Politics (Page 583)

ആലപ്പുഴ: കെപിസിസി വര്‍ക്കിംഗ് പ്രസിഡന്റ് കൊടിക്കുന്നില്‍ സുരേഷിനെതിരെ ഗുരുതര ആരോപണങ്ങളുമായി മാവേലിക്കര യുഡിഎഫ് സ്ഥാനാര്‍ത്ഥി കെ.എം ഷാജു. തന്റെ തോല്‍വിക്ക് പ്രധാന കാരണം കൊടിക്കുന്നിലാണെന്നും, തന്നെ സ്ഥാനാര്‍ത്ഥിയാക്കരുതെന്ന് ആവശ്യപ്പെട്ട് കൊടിക്കുന്നില്‍ ഇരുപത്തിയഞ്ച് തവണയിലേറെ നേതൃത്വത്തെ സമീപിച്ചുവെന്നും സ്ഥാനാര്‍ത്ഥി പ്രഖ്യാപനം വന്നപ്പോള്‍ മറ്റ് മുന്നണികള്‍ പ്രചാരണത്തില്‍ ബഹുദൂരം മുന്നിലായിയെന്നും ഷാജു ചൂണ്ടിക്കാട്ടി. പ്രാദേശിക വികാരവും ജയസാധ്യതയും സ്ഥാനാര്‍ത്ഥി നിര്‍ണയത്തില്‍ പരിഗണിക്കപ്പെടുന്നില്ലെന്നും എല്ലാവരും നേതാക്കന്മാരാകുമ്പോള്‍ താഴേ തട്ടില്‍ സംഘടന ദുര്‍ബലമായിക്കൊണ്ടിരിക്കുകയാണെന്നും പോസ്റ്റര്‍ ഒട്ടിക്കാന്‍ പോലും ആളില്ലാത്ത അവസ്ഥയാണെന്നുംജനപ്രതിനിധികള്‍ പാര്‍ട്ടിയുടെ സംഘടനാ ചുമതല ഒഴിഞ്ഞാല്‍ മാത്രമേ കോണ്‍്ഗ്രസ് ശക്തിപ്പെടുകയുള്ളുവെന്നും കെ.കെ ഷാജു പറഞ്ഞു.

മുഖ്യമന്ത്രി പിണറായി വിജയനും അദ്ദേഹത്തിന്റെ കുടുംബത്തിനുമെതിരെ ഫേസ്ബുക്ക്കുറിപ്പുമായി ഹിന്ദു ഐക്യവേദി നേതാവ് ആർ വി ബാബു.

മുസ്ലിം സമുദായത്തിന്റെ വോട്ട് നേടുന്നതിന് വേണ്ടിയാണ്‌ മകളെ മുസ്ലിം സമുദായത്തിലെ ഒരാൾക്ക് വിവാഹം കഴിച്ചുകൊടുത്തതെന്ന പരാമർശമാണ് ആർ വി ബാബു തന്റെ ഫേസ്ബുക്ക് പോസ്റ്റ് വഴി നടത്തിയിരിക്കുന്നത്. ഇങ്ങനെ ചെയ്യുന്നത് വഴി തുടർഭരണത്തിന്റെ അക്കൗണ്ടിലേക്ക് ഒരു സമുദായത്തിന്റെ വോട്ട് ഫിക്സഡ് ഡെപ്പോസിറ്റായെന്നും ഹിന്ദു ഐക്യവേദി നേതാവ് പറയുന്നുണ്ട്.

‘CAA ഒരു കാരണവശാലും നടപ്പാക്കില്ല. കേരളത്തിൽ മുസ്ലീങ്ങൾക്ക് വേണ്ടിയുള്ള കോൺസൻട്രേഷൻ ക്യാമ്പുകൾ തുറക്കില്ല. പിന്നെ അയോദ്ധ്യ , ഗുജറാത്ത് , ശൂലം, ഗർഭിണി,പശു, ആൾക്കൂട്ടക്കൊലപാതകം തുടങ്ങിയ ചേരുവകൾ ആവശ്യം പോലെ സമാസമം ചേർത്ത് ആവർത്തിച്ച് പ്രചരിപ്പിച്ചപ്പോൾ കേരളത്തിലെ മുസ്ലീം സമുദായത്തിലെ ഒരു വലിയ വിഭാഗത്തിന് പിണറായി വിജയൻ അവരുടെ മദ്നിയോ സക്കീർ നായിക്കോ ആയി മാറിയെന്നും ആർ വി ബാബു ഫേസ്ബുക്ക് കുറിപ്പിൽ പരാമർശിക്കുന്നു.

