അഴിമതിക്ക് പൂട്ട്; വൃത്തിഹീനമായ കടകള്‍ പൂട്ടിയാല്‍ തുറക്കാന്‍ ഇനി സംസ്ഥാന ഭക്ഷ്യസുരക്ഷാ കമ്മീഷണറുടെ അനുമതി വേണം
തിരുവനന്തപുരം: അഴിമതി കുറക്കാന്‍ പുതിയ നീക്കം. ഭക്ഷ്യസുരക്ഷാ വിഭാഗം നടത്തുന്ന പരിശോധനയില്‍ താല്‍ക്കാലികമായി അടച്ച കടകള്‍ തുറക്കാന്‍ ഇനി സംസ്ഥാന ഭക്ഷ്യസുരക്ഷാ കമ്മീഷണറുടെ അനുമതി വേണം. സംസ്ഥാന വ്യാപകമായി ഷവര്‍മ കടകളില്‍ ഉള്‍പ്പെടെ നിയമലംഘനം ശ്രദ്ധയില്‍പ്പെട്ട സാഹചര്യത്തിലാണ് തീരുമാനം.
വൃത്തിഹീനമായ സാഹചര്യത്തില്‍ ഭക്ഷണം തയ്യാറാക്കുക, പഴകിയതും കേടായതുമായ ഇറച്ചിയും മീനും ഉപയോഗിക്കുക തുടങ്ങിയ ഗുരുതര നിയമലംഘനങ്ങളാണ് കഴിഞ്ഞ ദിവസങ്ങളില്‍ ഭക്ഷ്യസുരക്ഷാ വിഭാഗം പരിശോധനയില്‍ കണ്ടെത്തിയത്. ശക്തമായ നടപടി എടുക്കാന്‍ ആരോഗ്യമന്ത്രി വീണാ ജോര്‍ജ് നിര്‍ദ്ദേശിച്ചതോടെ കമ്മീഷണര്‍ ഇടപെടല്‍ നടത്തുകയും, കടകള്‍ പൂട്ടുകയുമായിരുന്നു.
പ്രശ്‌നം പരിഹരിച്ച ശേഷം കടയുടമ ബന്ധപ്പെട്ട ഉദ്യോഗസ്ഥര്‍ക്ക് അപേക്ഷ നല്‍കുമ്പോള്‍ നേരിട്ട് പരിശോധന നടത്തിയാണ് തുടര്‍പ്രവര്‍ത്തനത്തിന് അനുമതി നല്‍കുന്നത്. എന്നാല്‍, രാഷ്ട്രീയ സ്വാധീനങ്ങളെ തുടര്‍ന്ന് ആവശ്യമായ നടപടികളെടുക്കാത്ത സ്ഥാപനങ്ങള്‍ക്കും പ്രവര്‍ത്തനാനുമതി കൊടുക്കാറുണ്ട്. ഇത്തരം സാഹചര്യങ്ങള്‍ക്കാണ് ഇനി പൂട്ടു വീഴുക.
