ഞായറാഴ്ച വൈകിട്ടോടെ തന്റെ രാഷ്ടീയം വ്യക്തമാക്കുമെന്ന് പറഞ്ഞ് ആസിഫ് അലി ഇട്ട ഫേസ്ബുക്ക് പോസ്റ്റ് പ്രേക്ഷക ശ്രദ്ധ ആകര്‍ഷിച്ചിരുന്നു. കൊല്ലം മണ്ഡലത്തിലെ എല്‍ഡിഎഫ് സ്ഥാനാര്‍ഥി എം മുകേഷിന് വോട്ടഭ്യര്‍ത്ഥിച്ച് ചലച്ചിത്ര താരം ആസിഫ് അലി റോഡ് ഷോയില്‍ പങ്കെടുത്തതും ഏറെ മാധ്യമശ്രദ്ധ നേടിയിരുന്നു. അതിനു പിന്നാലെയായിരുന്നു ആസിഫിന്റെ ഫേസ്ബുക്ക് പോസ്റ്റ്.വൈകിട്ട് അഞ്ച് മണിയോടെ ആസിഫിന്റെ പേജില്‍ പ്രത്യക്ഷപ്പെട്ട പോസ്റ്റ് ഇങ്ങനെയായിരുന്നു. രാഷ്ട്രീയമായാലും, കുടുംബമായാലും, വിപ്ലവമായാലും, പ്രണയമായാലും ഞങ്ങള്‍ ഡിവൈഎഫ്‌ഐ കാര്‍ക്ക് ഒരൊറ്റ നയം ഉള്ളു. ആസിഫും നടി രജിഷയും നില്‍ക്കുന്ന ചിത്രമടങ്ങിയ എല്ലാം ശരിയാകും എന്ന ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പങ്കുവെച്ചുകൊണ്ടായിരുന്നു ആസിഫ് ഇത് കുറിച്ചത്. യുവാക്കള്‍ക്കിടയിലെ രാഷ്ട്രീയ പ്രവര്‍ത്തനവും കുടുംബവും പ്രണയവുമൊക്കെയാണ് ചിത്രത്തിലുള്ളതെന്നാണ് സൂചന. സെന്‍ട്രല്‍ പിക്ടചേഴ്‌സിന്റെ ബാനറില്‍ ജിബു ജേക്കബ് സംവിധാനം ചെയ്യുന്ന ചിത്രമാണിത്.
2021-04-05