കോട്ടയം: കേരള കോണ്‍ഗ്രസ് എം ചെയര്‍മാന്‍ ജോസ് കെ. മാണിയുടെ പരാജയത്തിന് പിന്നാലെ പാതി മീശ വടിച്ച് കെ.ടി.യു.സി.എം കോട്ടയം ജില്ലാ പ്രസിഡന്റ് പൗലോസ് കടമ്പംകുഴി. പാലായില്‍ ജോസും കടുതുരുത്തിയില്‍ സ്റ്റീഫന്‍ ജോര്‍ജും വിജയിക്കുമെന്നായിരുന്നു പൗലോസ് സുഹൃത്തുക്കളുമായി പന്തയം വച്ചിരുന്നത്.

പൗലോസിന്റെ വാക്കുകള്‍- തിരഞ്ഞെടുപ്പില്‍ എന്റെ പാര്‍ട്ടി ചെയര്‍മാന്‍ ജോസ് കെ. മാണിയും എന്റെ നിയോജകമണ്ഡലം സ്ഥാനാര്‍ത്ഥി സ്റ്റീഫന്‍് ജോര്‍ജും പരാജയപ്പെട്ടു. എന്റെ ഒരു സ്‌നേഹിതനുമായി ഇരുവരുടേയും വിജയം ഉറപ്പാണെന്ന് പറഞ്ഞ് ബെറ്റ് വെച്ചിരുന്നു. ഇവരുടെ പരാജയം ഉള്‍കൊണ്ട് കൊണ്ട് മീശ പാതി വടിച്ചു കളഞ്ഞിരിക്കുകയാണ്. ജീവിതത്തില്‍ ആദ്യമായി മീശവടിച്ചു. ഇതുകൊണ്ടാന്നും തളരില്ല. പരാജയം വിജയത്തിന്റെ മുന്നോടിയാണ്. ഇന്ത്യയുടെ മുന്‍ പ്രധാനമന്ത്രി പോലും പരാജയപ്പെട്ടിട്ടുണ്ട്. പൊതു പ്രവര്‍ത്തനത്തില്‍ സജീവമായി ഉണ്ടാകും.

കോട്ടയം: പൂഞ്ഞാറിലെ തോല്‍വിക്ക് പിന്നാലെ തനിക്ക് നേരെ ഉയര്‍ന്ന വധഭീഷണിക്ക് മറുപടിയുമായി പി.സി.ജോര്‍ജ്. ഇവനെയൊക്കെ മര്യാദ പഠിപ്പിക്കാനുള്ള ആംപിയര്‍ ഇപ്പോഴും തനിക്കുണ്ട്. പോലീസ് സംരക്ഷണം ആവശ്യപ്പെടില്ലെന്നും അവന്‍ തന്നെ എന്ത് ചെയ്യുമെന്ന് കാണണമെന്നും പിസി പറഞ്ഞു.

വെല്ലുവിളി മുഴക്കിയവനെതിരെ പരാതി കൊടുക്കേണ്ട കാര്യമെന്താ, ഇവനെയൊക്കെ അടിച്ചു മര്യാദ പഠിപ്പിക്കാന്‍ എനിക്കറിയാമല്ലോ. എന്റെ മേത്ത് തൊട്ടാല്‍ ഒന്നിനെയും ഞാന്‍ ബാക്കി വച്ചേക്കില്ല. ഈ പട്ടികളെയൊന്നും എനിക്ക് ഭയമില്ല. എല്ലായിടത്തും വിളിച്ച്‌ തട്ടിക്കളയും. കൊന്നുകളയും എന്നൊക്കെ പറയുന്നുണ്ട്. നെറ്റ് കോളാണ്.അവന് ധൈര്യമുണ്ടേല്‍ എന്നെ വിളിക്കട്ടെ.. അവന്‍ പറയുന്നിടത്തോട്ട് ചെല്ലാം…അവനെന്താ ചെയ്യുന്നതെന്ന് കാണട്ടെ..തല്ലുന്നോന്ന് കാണാം.

