തീര്‍ക്കുവാന്‍ താങ്കള്‍ പകര്‍ന്നേകിയ ഓരോ ചലനങ്ങളും മാനറിസങ്ങളും ഇപ്പോഴും ഞാന്‍ മറന്നിട്ടില്ല. ഈ കൊറോണ സമയത്തും വിചാരിച്ചതിനും മുന്‍പേ ചിത്രീകരണം പൂര്‍ത്തിയാക്കുവാന്‍ സഹകരിച്ച മുഴുവന്‍ ടീമംഗങ്ങള്‍ക്കും പ്രത്യേക നന്ദി. വേഫെറര്‍ ടീമും നമ്മളും ഒന്നിച്ച് നടത്തിയ കഠിനാദ്ധ്വാനം തന്നെയാണ് ഇതെല്ലാം സാധ്യമാക്കിയത്. മനോജേട്ടാ.. താങ്കളെനിക്ക് ഒരു ജ്യേഷ്ഠന്‍ തന്നെയാണ്. ഏതു സാഹചര്യത്തിലും എന്നോട് കൂടെ നില്‍ക്കുന്ന ഒരാള്‍. ഈ സിനിമയില്‍ ഞങ്ങളോട് ഒപ്പം പ്രവര്‍ത്തിച്ച എല്ലാ അഭിനേതാക്കള്‍ക്കും ടെക്‌നീഷ്യന്‍സിനും എന്റെ എല്ലാമെല്ലാമായ ബോബിക്കും സഞ്ജയിനും (ഏതാണ് ബ്രോ നമ്മുടെ അടുത്ത പ്രൊജക്റ്റ്..?) ഈ സ്വപ്നം യാഥാര്‍ഥ്യമാക്കി തീര്‍ത്തതിന് ഒരു ബിഗ് സല്യൂട്ട്,’ റോഷന്‍ ആന്‍ഡ്രൂസ് തന്റെ പോസ്റ്റിനൊപ്പം കുറിച്ചു.

നവാഗതനായ അമല്‍ കെ ജോബി റഹ്മാനെ പ്രധാനകഥാപാത്രമായി ഒരുക്കുന്ന പുതിയ ചിത്രത്തിന്റെ ടൈറ്റില്‍ പ്രഖ്യാപിച്ചു. എതിരെയെന്നാണ് ചിത്രത്തിന്റെ പേര്. സംവിധായകന്റെ തന്നെ കഥക്ക് തിരക്കഥ രചിച്ചിരക്കുന്നത് സേതുവാണ്. ഒരു സൈക്കോ ത്രില്ലറാണ് പ്രമേയം. അഭിഷേക് ഫിലിംസ് നിര്‍മ്മിക്കുന്ന ചിത്രത്തില്‍ നൈല ഉഷ, ഗോകുല്‍ സുരേഷ്, വിജയ് നെല്ലീസ് എന്നിവരാണു ചിത്രത്തിലെ മറ്റു പ്രധാന അഭിനേതാക്കള്‍.എതിരേയുടെ ചിത്രീകരണം മെയ് മാസം എറണാകുളത്ത് ആരംഭിക്കും.

സന്തോഷത്തിന്റെ ഒന്നാം രഹസ്യം എന്ന മലയാള ചിത്രം മോസ്‌കോ ഇന്റര്‍നാഷണല്‍ ഫിലിം ഫെസ്റ്റിവല്‍ മത്സരവിഭാഗത്തില്‍ പ്രദര്‍ശിപ്പിക്കും. ഒറ്റ ഷോട്ടില്‍ പ്രധാനമായും ഒരു കാറിനുള്ളില്‍ ചിത്രീകരിച്ച മലയാളചിത്രമാണിത്. 85 മിനിട്ടാണ് ചിത്രത്തിന്റെ ദൈര്‍ഘ്യം. ഡോണ്‍ പാലത്തറ സംവിധാനം ചെയ്യുന്ന ചിത്രമാണ്. കേരളം രാജ്യാന്തര ചലച്ചിത്ര മേളയിലും ഈ സിനിമ പ്രദര്‍ശിപ്പിച്ചിരുന്നു.നീരജ രാജേന്ദ്രന്‍, അര്‍ച്ചന പത്മിനി എന്നിവരും ചിത്രത്തിന്റെ ഭാഗമാണ്.
ദമ്പതികളുടെ കാര്‍ യാത്രയാണ് സിനിമയ്ക്ക് പ്രമേയം. ഗര്‍ഭിണിയാണെന്ന് സംശയം ഉള്ളതിനാല്‍ പരിശോധനയ്ക്കു പോകും വഴിയുള്ള സംഭാഷണമാണ് ഈ ചിത്രത്തില്‍. അവിചാരിതമായുണ്ടായ സംഭവമായതിനാല്‍ അവര്‍ അനുഭവിക്കുന്ന പിരിമുറുക്കവും മറ്റും സിനിമയ്ക്ക് പ്രചോദനമാകുന്നു.1956 മധ്യ തിരുവിതാംകൂര്‍ എന്ന സിനിമയ്ക്ക് ശേഷം ഡോണ്‍ സംവിധാനം നിര്‍വഹിക്കുന്ന ചിത്രമാണിത്.

ബി സി നൗഫല്‍ സംവിധാനത്തില്‍ മമ്മൂട്ടിചിത്രമൊരുങ്ങുന്നു. മൈ നെയിം ഈസ് അഴകന്‍ എന്ന് പേരിട്ടിരിക്കുന്ന ചിത്രം സലിം അഹമ്മദ് പ്രൊഡക്ഷന്‍സ് ആണ് നിര്‍മിക്കുന്നത്. മമ്മൂട്ടി തന്നെയാണ് ചിത്രത്തിന്റെ ഫോട്ടോ ഷെയര്‍ ചെയ്തിരിക്കുന്നത്. സിനിമയുടെ ചിത്രീകരണം പുരോഗമിക്കുന്നുവെന്നും പോസ്റ്ററില്‍ പറയുന്നു.വണ്‍ എന്ന സിനിമയാണ് മമ്മൂട്ടി നായകനായി ഏറ്റവും ഒടുവില് പ്രദര്ശനത്തിന് എത്തിയത്.കടയ്ക്കല്‍ ചന്ദ്രന്‍ എന്ന കേരള മുഖ്യമന്ത്രിയായിട്ടാണ് മമ്മൂട്ടി അഭിനയിച്ചത്.