സിനിമ തീയറ്ററുകള് തിങ്കളാഴ്ച മുതല് തുറക്കും, പ്രവേശനം പകുതിപ്പേര്ക്ക് മാത്രം
തിരുവനന്തപുരം: സംസ്ഥാനത്തെ സിനിമ തീയറ്ററുകള് തിങ്കളാഴ്ച മുതല് തുറക്കുമെന്ന് തീയറ്റര് ഉടമകള് അറിയിച്ചു. കൊവിഡ് പശ്ചാത്തലത്തില് അടച്ച് പൂട്ടിയ മള്ട്ടിപ്ലെക്സുകള് അടക്കമുള്ള മുഴുവന് തീയറ്ററുകളും ഈ മാസം 25 ന് തന്നെ തുറക്കും. ഇന്ന് ചേര്ന്ന തീയറ്റര് ഉടമകളുടെ യോഗമാണ് തീരുമാനം കൈക്കൊണ്ടത്. ഇതിന് മുന്നോടിയായി ഈ മാസം 22 ന് തീയറ്റര് ഉടമകളും സര്ക്കാരുമായി ചര്ച്ച നടത്തും.
തീയറ്റര് ജീവനക്കാര്ക്കും സിനിമ കാണാന് എത്തുന്ന പ്രേക്ഷകര്ക്കും രണ്ട് ഡോസ് വാക്സിന് പൂര്ത്തിയായിരിക്കണമെന്ന നിബന്ധന സര്ക്കാര് മുന്നോട്ട് വെച്ചിട്ടുണ്ട്. പകുതിപ്പേരെ പ്രവേശിപ്പിച്ചേ ഷോ നടത്താന് പാടുള്ളൂ എന്നും നിബന്ധനയുണ്ട്.
25 മുതല് തീയറ്ററുകള് തുറക്കാന് നേരത്തെ സര്ക്കാര് അനുമതി നല്കിയിരുന്നു. എന്നാല് തിയേറ്റര് തുറക്കണമെങ്കില് നികുതി കുറയ്ക്കുന്നതടക്കമുള്ള ചില ആവശ്യങ്ങള് ഉടമകള് മുന്നോട്ട് വെച്ചിരുന്നു.
വിനോദ നികുതിയില് ഇളവ് നല്കണം, തീയറ്റര് പ്രവര്ത്തിക്കാത്ത മാസങ്ങളിലെ കെ എസ് ഇ ബി ഫിക്സ്ഡ് ഡെപ്പോസിറ്റ് ഒഴിവാക്കണം, കെട്ടിട നികുതിയില് ഇളവ് വേണം തുടങ്ങിയ ആവശ്യങ്ങളാണ് തീയറ്റര് ഉടമകളുടെ സംഘടനകള് സര്ക്കാരിന് മുന്നില് ഉന്നയിച്ചത്.