അവന്റെ വാപ്പായെ തല്ലുവെന്ന് പറഞ്ഞേര്.. ഈരാറ്റുപേട്ടയില്‍ കൂടി നടന്നുതന്നെ പോകുന്നുണ്ട്. എന്തു ചെയ്യുമെന്ന് കാണട്ടെ. എനിക്ക് പേടിയില്ല. എന്റെ മണം അടിച്ചാല്‍ അവനൊക്കെ പേടിക്കുവല്ലോ. വെറുതെ വീഡിയോയില്‍ ഉളുപ്പടിക്കുന്നതല്ലാതെ. അവനെയൊക്കെ ആരാ മൈന്‍ഡാ ചെയ്യുന്നെ. എനിക്ക് ഭയമില്ല. ഒരുത്തനും എന്നെ തല്ലത്തില്ല. നമുക്ക് കാണാം. അവന്‍ തല്ലിയേച്ച്‌ കിടന്നുറങ്ങുന്ന പ്രശ്നമില്ല. എന്നെ തല്ലട്ടെ അവന്റെ ജീവിതം കളയുമെന്നും പിസി പറഞ്ഞു.

തിരുവനന്തപുരം: രാഷ്ട്രീയകാര്യ സമിതിയോഗം വിളിച്ചുചേര്‍ത്തശേഷം കെ പി സി സി അദ്ധ്യക്ഷസ്ഥാനം മുല്ലപ്പളളി രാമചന്ദ്രന്‍ ഒഴിഞ്ഞേക്കും.മേല്‍ത്തട്ടിലെ ആവേശത്തിനപ്പുറം സംഘടനാസംവിധാനം തകര്‍ന്നടിഞ്ഞതിന്റെ ചോദ്യങ്ങളാണ് മുല്ലപ്പളളിക്ക് നേരെ ഉയരുന്നത്.മുല്ലപ്പളളിയുടെ അന്തിമ തീരുമാനം എന്തെന്ന് അറിഞ്ഞശേഷം മതി തുടര്‍നടപടികള്‍ എന്നാണ് ഹൈക്കമാന്‍ഡ് നിലപാട്. മുല്ലപ്പളളിക്ക് പകരം ആര് കെ പി സി സി അദ്ധ്യക്ഷനാകുമെന്ന കാര്യം ഹൈക്കമാന്‍ഡ് തീരുമാനിക്കും.പ്രസിഡന്റ് സ്ഥാനത്തേക്ക് കെ സുധാകരനെ പരിഗണിക്കാനായിരുന്നു നേരത്തെ ഹൈക്കമാന്‍ഡ് താത്പര്യപ്പെട്ടിരുന്നത്. ഐ ഗ്രൂപ്പുകാരനായ സുധാകരന്‍ പ്രസിഡന്റ് സ്ഥാനത്ത് എത്തിയാല്‍ പ്രതിപക്ഷനേതൃസ്ഥാനം എ ഗ്രൂപ്പ് ആവശ്യപ്പെടാന്‍ സാദ്ധ്യതയുണ്ട്. ഐ ഗ്രൂപ്പില്‍ നിന്ന് വി ഡി സതീശന്‍, എ ഗ്രൂപ്പില്‍ നിന്ന് തിരുവഞ്ചൂര്‍ രാധാകൃഷ്ണന്‍, പി ടി തോമസ് എന്നിവരുടെ പേരുകളാണ് പ്രതിപക്ഷ നേതൃസ്ഥാനത്തേക്ക് ഉയര്‍ന്നുകേള്‍ക്കുന്നത്. എന്നാല്‍, രമേശ് ചെന്നിത്തല മാറേണ്ട സാഹചര്യം ഇല്ലെന്നാണ് ഐ ഗ്രൂപ്പ് നേതാക്കള്‍ പറയുന്നത്.

മലപ്പുറം: ലോക്‌സഭ അംഗത്വം ഇട്ടെറിഞ്ഞ് കേരള രാഷ്ട്രീയത്തിലേക്ക് തിരികെ വരാനുള്ള പി.കെ. കുഞ്ഞാലിക്കുട്ടിയുടെ തീരുമാനം സംസ്ഥാനത്ത് ഭരണം ലഭിക്കുമെന്ന ഉറച്ച പ്രതീക്ഷയിലായിരുന്നു പ്രവര്‍ത്തകര്‍ മനസ്സില്ലാ മനസ്സോടെ ഉള്‍ക്കൊണ്ടത്. ഭരണപക്ഷത്ത് നില്‍ക്കുമ്പോഴാണ് ഇതിന് മുമ്പുള്ള വലിയ തിരിച്ചടികളുണ്ടായിട്ടുള്ളത്. എന്നാലിക്കുറി പ്രതിപക്ഷത്തായിരിക്കുമ്പോഴുള്ള തിരിച്ചടി ഇരട്ടി പ്രഹരമാണ്.പി.കെ. കുഞ്ഞാലിക്കുട്ടി രാജിവെച്ച ഒഴിവിലേക്ക് നടന്ന മലപ്പുറം ലോക്‌സഭാ ഉപതിരഞ്ഞെടുപ്പില്‍ ലീഗിന്റെ ഭൂരിപക്ഷം ഗണ്യമായി കുറഞ്ഞത് ജനങ്ങളുടെ പ്രതിഷേധമാണ് പ്രതിഫലിക്കുന്നതെന്ന് പ്രവര്‍ത്തകര്‍ ചൂണ്ടിക്കാട്ടുന്നു.

ബി.ജെ.പിക്കെതിരായ പോരാട്ടത്തില്‍ മുന്നില്‍ നില്‍ക്കുന്നത് ഇടതുപക്ഷമാണെന്ന പ്രതീതിക്ക് കുഞ്ഞാലിക്കുട്ടിയുടെ രാജി ആക്കം കൂട്ടിയെന്നും പ്രവര്‍ത്തകര്‍ പറയുന്നു.മലപ്പുറത്ത് സീറ്റുകളൊന്നും നഷ്ടപ്പെട്ടില്ലെങ്കിലും പി.കെ. കുഞ്ഞാലിക്കുട്ടിയടക്കം പലരുടേയും ഭൂരിപക്ഷം കുറഞ്ഞിട്ടുണ്ട്.എന്നാല്‍ യു.ഡി.എഫിന് അധികാരത്തിന്റെ ഏഴയലത്ത് പോലും എത്താന്‍ കഴിയാതിരുന്നതോടെ അന്ന് അടക്കിപിടിച്ചിരുന്ന അതൃപ്തി ഇപ്പോള്‍ പൊട്ടിത്തെറിയുടെ വക്കിലെത്തിയിരിക്കുന്നു. പി.കെ. കുഞ്ഞാലിക്കുട്ടിയുടെ അധികാരമോഹം യു.ഡി.എഫിന്റെ തോല്‍വിയില്‍ ഒരു ഘടകമായെന്നാണ് ഒരു വിഭാഗം അണികള്‍ സാമൂഹികമാധ്യമങ്ങളിലൂടെ ഉയര്‍ത്തുന്നത്.

യു.ഡി.എഫില്‍ കോണ്‍ഗ്രസ് അടക്കമുള്ള ഘടകകക്ഷികളെക്കാള്‍ ഭേദപ്പെട്ട പ്രകടനം കാഴ്ചവെക്കാനായെങ്കിലും 15 വര്‍ഷത്തിന് ശേഷം മുസ്ലിം ലീഗിനുണ്ടാകുന്ന ഏറ്റവും വലിയ തിരിച്ചടിയാണ് ഇത്തവണത്തേത്.1,14,615 വോട്ടുകള്‍ക്കാണ് അബ്ദുസമദ് സമാദാനി മലപ്പുറത്ത് ജയിച്ചത്. 2019-ലെ പൊതു തിരഞ്ഞെടുപ്പില്‍ 2,60,153 വോട്ടിന്റെ ഭൂരിപക്ഷം ഇവിടെ ലീഗിനുണ്ടായിരുന്നു. ഇ. അഹമ്മദിന്റെ നിര്യാണത്തെ തുടര്‍ന്ന് 2017-ല്‍ നടന്ന ഉപതിരഞ്ഞെടുപ്പില്‍ 1,71,023 വോട്ടിന്റെ ഭൂരിപക്ഷം പി.കെ. കുഞ്ഞാലിക്കുട്ടിക്ക് ഉണ്ടായിരുന്നു.

പി.കെ. കുഞ്ഞാലിക്കുട്ടി ലോക്‌സഭാ അംഗത്വം രാജിവെച്ചത് ബി.ജെ.പിക്കെതിരായി പാര്‍ട്ടിയും മുന്നണിയും നടത്തുന്ന പ്രചാരണങ്ങളെ ദുര്‍ബലപ്പെടുത്തി. മോദി സര്‍ക്കാരിന്റെ ഫാസിസ്റ്റ് നടപടികള്‍ക്കെതിരെ പ്രതിപക്ഷത്തിന്റെ നാവായി മാറുമെന്ന് പ്രഖ്യാപിച്ചായിരുന്നു കുഞ്ഞാലിക്കുട്ടി ഇ. അഹമ്മദിന്റെ വിയോഗത്തില്‍ ലോക്‌സഭയിലേക്ക് വണ്ടി കയറിയത്. എന്നാല്‍ സുപ്രധാന ബില്ലുകളിലടക്കം അദ്ദേഹത്തിന്റെ അസാന്നിധ്യം വലിയ ചര്‍ച്ചയും വിവാദവുമായിരുന്നു. ഇതെല്ലാം വീണ്ടും ഉയര്‍ത്തിക്കാട്ടുകയാണ് പ്രവര്‍ത്തകര്‍.

തിരുവനന്തപുരം: സംസ്ഥാനത്ത് യുഡിഎഫും ബിജെപിയും തമ്മില്‍ വോട്ട് കച്ചവടം നടന്നതായി ആരോപിച്ച്‌ മുഖ്യമന്ത്രി പിണറായി വിജയന്‍. കൗണ്ടിംഗിന് മുന്‍പ് വരെ തങ്ങളിവിടെ ജയിക്കും എന്ന വലിയ ആത്മവിശ്വാസം കാണിക്കുന്ന യുഡിഎഫിനെയാണ് കണ്ടത്. ഈ ആത്മവിശ്വാസം ചില കച്ചവട താല്‍പര്യം കൊണ്ടാണ് അവര്‍ക്കുണ്ടായത്. ബിജെപി വോട്ടുകള്‍ നല്ലരീതിയില്‍ ഈ കച്ചവടത്തിലൂടെ യുഡിഎഫിന് വാങ്ങാനായെന്ന് മുഖ്യമന്ത്രി പറഞ്ഞു.

ബിജെപി അടിവച്ച്‌ മുന്നേറുന്നു എന്നാണ് അവര്‍ അവകാശപ്പെടുന്നത്. അതിനായി നല്ല ശ്രമവും നടത്തുകയുണ്ടായി. അഖിലേന്ത്യാ നേതാക്കള്‍ സംസ്ഥാനത്തെത്തി പ്രവര്‍ത്തനം നടത്തുകയും ധാരാളം പണവും ചിലവഴിച്ചു. എന്നിട്ടും ഫലം വന്നപ്പോള്‍ 140ല്‍ 90 മണ്ഡലങ്ങളില്‍ ബിജെപിയ്‌ക്ക് വോട്ട് കുറഞ്ഞു. 2016ലെ അനുസരിച്ച്‌ വോട്ട് വര്‍ദ്ധന ഏത് പാര്‍ട്ടിക്കും ലഭിക്കേണ്ടതാണ്. എന്നാല്‍ ഇത്ര പ്രവര്‍ത്തനം നടത്തിയിട്ടും ശക്തി പ്രാപിച്ചെന്ന് പറഞ്ഞവര്‍‌ക്ക് അത് യാഥാ‌ര്‍ത്ഥ്യത്തില്‍ കൊണ്ടുവരാന്‍ കഴിഞ്ഞില്ലെന്ന് തിരുവനന്തപുരത്ത് നടന്ന മീ‌റ്റ് ദി പ്രസില്‍ മുഖ്യമന്ത്രി പറഞ്ഞു.

സംസ്ഥാനത്ത് പുറമേ കാണുന്നതിലും വലിയ വോട്ട് കച്ചവടം നടന്നു. ചിലയിടത്തെങ്കിലും ബിജെപിയെ ജനം കൈവെടിഞ്ഞു എന്ന സൂചന ലഭിച്ചതായും മുഖ്യമന്ത്രി പറഞ്ഞു. വോട്ട് കുറഞ്ഞ മണ്ഡലങ്ങള്‍ സംസ്ഥാനമാകെ ഉണ്ട്. വിവിധ ജില്ലകളില്‍ വ്യാപകമായ കുറവുണ്ടായെന്ന് മുഖ്യമന്ത്രി അഭിപ്രായപ്പെട്ടു. 2016ലെ തിരഞ്ഞെടുപ്പില്‍ 30 ലക്ഷത്തിലധികം വോട്ടുകള്‍ ലഭിച്ച ബിജെപിയ്‌ക്ക് ഈ തിരഞ്ഞെടുപ്പില്‍ നാലര ലക്ഷത്തോളം വോട്ടുകള്‍ കുറഞ്ഞു.

കുണ്ടറയിലും പെരുമ്ബാവൂരിലും വോട്ട് കച്ചവടം നടന്നു. തൃപ്പൂണിത്തുറയില്‍ 900 വോട്ടിന്റെ ഭൂരിപക്ഷത്തിലാണ് യുഡിഎഫ് ജയിച്ചത്. ഇവിടെ 6037 വോട്ടിന്റെ കുറവ് ബിജെപിയില്‍ നിന്നുണ്ടായി. വോട്ടുകച്ചവടം കാരണമാണ് ചിലയിടത്ത് യുഡിഎഫ് ജയിച്ചതെന്നും ചിലയിടത്ത് എല്‍‌ഡിഎഫ് തോ‌റ്റതെന്നും മുഖ്യമന്ത്രി പറഞ്ഞു. ചാലക്കുടി, കോവളം, പാലാ, കടുത്തുരുത്തി മണ്ഡലങ്ങളില്‍ യുഡിഎഫ് ജയിച്ചതിന് കാരണം ബിജെപിയുമായുള‌ള വോട്ട് കച്ചവടമാണ്. വാമനപുരത്ത് 8000ലധികം വോട്ടുകളാണ് ബിജെപിക്ക് മറിഞ്ഞത്. വോട്ട് കച്ചവടം നടന്നില്ലായിരുന്നെങ്കില്‍ യുഡിഎഫിന്റെ പതനം കൂടിയേനെയെന്നും മുഖ്യമന്ത്രി അഭിപ്രായപ്പെട്ടു.

ആലപ്പുഴ: എൻ എസ് എസ് ജനറൽ സെക്രട്ടറി സുകുമാരൻ നായരുടെ മകൾ ഡോ സുജാത എം ജി സർവകലാശാല സിൻഡിക്കേറ്റ് മെമ്പർ സ്ഥാനം രാജിവച്ചു. കഴിഞ്ഞ ഏഴ് വർഷമായി സുജാത സിൻഡിക്കേറ്റ് മെമ്പർ സ്ഥാനത്ത് പ്രവർത്തിക്കുകയാണ്. ആദ്യം യു ഡി എഫും പിന്നീട് എൽ ഡി എഫുമാണ് സുജാതയെ നോമിനേറ്റ് ചെയ്‌തത്.മൂന്ന് വർഷം ഇനിയും കാലാവധിയുണ്ടെന്നും എന്നാൽ വ്യക്തിപരമായ കാരണങ്ങളാൽ സുജാത രാജിവയ്‌ക്കുകയാണെന്നും സുകുമാരൻ നായർ വിശദീകരിച്ചു.യോഗ്യതയുടെ അടിസ്ഥാനത്തിലാണ് നോമിനേറ്റ് ചെയ്‌തതെന്നും സുകുമാരൻ നായർ വ്യക്തമാക്കി.

താനോ മകളോ സ്ഥാനമാനങ്ങൾക്ക് വേണ്ടി ആരേയും സമീപിച്ചിട്ടില്ല. എസ് എൻ ഡി പി യോഗം ജനറൽ സെക്രട്ടറി വെളളാപ്പളളി നടേശന്റെ വിമർശനത്തിന് പിന്നാലെയാണ് ഡോ സുജാതയുടെ രാജി. മകൾക്ക് സിൻഡിക്കേറ്റ് സ്ഥാനം കൊടുത്തിട്ടും എൻ എസ് എസ് ഇടതുപക്ഷത്തിന്റെ നെഞ്ചത്ത് കുത്തിയെന്നായിരുന്നു വെളളാപ്പളളി കുറ്റപ്പെടുത്തിയത്.അതേസമയം, ആരോപണം അടിസ്ഥാനരഹിതമാണെന്നാണ് സുകുമാരൻ നായർ പറഞ്ഞു. മകൾ രാജിവച്ച വിവരം അദ്ദേഹം തന്നെയാണ് മാദ്ധ്യമങ്ങളെ അറിയിച്ചത്.

പാലക്കാട് : ഇ ശ്രീധരന്‍ – രാജ്യത്തിന് അഭിമാനിക്കാവുന്ന നിരവധി പദ്ധതികളില്‍ എഴുതിച്ചേര്‍ത്ത പേരായിരുന്നു. എന്നാല്‍ നിര്‍ഭാഗ്യം കൊണ്ട് തിരഞ്ഞെടുപ്പ് ഗോദയില്‍ പരാജയപ്പെടാനായിരുന്നു അദ്ദേഹത്തിന്റെ വിധി. അവസാന റൗണ്ട് വരെ പ്രതീക്ഷ വച്ച് പുലര്‍ത്തിയിരുന്ന അദ്ദേഹം അവസാനം ഷാഫി പറമ്പിലിനോട് പരാജയപ്പെടുകയായിരുന്നു. രാജ്യത്തിന്റെ വിവിധ ഭാഗങ്ങളിലായി അദ്ദേഹം മൂന്ന് സുപ്രധാന പദ്ധതികളില്‍ പ്രവര്‍ത്തിച്ചുകൊണ്ടിരിക്കുകയാണ് ഇപ്പോള്‍. കാശ്മീരിലെ ദാല്‍ തടാകം ശുദ്ധീകരിക്കുന്ന പ്രവര്‍ത്തിയാണ് ചെയ്തുകൊണ്ടിരിക്കുന്നതില്‍ പ്രധാനം. മൂവായിരം കോടിയോളം ചെലവ് പ്രതീക്ഷിക്കുന്ന ശുദ്ധീകരണ പ്രവര്‍ത്തനങ്ങള്‍ക്ക് മേല്‍നോട്ടം വഹിക്കാന്‍ ശ്രീധരനെ തിരഞ്ഞെടുത്തത് തന്നെ അദ്ദേഹത്തില്‍ കഴിവില്‍ കോടതിക്കുള്ള പ്രതീക്ഷമൂലമാണ്.ന്യൂഡല്‍ഹി ആസ്ഥാനമായ ‘ദി ഫൗണ്ടേഷന്‍ ഫോര്‍ റസ്റ്ററേഷന്‍ ഓഫ് നാഷനല്‍ വാല്യൂസ്’ എന്ന സംഘടനയാണ് ശ്രീധരന്റെ അടുത്ത പ്രവര്‍ത്തന മേഖല. ഈ പ്രസ്ഥാനത്തിന്റെ സ്ഥാപക പ്രസിഡന്റാണ് അദ്ദേഹം. മെട്രോമാനായി ഡല്‍ഹിയില്‍ തുടരുന്ന കാലത്താണ് ഇത്തരമൊരു സംഘടനയെകുറിച്ച് ശ്രീധരന്‍ ആലോചിക്കുന്നത്.കേരളത്തില്‍ ഫ്രണ്ട്‌സ് ഓഫ് ഭാരതപ്പുഴ’ എന്ന സംഘടനയുമായി ചേര്‍ന്നാണത്. ഭാരതപ്പുഴയെ പുനരുദ്ധാരണം നടത്തുക എന്നതാണ് ആ ദൗത്യം. ഈ മൂന്ന് ചുമതലകളും പൂര്‍ത്തീകരിക്കാനുള്ള ജോലിത്തിരക്കിലാണ് അദ്ദേഹം.